Yihowwaa Ulfeesse

1. Techchixxe yannaꞌni heddi manni miꞌlachcho assaꞌneeki mayekeꞌnite?

TECHCHIXXE yannaꞌni heddi manni ifiꞌaan calla hedaaꞌnaa hubatte egendebexxoo? Fakkeennakeꞌe, mitti mitti manni manjiinxa miꞌlachcho ifibaannna assaꞌneexxe yaanebaa butatatee ardiinke miidiyaꞌni gargariti hexxeexxa yaane assaꞌneen. Kaddomaleꞌe, techchixxe yannaꞌni heenooki manni Mageno Yihowwaa ulfeessaꞌneen. Tenne qoꞌneꞌni Yihowwaa ulfinna uwwate hiyyo maa hiyyote kaddeexxanna isoo ulfeessinannoshsha noꞌoo tirtirsitaaxxi yaane maachcho kada hasissaaxxa uundannon. Ittanni Magenokee hasisaaka ulfinna uwwa dandeennannoki hittate kaddeexxanna isi ediꞌa ifiꞌaanni summa isika ulfeessaaki hittate kaddeexxa barantannon.

YIHOWWAA ULFINNA UUWWATE HIYYO MAA HIYYOTE?

2. Yihowwa Siinaxxe Koobaꞌni ulfinna isika leellisheeki hittate? (Fakke uudi.)

² Ulfinnake hiyyo maa hiyyote? Maxaafi Qullichchi giddo “ulfinna” hitaaxxi hiyya mitti manji manbeꞌa hiyyaashsha assitaaxxa heene yaanenna ifissaaxxen. Israꞌeeliki ardi Gibsteeꞌni garbuntetenaaꞌni fuleexxe shiixxooxxe yanna uduma, Yihowwa manbeꞌa assaa garinni lumoka ulfinna isika leellisheen. Tinni yaane sammotibaa fakketi daggaashsha asse: Miilooneti laakkoꞌemaaki Israꞌeelooti, Mageno insaꞌnekinni afematee Siinaxxe Kooba hunda bukki hiyyeen. Jaba duumanchinna kooba himmi-asse buqeen. Dedhangeꞌni, buttini jaba qicinni leleꞌmeen, balaqinna banqo hexxemman. Ittan mansha duuchchaaki lumoki malagatiinki hafuuri laqemeen. Eettenee yanna lekka insaꞌnexxi hunda buttini giri-giri hiyyaamman. (Zts. 19:16-18; 24:17; Far. 68:8) Yihowwa lumoka ulfinna isika leellisheexxa yanna eettene bakkaꞌni bukki hiyyeemaki Israꞌeelooti hittee qico manbeꞌa hiyyaaxxa hedde.

3. Yihowwaa ulfinna uwwate hiyyo maa hiyyote?

³ Manji Yihowwaa ulfinna idaga dandeꞌaa? Eeti dandeꞌaan. Yihowwaa ulfinna idangannoki mitti ori, manbeꞌa assitaaxxa hunna isixxanna gammachchiisaaka adabuwwa isika welekee kulatiten. Gargaarsa isikenni assinennexxe yaaneꞌaa galata isiꞌaa uwwatinna isoo ulfeessinannon. (Isa. 26:12) Mootichchi Daawiti Yihowwaa ulfinna uwwati eloke fakkeennamman. Daawiti Israꞌeelooti bukki hiyye hedhemmaxxe bakkaꞌni Mageno kadhateemma wodda: “Yihowwaa lumminni, hunna, danchumme, ulfinninnna gaachchanni atiken, iimateꞌninna buttateꞌni hexxeexxi yaane duuchchi atixxen” hiyyeemman. Daawit kadha muuxeechchi uduma “bukki hiyyeemmaki ardinna Yihowwaa jajeen.”—1Ze. 29:11, 20.

4. Yesuusi Yihowwaa ulfinna uwweeki hittate?

⁴ Yesuusi butta hedhemma wodda maso hujaashsha hunna isiꞌaa uwweeki Anna isike kadeexxa mannakee haasoꞌati Anna isika ulfeesseꞌeen. (Mar. 5:18-20) Ittanni Yesuusi Anna isika uuddaaxxa haasoꞌeexxe yaanenninna wele abidee garinni Yihowwaa ulfaataashsha asseꞌeen. Mitte yanna Yesuusi Mikuraabe giddo barsiisateꞌni hedhemman. Isoo caqasaammake manni giddo 18 woggaaꞌa durriisi abide tureexxi manjichcho hexxemman. Isee abideeki durriisinna xukkitaashsha asseemmaxxeꞌe iimaa toggi hiyya dandeettaammabaan. Tinni yoꞌoshsha yaadissaaxxe yaanen! Yesuusinna iseꞌaa yaadeexxi isebaa shikki hiyyeexxi mararteti: “Tee manjo atee dhibbammaxxe dhibonaaꞌni hafuura adhdhiteeten” hiyyeen. Isinna anga iseꞌni uggeen isenna hirbangeꞌni toggi hiteen. Okkooꞌni fayyunte isexxinna ulfinni iseki higeemmaxxeꞌe “Mageno galateeffata saffeen”! (Luq. 13:10-13) Noꞌonna tenne manjichchoshshanni Yihowwaa ulfeessinannoshsha assitaaxxi buutuwwa hexxeen.

YIHOWWAA ULFINNA UUNANNOSHSHA TIRTIRSITAAXXI YAANE MAACHCHO?

5. Yihowwaa ulfeesinannoshsha assitaaxxi buutuwwa heente?

⁵ Qalbe giddixxenni isoo lumminsaannaxxeꞌe Yihowwaa ulfeesinaannen. Yihowwaa ulfeesinannoshsha assitaaxxi hedo buutuwwa hexxeen. Yihowwa duuchchiinxa dandeꞌaaken, isi gabala affebaaxxa hunnanna afeen. (Far. 96:4-7) Isiki lumoki beekkumi isi dadeexxe yaaneꞌni waꞌa hiyyee leellaan. Isi hedhotixxe muummen, ittan hedhoti hedhatee hasissaaxxa yaanenna qophpheessaꞌneeki isoten. (Lel. 4:11) Isi addatemeeken. (Lel. 15:4) Isi assaaxxi yaane duuchchi qabbaan. Kako aageexxa yaane duuchchinii wodda muuxaan. (Iya. 23:14) Wabeekichchi Ermiyaasi Yihowwaa: “Gosoleeyyetixxe beekkooleeyye duuchchinaaꞌni, ittan duuchchiinxe mootumuwwa insaꞌnexxi giddiiꞌni atishsha hedheeki hedhebaan”! hiyyeeki tenneꞌaaten (Er. 10:6, 7) Dhugaandinni, noꞌonna iimatika Anna noꞌoka ulfeesinannoshsha assitaaxxa eloxxa buutuwwa anfeennen. Yihowwaa ulfinnakenaaꞌn caaldeexxi yaane hasissaake Magenon—tinninna jaalalaten.

6. Yihowwaa eenaanneki mayeete?

⁶ Yihowwaa ulfeessinaanneki isoo yoꞌoshsha eenaannaxxeeteen. Yihowwa eenannoshsha assaaka gargariti hedheeka adabuwwa isika hedde. Isi marartetikenna oꞌwalloken. (Far. 103:13; Isa. 49:15) Isi noꞌo yaandanno wodda yaadaake Magenon. (Zek. 2:8) Isi jaaliinsha sholla qicinni isibaa shinqannoshsha asseꞌeen. (Far. 25:14; Huj. 17:27) Isi ifi heeshshi assaꞌneeke. Magenon, “Iimatanna butta uudatee buttaa heeshshi hiyyaan, rakkichchanna buttinakenaaꞌni keꞌissaan.” (Far. 113:6, 7) Tinni yaanuwwa lumoka Mageno noꞌoka duuchchiiingi ulfeessaashsha assitaaxxe yaanebaa?—Far. 86:12.

7. Noꞌo heenee gargariti hexxeexxa mabite anfeenne?

⁷ Yihowwaa ulfeessinaanneki welinna isoo egeꞌnaashsha hansaannaxxeeten. Heddi manni Yihowwaa uuddaaxxa dhugaate kaddeexxa yaane egeꞌnebaan. Mayee? Buutotinna Seexani isoo uudaaxxa fuggoka dhara facaasati, sammo insaꞌnexxa doochcheemmaxxeeten. (2Qo. 4:4) Seexani, manji Yihowwaaꞌa mararte beloke, manjokee hedabaakenna ‘buttateꞌni hexxeexxa rakko duuchcha idageeki isoten’ hiyye hedaashsha asseꞌeen. Kaddomaleꞌe, noꞌo Mageno noꞌoka uuddaaxxa dhugaate kaddeexxe yaane egenneennen! Noꞌo manjiinxa toggitte kaddebaaxxa hedino toggi assatixxanna isoo ulfeessinaashsha gargaaratixxa mabite anfeennen. (Isa. 43:10) Faaro 96 soxxi Magenokee ulfinna uunannoka oruwwa ifissaan. Tenne manfasi qullichchiinxe akeettenni borreessendeexxe, faaro giddo hexxeexxe mitte mitte hiyyuwwaꞌni mariꞌantanno wodda Yihowwaa hasisaaka ulfinna uutattoki hoone oruwwinnite kaddeexxa hedi.

YIHOWWAA HASISAAKA ULFINNA UWWA DANDEENNANNOKI HITTATE?

8. Yihowwaa ulfeessa dandeennannoki mitti ori hoonte? (Far. 96:1-3)

⁸ Faaro 96:1-3 yaansis. Isoo uuddaaxxa haasoonnannoxxe yaanenni Yihowwaa ulfeessa dandeennannon. Konne laakkoossuwwaꞌni Yihowwaki ardi, ‘Yihowwaa faarsaashsha, summa isika jajaashsha, fayyisatixxa huje isixxa lallabaashshanna ulfinna isika gosooleeyyetixxe oddoꞌni egeꞌnishaashsha’ kulendeen. Kunni duuchchiingi iimatika Anna noꞌoka haasoꞌiki ulfeessa dandeennannoke oruwwan. Addatemeeki Ayhuudootinna taakkake dhibbeesso baroꞌni hedhemmaki Kirsitaani, Yihowwa insaꞌnaa asseexxa yaane duuchcha welekee kulatenaaꞌninna summa isikee urratenaaꞌni udumaa higeemabaan. (Dan. 3:16-18; Huj. 4:29) Noꞌonna iitta assa dandeennannoki hittate?

9-10. Anjeliinaxxe hedhotixxe barannonaaꞌni maa barachcho alfiteette? (Fakke uudi.)

⁹ Yunaytid Isiteetise hexxaꞌneexxe Anjeliinaa hiyyendaaxxe dayyoxxa hedhotixxa baranno uundo. Ise hujjaammaxxe bakkaꞌni Yihowwake summiꞌaa jabeenniki uurriteen. Anjeliina tenne orgaꞌni huje saffeeki reefite kaddemmaxxeꞌe, tenne orgabaa reefi dageeki manji ifika mitte mitte hedhotika raaga hujetike jaaluwwaa haasoꞌati ifi egeꞌninshaashsha assinaꞌneexxe bukkiiꞌni Anjeliinanna yeꞌneen. Anjeliinanna Yihowwaxxe Naqaashen saꞌissiteexxa gammachchiissaaxxa yaannuwwa leellishshaaxxa fotuwwa televizhiineteꞌni saꞌissite leellishate qophpheessiteemman. Kaddomaleꞌe, ise haasoꞌa saffebaa edi darre, mitti hujetiki jaali ifi egeꞌnishaꞌni, Yihowwaxxe Naqaashe kaddeexxe maate giddo nophpheexxa haasoꞌeen. Isinna Yihowwaxxa Naqaashenna adde insaꞌnexxa busheeshshitaaxxa yaane haasoꞌa safeen. Anjeliinanna: “Yoꞌoshsha sodaatennen. Kaddoolenna ‘mitti manji summa Yihowwaka balleessaaꞌnaaꞌa uudaꞌni sammi hiyyanno moo summa isikee uurranno?’ hiyye hedennen.”

¹⁰ Isi haasoꞌe bireechchi uduma, Anjeliina qalbe giddo harumaaxxa kadha kadhatteen. Isenna eloke kadeeke orinni: “Anki nophphichchi atikenni weli fakkaataangen. Aninna nophphenneki atishshanni Yihowwaxxe Naqaashe kaddeexxe maate giddon. Ani taꞌi qicoꞌni Yihowwaxxe Naqaashe kadenneshshanni ittin ediꞌaa sufeennen.” Anjeliina adda sodaatteexxe kaddoolenna, manfasiinxe bukkiiꞌni afendee wodda kexxeexxa gammachchiissaaxxa fotuwwa leellishatenaaꞌninna adde isexxee maliki uurratenaaꞌni udumiꞌaa higgebaan. (1Ph. 3:15) Tinni yaane maa jijjiirra idagge? Anjeliina haasoꞌa birteeshshanni uushsho isixxi jijjiirendeen. Matanga Yihowwaxxe Naqaashe kaddeexxe maate giddo nophphee wodda gammachchiissaꞌneexxi qalli hiyyaꞌneexxi yaanuwwa hexxeexxa haasoꞌeen. Anjeliina: “Yihowwaaꞌa uurra hasissaake Magenon. Summa isika uuddaaxxa dhugaate kaddeexxa yaane haasoꞌa lumoke ulfinnanni” hiteen. Noꞌonna iseshshanni weli manji Yihowwaa ulfeessa gophaꞌneexxenna kaddoole, isoo jajanna ulfeessa dandeennannon.

11. Dhugaatixxi Mageneeffatoole qeerraake bariꞌaa Faaro 96:8 keꞌni hedheeka hundaayyetika seera hordoffaꞌni turteeki hittate?

¹¹ Faaro 96:8 yaansis. Anfeennexxe karranni Yihowwaa ulfeessa dandeennannon. Dhugaatixxi mageneefatoole, Yihowwaa duchchinii wodda konne orinni ulfeessitaan. (Fak. 3:9) Fakkeennakeꞌe, Israꞌeelooti mageneefachchotika mine ijaarateenna haaroonsatee afeexxe yaanenaaꞌni uwweemman. (2Ne. 12:4, 5; 1Ze. 29:3-9) Mitte mitte Kirsitoosixxi hordofooleeyye isoonna hawaaryaate isixxa “karra affeexxinni” kiphphaamman. (Luq. 8:1-3) Keꞌitiinke dhibbeesso baroꞌni hedhemmaki Kirsitaaninna beeli ibeemmake bogaꞌni hexxemmaxxa dayyuwwa gargaareemman. (Huj. 11:27-29) Techchixxe yannaꞌni, noꞌonna ifixxe fedhiinni buusa buusati Yihowwaa ulfeessa dandeennannon.

12. Buusi buunsaanneki Yihowwaa ulfinna idagaaki hittate? (Fakke uudi.)

¹² Buusi buunsaanneki Yihowwaa ulfinna idagaaxxa leellishshaaxxa mitte hedhotixxa baranno uundo. Zimbaabweke bogaꞌni qeerraaxxe yannaꞌa tureeki beelli hitteexxa rakko geesiseexxa 2020 woggaxxe rippoorteꞌni kulendeemman. Ettene yannaꞌni, heddo miiloonenni laakkoꞌemaaki manji soloꞌo jabakeꞌni ibeemman. Konne manni giddo Pirsika hiyyendaaxxi dayyo noꞌoxxinna hexxemman. Pirsika soloꞌi hedheexxenna kaddoole wiisatinxa maye, Gidaadiinxanna Bitaꞌixxa barra duuchchinii wodda ergatensha fuldaamman. Ise tenne hujetinxe mayeꞌninni ergatensha fuldaammaxxeꞌe ollaꞌi iseki, “Soloꞌiki rertatton” hiyyaꞌni cooraamman. Pirsikanna woꞌma qalbenni “Yihowwa ergantooleeyye isixxa ijjenda hunabaan” hitaꞌni hiissitaamman. Okkooꞌni adda turtebaangi, orga noꞌoxxi darreeꞌni uwwemaꞌneeki gargaarsi iseꞌaa geyeen. Pirsika iitta hedheeka gargaarsa alfa dandeetteeki, orga noꞌoxxee buusa buunsaannaxxeeten. Pirsikaki ollaꞌinna manbeꞌa hiyyeexxi, “hitattashshanni Mageni atee ijjenda hunebaan, noꞌonna isoo egennonnaa hansaannen” hiyyeen. Iseke ollaꞌi giddiiꞌni torbaani manji gubaꞌe daga safeen.

13. Faaro 96:9 xxe hundaayyeshsha, Yihowwaa ulfeessatee maa assa hasissa?

¹³ Faaro 96:9 yaansis. Adabi noꞌoki caꞌichcha kadoolee Yihowwaa ulfeessa dandeennannon. Yihowwake mineꞌni ergatendaammaxxi kahnaate bisi ifikixxa caꞌunte heqqedha hasissaamman. (Zts. 40:30-32) Kaddoolenna bisiinke caꞌinni irra lumoxxa bakka afeeki adabiinke caꞌinnen. (Far. 24:3, 4; 1Ph. 1:15, 16) “Dullatte ayyunte”— tinninna caꞌitte kaddebaaxxa hedinonna aada ifinaaꞌni fulche hunateenna hendaannexxenna assinaannexxe yaanenni ulfinniinka Yihowwaka adaba anfeennexxa leellishshaaxxa “haarooxxa ayyunte” oddoꞌwatee jabaxxa woꞌlaachcho assa hasissaan. (Qol. 3:9, 10) Matanga elobaaka adaba afeemmakinna jallichcha kadeemmaki mitti mitti manni Yihowwake gargaarisinni jijjiiremeꞌe haarooxxa ayyunte oddoꞌwa dandeꞌeen.

14. Jaakixxe hedhotixxe barannonaaꞌni maachcho baratteete? (Fakke uudi.)

¹⁴ Jaakixxa hedhotixxa baranno uundo. Isi jallichchanna fuggichcha manjomman, matanga manji isiꞌa Durriisa hiyyaaka summa fulcheemman. Hujaammaxxe fuggoxxe hujenaaꞌni kexxeexxa murtetiki mini reyaashsha murteesseemman. Kaddomaleꞌe, reyo heqqedhateꞌni hedheꞌe, isi usuremeeke miniba maraꞌni maxaafa Qullichcha barsiisaammake mitti dayyinni Maxaafa Qullichcha barata safeen. Jaaki edi wodda heddo elobaaxxa yaane hujeeke manjonna kadoole, haarooxxa ayyunte oddoꞌwe cuupheme Yihowwaxxe Naqaashe kadeen. Jaaki yoꞌoshsha jijjiiremeemman. Ettenne isoo shinnammaxxe barraꞌni, usurriinka mine heqqaammaki mitti mitti manni isoo geegeesse wodda illetenaaꞌni indiddo wocci wocci assaamman. Mitti usurriinke miniki sooreessi iitta hiyyeen: “Tenne bakkaꞌni Jaaki edi wodda harange sodaachchisaammake manjomman. Taꞌa kinni eloke manjo kadeen.” Jaaki reyeexxe itti aana torbaꞌni, usurriinke mineꞌni bukkii akeekatee mareeki dayyuwwi, edo bukkii dage egeꞌnebaaka mitte usuremeeka manjichcho bukkii dageeꞌnaa afeen. Isi bukkii dagaashsha assiteexxi yaane maachcho? Isinna Jaaki adabiki jijjiiremeexxee manbeꞌa hiyyeemman, ittan Yihowwaa mageneefatatee maa assa hasissaaxxa egeꞌnatee haseemman. Dhugaandinni adabi noꞌoki iimatike anna noꞌokee ulfinna idagaan!—1Ph. 2:12.

YIHOWWA SHIQIXXE YANNAꞌNI SUMMI ISIKI ULFAATAASHSHA ASSAAKI HITTATE?

15. Yihowwa shiqixxe yannaꞌni woꞌma kadeeke garinni summi isiki ulfaataashsha assaaki hittate? (Far. 96:10-13)

¹⁵ Faaro 96:10-13 yaansis. Faaro 96 keꞌni hedheeki muuxamiinki laakkoosuwwi, Yihowwa dhugichcha Murtichchanna Mootichcha kadeexxa ifisaan. Yihowwa ediꞌaa shiqixxe yannaꞌni summi isiki ulfaataashsha assa dandeꞌaaki hittate? Murteessaaxxe murtenniten. Shiqixxe yannaꞌni summi isiki xuroꞌaashsha assiteexxa Lumoxxa Baabiloone balleessaan. (Lel. 17:5, 16; 19:1, 2) Lumoxxi Baabiloone baxxaaꞌnaa uudaaki mitti mitti manni dhugaatixxe mageneeffachchobaa dagaaxxi hexxaan. Muuxamakeꞌni Yihowwa, Seexaniinxa aada, isoo moromaammakanna summa isika yowwaammaka manna Armaageedoneti balleessaan. Kaddomaleꞌe, isoo eeyyaꞌneeka, isiꞌaa ajajemaꞌneekanna isoo ulfeessaaka manna baꞌnetenaaꞌni gargaaraan. (Mar. 8:38; 2Te. 1:6-10) Kirsitoosixxe Kuma Woggaxxe Galchake muuxamaꞌni Yihowwa summa isika woꞌma kadeeke garinni qulloonsaan. (Lel. 20:7-10) Okkone wodda “wodiꞌi abbaayya buqammashsha, buttatinna Yihowwake ulfinnixxe egeꞌnanni woꞌmitaan.”—Inb. 2:14.

16. Maa assatee mudhdhiteette? (Fakke uudi.)

¹⁶ Hedho afeeki duuchchi Yihowwake summiꞌa hasisaaka ulfinna uwwaaꞌnaa uuda yoꞌoshsha gammachchiissaaxxe yaanen! Barra itti geltaa qicoꞌni, anfennexxe futtii duuchchaꞌni Mageno noꞌoka ulfeessatee dandeennennexxa duuchcha assino. Tennee haranga hasissaaxxa yaane jabeessateꞌe, Iimiki Bisi Faaro 96:8, 2025 xxe woggatixxe xiqse kaddaashsha fileen. Xiqsetinna: “Summa isikee hasisaaka ulfinna Yihowwaa uwwe” Hitaaxxen.