LECCIÓN 13
Ndijaá religión ña̱ jánaʼa̱ ña̱to̱ʼón jáyakoña kivi̱ Ndio̱s
Tá Ndio̱s kíʼvi̱ ndiva̱ʼo inina saʼa̱yó ta na̱ ndíta nuu̱ religión káchina ña̱ kéena kuaʼa̱ ña̱ʼa saʼa̱ kivi̱ Ndio̱s ta janí káchina ña̱ kúúna kuendá Ndio̱s, ¿ndiva̱ʼa kuaʼa̱ ndiva̱ʼo ña̱ kini kéena? Jáchi̱ ndijaá na̱yóʼo, kúúna kuendá religión ña̱to̱ʼónvá. Xíʼín ndijaá ña̱to̱ʼón jánaʼa̱na ta kéena, ndijaá na̱ kuendá religión yóʼo jáyakona kivi̱ Ndio̱s. ¿Ndixi kéena ña̱yóʼo? ¿Ndixi kuu ini Ndio̱s saʼa̱ ndijaá ña̱ kini kéena? Ta ¿ndíki̱án kee Ndio̱s xíʼín ndijaá na̱ kée ña̱ kini yóʼo?
1. ¿Ndixi kée na̱ kuendá religión yóʼo jáyakona kivi̱ Ndio̱s xíʼín ña̱ jánaʼa̱na?
Ndijaá religión ña̱ jánaʼa̱ ña̱to̱ʼón ni̱ da̱nkoo na “ña̱ ndaa̱ saꞌa̱ Ndios, ta ni̱ ka̱ndísa na ña̱ to̱ꞌón” (Romanos 1:25). Iin ña̱ kéena kúú, kuaʼa̱ na̱yóʼo ko̱ jánaʼa̱na kivi̱ Ndio̱s nuu̱ na̱yivi. Ta, nuu̱ Tu̱ʼun Ndio̱s káchi ña̱ xiniñúʼún kuchúunyó kivi̱ Ndio̱s (Romanos 10:13, 14, TNM). Java ta̱ ndíta nuu̱ religión káchira ña̱ tá kuu iin tu̱ndóʼó kúúña ña̱ kúni̱ Ndio̱s. Jo ña̱to̱ʼónvá kúú ña̱yóʼo. O̱ju̱ú kua̱chi Ndio̱s kúú ña̱ kuu ndijaá tu̱ndóʼó (kaʼviní Santiago 1:13, TNM). Ndaʼví ndiva̱ʼo kuu iniyó, jáchi̱ xíʼín ña̱to̱ʼón tátu̱ʼun ña̱yóʼo kée jaá kuaʼa̱ na̱yivi kúxíkana nuu̱ Ndio̱s.
2. ¿Ndixi kée na̱ kuendá religión yóʼo jáyakona kivi̱ Ndio̱s xíʼín ndijaá ña̱ kéena?
Na̱ kuendá religión ña̱to̱ʼón yóʼo ko̱ naʼa̱na ña̱ kíʼvi̱ inina saʼa̱ na̱yivi tátu̱ʼun ki̱ʼa kée Jeová. Tu̱ʼun Ndio̱s káchi ña̱ “ndidaá kua̱chi kée na ni̱ xi̱nko̱o nda̱ induú [indiví]” (Apocalipsis 18:5). Na̱ kuendá religión yóʼo sa̱ kuaʼa̱ ciento kuia̱ chiʼina miína tein política, ta janí chindeé táʼanna xíʼín ta̱ kuaʼa̱n naá guerra ta ndijaá ña̱yóʼo kée jaá kuaʼa̱ ndiva̱ʼo na̱yivi xiʼi̱na. Java ta̱ ndíta nuu̱ religión yóʼo kuaʼa̱ ndiva̱ʼo ña̱ kui̱ká ió nuu̱ra ta janí xíka̱ra xu̱ʼún nuu̱ na̱ kuendá religión ra jaá ná kuu kandoyi va̱ʼa chááka̱ra xíʼín ña̱ kui̱ká. Xíʼín ndijaá ña̱ kini kéera naʼa̱ra ña̱ ko̱ náʼá miívára Ndio̱s. Sa̱ʼá ña̱yóʼo ¿ndixi kuu káchira ña̱ kúúra kuendá Ndio̱s? (Kaʼviní 1 Juan 4:8).
3. ¿Ndixi kuu ini Ndio̱s tá ndéʼéna ña̱ kini kée ndijaá religión ña̱to̱ʼón?
Tá miíní ko̱ nátaʼan ininí xininí ña̱ kée ndijaá religión ña̱to̱ʼón, ¡nákani ininí ndixi ví kuu ini Jeová! Ndio̱s kúni̱ ndiva̱ʼona na̱yivi, sa̱ʼá ña̱yóʼo ndukueʼe ndiva̱ʼona saʼa̱ ña̱ kée ta̱ ndíta nuu̱ religión yóʼo, jáchi̱ jáyakora kivi̱ Jeová ta kéendava̱ʼara xíʼín na̱ ndíko̱ña. Sa̱ʼá ña̱yóʼo Ndio̱s káchina ña̱ religión ña̱to̱ʼón naáváña ta “ni iin kuu̱ [kivi̱] ka̱ o̱ nándió ko̱oan” (Apocalipsis 18:21). Sa̱yati ñúʼú jánaá Ndio̱s nuu̱ ndijaá religión ña̱to̱ʼón (Apocalipsis 18:8).
NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO
Ná kundaa̱ va̱ʼa chááka̱ iniyó saʼa̱ ndixi nákani ini Jeová saʼa̱ religión ña̱to̱ʼón. Janí ná kande̱ʼéyó saʼa̱ chááka̱ ña̱ kini kée religión yóʼo. Tá ni̱ndiʼi, ná jákuáʼayó saʼa̱ ndiva̱ʼa ndijaá ña̱ kini kéena ko̱ kánian chi̱tivi ña̱yóʼo miíní ña̱ jákuáʼa chááka̱ní saʼa̱ Jeová.
4. Ndio̱s ko̱ nátaʼan inina xinína ndijaá religión
Kuaʼa̱ na̱yivi káʼánna ña̱ ndijaá religión kúúña jíin jíin íchi̱ ña̱ néʼeña kuaʼa̱nna nuu̱ Ndio̱s. Jo ¿á ña̱ ndaa̱ kúú ña̱yóʼo? Kaʼvindó Mateo 7:13, 14, TNM ta kanatúʼúnndó saʼa̱ ña̱ va̱xi yóʼo:
Tátu̱ʼun káchi Tu̱ʼun Ndio̱s, ¿ndixi kúú íchi̱ ña̱ kuaʼa̱n nuu̱ niʼi̱yó ña̱ kutakuyó?
Kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:
¿Á jánaʼa̱ Biblia ña̱ Ndio̱s nátaʼan inina xinína kuaʼa̱ religión?
5. Na̱ kuendá religión ña̱to̱ʼón ko̱ naʼa̱na ña̱ kíʼvi̱ ini Ndio̱s saʼa̱ na̱yivi
Ndijaá religión kéeña kuaʼa̱ ña̱ kini ta jáyakoña kivi̱ Ndio̱s, iin ña̱yóʼo kúú ña̱ chindeé táʼanña xíʼín ta̱ kuaʼa̱n naá guerra. Tá kúni̱ndó kundaa̱ inindó saʼa̱ iin ña̱yóʼo, kande̱ʼéndó VIDEO. Tá ni̱ndiʼi kanatúʼúnndó saʼa̱ ña̱ va̱xi yóʼo:
¿Ndíki̱án ni̱kee kuaʼa̱ na̱ kuendá Veʼeñu̱ʼu tá ni̱saio Segunda Guerra Mundial?
¿Ndixi káʼán miíní saʼa̱ ndijaá ña̱ ni̱keena?
Kaʼvindó Juan 13:34, 35 xíʼín 17:16. Tá ni̱ndiʼi kanatúʼúnndó saʼa̱ ña̱ va̱xi yóʼo:
¿Ndixi kuu ini Jeová tá ndéʼéna ña̱ religión chindeé táʼanña xíʼín ta̱ kuaʼa̱n naá guerra?
Kua̱chi religión ña̱to̱ʼón kían ña̱ kuaʼa̱ ndiva̱ʼo ña̱ kini kuu ta ko̱ naʼa̱ña ña̱ kíʼvi̱ ini Ndio̱s saʼa̱ na̱yivi. ¿Ndiku̱ú ña̱ʼa xiní miíní naʼa̱ ña̱ ki̱ʼa jaá kían?
Na̱ kuendá religión ña̱to̱ʼón ko̱ naʼa̱na ña̱ kíʼvi̱ ini Ndio̱s saʼa̱ na̱yivi.
6. Ndio̱s kúni̱na jáka̱kuna na̱yivi nuu̱ religión ña̱to̱ʼón
Kaʼvindó Apocalipsis 18:4a ta kanatúʼúnndó saʼa̱ ña̱ va̱xi yóʼo:
Ndio̱s Jeová kúni̱na jáka̱kuna ndijaá na̱yivi na̱ ni̱ja̱ndaʼví religión ña̱to̱ʼón. ¿Ndixi káʼán miíní sa̱ʼá ña̱yóʼo?
7. O̱jándákooní ña̱ kati̱ʼa chááka̱ní saʼa̱ Ndio̱s ndaa̱ ndísa
¿Á kánian chi̱núu kua̱chiyó Ndio̱s saʼa̱ ña̱ kini kée religión ña̱to̱ʼón? Nákani ininí saʼa̱ iin de̱ʼe ko̱ kúni̱ra kunijo̱ʼora ña̱ káʼa̱n tatára, ni̱ja̱ndákoora veʼera ta kuaʼa̱nra kéera ña̱ kúni̱ miívára. Ta̱ kúú tatá ko̱ nátaʼan inira xiníra ña̱ kée de̱ʼera. ¿Á kuu káchiyó ña̱ kua̱chi tatá kúú ña̱ ko̱va̱ʼa kée de̱ʼera?
¿Á kuu káchiyó ña̱ kua̱chi Jeová kúú ña̱ ko̱va̱ʼa kée religión ña̱to̱ʼón ta jándákooyó ña̱ jákuáʼayó saʼa̱ Tu̱ʼun Ndio̱s?
ÑA̱ KÁʼA̱N INGA NA̱YIVI: “Yuʼu̱, iin íchi̱vá ko̱ kúni̱ kundaa̱ ini saʼa̱ Ndio̱s; jáchi̱ na̱ kuendá religión kuaʼa̱ ndiva̱ʼo ña̱ kini kéena”.
¿Á janí nákani ini miíní?
¿Ndiva̱ʼa ko̱ kánian chi̱núu kua̱chiyó Jeová saʼa̱ ña̱ kini kée religión ña̱to̱ʼón?
ÑA̱ NI̱KATI̱ʼAYÓ
Na̱ kuendá religión ña̱to̱ʼón jáyakona kivi̱ Ndio̱s xíʼín ndijaá ña̱to̱ʼón jánaʼa̱na ta xíʼín ndijaá ña̱ kini kéena. Ta nda̱ cháává tiempo kúmani̱ ta Ndio̱s jánaána nuu̱ ndijaá religión yóʼo.
¿Á naku̱ʼun inión?
¿Ndixi káʼán miíní saʼa̱ ndijaá ña̱ kini kée ta jánaʼa̱ na̱ kuendá religión ña̱to̱ʼón?
¿Ndixi káʼán Jeová saʼa̱ na̱ kuendá religión ña̱to̱ʼón?
¿Ndíki̱án kee Ndio̱s xíʼín religión ña̱to̱ʼón?
KUU NANDUKÚNÍ JAVAKA̱ ÑA̱ʼA
Kuaʼa̱ ndiva̱ʼo religión ko̱ nátaʼan ini Ndio̱s saʼa̱ ivi̱ ña̱ kini kéena. Kande̱ʼéní ndiku̱ú ña̱yóʼo.
“¿Á ndijaá religión kuu chindeéñayó náti̱vi yatiyó nuu̱ Ndio̱s?” (Artículo nuu̱ jw.org)
¿Ndiva̱ʼa kúni̱ Jeová ña̱ ná na̱kitáʼanyó xíʼín kuaʼa̱ na̱yivi jaá kekáʼnoyóna, ta o̱ju̱ú túʼún miíyó keeña?
“¿Á xiniñúʼúnyó kakuuyó kuendá iin religión?” (Artículo nuu̱ jw.org)
Iin ta̱ jutu̱ ni̱sanakani kuáchi̱ inira saʼa̱ religión ra. Jo ña̱yóʼo ko̱ ni̱sajíña nuu̱ra ña̱ kati̱ʼara ña̱ ndaa̱ saʼa̱ Ndio̱s.
“Iin ta̱ jutu̱ ni̱ja̱ndákoora Veʼeñu̱ʼu nuu̱ ni̱sasaʼa̱nra” (¡Despertad!, febrero de 2015)
Sa̱ kuaʼa̱ siglo, na̱ kuendá religión jánaʼa̱na ña̱to̱ʼón saʼa̱ Ndio̱s nuu̱ na̱yivi ta káchina ña̱ Ndio̱s ko̱ ndíʼi inina saʼa̱yó ta kéendava̱ʼana xíʼínyó. Kande̱ʼéní ndeí ni̱kixi uni̱ ña̱to̱ʼón yóʼo.
“Ña̱to̱ʼón kúxíkaña na̱yivi nuu̱ Ndio̱s” (La Atalaya, 1 de noviembre de 2013)