LECCIÓN 21
¿Ndixi kéena jaá kástu̱ʼunna saʼa̱ noticia va̱ʼa?
Sa̱yati ñúʼúvá, kuchúun Jeová Reino na jaá jándíʼina nuu̱ tu̱ndóʼó ndóʼo na̱yivi. Ta ¡¿ndiva̱ʼa o̱kástu̱ʼunvíyó xíʼín na̱yivi saʼa̱ noticia va̱ʼa yóʼo?! Jesús ni̱saʼnda chúun nuu̱ ndijaá na̱ ndíko̱ña ña̱ ná kástu̱ʼunna nuu̱ inííkúú ñuyíví saʼa̱ noticia va̱ʼa yóʼo (Mateo 28:19, 20, TNM). ¿Ndíki̱án kée na̱ testigo Jeová jaá naʼa̱na ña̱ xinijo̱ʼona chúun ni̱saʼnda Jesús?
1. ¿Ndixi xino̱ko̱o kivi̱ víti ña̱ va̱xi nuu̱ Mateo 24:14?
Jesús ni̱kachina ña̱: “Noticia va̱ʼa saʼa̱ Reino Ndio̱s kuʼu̱nna kástu̱ʼunna inííkúú ñuyíví” (Mateo 24:14, TNM). Nduʼu̱ na̱ testigo Jeová kujii̱ ndiva̱ʼo inindu̱ kéendu̱ chúun ndayaʼvi yóʼo. Kástu̱ʼunndu̱ saʼa̱ noticia va̱ʼa yóʼo inííkúú ñuyíví nuu̱ 1.000 chááka̱ yúʼu̱. Xiniñúʼún ña̱ ndukundeé ndiva̱ʼondu̱ jaá ná koo yíko̱ chúun nuu̱ kuaʼa̱nndu̱ keendu̱ ndijaá chúun ndayaʼvi yóʼo. Tá ná o̱chindeéña mií Ndio̱s Jeová ni o̱kandeé miívándu̱ keendu̱ chúun yóʼo.
2. ¿Ndíki̱án kéendu̱ jaá kuu kástu̱ʼunndu̱ saʼa̱ Tu̱ʼun Ndio̱s xíʼín ndijaá na̱yivi?
Ndíʼi inindu̱ kástu̱ʼunndu̱ saʼa̱ Tu̱ʼun Ndio̱s ndeí kúú miívá nuu̱ naniʼi̱ndu̱ na̱yivi. Tátu̱ʼun, ni̱sakee na̱ cristiano ni̱sandoyi siglo kúú nu̱ú, kuaʼa̱nndu̱ “iin rá iin veʼe” (Hechos 5:42). Ña̱yóʼo chindeéña jaá yíko̱ kuchúunndu̱ ta kuu saa̱ndu̱ kástu̱ʼunndu̱ saʼa̱ Tu̱ʼun Ndio̱s nuu̱ millón na̱yivi kuia̱ tá kuia̱. Jo, kuaʼa̱ íchi̱ ko̱ na̱yivi ndóyi veʼena, sa̱ʼá ña̱yóʼo kástu̱ʼunndu̱ saʼa̱ Tu̱ʼun Ndio̱s sa̱jíin sa̱jíin xían nuu̱ xíkanuu na̱yivi. Jaá kuití nandukúndu̱ ndeí kúú miívá kástu̱ʼunndu̱ xíʼín na̱yivi saʼa̱ Jeová ta saʼa̱ ña̱ va̱xina keena chínuu̱.
3. ¿Ndáyoo kúú na̱ saʼndá Ndio̱s chúun nuu̱ ña̱ ná kuʼu̱nna kástu̱ʼunna saʼa̱ noticia va̱ʼa?
Ndijaá táʼa̱n na̱ kúú cristiano ndaa̱ ndísa kánian kuʼu̱nna kástu̱ʼunna saʼa̱ noticia va̱ʼa. Nduʼu̱ na̱ testigo Jeová ni̱sisa ndíʼi inindu̱ kéendu̱ chúun yóʼo. Kástu̱ʼunndu̱ saʼa̱ Tu̱ʼun Ndio̱s tátu̱ʼun ki̱ʼa kuu kee iin ta iinndu̱ jáchi̱ xíni̱ndu̱ ña̱ kuaʼa̱ na̱yivi kuu niʼi̱na ña̱ ka̱kuna (kaʼviní 1 Timoteo 4:16, TNM). Ko̱ iin miívá chíya̱ʼvindu̱ jaá kéendu̱ chúun yóʼo, jáchi̱ Tu̱ʼun Ndio̱s káchiña: “Ko̱ ni̱kiʼinya̱ʼvina nuu̱ndó ta o̱sa̱kiʼinya̱ʼvindó saʼa̱ ña̱ kéendó” (Mateo 10:7, 8, TNM). Va̱árá, o̱ju̱ú ndiʼi na̱yivi kúni̱ kunijo̱ʼoña, jo ko̱ jándákoondu̱ ña̱ kástu̱ʼunndu̱ saʼa̱ Jeová jáchi̱ ña̱yóʼo kúú iin ña̱ kéendu̱ jaá kekáʼnondu̱ Jeová ta xíʼondu̱ ña̱ kujii̱ inina.
NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO
Ná kande̱ʼéyó ndijaá ña̱ kéendu̱ na̱ testigo Jeová inííkúú ñuyíví jaá kuu kástu̱ʼunndu̱ saʼa̱ Tu̱ʼun Ndio̱s ta janí saʼa̱ ndixi chindeéña mií Ndio̱s Jeová.
Kástu̱ʼunndu̱ saʼa̱ Tu̱ʼun Ndio̱s inííkúú ñuyíví: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Ndukundeéndu̱ jaá ndiʼi na̱yivi ná kuu kunijo̱ʼona saʼa̱ Tu̱ʼun Ndio̱s
Nduʼu̱ na̱ testigo Jeová ni̱sisa ndukundeéndu̱ jaá kuu kástu̱ʼunndu̱ noticia va̱ʼa xíʼín ndiʼi na̱yivi ndeí kúú miívá nuu̱ ndóyina. Kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:
¿Ndiku̱ú ña̱ nátaʼan chááka̱ ininí xiníní tátu̱ʼun ki̱ʼo kéendu̱ na̱ testigo Jeová jaá kástu̱ʼunndu̱ saʼa̱ Tu̱ʼun Ndio̱s?
Kaʼvindó Mateo 22:39 xíʼín Romanos 10:13-15, TNM ta kanatúʼúnndó saʼa̱ ña̱ va̱xi yóʼo:
¿Ndixi naʼa̱ ña̱ kástu̱ʼunndu̱ saʼa̱ Tu̱ʼun Ndio̱s ña̱ kíʼvi̱ ndísa inindu̱ saʼa̱ na̱ ñani táʼanndu̱?
¿Ndixi ndéʼé Jeová na̱ kástu̱ʼun saʼa̱ noticia va̱ʼa? (Kande̱ʼéndó versículo 15).
5. Kuchúunndu̱ xíʼín Ndio̱s
Kuaʼa̱ ndiva̱ʼo ña̱ ndóʼo na̱yivi naʼa̱ táʼya ña̱ mií Jeová kúú na̱ chindeéña jaá kuu kástu̱ʼunndu̱ saʼa̱ Tu̱ʼunna. Ná kande̱ʼéyó ña̱ ni̱kuu Nueva Zelanda. Tá sa̱ni íni iin kivi̱, iin Testigo naní Paul ni̱kiʼinra kuaʼa̱nra ka̱stu̱ʼunra saʼa̱ Tu̱ʼun Ndio̱s veʼe ta veʼe ta ni̱naniʼi̱ra iin ñáʼa̱. Ñáyóʼo ni̱kachiñá ña̱ mina̱ʼa kivi̱ jaá, ni̱xika̱taʼvi̱ñá nuu̱ Ndio̱s ta ni̱kuchúunñá kivi̱na, Jeová, ta ni̱xika̱ñá nuu̱ Jeová ña̱ ná chindaʼána iin na̱yivi saa̱ chindeéña jaá kundaa̱ iniñá saʼa̱na. “Tá ni̱ya̱ʼa oni̱ká hora—káchi Paul—, yuʼu̱ sa̱nakaa̱vái kani ndáʼa̱i yéʼéñá”.
Kaʼvindó 1 Corintios 3:9 ta kanatúʼúnndó saʼa̱ ña̱ va̱xi yóʼo:
¿Ndixi naʼa̱ ña̱ ni̱ndoʼo ñáʼa̱ yóʼo ña̱ mií Jeová kúú na̱ kuaʼa̱n nu̱ú tá kuaʼa̱nndu̱ kástu̱ʼunndu̱ saʼa̱ Tu̱ʼun Ndio̱s?
Kaʼvindó Hechos 1:8, TNM ta kanatúʼúnndó saʼa̱ ña̱ va̱xi yóʼo:
¿Ndiva̱ʼa xiniñúʼúnyó ña̱ mií Jeová ná chindeéña tá kuaʼa̱nyó kástu̱ʼunyó saʼa̱ noticia va̱ʼa?
¿Á náʼání?
Nuu̱ nátakandu̱ tein semana jánaʼa̱na nuu̱ndu̱ tátu̱ʼun ki̱ʼo keendu̱ jaá kati̱ʼanndu̱ káʼa̱nndu̱ saʼa̱ Tu̱ʼun Ndio̱s. Tá sa̱ ni̱saʼa̱nní reunión yóʼo, ¿ndixi káʼánní saʼa̱ tátu̱ʼun ki̱ʼo jánaʼa̱na nuu̱ndu̱?
6. Tá kástu̱ʼunndu̱ saʼa̱ noticia va̱ʼa naʼa̱ndu̱ ña̱ xinijo̱ʼondu̱ iin chúun saʼndá Ndio̱s
Tein siglo kúú nu̱ú, java na̱yivi ni̱sakandajína na̱ ni̱sandíko̱ Jesús ta ni̱kuni̱na kajína nuu̱ na̱ cristiano ña̱ káʼa̱nna saʼa̱ Tu̱ʼun Ndio̱s. Na̱ cristiano kúú nu̱ú ni̱keyíko̱na jaá ni̱kuu ni̱saka̱ʼa̱nna saʼa̱ Tu̱ʼun Ndio̱s “Ta kéyíko̱i nuu̱ ta̱ néʼe chúun saʼa̱ noticia va̱ʼa” (Filipenses 1:7, TNM). Kivi̱ víti, nduʼu̱ na̱ testigo Jeová janí kéendu̱ ña̱yóʼo.a
Kaʼvindó Hechos 5:27-42, TNM ta kanatúʼúnndó saʼa̱ ña̱ va̱xi yóʼo:
¿Ndiva̱ʼa o̱jándákooyó ña̱ kástu̱ʼunyó saʼa̱ Tu̱ʼun Ndio̱s? (Kande̱ʼéndó versículo 29, 38 xíʼín 39).
ÑA̱ NDAKATU̱ʼÚN JAVAKA̱NA: “¿Ndiva̱ʼa kuaʼa̱n na̱ testigo Jeová veʼe ta veʼe?”.
¿Ndixi kachi miíní?
ÑA̱ NI̱KATI̱ʼAYÓ
Jesús ni̱saʼnda chúun nuu̱ na̱ ndíko̱ña ña̱ ná kástu̱ʼunna saʼa̱ noticia va̱ʼa inííkúú ñuyíví. Mií Jeová kúú na̱ chindeé na̱ ñuuna jaá kandeéna kéena chúun yóʼo.
¿Á naku̱ʼun inión?
¿Ndíki̱án kúú ña̱ kéena jaá kástu̱ʼunna saʼa̱ noticia va̱ʼa inííkúú ñuyíví?
¿Ndixi naʼa̱ ña̱ kástu̱ʼunndu̱ saʼa̱ noticia va̱ʼa ña̱ kíʼvi̱ inindu̱ saʼa̱ na̱ ñani táʼanndu̱?
¿Á káʼán miíní ña̱ kastu̱ʼunyó saʼa̱ noticia va̱ʼa kuu ki̱ʼoña ña̱ kujii̱ iniyó? Ta ¿ndiva̱ʼa?
KUU NANDUKÚNÍ JAVAKA̱ ÑA̱ʼA
Kande̱ʼéní ndixi kée na̱ testigo Jeová jaá kuu kástu̱ʼunna saʼa̱ noticia va̱ʼa nuu̱ ió ñuu náʼno.
Kástu̱ʼunna saʼa̱ noticia va̱ʼa nuu̱ xíkanuu kuaʼa̱ na̱yivi ñuu naní París (5:11)
¿Ndixi kée na̱ testigo Jeová jaá kuu káʼa̱nna xíʼín na̱yivi na̱ xino va̱xi nuu̱ tu̱ndóʼó ió ñuuna?
Kunijo̱ʼoní tátu̱ʼun ñúchí kúú vida iin na̱ kuchúun ndiʼi tiempo nuu̱ Ndio̱s.
Ni iin miívá ña̱ʼa ko̱kíʼin táʼan xíʼín ña̱ ni̱ndoʼoi (6:29)
Kande̱ʼéní saʼa̱ java ña̱ʼa ni̱kandeéndu̱ nuu̱ ta̱ néʼe chúun tá ni̱keyíko̱ndu̱ ña̱ kástu̱ʼunndu̱ saʼa̱ noticia va̱ʼa.
a Ndio̱s kúú na̱ saʼndá chúun nuu̱ndu̱ ña̱ kástu̱ʼundu̱ saʼa̱ noticia va̱ʼa. Sa̱ʼá ña̱yóʼo, nduʼu̱ na̱ testigo Jeová ko̱ xiniñúʼúnndu̱ permiso ta̱ néʼe chúun jaá kuu kástu̱ʼunndu̱ saʼa̱ noticia va̱ʼa.