ÑA̱ SÁNAʼA̱ ÑA̱ 3

Siñiñúʼú yó kundaa̱ va̱ʼa iñi yó ñixi kú ndióxi̱

Siñiñúʼú yó kundaa̱ va̱ʼa iñi yó ñixi kú Ndióxi̱ já kaneʼe táʼan va̱ʼa yó síʼín rá. Na̱yivi na̱ néʼe táʼan va̱ʼa síʼín yó, síñi̱ na̱ ñixi nañí yó tsa kaʼa̱n na̱ kivi̱ yó, ¿á suú nda̱a̱ ña̱ saá kíá? Ndióxi̱ kúñi̱ ra̱ ña̱ ná kundaa̱ iñi yó kivi̱ ra̱ tsa ná kuchún yó ña̱. Kivi̱ Ndióxi̱ kú Jeo­vá (Salmo 83:​18; Mateo 6:9). Siñiñúʼú yó kundaa̱ iñi yó ña kú ña̱ sitaʼan iñi ra tsa ña̱ ko̱ sitaʼan iñi ra, ntse na̱ kú na̱ ko̱ kúñi̱ kaneʼe táʼan va̱ʼa síʼín Ndióxi̱ tsa na̱ néʼe táʼan va̱ʼa síʼín rá. ­Naʼá vá sé kundaa̱ iñi yó ñixi kú iin na̱yivi, Tu̱ʼun Ndióxi̱ kachíá ña̱ já ná kundaa̱ iñi yó ñixi kú Jeo­vá siñiñúʼú yó ntsi̱ʼi iñi yó sákuáʼa yó Tu̱ʼun Ndióxi̱ (Efesios 5:​15, 16).

Na̱ néʼe táʼan va̱ʼa síʼín Ndióxi̱ kée ná ña̱ kúñi̱ ra̱. Ndakañi iñi ní siaʼa̱ ña̱yóʼo. Tú ko̱ váʼa kúú iñi ní síʼín na̱ néʼe táʼan va̱ʼa síʼín ní tsa kée ní ña̱ ko̱ sitaʼan iñi na, ¿á kaneʼe táʼan va̱ʼa na síʼín ní? Ko̱ó. Jaá ni, tú kúñi̱ yó kaneʼe táʼan va̱ʼa yó síʼín Ndióxi̱, siñiñúʼú yó kee yó ña̱ sitaʼan iñi ra (Juan 4:​24).

E̱suú ntsiʼi religión chindéá miío já kaneʼe táʼan va̱ʼa yó síʼín Ndióxi̱. Jesús, tsa̱ néʼe táʼan va̱ʼa cháá ga̱ síʼín Ndióxi̱, ñi̱ kaʼa̱n ra̱ siaʼa̱ uvi̱ íchi̱. Iin íchi̱ ña̱ ntsíka̱ nuu̱ kuaʼa̱n kuaʼa̱ ntsiva̱ʼa na̱yivi. Na̱yivi na̱ kuaʼa̱n íchi̱ yóʼo naá ná inteéva. Tsa inka̱ íchi̱ ña̱ tsuu̱ á ña̱ kuíi̱n cháá ntsiva̱ʼa na̱yivi kuaʼa̱n íchi̱ yóʼo. Tsa na̱yivi na̱ kuaʼa̱n íchi̱ yóʼo kú na̱ kutsaku ntsisaá kivi̱. Ña̱yóʼo kúñi̱a̱ kachíá ña̱ tú kúñi̱ yó kaneʼe táʼan va̱ʼa yó síʼín Ndióxi̱, siñiñúʼú yó kundaa̱ va̱ʼa iñi yó ñixi sitaʼan iñi ra ña̱ keekáʼno yó ra̱ (Mateo 7:​13, 14, NM).