Yihowwaxxa Akeette Hordofa Ittin Suffe

1. Yihowwaxxa akeette hordofa hasisseeki mayeete kaddeexxa fakkeenniki ifisi.

GONGOMI giddo ora baxxeette hine hendo. Konne gongomi giddo biniinchuwwi, dhukkuba saꞌisittaaxxi corroqquwwa, marze afeeki hiddichchuwwi, ittan kinuwwa hexxeen. Loola konnee adda egeꞌneekanna ateꞌe akeekaaka manjo alfitottole yoꞌoshsha gammaddattoxxi egeꞌnendeexxen. Tinni buttanna konne gongomishshaten, isenna manfasiinxa hedho noꞌoxxa haranga miitaaxxe elobaaxxe yaanuwwanni woꞌmiteen. Kaddomaleꞌe, qullichcha kadeeka akeekisanjo Yihowwaꞌa anfeennen. Isinna tenne fuggaaleette buttanaaꞌn, bari bariinxa hedho alfinnannoxxe haarooxxe butta qicoꞌn noꞌoꞌo akeekaan.

2. Yihowwa noꞌoꞌo akeekaꞌneeki hittate?

² Yihowwa noꞌoꞌo akeekaꞌneeki hittate? Noꞌoꞌo akeekaꞌneeki taakkaki ori, Qaale isixxe kadeeke Maxaafa Qullichchikiten. Kaddomaleꞌe, manjiinxa tukkeessanoolenna laꞌoonfataan. Fakkeennakeꞌe, eloxxa murte assedha dandeennannoshsha sagale qophpheessaashsha “addatemeekanna wodantichcha garbichcho” laꞌoonfataan. (Mat. 24:45) Ittan dandeette afeeka labbaluwwanna noꞌoꞌo akeekateꞌe laꞌoonfataan. Fakkeennakeꞌe, rogiinke iimike dooyyalluwwinaaꞌninna gubaꞌetixxe geedhenaaꞌn dayyeessaaka yaadanna, rakko injifante saꞌa dandennannoshsha, gargaartaaxxa akeettuwwa alfa dandennannon. Tenne haranga rakkisaꞌneexxe muuxamiinxe barruwwaꞌn, iitta hedheeka addachchisaaka gorsa, alfa noꞌoxxi hittatta galateeffachchiissaaxxe! Tinni akeettenna, Yihowwa edo eeyyemmannoshshanna hedhotike oraꞌn meꞌa ittin ediꞌaan sunfannoshsha gargaartaan.

3. Tenne qoꞌneꞌn heene yaanuwwa mariꞌantanno?

³ Kaddoolenna yanna yanna, qullichcha kadebaake manji darrenaaꞌn uwwendaꞌnexxa Yihowwaxxa akeette adhdha haꞌurtaaxxi yanna hedha dandeettaan. Mayee? Dedha gorsi insaꞌne uunaꞌneeki noꞌo eenaannexxe yookiin ginbaannexxe yaanen weli ginoommaake kada dandeꞌaan. Yookiin akeette uwwendeexxi beekkumi xeꞌyeexxishshanna gorsi kunni Yihowwabaaꞌn dageebaashsha assine hendannoxxi hexxaan. Iitta hexxexxa yannanna Yihowwa arda isika akeekaꞌneexxanna isixxa akeette hordofa eebba affeexxe kaddeexxa addata hasissaan. Isixxe akeetteꞌn anfeennexxa adde jabeesedhateꞌe tenne qoꞌneꞌn (1) Maxaafi Qullichchi borreessememmaka baro Yihowwa arda isika akeekeeki hittate kaddeexxa, (2) techchonna noꞌoꞌo akeekaꞌneeki hittate kaddeexxa (3) isixxa akeette hordofa ittin sunfonnole maa laꞌo alfinannoxxa uundannon.

YIHOWWA ISIRAꞌEELIKA ARDA AKEEKEE QICO

4-5. Yihowwa Muuse darreeꞌn Isiraꞌeeloota akeekaꞌneexxa leellishsheeki hittate? (Fakke uudi.)

⁴ Yihowwa Isiraꞌeeloota Gibtseeꞌn akeeke fulchaashsha Muuseꞌe melleemman. Isinna Muuse darreeꞌn Isiraꞌeeloota akeekaꞌneexxa leellishaꞌneeki beesissuwwi hedhemman. Fakkeennakeꞌe barriꞌa duumanchiinxa mososso, hashshiꞌaa kinni giiratixxa mososso qophpheesseemman. (Zetsi. 13:21) Muuse tenneꞌe mososso hordofati Isiraꞌeeloota Diimmooxxe Abbaayyabaꞌa akeekeen. Ardikinna ediiꞌn abbayya hexxeeꞌnaa udumiiꞌn Gibtseki sannachchi shorraaꞌnaꞌa buttin insaꞌneꞌn duudeechcho fakkaatteeꞌna haranga raankeemman. Muuse insaꞌneꞌe Diimmooxxe Abbaayyabaꞌa akeeke daga isixxi dedhake hine hendemman. Kaddomaleꞌe, tinni dedhakemmabaan. Yihowwa arda konneꞌe Muuse darreeꞌn okkoꞌaa akeekeeki egeꞌnaꞌnindemman. (Zetsi. 14:2) Magenikinna haraanga manbeꞌa assa orin insaꞌnaeꞌe foossemman.—Zetsi. 14:26-28.

⁵ Okkonechchi uduma 40 woggaꞌa, Muuse Mageniinka arda gammoojje qiillakeꞌn akeekateꞌe tenneꞌe duumanchiinxa mososso hordofa ittin ediꞌa sufeen.a Wele wodda kinni Yihowwa Isiraꞌeelooti uuda dandeꞌaashsha tenne mososso Muusexxe dunkaane iima uurrisaamman. (Zetsi. 33:7, 9, 10) Yihowwa arda isikeꞌe akeette uwwaa wodda, duumanchiinxe mososso giddo hedhee Muuse haasoossaamman. (Faaro 99:7) Isiraꞌeelooti, Yihowwa Muuse darreeꞌn insaꞌneꞌe akeekaꞌneexxa uuda dandeennaaki leellaꞌneeki beesisi hedhemman.

6. Isiraꞌeelooti Yihowwaxxa akeette udaammaki hittate? (Zehulquꞌu 14:2, 10, 11)

⁶ Yaadissaaxxa, baci Isiraꞌeelooti Yihowwa insaꞌneꞌe akeekateꞌe Muuseꞌe isixxe tukke asse laꞌoonfataꞌneexxa leellishaaka beesisa addataammabaan. (Zehulquꞌu 14:2, 10, 11 yaansis.) Higge higgeen Muusexxa akeette adhateꞌe jallanteen. Tennenaaꞌn kexxeexxa, iitti Isiraꞌeelixxi ila Kakot Boga dhaaldebaang gatteen.—Zehu. 14:30.

7. Yihowwaxxa akeette hordofeeke mannika fakkeenna kulle. (Zehulquꞌu 14:24) (Fakke uudi.)

⁷ Kaddomaleꞌe, mitti mitti Isiraꞌeelooti Yihowwaxxa akeette hordofaamman. Fakkeennakeꞌe, Yihowwa “Kaalebi... woꞌma qalben aneꞌe hordofeen” hiyyeen. (Zehulquꞌu 14:24 yaansis.) Mageni Kaalebi eebbiseen, ittan Keenyanike bogi giddo isi meꞌledheexxa bakka uwween. (Iya. 14:12-14) Ittanni Isiraꞌeelootiinxi itti aana ila, Yihowwaxxa akeette hordofat eloka fakkeenna leellishsheen. Iyaasu Muuseke tukkesallo kade Isiraꞌeeloota akeekaashsha mellemeemma wodda insaꞌnenna “isika hedhotika baro duuchcha isoꞌo qalbet ulfeesinaamman.” (Iya. 4:14) Tennenaaꞌn kexxeexxa Yihowwa kakotika boga dhaallaashsha assati insaꞌnee eebbiseen.—Iya. 21:43, 44.

8. Mootoleeyyetika baro Yihowwa arda isika akeekaammaki hittate kaddeexxa ifisi. (Fakke uudi.)

⁸ Wogguwwati, udumi darrenna kinni arda isika akeekateꞌe Yihowwa hayyoole keꞌisseemman. Yannati udumanna mootoleeyyetike baroꞌn, Yihowwa arda isika akeekateꞌe wabeekkoole keꞌisseen. Addatendeexxi mootoleeyye wabeekkooletika gorsa laqqaamman. Fakkeennakeꞌe mootichchi Daawiti wabeekkichchi Naatani uwweeka xixxichcho ifi heeshi assati adheen. (2 Samu. 12:7, 13; 1 Zeena 17:3, 4) Mootichchi Eyyoosaafixxi, Wabeekkichchi Yahaziꞌeeli, uwweexxa akeettenna Yihudaki ardi “Mageniinxe wabeekkooleyyeꞌn addataashsha” jajjabeesseemmaka gorsa adhdheemman. (2 Zeena 20:14, 15, 20) Mootichchi Hiizqiyaasi rakko isoꞌn geltemmaxxa yanna wabeekkichcho Isayaasika gargaarsa halsemman. (Isa. 37:1-6) Mootoleeyye Yihowwaxxa akeette hordoffaammaxxa yanna duuchcha, insaꞌnenna eebbisemmaamman ardikinna nageꞌa alfaamman. (2 Zeena 20:29, 30; 32:22) Yihowwa wabeekkooleeyye laꞌooffate arda isika akeekaꞌneexxi duchchiingeꞌe shoondeexxe yaanemmabaan. Kaddoolenna heddo mootoleeyyenna ardi, Yihowwaxxa akeette lanqaammabaan.—Ermi. 35:12-15.

EDIKA KIRSITAANA YIHOWWA AKEEKAAMMAKI HITTATE?

9. Keꞌitiinke dhibbeesso baroꞌn Yihowwa kirsitaana akeekaammaki ayyi darreeꞌnite? (Fakke uudi.)

⁹ Keꞌitiinke dhibbeesso baroꞌn Yihowwa Kirsitaaniixxa gubaꞌe hundeesseemman. Ettene yanna konnee Kistaana akeekaammaki hittate? Yesuusiꞌi gubaꞌetike umo asse hariireen. (Efe. 5:23) Kaddoolenna, Yesuusi hordofooleeyye isixxa akeekaammaki qofi qofititebaan. Isinna Iyyerusaalemi hexxaammaxxa hawaariyaatenna geedhe insaꞌnee akeekatee laꞌoonfataamman. (Huje 15:1, 2) Ittan gubaꞌe akeekkaaxxi geedhenna baalonsendeemman.—1 Tese. 5:12; Tiito 1:5.

10. (a) Keꞌitiinke dhibbeesso baroꞌn, hedhemmaki baci Kirsitaani uwwendaꞌneexxe akeetteꞌaa maa uushsho afeema? (Huje 15:30, 31) (b) Maxaafi Qullichchi borreessemeemmake baroꞌn hedhemmaki mitti mitti manni Yihowwaxxa tukkeessanoole adhdha gopheemmaki mayeete? (“Mitti Mitti Manni Egeꞌnishaꞌneenga Beesisa Addata Gopheeki Mayeete?” hitaꞌneexxa kollo uudi.”)

¹⁰ Keꞌitiinke dhibbeesso baroꞌn hedhemmaki Kirsitaani tenne qophpheꞌaa hitta hexxeexxe uushsho afeemaꞌa? Baci Kirsitaani uwwendaꞌneexxa akeette gammashshoti hordofaamman. Ittan alfineeke “jajjabeenanaaꞌni kexxeexxa haranga gammandeemman.” (Huje 15:30, 31 yaansis.) Yihowwa shiqixxe yannanaaꞌn safe arda isika akeekaꞌneeki hittate?

TECHCHIXXE YANNAꞌN YIHOWWA NOꞌOꞌO AKEEKAꞌNEEKI HITTATE?

11. Yihowwa shiqike baroꞌn akeette uwwaammaka manna, akeekaammaxxa leellishshaaka fakkeenna kulle.

¹¹ Techchonna Yihowwa arda isika akeekateꞌn hedheen. Akeekaꞌneeki Qaale isixxinninna gubaꞌetike umo kadeeke belto isiki darreeꞌniten. Yihowwa techchonna manjiinxa tukkeesanoole laꞌoonfata ittin ediꞌaa sufeexxa leellishaaki beesisuwwi hedhee? Eeti. Fakkeennakeꞌe, 1800 woggake muuxamibaa kaddeexxa yaane uundo. Charleesi Tezi Raasilinna isin welt hedhemmaki manni 1914 woggaꞌn Mageniinxi Mootumma hundeessendeexxa leellishshaaxxi yaane hexxaaxxa hubata sanfeen. (Dani. 4:25, 26) Tenneenna egeꞌna dandeeneeki Maxaafi Qulliichchiinxa tinbite qoꞌnisatiten. Yihowwa tenne assinaꞌneexxa Maxaafi Qullichchiinxa qoꞌne akeekaamaꞌa? Eeti. Buttateꞌn 1914 woggaꞌn kaddeexxi yaane Mageniinxi Mootumma galcha saffeexxa kokeesiteꞌeen. Taakkaki Buttatiki Bagedi keꞌeen, tare saꞌaaki dhukkubi, buttiniinxi leleꞌmanna sagaletixxi heenoꞌma buttateꞌn kaddeen. (Luqa. 21:10, 11) Yihowwa konne qajeela kadeeka Kirsitaana labballo, arda isika akeekateꞌe laꞌoonfataamman.

12-13. Langake Buttatike Bagedi wodda, lassatixxanna barsiisatixxa huje baꞌlisatee hitta hexxeexxi qophphe assendee?

¹² Buttatike Langake Bagedi wodda, hiin yaane kaddeexxa uundo. Illite beeroꞌn hedhaammaki baalle afeeki dayyuwwi, Leellisha Yohaannisixxa 17:8 keꞌn qoꞌne asseechchinni udumiꞌaa, kunni bagedi Armaageedooni bagedibaꞌa akeekaake kadebaaki, Mageniinxa Mootumma baꞌla qicoꞌn lassatee ora banaake kadeexxa hubateen. Ettene yanna wele bogibaa meꞌa shollaxxenna kadda gophphoole, Yihowwaxxi orga butta duuchchaꞌn Mageniinxe Mootummaxxa dhugaa lassateenna barsiisateꞌe, miisonoota leenjisateꞌe Giliyaadi hiyyemaaka Maxaafi Qullichchiinka barachchotika mine bandeen. Okkone wodda miisoonooti bagedi hedheeꞌnaan ergemeexxe bakkabaꞌa meꞌaamman. Ittan lebendaaxxa, addatemeeki garbichchi, gubaꞌe giddo hedheeki duuchchin manji eloke lassallonna barachchiisanjo kadaashsha Tiꞌokiraasetika Barachchotika Mineb orgeesseen. Konne orinni Mageniinki ardi ediꞌa heqqitaꞌneexxe hujeꞌaa ifi qophpheefateeke kadeen.

¹³ Saxxemmaxxa yanna qalliyyat, ettene jabaxxe yannaꞌn, Yihowwa arda isika akeekaammaxxa egeꞌna dandeennannon. Langake Buttatike Bagedi uduma gargari bogaꞌn, hedheeki Yihowwaki ardi Mootummatixa dhugaꞌa nageꞌiki kulaamman. Ittan hujetinna edi qiconaaꞌn baꞌlataꞌn meꞌiteen.

14. Yihowwaxxe orgaꞌnaaꞌninna baallonsendexxe geedhe darreenaaꞌn uwwendaꞌneexxa akeette addata dandeennannoki mayeete? (Leellisha Yohaannisixxa 2:1) (Fakke uudi.)

¹⁴ Techchixxe yannaꞌninna Iimike Bisixxi una, Kirsitoosixxa akeette hordofa ittin ediꞌaa suffeen. Insaꞌnenna dayyuwwakeꞌe uunaꞌneexxa akeette, iimatenaaꞌn uwwendeexxishsha assine hendonnaa hansaꞌneen. Tennee akeette rogiinke iimike dooyyalli darrenaaꞌninna geedhuwwat darrenaaꞌn gubaꞌeteec geltaashsha assinaan. Hariirendeexxi geedhe Kirsitoosixxe “middixxe angaꞌn” hexxeen. (Leellisha Yohaannisixxa 2:1 yaansis.) Duuchchiinxi geedhe qulliyye kada gophphemmaxxee dedha hujjaaxxi egeꞌnendeexxen. Muusenna Iyyaasu, ittan hawaariyaate dedha hunjeemmaxxi yanna hexxeen. (Zehu. 20:12; Iya. 9:14, 15; Roome 3:23) Kaddoolenna, Kirsitoosi addatemeeka garbichchanna baaloonsendeexxa geedhe akeekandeꞌn hedheen, ittanni “tenne aadake muuxami” qicoꞌn akeeka ittin sufaan. (Mat. 28:20) Tenneꞌa isi noꞌoꞌo konne addatemeeke dayyuwwi darreeꞌn akeekateꞌn hedheexxa addantannoshsha assitaaxxi heddo buutuwwa hexxeen.

YIHOWWAXXA AKEETTE HORDOFA LAꞌO AFFEEN

15-16. Yihowwaxxa akeette hordofeeke mannixxe hedhotixxe barannonaaꞌn maa barachcho alfa dandeennanno?

¹⁵ Yihowwa uwwaꞌneexxe akeeteꞌaa ajajemmanno wodda taꞌixxe yannaꞌninna eebba alfinannon. Fakkeennakeꞌe, Andiyinna Roobiyni jiro shollisa hasissaaxxa uwwemeeka gorsa hujeteꞌn hosinseen. (Ibra. 13:5) Tennenaaꞌn kexxeexxa, insaꞌnenna ifixxe fedhiin, bukkiitike galmixxeꞌninna wele ijaarsiniinxe hujeꞌn qoodema sanfeen. Roobiyininna itta hiteen: “Heꞌnaannaki raꞌisseꞌnaaxxa bakka afebaake shiixxooke mineꞌniten. Foto keꞌisaꞌn dayyeefatatee laꞌoonfataannaka heddo kaameriinka miyuwwa gurgura hasisseemman. Tenne yaanuwwa oodhaꞌnee gurgurennen. Kaddomaleꞌe, Abrihaamixxe miniinxe amashshani, “ediꞌaa maleꞌe udumiꞌa uuda gophateeꞌe mudhdhennen.” (Ibra. 11:15) Kunni miniinki anninna miniinxi ama assineexxe yaanenaaꞌn maa laꞌo alfinee? Roobiyin itta hiteen; “anfennexxa yaane duuchcha Yihowwa uwwateꞌn heꞌnennexxa egenanno wodda konnete hinabaaka gammado alfa dandeeneen. Tiꞌokiraasetixxe hujeꞌn qoodemmanno wodda haaroxxe buttaꞌn hitta heꞌnannoxxa egeꞌna dandeeneen.” Andiyinna yaada iseka kiphati iitta hiyeen; “Yihowwaxxe hujeꞌaa yannanna hunna noꞌoxxa uunennexxee yoꞌoshsha gammandeennen.”

¹⁶ Yihowwaxxa akeette hordofat wele laꞌo alfa dandeenannoki hittate? Marsa, langake koobbika barachchoti mine birteechchi uduma, qaajeellisanjo kaddaashsha uwwemeemmaka gorsa hujeteꞌn hosisseemman. (Mat. 6:33; Roome 12:11) Isenna iitta hiteen: “Yunveresite shoole woggaa tola baratannoshsha fedhii aniꞌaa uuteemman. Kaddoolenna, manfasiinke herrega ankeꞌni geyonaaꞌa hedennen. Tenneꞌa ergachchotixxe hujeꞌn aneꞌe gargaartaaxxa oge baratatee, tekiniketixxe leenjoke barachchoti mineꞌn barata safennen. Tinninna techchi qicoꞌn assedhennexxe murte giddiiꞌn haranga caaldeexxemman. Taꞌa duuchchi woddixxe qajeellisanjo kade ergatemateꞌn hedhennen, ittan huje anxiki progiraami jijjiiremaꞌneeke kademmaxxe Beetele maraꞌn ergatemanna wele gargariti hexxeexxa eloxxa yaanuwwanna alfa dandeꞌeenen.”

17. Yihowwaxxa akeette hordonfonnole heene wele eebba alfa dandeennanno? (Isayaasi 48:17, 18)

¹⁷ Mitte mitte wodda maallaqiinxe jaalalanni abidemmabeꞌnoshshanna Mageniinka seera saꞌnannoshsha assitaaxxe yaanenaaꞌn ifi heqqeꞌnannoshsha asssaaki gorsi noꞌaa uwwemaan. Iittatenna kaddoole, tennee Yihowwaxxa akeette hordofati eebbisemmeennen. Caꞌichcha wodana afa, ittan hasissabaaxxe rakkonaaꞌn ifi heqqedha dandeeneennen. (1 Ximo. 6:9, 10) Tennenaaꞌn kexxeexxa, woꞌma qalbenni Yihowwaꞌa, mageneefata dandeeneennen. Tinninna dhugaatika gammado alfinannoshshanna nageꞌa ittan itinte heꞌnannoshsha assiteen—Isayaasi 48:17, 18 yaansis.

18. Yihowwaxxa akeette hordofatee murteessexxeeteki mayeete?

¹⁸ Yihowwa lumoke abari woddanna kaddo ittan Kuma Woggaxxe Galcha woddanna manjiinxa tukkeessanoole laꞌoonfata ittin sufaaxxa mandinoqqe. (Faaro 45:16) Uwwendeexxi akeeta noꞌoxxe halchani welt ginoondaa wodda akeete tenne hordonfaane? Duuchchiinxi yaane hundeessendeeki Yihowwa taꞌixxxe yannaꞌn uwwaꞌneexxe akeetteꞌaa ajajemateꞌnite kada dandeettaan. Tenneꞌaa Yihowwaxxe akeetteꞌaanna kadde noꞌoꞌo toꞌatoꞌa baallonsseeke mannixxe akeetteꞌa duuchchinii wodda ajajemmo. (Isa. 32:1, 2; Ibra. 13:17) Tenne assinaannexxe kaddoole, manfasiinxe hedhoꞌa fuggoxxe kaddeexxe tenne buttanaaꞌn, bari bariinxxa hedho alfinannoxxe haarooxxe butta qicoꞌni akeekisanjo noꞌokeꞌn Yihowwaꞌn addantaannoxxi heddo buutuwwa hexxeen.