Naaziraꞌeelootakenaaꞌn Alfinannoxxa Barachcho

1. Duuchchiinge baroꞌn hexxemmaxxi Yihowwaxxi mageneeffatoole hitta hexxeexxa eloxxa yorte affeexxa leellishshee?

YIHOWWANI welti affeetteexxa firunte lummissee uuddaatte? Tinninna mama affexxebaan! Ittan atinna qofi hexxebexxon, qarixxe yannaꞌn hedhemmaki heddi manni iitta atishshanni hedaamman. (Faaro 104:33, 34) Kunni manninna, Yihowwaꞌa mageneffatateꞌe hiyya wodda ifixxa halcha tolcha asseen. Qarike Isiraꞌeelooti giddo Naaziraꞌeeloota hiyyemaaki manni iitta hexxeexxa yaane asseemman. Insaꞌneke fakkeennanaaꞌn maa barachcho alfa dandeennanno?

2. (a) Naaziraꞌeelooti ayye manna? (Zehulquꞌu 6:1, 2) (b) Mitti mitti Isiraꞌeelooti Naaziraꞌeeloota kadateꞌe silateeki mayeete?

² “Naaziraꞌeelcho” hitaaxxi Ibirayistetixxe hiyyaxxi tika “Qofitti Higeeke,” “Welekenaaꞌn Gargarti Higeeke,” yookiin “Ifi Mudhdheeke” hitaaxxen. Tinni hiyya welekenaaꞌn gargarti hedheeke orinni Yihowwaꞌa ergatemateꞌe, ifi mudhdheeka hinaaffe afeeka Isiraꞌeeloota, woꞌma kadeeke orinni ifissaaxxen. Muuseki Seeri, mitti labbaki yookiin meyyaki manji, hasaꞌneexxe yannaꞌa Naaziraꞌeelcho kade hedhateꞌe Yihowwaꞌa silata dandeꞌaaxxa haasoꞌaan.a (Zehu. 6:1, 2 yaansis.) Kunni silati yookiin kako, weli Isiraꞌeelooti heqqedha hasissabaaka seeruwwa, hordofa insaꞌnenaaꞌn heqqendaamman. Mitti Isiraꞌeelchi, Naaziraꞌeelcho kadateꞌe silataꞌneki mayeete? Mitti Isiraꞌeelchi iitta assaꞌneeki, Yihowwaꞌa afeexxe jabaxxe jaalalanaaꞌninna Yihowwanaaꞌn alfeeke badhaadhinaaꞌn kexxeexxenniten.—Zedag. 6:5; 16:17.

3. Techchixxe yannaꞌn hedheeki Mageniinki ardi Naaziraꞌeeloota fakkaataaki hittate?

³ Tinni, Naaziraꞌeelcho kadatixxi qophphe uurteeki Muuseki Seeri “Kirsitoosike seeraꞌn” tukkeessemee woddan. (Gela. 6:2; Roome 10:4) Kaddomaleꞌe, techchonna Yihowwaki ardi Naaziraꞌeelotiinshanni woꞌma qalben, lubbon, sammonninna hunnanni isoꞌo ergatemateꞌe, jabaxxa halcha afeexxa leellishsha ittin ediꞌa sufeen. (Marqo. 12:30) Noꞌonna Yihowwaꞌa ergatemateꞌe hedho ifixxa mudhdhinanno wodda fedhii ifixxen silantaanne hiyyoten. Konne silatixxe hundaayyeshsha hedhateꞌe, Yihowwaxxa fedhiꞌi assannaa isoꞌo ergatemateꞌe halcha ifixxa tolcha assa hasissaan. Naaziraꞌeelooti silata silateeka muuxeeka ora qoꞌnisa, noꞌonna silata noꞌoka muuxa dandeennannoki hittate kaddeexxa eloxxa barachcho alfa dandeennannon.b (Mat. 16:24) Mitte mitte fakkeennuwwa uundo.

LAꞌO IFIXXA TOLCHA ASSATEꞌE FEDHIITIKE KADA

4. Zehulquꞌu 6:3, 4, xxe hundaayyeshshan, ifixxa halcha tolcha assatiki manfasi hega uudemeeki hittate?

⁴ Zehulquꞌu 6:3, 4 yaansis. Naaziraꞌeelooti, alkooletike haꞌwo duuchchanaaꞌn, woyinetixxe gummanaaꞌn giisineexxa yaane ittan zebiibetixxa gumma itatenaaꞌn bayyatiyyo hasissaan. Weli Isiraꞌeelooti woyinetixxa xajje haꞌwaamman ittan woyinetixxanna zebiibetixxa gummuwwa itaamman, tennee yaanuwwa ita rakko affeexxe yaanebaan. Maxaafi Qullichchi “woyine qalbe manjiinxa gammachchissaaxxe Mageniinxe uwwa kaddeexxa haasoꞌaan. (Faaro 104:14, 15) Kaddoolenna, Naaziraꞌeelooti tenne yaanuwwa itaꞌn gammadatixxa mabite, fedhiꞌi ifixxenni tolcha asseen.c

5. Madyaaninna Marseella heene yaane tolcha assateꞌe fiꞌlinee? mayee?

⁵ Noꞌonna Naaziraꞌeelotiinshanni, Yihowwaꞌa woꞌma kadeeke orinni ergatemateꞌe halcha ifixxa tolcha assinannon. Madyaanikanna Marseellaka fakkeenna hubatte.d Kunni miniinki anninna miniinxi ama danqasha hedho heꞌnaamman. Madyaani eloxxa huje afemmaxxeꞌe dancha appaartamaꞌn heꞌnaamman. Kaddomaleꞌe, Yihowwaꞌa ergatemateꞌe caaldeexxa yaane assa hanseen. Konne herregaꞌn geyateꞌe mitte mitte jijjiirra assateꞌe murte asseꞌneen. Insaꞌnenna iitta hineen, “fulchinaanneka maallaqa heenoonsa sanfennen. “Shiixxooke appaartamibaaꞌa hingennen, kaamole anfeennaxxanna gurgudhdhinennen.” Madyaaninna Marseella iitta hedheeka tolcha assa hasissaammabaan. Kaddomaleꞌe, tenne yaane assineeki ergatensha insaꞌnexxa baꞌlinsaashsha gargaartaammaxxeeten. Insaꞌnenna asseꞌneexxe murteꞌn gammandeen.

6. Techchixxe yannaꞌn Kirsitaani tolcha assaꞌneeki mayeete? (Fakke uudi.)

⁶ Techchixxe yannaꞌninna, Kirsitaani tiꞌokiraasetixxe hujeꞌn qeerraaxxa yanna saꞌissateꞌe hiyya wodda ifixxa halcha tolcha assati gammashsho alfeꞌeen. (1 Qoro. 9:3-6) Yihowwa iitta hedheeka tolcha assinonnaꞌa noꞌonaaꞌn heqqaꞌnebaan kaddomalee iitta assa kinni dedhakebaan. Fakkeennakeꞌe, mitti mitti eloxxa huje, mine, yookiin karra waaleen. Heedi dayyuwwi kinni aadhebaangi turateꞌe yookiin oose iꞌla gophateꞌe fiꞌleen. Weli kinni hado ifikinaaꞌn bayyateꞌe hedha hasissaꞌneexxenna kaddoole, gargaarsi haranga hasissaaxxe bakkabaꞌa meꞌateꞌe fiꞌleen. Noꞌo giddiiꞌn baci iitta hedheeka tolcha assineenneki eloxxe hinaannexxa yaane uwwinonnaaꞌa hansaannaxxeeten. Isiꞌa ergatemateꞌe hitineꞌe assitinaꞌneexxi yaane lummexxenna shiixxexxoole, Yihowwa tolcha isiꞌaa assitinaꞌneeka duuchcha lummise uudaaxxa kokiinke kadde.—Ibra. 6:10.

GARGARITI HEꞌNE LEELLATEꞌE FEDHIITIKE KADA

7. Mitti Naaziraꞌeelch silata isika muuxabaashsha gufo kaddaaxxi yaane maachcho kada dandeetta? (Zehulquꞌu 6:5) (Fakke uudi.)

⁷ Zehulquꞌu 6:5 yaansis. Naaziraꞌeelooti umo ifika woxxedha gophateꞌe silateemman. Tinninna qalbe mittenni Yihowwaꞌa hiremmaꞌneexxa leellishaake orani. Mitti Isiraꞌeelichchi Naaziraꞌeelcho kade tureexxe qixxeꞌn, umi isikinna nophphaꞌn meꞌaammaxxeꞌe, weli manjinna sholla qiciꞌn isoꞌo egeꞌna dandeꞌaan. Weli manni silata konnee muuxaashsha kiphaammaxxeenna ulfessaammaxxeꞌe welekenaaꞌn gargarti hige hedha haꞌurtabaan. Yaadissaaxxa kinni, Isiraꞌeelootinke raagaꞌn, Naaziraꞌeeloota kinphaammabaaxxinna tuffantaammaxxi yanna hexxemman. Wabeekkichcho Amotsike baroꞌn, waakkattoole Isiraꞌeelooti, Naaziraꞌeelooti “woyine haꞌwa gophateꞌe aageemmaxxa kako,” diigaashsha assateꞌe woyine haꞌwinoꞌaa uunaamman. (Amo. 2:12) Naaziraꞌeelooti okkonee silata muuxateennaa welekenaaꞌn gargarti hige leellateꞌe worba kada hasissaamman.

8. Beenjaamini hiyyemaꞌneeke dargaggeessixxe hedhotixxe barannonaaꞌn maa jajjabeessaaka yaada alfiteete?

⁸ Dadumangeꞌn shookaameessa manjo kandonnolenna, Yihowwake gargaarsinni welekenaaꞌn gargarti hinge leella dandeennannon. Nooruwe hedhaꞌneeka, Yihowwaxxe Naqaashe kadeeka, tomme woggake beltika, Beenjaamika fakkeenna hubat. Isi barataꞌneeki barachchotiki mini bagediki miidhendeexxa Yuukireene kiphateꞌe qophphe asseemman. Barattoole Yuukireenetika baandira oddoꞌwiteexxi faarsitaashsha qorreemman. Beenjaaminna tennee yaane assinaꞌneebaaꞌn bayyate uurati, tenne yaanenaaꞌn fagaateemman. Barsiisanjotinna cancite yexxaꞌn “noꞌo atetebaa heqqinaanneki, kabaa dagge makendaaxxoo!” hiteen. Beenjaminna barsiisanjotibaꞌa shiqeexxi “ani oddo goomorcha kadennaxxeꞌe polotikiinxe yaaneꞌn eyyabeꞌnon, ittan, heddo Yihowwaxxi Naqaashe bagedokeꞌe duula gophatenaaꞌn kexxeexxa usurendeen.” Barsiisanjotinna isi hiyyaꞌneeka yaada addatteexxi gattowwaal hiteen. Kaddomaleꞌe, kutta isixxixxi jaaluwwa insaꞌnenni welt makema gopheeki mayeete kadeexxa qora saffeen. Beenjaaminna haranga alayyeexxi oodha safeen; kaddoolenna, barsiisanjoteꞌe haasoꞌeemmaka yaada kutatixxe barattooleꞌaanna hiisseexxi jabeenniki haasoꞌeen. Okkoneechchi uduma, Beenjaamini adde isixxeꞌe uurra dandeꞌaashsha, Yihowwa gargaareexxa hadokeꞌe haasoꞌeen.

9. Yihowwaxxa qalbe gammachchiisa dandeennannoki hoone orinnite?

⁹ Yihowwaxxa fedhiꞌi assateꞌe fiꞌlineennaxxeꞌe loola noꞌokeꞌn hedheeke manninaaꞌn gagarti hinge leellinannon. Hujetixxe bakkaꞌn yookiin barachchotike mineꞌn, Yihowwaxxe Naqaashe kandeennexxa weli manji egeꞌnaashsha assateꞌe worba manjo kadiyyo hasissaan. Tenne buttaxxi yortenna adabi irrancaala yoꞌaꞌn meꞌaammaxxeꞌe, Mageniinxe Mootummaxxa odo lassanna Maxaafi Qullichchiinke hundaayyetike seerishsha hedha haꞌurtaꞌn meꞌitaan. (2 Ximo. 1:8; 3:13) Duuchchini wodda, isiꞌa ergatemaꞌnebaake manninaaꞌn, gargarti hige leellati “qalbe Yihowwaxxa gammachchiinsannoxxa” qalli hiyye.—Fakke. 27:11; Mil. 3:18.

HEDHO HAꞌNOOXXEꞌN YIHOWWAꞌA EDISSE

10. Zehulquꞌu 6:6, 7 keꞌn afemaaka seera ajajema, Naaziraꞌeelootakeꞌe haꞌurtaaki hittate?

¹⁰ Zehulquꞌu 6:6, 7 yaansis. Naaziraꞌeelooti hoone reyeeke manjibaanna shiqa dandeꞌaammabaan. Kunni tolchi iimi giddo uundanno wodda okkone qiconna lumoke fakkaata gopha dandeꞌaan. Maxaafi Qullichchiinke baroꞌn kinni mitti Naaziraꞌeelchi shiqiki hadi reya wodda, seera konneꞌe heqqedha haranga haꞌurtittetemman. Okkone wodda hedhemmaki ardi, hordofaammaki mooggiinki seeri reenshii biriꞌaa shinqaashsha assaammaken. (Yoha. 19:39, 40; Huje 9:36-40) Naaziraꞌeelootiink silat kinni, iitta hedheeka seera haranga hordonfabaashsha gabalaammaken. Iitta hexxeexxi yaadissaaxxi jabaxxi yaaddo mini hado insaꞌnekeꞌn gelteexxenna kaddoole, Naaziraꞌeelooti silata insaꞌneka muuxateꞌe jabaxxa adde anfeexxa leellinshaamman. Yihowwa konneꞌe addatenshat isoꞌo mageneffataꞌneeke manniꞌaa iitta hexxeexxi haꞌura rakko geltaa wodda, jabeenna uwwaaxxi egeꞌnendeexxen.

11. Mitti Kirsitaani minike hadinni welt abidendeexxa maa assateꞌe murteessedha hasissa? (Fakke uudi.)

¹¹ Noꞌonna kirsitaana kandennaxxeꞌe, Yihowwaꞌa ifi mudhdhati aangeenneka silata lumminse uundaannen. Tinni yaane mini hadinni welt abidendeexxa assinaannexxe yaaneꞌninna jijjiirra idaggaan. Mini hado noꞌokeꞌe hasissaaxxa yaane wonshateꞌe jabaate huja hasissoolenna, insaꞌneexxa halcha Yihowwa noꞌonaaꞌn heqqaꞌneexxe yaane iimi darre asse uuda hasissabaan. (Marqo. 10:35-37; 1 Ximo. 5:8) Mitte mitte yanna, Yihowwaꞌa gammachchiisateꞌe asseꞌneennexxi murte hado noꞌoka gammachchiisa gophphaan.

12. Alekisandru mini giddo haꞌuri jeeji futti hiyye wodda maa asseemmaꞌa? Assebaaxxinna?

¹² Aleksandiruxxanna isixxe miniinxe amaxxe Dorinaka hedhotixxa baranno hubatte. Kunni miniinki anninna miniinxi ama mitte wogga qicoꞌn Maxaafa Qullichcha baranteechchinni uduma, Dorina Maxaafa Qullichcha barata uurrisseen, Aleksandirunna uurisaashsha hasseemman. Kaddomaleꞌe, isinna laana maliki Maxaafa Qullichcha barata uurisaꞌnebaaxxa kuleen. Dorinanna tenne yaaneꞌn gammada gophpheemmaxxeꞌe hunnati barachcho uurisaashsha assatee woꞌlaandeen. Aleksandrunna ise iitta assateꞌe woꞌlaandaꞌneeki mayeete kaddeexxa egeꞌneemmaxxanna tinni yaane isiꞌa shollaxxe kaddeemmabaaxxa haasoꞌeen. Dorina isoꞌo ceeggattammaxxanna hunnat haasoottaammaxxa yanna, Maxaafa Qullichcha barata uurisateenna hedeemman. Kaddoolenna, Aleksandru hedho isixxeꞌn Yihowwaꞌa edisaꞌninni, miniinxe ama isixxeenna qalbetixxa jaalalanna ulfinna leellishaamman. Muuxamakeꞌn, isike eloke adabinaaꞌn kexxeexxa Maxaafa Qullichcha haarooba barata saffeexxi, okkooꞌn cuuphendeen.—Jw.org teꞌn Aleksandrunna Dorina Vaakar : “Jaalala Ossaameettenna Baꞌlaxxen” Dhugaꞌa Hedho Jijjiirtaan” hitaaxxa viidiyo uudi.

13. Yihowwanna mini hadiꞌa jaalala leellisha dandeennannoki hittate?

¹³ Mini hado orgeesseeki Yihowwateni, mini hadi noꞌokinna gammashshot hedhoꞌa hasaꞌneen. (Efe. 3:14, 15) Dhugaatixxa gammashsho alfinonnaꞌa hansaannole, Yihowwa noꞌonaaꞌn heqqaꞌneexxa yaane assiyyo hasissaan. Mini hado haꞌnooka karkarsati, jaalalatinna ulfinniki abidat isoꞌo mageneeffatateꞌe assitinaꞌneeka tolcha, Yihowwa lummise uudaaxxa mandinoqqe.—Roome 12:10.

NAAZIRAꞌEELOOTIINKIKA MANFASA WELINNA AFAASHSHA JAJABEESSE

14. Yaadiki haranga jajjabeessateꞌe woꞌlaancho assa hasissaaki ayyeete?

¹⁴ Taꞌixxe yannaꞌn Yihowwaꞌa mageneeffatateꞌe melledheeki duuchchi jaalalatenaaꞌn kexxeexxa, ifixxa halcha tolcha assateꞌe hasaꞌneen. Mitte mitte wodda iitta assa shollaxxebaan. Iitta hexxeexxa uushsho afateꞌe weliꞌaan weli jajjabeessa dandeennannoki hittate? Yaadiki weliꞌaan weli jajjabeessatiten. (Iyyo. 16:5) Gubaꞌeti giddo, Yihowwaꞌa baꞌla qicini ergatemateꞌe hiyyaa wodda, jiro ifixxa shollisateꞌe woꞌlaancho assaꞌneeki mitti mitti manji hedhee? Haꞌurtaaxxenna kaddoole, barachchotike mineꞌn welekenaaꞌn gargarti hige leellateꞌe jabaxxa yaane assitaꞌneexxi egendineexxi dargaggeeyye hexxee? Mini hadi shorrichcho geesisaaꞌnaan addatemeeke kadateꞌe, woꞌlaancho assitaꞌneexxi Maxaafi Qullichchiinxi barattonna addetiki jaaluwwi hedhee? Kunni fiixxa kadeeki addetiki jaaluwwi, ifixxa halcha tolcha assaꞌneexxenna jabeenna insaꞌneekeꞌe, saadino anfeennexxa leellishati duuchchin wodda, insaꞌneꞌe jajjabeessateꞌe dandeennennexxa duuchcha assino.—Filph. 4:5, 7.

15. Mitti mitti woꞌma yannaxxe ergatenshaꞌn hexxeexxa dayyuwwa gargaareeki hittate?

¹⁵ Mitte mitte yanna woꞌma yannaxxe ergatenshaꞌn hedheeke Kirsitaaniꞌa hujeti leellaaka gargaarsa assa dandeennannoxxinna hexxeen. (Fakke. 19:17; Ibra. 13:16) Sir Laanka afendaaxxe, cindeexxe addatendeexxe dayyoxxi qalbetixxi halchanna tennendemman. Iseꞌa xuratiinki maallaqi lebemeemmaxxeꞌe haꞌuraake ikkonoometike jeejaꞌnini hexxe, Yihowwaꞌa ergattaꞌneexxe lame qajellisano dubarte dayyuwwa, gargaarateꞌe hasseen. Tenneꞌa agenjo agenjongeꞌn insaꞌnaꞌa moobayiletixxa kaarde hidhdhateꞌe kadaaka maallaqa uwwateꞌe murteessexxeen. Tinni dayyo assiteexxi yaane hittatta gammachchiissaaxxe!

16. Qarixxe yannaꞌn hexxemmaxxe Naaziraꞌeelootiinxe qophphenaaꞌn maa barantanno?

¹⁶ Qariki Naaziraꞌeelooti leellisheeke eloke fakkeenninaaꞌn, laꞌo affeexxa heddo barachcho alfa dandeennannon. Kaddomaleꞌe, tenne Naaziraꞌeelootiinxe qophphenaaꞌn iimatika Anna noꞌoka Yihowwa uuddaaxxa barantannoxxi yaanenna hexxeen. Noꞌonna isoꞌo gammachchiisateꞌe hansaannexxanna ifi isiꞌa mudhdhine hedhateꞌe aangeennexxa kako muuxateꞌe, hinanno wodda ifixxa halcha tolcha assateꞌe fedhiitike kandeennexxa egeꞌneꞌeen. Isiꞌa anfeennexxa jaalala leellinshannoshsha eeti uwwati noꞌoꞌo ulfesseꞌeen. (Fakke. 23:15, 16; Marqo. 10:28-30; 1 Yoha. 4:19) Tinni Naaziraꞌeelootiinxi qophphe, Yihowwa isiꞌa ergatemateꞌe assinaanneka tolcha hubataꞌneexxanna lummise uudaꞌneexxa leellishshaan. Yoona, noꞌoxxe eloxxe yaane hinaannexxa isiꞌa uwwateꞌe fedhiitike kadat, Yihowwaꞌa ergatemati ittin ediꞌa sufateꞌe murte asseꞌno.