ÑA̱ SÁNAʼA̱ ÑA̱ 10

Ñixi kundaa̱ iñi yó ntse ña̱ kú religión ña̱ ndandaa̱

Tú kúñi̱ yo̱ kaneʼe táʼan va̱ʼa yó síʼín Ndióxi̱, siñiñúʼú yó kuntsiku̱ yo̱ religión ña̱ kúñi̱ Ndióxi̱. Jesús ñi̱ kachi ra ña̱ na̱ “kaja káʼnu [...] Ndióxi̱ [...] xi̱ʼín ndinuʼu ini na” siñiñúʼú ná kee­káʼno na Ndióxi̱ “xi̱ʼín ndinuʼu ini na” ( Juan 4:​23, 24). Na̱yivi na̱ ntsíku̱n religión ña̱ ndandaa̱ kú na̱ kéekáʼno Ndióxi̱ tatún kúñi̱ ra̱ (Efesios 4:​4-6). Tú ntsíku̱n yo̱ religión ña̱ ndandaa̱ kutsaku yó ntsisaá kivi̱, tsa na̱ ntsíku̱n religión ña̱ ko̱ sánaʼa̱ ña̱ nda̱a̱ siaʼa̱ Ndióxi̱ naá ná inteéva (Mateo 7:​13, 14).

Kuvi kundaa̱ iñi yó ntse ña̱ kú religión ña̱ ndandaa̱ tú ná kandeʼe yó ñixi kée na̱yivi na̱ ntsíku̱n religión ña̱ ndandaa̱. Ndióxi̱ Jeo­vá va̱ʼa ntsiva̱ʼa iñi ra, ña̱kán ntsiʼi na̱ kéekáʼno Ndióxi̱ Jeová kánia kukuu na na̱yivi na̱ va̱ʼa iñi. Tatún iin yító kuiʼí va̱ʼa, ntsinuʼu kui̱ʼi va̱ʼa kuitsí kúun nuu̱ to̱, na̱ kúndaa̱ iñi ntse ña̱ kú religión ña̱ ndandaa̱ nduú ná na̱yivi váʼa (Mateo 7:​15-​20).

Na̱ néʼe táʼan va̱ʼa síʼín Ndióxi̱ Jeo­vá iyá tuviñúʼú iñi na nuu̱ Tu̱ʼun Ndióxi̱. Síñi̱ na̱ ña̱ Tu̱ʼun Ndióxi̱ kíá. Tsa si̱aʼá ña̱yóʼo, ntsíku̱n na̱ ña̱ va̱si nua̱, chíndeá na̱ ta yáʼa na iin tu̱ndóʼó, tsa ­kundaa̱ va̱ʼa iñi na ñixi kú Ndióxi̱ (2 Timoteo 3:​16). ­Ndúkúndeé ná kée na ña̱ sánaʼa̱ na̱ siaʼa̱ Tu̱ʼun Ndióxi̱ nuu̱ na̱yivi.

Na̱ néʼe táʼan va̱ʼa síʼín Ndióxi̱ Jeo­vá kúʼvi̱ iñi táʼan na. Jesús ñi̱ naʼa ra ña̱ kuʼvi̱ iñi ra na̱yivi saáchi ñi̱ sa̱náʼa̱ ra̱ nuu̱ na siaʼa̱ Ndióxi̱, tsa ñi̱ sa̱nduva̱ʼa ra na̱ kuʼvi̱. Na̱ ntsíku̱n religión ña̱ ndandaa̱ kuʼvi̱ iñi na na̱yivi. Tatún Jesús, na̱yivi na̱ ntsíku̱n religión ña̱ ndandaa̱ ko̱ kándají ná na̱yivi na̱ kúndaʼví á na̱ kui̱ká. Jesús ñi̱ kachi ra ña̱ na̱yivi kundaa̱ iñi na ntse na̱ kú na̱ ntsíku̱n miírá saáchi kuʼvi̱ iñi táʼan na ( Juan 13:​35).

Na̱ néʼe táʼan va̱ʼa síʼín Ndióxi̱ iyá tuviñúʼú iñi na siaʼa̱ kivi̱ Ra̱: Jeo­vá. Tá iin na̱yivi ko̱ kúñi̱ na̱ kaʼa̱n na̱ kivi̱ yo̱, ¿á kuvi kaneʼe táʼan va̱ʼa yó síʼín ná? E̱kuvi. Tá iyá iin na̱ néʼe táʼan va̱ʼa síʼín yó, kaʼa̱n va̱ʼa yó siaʼa̱ na nuu̱ sava ga̱ na̱yivi. Ña̱kán, na̱ kúñi̱ kaneʼe táʼan va̱ʼa síʼín Ndióxi̱ siñiñúʼú ná kaʼa̱n na̱ kivi̱ Ra tsa sánaʼa̱ na̱ siaʼa̱ Ndióxi̱ nuu̱ na̱yivi. Ña̱yóʼo kú ña̱ kúñi̱ Ndióxi̱ Jeo­vá (Mateo 6:9; Romanos 10:​13, 14).

Tatún Jesús, na̱ néʼe táʼan va̱ʼa síʼín Ndióxi̱ sánaʼa̱ na̱ nuu̱ na̱yivi siaʼa̱ Gobierno Ndióxi̱. Gobierno Ndióxi̱ kíá iin Gobierno ña̱ indakaa̱ indi­ví ña̱ ndasanúchí Ñúʼu̱ ntseʼei̱ yóʼo. Na̱ néʼe táʼan va̱ʼa síʼín Ndióxi̱ sánaʼa̱ na̱ nuu̱ na̱yivi tu̱ʼun va̱ʼa siaʼa̱ Gobierno Ndióxi̱ (Mateo 24:​14).

Na̱ testigo mií Jeo­vá ndúkúndeé ná kaneʼe táʼan va̱ʼa na síʼín Ndióxi̱. Iyá tuviñúʼú iñi na nuu̱ Tuʼún Ndióxi̱ tsa kúʼvi̱ iñi táʼan na. Kaʼa̱n na̱ tsa iyá tuviñúʼú iñi na siaʼa̱ kivi̱ Ndióxi̱ tsa sánaʼa̱ na̱ nuu̱ na̱yivi siaʼa̱ Gobierno Ndióxi̱. Na̱ testigo mií Jeo­vá ntsíku̱n na̱ religión ña̱ ndandaa̱ ña̱ iyá nuu̱ Ñúʼu̱ ntseʼei̱ yóʼo.