Adde Woxissaaxxi Yaane Hexxoolenna Jabeenniki Ossa Dandeetinaan

1. Yihowwaxxe orgaxxe gamo kadatenaaꞌn kexxeexxa alfinannoki mitti mitti badhaadhuwwi hoonte?

TENNE haranga rakko bira saxxeexxe muuxamiinxe barruwwaꞌn, Yihowwaxxe orgaxxe gamo kada dhugaandini noꞌaa badhaadhaken. Buttatiki jeeji gara baꞌaꞌn meꞌaꞌneexxe kaddoolenna, Yihowwa noꞌaa mittunte affeexxa manfasiinxa maate qophpheesseen. (Faaro 133:1) Isinna tenne maatenni jabaxxa mittunte afa dandeennannoshsha gargaaraan. (Efe. 5:33–6:1) Ittan giddo noꞌoxxi dhugaatika nageꞌa alfitaashsha qalbeeffannannaa beekkuma uwwaan.

2. Maa assa hasissa? Mayee?

² Addatenshati Yihowwaꞌa ergatematee ittin sufatee jabaatiyyo hasissaan. Mayee? Buutotinna weli manni haasoꞌaꞌneexxenna assaꞌneexxe yaanenni noꞌoꞌo aarsaaxxi yanna hedha dandeettaan. Noꞌonna dedha mitte, higge higgeen hunjanno wodda, adde wonxannoxxinna hedha dandeettaan. Tenneꞌa Yihowwaxxe ergachchoꞌn jabaatiyyo hasissaan. (1) mitti addetiki jaali noꞌoꞌo mufachchiisaa wodda, (2) bultetiki jaali (jaalo) noꞌoꞌo hifachchiisaa wodda, ittan (3) dedha hunjanno wodda. Tenne qoꞌneꞌn konne yaaduwwa uundannon. Maxaafi Qullichchi giddiiꞌn iitta hexxeexxi yaane gelteeke addatemeeke mannike fakkeennanaaꞌn maa barantannoxxa uundannon.

ADDETIKI JAALUWWI MUFACHCHIISAA WODDA OSSE

3. Yihowwake ardaꞌni huuni haꞌuraaki jeeji geya dandeꞌa?

³ Haꞌuraa jeeja. Mitti mitti adddetiki jaaluwwi noꞌoꞌo hifachchiisaaka adaba afa dandeꞌaan. Dedha weli noꞌoꞌo tuffataaxxi yookiin ulfiniinke kadebaake orinni abidaaxxi hedha dandeettaan. Ittan akeette uutaaxxi dayyuwwanna dedha hujjaaxxinna hedha dandeettaan. Tinni yaanuwwanna mitti mitti manni Mageniinxa orga mamaashsha assitoꞌaa dandeettaan. Dayyuwwikinna dayyuwwat “anga weliꞌaan weli abixxine” Magenokeꞌe ergata ediꞌaan sufat irra, insaꞌneꞌe hifachchiiseeke manjinni mufantaan yookiin gubaꞌe mara uurinsaan. (Zekka. 3:9) Tinni beekkumiinxe murte? Iitta weli fakkaataaki jeeji futti hiyyeeke Maxaafi Qullichchi giddo afemaake mannike, fakkeennanaaꞌn maa barachcho alfa dandeennannoxxa hedde.

4. Phawuloosiꞌn huuni haꞌuraaki jeejuwwi geyeemma?

⁴ Maxaafi Qullichchiinka fakkeenna. Hawaariya Phawuloosi, Kirsitaana kadeeki dayyuwwinna dayyuwwa qulliyyete kandebaaxxa egeꞌneemman. Fakkeennnakeꞌe, gubaꞌe afema safeeshshanni Kirsitoosike hordofeessa, kadeexxa addate adhdha sodanteemman. (Huje 9:26) Wele wodda kinni, summa isika balleessitaaxxa yaane haasoonneemmaxxi yanna hexxemman. (2 Qoro. 10:10) Mitti baalle affeeki dayyi, wele manjo guggufachchiisa dandeettaaxxa yaane assaaꞌnaanna uudeemman. (Gela. 2:11, 12) Ittan Phawuloosike shiqike jaalo kadeemmaki Marqoosi jaba qicinni isoꞌo yaadiseemmaxxi yanna hexxemman. (Huje 15:37, 38) Jeejuwwi konne giddiiꞌn mittekenna kadoole, Phawuloosi dayyuwatenaaꞌn bayyataashsha assa dandeꞌaakemman. Kaddomaleꞌe, dayyuwwakeenna dayyuwwateꞌe qajeelto uushsho afeemmaxxeꞌe, Yihowwaꞌa addatenshat ergatema ittin sufa dandeꞌeen. Phawuloosi ossaashsha gargaarteexxi yaane maachcho?

5. Phawuloosi dayyuwwa isikeꞌn adde woxabaashsha gargaarteexxi yaane maachcho? (Qolaasiyaasi 3:13, 14) (Fakke uudi.)

⁵ Phawuloosi dayyuwwa eeyyaamman. Isinna welekeꞌe afeemmaxxi jaalala gonphe insaꞌnexxeꞌn kaddebaang, eloke adaba insaꞌnekeꞌn miꞌlachcho assaashsha gargaarteen. Tinni jaalala Phawuloosi Qolaasiyaasi 3:13, 14. (Yaansis.) keꞌn, borreesseeka yaada ifiꞌaan hujeteꞌn hosisaashsha gargaarteen. Tenne jaalala Marqoosiꞌa leellishsheeki hittate kaddeexxa uundo. Marqoosi taakkake miisoonetike maroꞌn, Phawuloosi waale meꞌeexxenna kaddoole isoꞌn mufateemmabaan. Yannati uduma Qolaasiyaasi afendaaxxe gubaꞌeꞌa borreesseexxe jaalalatixxe daddaabbeꞌn, hujetika jaalo isika Marqoosiꞌi, “jabeenniinxe muumme” hiyyat jajeen. (Qola. 4:10, 11) Roome usuriinke mineꞌn hedhemmaxxa yanna Marqoosi isoꞌo gargaaroꞌaa dagaashsha qoreemman. (2 Ximo. 4:11) Kabaaꞌn uundaanneshshani Phawuloosi dayyuwwa isikeꞌn adde woxeemabaan. Phawuloosinaaꞌn maa barachcho alfa dandeennanno?

6-7. Dayyuwwinna dayyuwwa dedha hunjaaxxenna kaddoole, ossuntet jaalala leellisha dandeennannoki hittate? (1 Yohaannisi 4:7)

⁶ Alfinannoxxa barachcho. Yihowwa dayyuwwa noꞌokeenna dayyuwwateꞌe ossuntet jaalala leellinshonnaa hasaꞌneen. (1 Yohaannisi 4:7 yaansis.) Mitti manji Kirsitaanakenaaꞌn heqqemaaka adaba leellisha gophaa wodda, Maxaafi Qullichchiinka hundayyeti seera hujeteꞌn hosisateꞌe woꞌlaanaꞌnin, iitta hexxeexxa yaane asseeki hedebaangite kaddeexxa heda dandeennannon. (Fakke. 12:18) Mageni addatendeexxi ergantoole isixxi gonphe affeexxenna kaddoole eeyyaan. Dedha hunjonnolenna isi noꞌoꞌo waalabaan ittan halo abixxabaan. (Faaro 103:9) Gattowwaaliitika Anna noꞌoka fakkaata hittatta laꞌo affeexxe yaane!—Efe. 4:32–5:1.

⁷ Bari konneki muuxami shiqaꞌn dagaashshani dayyuwwikinna dayyuwwati haranga shiqiyyo hasissaaxxa deenonnoqqe. Shorrichchi noꞌoꞌn jaba qicoꞌn geyaaxxa heqqa dandeennannon. Addetixxe buutonni usuremmannoxxinna hedha dandeettaan. Iitta hexxeexxi yaane noꞌoꞌn galtoole haaninaaꞌninna irraan caala dayyuwwa noꞌoꞌaa hasissaan. (Fakke. 17:17) Mitte Ispeene hedhaꞌneeke Joosepa hiyyemaake gubaꞌetike geerchoꞌn gelteexxa yaane uundo. Isinna wele dayyuwwa oddo goomurummatenaaꞌn kexxeexxa usuremmeemman. Isinna iitta hiyyeen: “usuriinke mineꞌn ifixxe hinannoxxi yaane hedha gophpheemmaxxee dayyuwwateꞌn hifantannoshsha assitaaxxi heddo yaanuwwa hexxeen. Tenneꞌa weli dandeꞌanna gattowwaal hiyya hasissaamman. Tennenaaꞌn kexxeexxa mittuntet hedhannaa weli heqqa dandeenneennen. Noꞌonna heꞌnennaki Yihowwaꞌa mageneeffataꞌnebaake manni giddoten. Mitte yanna miidhemeeꞌnaꞌa anga loꞌo hiteemmaxxeꞌe, ifiꞌa mitte yaanenna assa dandeꞌaanabaan, kaddoolenna dayyuwwi welt usuremmeenneki giddiiꞌn mitti seemma anxa aanshaamman ittan wele hasisaa darrenni aneꞌe karkarsaamman. ‘Gargaarsi aniꞌa hasisaammaxxe yannaꞌn qalbetixxa jaalala’ leellinsheexxa uudennen.” Oddoo noꞌoxxeꞌni dadendaaxxa rakko taꞌanni tika hasissaaxxa hubachchiissaaxxe, hittatta hexxeexxe laꞌo affeexxe barachcho!

BULTETIKI JAALI HIFACHCHIISAA WODDA OSSE

8. Weli aadheeke mannaꞌni huuni haꞌuraaki jeeji geya dandeꞌa?

⁸ Haꞌuraa jeeja. Duuchchiinxe bulii giddo rakko gophendabaan. Maxaafi Qullichchi weli aadheeke mannike ‘bisoꞌn rakko geltaaxxa’ haasoꞌaan. (1 Qoro. 7:28) Mayee? Buutotinna bulii qullichcha kadebaake lami mannixxe muttunte kaddemmaxxee, insaꞌneki adabi, eenaaxxinna ginbaaxxi yaane gargarunte affeen. Insaꞌnenna gargarti hexxeexxa aadanna nophphichcho anfeera kada dandeennaan. Bultetike jaaloꞌn, jilati edi darre leelle egeꞌnebaaki adabi yannat uduma leellaaxxinna hexxaan. Tennenaaꞌn kexxeexxa insaꞌnexxe oddooꞌn rakko dadendoꞌaa dandeettaan. Rakko ifi ifinxa egenne tikateꞌe woꞌlaanat irra, weliꞌaan weli aallantaaxxinna hexxaan. Dedha gargarti higa yookiin weli tika xuullotishsha assine uundaaxxinna hexxaan. Buliiteꞌn adde woxa rakko tikendaake ora?b Maxaafi Qullichchi giddiiꞌn haranga rakkoti woꞌmiteexxe bulteꞌni osseeke mannike fakkeennanaaꞌn alfinannoxxa barachcho uundo.

9. Huuni haꞌuraaki jeeji Abigaꞌeeliꞌn geyeemaꞌa?

⁹ Maxaafi Qullichchiinka fakkeenna. Abigaꞌeeli heerundeemmaki Naabaali hiyyemaake manjoꞌnitemman, Maxaafi Qullichchinna isoꞌo hunnaameessakenna adaba baꞌeeke kadeexxa haasoꞌaan. (1 Samu. 25:3) Abigaꞌeeliꞌa konne iitta hedheeke manjinni hedha shollaxxemmabaan. Abigaꞌeeli Naabaalinaaꞌn sholla qicoꞌn gargarti higgaaki ori hedhemmaꞌa? Ediꞌa Israꞌeelike mootichcha kadaꞌneeka Daawitiinna isinni welt hedhemmaka manna yowweeꞌnaꞌa, isoꞌo shiyatee marreemmaxxa eettene yanna laꞌoonfatte, isoꞌnaaꞌn gargarti higatixxa futtii affeemman. (1 Samu. 25:9-13) Isenna baqatteexxi Daawit isoꞌo shiyaashsha assa dandeettamman. Kaddoolenna, tenne yaaneꞌn oddoꞌo eꞌyat Daawiti miirsat Naabaali lubbo gatisseen. (1 Samu. 25:23-27) Iitta assitaashsha iseꞌe tirtirsiteexxi yaane maachcho kada dandeetta?

10. Abigaꞌeeli haranga jabaxxe buliiꞌn ossitaashsha tirtirsiteexxi yaane maachcho kada dandeetta?

¹⁰ Abigaꞌeeli Yihowwa eetaamman ittan isi buliiteꞌe fulcheeka seeranna ulfeessitaamman. Mageni keꞌitokeꞌn buliiꞌi hundeessee wodda, Addamiꞌaanna Heewaniꞌa hiyyeexxa yaane egendeexxe kaddeexxi mama affeexxebaan. (Dada. 2:24) Ittan Yihowwa bulii qullitte qophpheshsha asse uudaꞌneexxa egendeemman. Mageno gammachchiisateꞌe affeemmaxxi halcha, iseka mini hadonna miniinka anna lubbo gatisateꞌe dandeetteexxa yaane duuchcha assitaashsha tirtirsiteen. Daawit Naabali shiyabaashsha wiinamiki tarkaaffe adhdhiteen. Ise hujjebaaxxe balleessaꞌa gattowwaali qorteen. Yihowwa tenneꞌe worbanna umo ifika calla eeteꞌneebaaxxa manjo eeyyaaxxi egeꞌnendeexxen. Abigaꞌeelike fakkeennanaaꞌn miniinki anninna miniinxi ama maa barachcho alfa dandeennaa?

11. (a) Yihowwa weli aadheeke mannanaaꞌn heqqaꞌneexxi yaane maachcho? (Effesooni 5:33) (b) Karmeen bulii isexxi xeerendabaashsha assiteexxe yaanenaaꞌn maachcho barattine? (Fakke uudi.)

¹¹ Alfinannoxxa barachcho. Yihowwa, weli aadheeki manni, bultetiki jaali welt hedhateena haꞌuraꞌneeke kadoole, bultetixxa qophphe ulfeesinaashsha ajajeen. Weli aadheeki manni, rakko tikateꞌe jabaxxa yaane assaaꞌnaanna qalbeti weli eeyyaaꞌnaꞌa ittan weli ulfeessaaꞌnaꞌa uuda wodda hittatta gammadaaxxa hedde. (Effesooni 5:33.) Karmeenika fakkeenna uundo. Weli aaꞌneexxe jaane wogga uduma, Karmeen Yihowwaxxe Naqaashenni Maxaafa Qullichcha baratteexxi cuphendeen. Karmeenna “miniinki anni anki tenneꞌe assedhennexxa murte eeyyeemabaan” hiteen. “Isinna Yihowwa hinaafa safeen. Ittan yowwaꞌninna aneꞌe waalaaxxa haasoꞌat sodaachchisaamman.” Kaddoolenna, Karmeen bulii isexxeꞌn ossiteen. Isenna 50 woggaꞌa bulii isexxi jaalalatixxenna ulfessendeexxe kaddaashsha assateꞌe jabaxxa yaanuwwa assitaꞌn turteen. “Heddo wogga saxxeechchi uduma, qalbeeffanna afennexxe manjo kada hasissaaxxanna miniinka anna anka ulfinniki haasoossa hasissaaxxa baratennen. Bulii Yihowwa edo qullittete kaddeexxa egeꞌneennaxxee, bulii tinni xeerendabaashsha asseteꞌe hunna anxeꞌn dandeessisseexxa duuchcha asseennen. Yihowwa eeyyaannaxxeꞌe bulii anxeꞌn ijjenda adde woxabeꞌnon.”c Bulii atixxeꞌninna haꞌurtaaxxi yaane geltoole, Yihowwa ateꞌe kiphaaxxanna ossa dandeetattoshsha gargaaraaxxa addata dandeetatton.

IFIꞌNI YAADINAA WODDA OSSE

12. Haꞌura cubbo hunjanno wodda huun haꞌuraaki jeeji noꞌoꞌn geya dandeꞌa?

¹² Haꞌuraa jeeja. Haꞌurtaaxxa cubbo hunjanno wodda ifiꞌn adde wonxannoxxi hexxaan. Maxaafi Qullichchi hunjennexxe cubbonaaꞌn kexxeexxa ‘enqemmannoxxanna cuqurtoonnannoxxa’ haasoꞌaan.” (Faaro 51:17) Mitti Roobert hiyyemaaki dayyi, gubaꞌetike ergatanjo kadatixxa dandeette wonshateꞌe jabaxxa yaane assaꞌn tureen. Kaddomaleꞌe, Yihowwaꞌa waakkateeshsha isoꞌn fakkaatteexxa haꞌura cubbo hujeen. Iitta hiyyen, “Hujennexxa cubbo hedanno wodda wodani aneꞌe diipho kuteen. Ittan godobikinna aneꞌe raankeen. Oodhaꞌninna Yihowwabaꞌa kadhatennen. Mageni ijjenda langaxxa kadha anxa laqabaan hiyye hedaannaxxanna qalli hiyyaannen. Buutotinna isoꞌo yaadiseennaxxeeten.” Haꞌurtaaxxa cubbo hunjanno wodda qalbe noꞌoxxi yaadot eenqendaammaxxe, ifiꞌn adde wonxanoshshanna Yihowwanna noꞌoꞌn adde woxeeshsha assine hendannoshsha assitoꞌaa dandeettaan. (Faaro 38:4) Haꞌnooꞌninna iittan fakkaattaꞌnoole, haꞌura cubbo hujeen hedhe, ossunteti Yihowwa ergatemeeke mitte addatemeeke manjika fakkeenna uundo.

13. Pheexiroosi heene haꞌura cubbo hujee? Tenne cubbo hujaashsha assiteexxi yaane maachcho?

¹³ Maxaafi Qullichchiinka fakkeenna. Yesuusi, reyebaa edi darre hexxemmaxxa hashsha, hawaariya Pheexiroosi hedho isixxa haranga yaadoteꞌn ibisaaka jabaka dedha hujeen. Keꞌitokeꞌn Pheexiroosi miket iimi darre ifiꞌn addatati, wele hordofooleeyye Yesuusi waalde metoolena isi Yesuusi walabaaxxa ifi saadat haasoꞌeen. (Marqo. 14:27-29) Getesemaani heꞌnemmaxxa yanna heddole dammaqe heqqa dandeꞌe gopheen. (Marqo. 14:32, 37-41) Okkooꞌn, bukki hiyye dageeke manniꞌa Yesuusi qofi hune baqateen. (Marqo. 14:50) Muuxamakeꞌn, Yesuusi egeꞌnebaaxxa sasele waakkatati dhariki kakateen. (Marqo.14:66-71) Pheexiroosi hujeexxi yaane jabaxxe kaddeexxa egeꞌnee wodda maa kade? Isinna yaaddoti hansha hiyye oodheeki balleessa hujeechcho fakkaateeꞌnaate kada gophpheebaan. (Marqo. 14:72) Yannati uduma, jaallo isika Yesuusiꞌi shinnaa wodda, Pheexiroosi hitte qico yaadaaxxa hedateꞌe woꞌlaanne. Tennenaaꞌn kexxeexxa Phexiroosi ifi laꞌo afebaake manjishsha asse hedaaxxe kaddeexxi egeꞌnendeexxen!

14. Pheexiroosi ossunteti Yihowwaꞌa ergatemaashsha gargaarteexxi yaane maachcho? (Gogakeꞌn hexxeexxa fakke uudi.)

¹⁴ Pheexiroosi, Yihowwaꞌa addatenshati ergatema dandeꞌeeki gargarti hexxeexxe buutonaaꞌn kexxeexxinniten. Ifi welekenaaꞌn fojebaang manfasiinxe dayyuwwabaaꞌa meꞌeen, ittan insaꞌnenna isoꞌo jajjabeesineexxi egeꞌnendeexxen. (Luqa. 24:33) Ittan lebndaaxxa, Yesuusi reyotenaaꞌn keꞌee wodda isoꞌn leelleemmaxxeꞌe, tinninna isoꞌo jajjabeessa gophpheebaan. (Luqa. 24:34; 1 Qoro. 15:5) Yesuusinna Pheexiroosi hujeexxe balleessaꞌa xixati irra, caldeexxa maganne jaalo isikeꞌe uwwaꞌneexxa haasoꞌeen. (Yoha. 21:15-17) Pheexiroosi haꞌurtaaxxa cubbo hujeexxa egeꞌnoolenna ifiꞌni adde woxeemabaan. Mayee? Buutotinna isiki Barsiisanji Yesuusi, isoꞌn adde woxeemmabaaxxa addateemmaxxeeten. Ittan manfasiinxi dayyuwwa isixxinna isoꞌo kiphphaamman. Fakkeenna Pheexiroosikenaaꞌn maa barachcho alfa dandeennanno?

15. Yihowwa heene yaane addantonnaa hasaꞌne? (Faaro 86:5; Roome 8:38, 39) (Fakke uudi.)

¹⁵ Alfinannoxxa barachcho. Yihowwa noꞌoꞌo eeyyaꞌneexxanna gattowwaal hiyyaꞌneexxa addantonnaꞌa hasaꞌneen. (Faaro 86:5; Roome 8:38, 39 yaansis.) Cubbo hunjannoxxa yanna ifi balleessanjiinsha assine uundannon. Tinninna egeꞌnendeexxe yaanen. Kaddomaleꞌe, Yihowwa noꞌoꞌo eeyaꞌnebaashsha yookiin gattowwaal hiyyaꞌnebaashsha assine hediyyo hasissabaan. Tenneꞌa irra rankennexxi gargaarsa alfateꞌe woꞌlaancho assiyyo hasissaan. Iimiiꞌn kulemeemmaki Roobert iitta hiyyeen: “Cubboteꞌn ibenneki hega uushsho ifixxe hunnanni injifatannon hiyye addateennaxxeeten.” Isinna hujeexxa cubbo geedheteꞌn haasoꞌiyyo hasissaaxxa hubateen. Iittanna hiyyeen: “Geedheteꞌn mare haasoꞌenneshshanni Yihowwaxxi jaalalatixxi anga insaꞌne darreeꞌn aniꞌa diriirteeshsha aneꞌn laqendeen. Geedhuwwatinna aneꞌn adde woxxebaan. Ittan insaꞌnenna Yihowwa aneꞌe waalabaaxxa addatannoshsha gargaarreen.” Cubbo hunjennexxeꞌe aadde aangaannole, gargaarsa halsinaanolenna langaxxa cubbo huja gophateꞌe qalbetixxa woꞌlaancho assinaanole, Yihowwa noꞌoꞌo qalbeti eeyyaaxxanna gattowwaal hiyyaaxxa addata dandeennannon. (1 Yoha. 1:8, 9) Tinni addenna cubboteꞌn inbanno wodda, ifiꞌn adde wonxabeꞌnoshsha gargaartaan.

16. Yihowwa ossunteti ergatemateꞌe mudhdhiteetteki mayeete?

¹⁶ Yihowwa, tenne haranga haꞌurtaꞌneexxe muuxamiinxe barruwwaꞌn, isiꞌa ergatemateꞌe assinaannexxa woꞌlaancho lummisee uudaꞌneen. Yaadissaaxxi yaanenna hexxeexxe kaddoolenna isike gargaarsinni ossa dandeennannon. Dayyuwwa noꞌokeenna dayyuwwateꞌe anfeennexxa jaalala nossedhanaa noꞌoꞌo hifachchiinsaa wodda gattowwaal hiyya dandeennannon. Bulii noꞌoxxeꞌn rakko gelteexxe kaddoole rakko tikateꞌe dandeennennexxa duuchcha assati, Magenokeꞌe qalbetixxa jaalala anfeennexxenna qophphe tenneꞌa saadino anfeennexxa leellisha dandeennannon. Ittan cubbo hunjennexxe kaddoole, gargaarsa halsat, jaalalanna gattowwaal isixxa adhdhinennexxi isiꞌa ergatema ittin ediꞌa sufa dandeennannon. “Adde wonxebeꞌnongi eloxxa huje hunjonnole” dinbiliqqi hiteexxa eebba haaꞌminannon.—Gela. 6:9.