Yesuusi Noꞌoke Marartichcha Lumoke Kahnaatichcho Kadeexxa Deenonnoqqe

1-2. (a) Yihowwa Belto isika buttiꞌa ergeeki mayeete? (b) Tenne qoꞌneꞌni mariꞌantaannexxi yaanuwwa maachcho? (Ibraawiyaane 5:7-9)

YIHOWWA 2,000 wogguwwa edi darre, yoꞌoshsha eeyyaꞌneeka Belto isika buttiꞌa ergeen. Mayee erge? Buttiꞌa ergeexxi taakkaxxi buuto, manjiinxa sanne cubbotixxenna reyotixxe bakenaaꞌni wodoꞌaanna Seexaniinxa fuggoxxa huje balleesoꞌaaten. (Yoh. 3:16; 1 Yo. 3:8) Yihowwa, Yesuusi manjo kadeꞌe butateꞌni saꞌissaaxxi hedho irran caala marartetike, shaqqakenna welekeꞌe yaadake Lumoke Kahnaatichcho noꞌa kadaashsha assitaaxxa egeꞌneemman. Yesuusi Lumoke Kahnaatichcho kadeꞌe ergatema safeeki 29 GW ꞌni cuphemeechchi uduman.a

² Tenne qoꞌneꞌni, Yesuusi buttiꞌa dageꞌe barateexxi yaane isi mararte afeeke Lumoke Kahnaatichcho kadeꞌe ergatemateꞌe geyaashsha gargaartee qico uundannon. Tinni yaane Yesuusi maganne isixxeꞌe ‘woꞌma dandeette afaashsha’ assitee qico adda egennennexxe qixxeꞌni, cubboti yookiin gonphe ifixxenni adde wonxanno wodda Yihowwabaꞌa shiqa noꞌaꞌa shollexxaꞌni metaan.—Ibraawiyaane 5:7-9 yaansis.

MAGENI EEYYAꞌNEEKA BELTO ISIKA BUTTIꞌAA ERGEEN

3-4. Yesuusi heenee yaanuwwa walee buttiꞌa dagee? Buttateꞌni hitta hexxeexxe hedho hedhaammaꞌa?

³ Noꞌo giddiiꞌni heddi eenaannexxe bakkanaaꞌni welebaꞌa meꞌa yookiin eenaanneke mini hado noꞌokenaaꞌninna jaaluwwakenaaꞌni bayyata maa fakkaattaaxxa uundeennen. Iitta hexxeexxi jijjiirra shollaxxebaan. Kaddomaleꞌe, Yesuusiꞌni gelteexxixxi jijjiirra gelteeki ayyinna hedhebaan. Yesuusi iima hedhemma wodda Yihowwaxxe manfasiinxe oosuwwanaaꞌni haranga lumoxxa bakka afeemman. Isoꞌo eeyyaꞌneeke anni isike Yihowwanni welti hedhaamman, ittan Mageniinke “middaꞌni” hedheꞌe ergatemaammaxxeꞌe duuchchinii wodda gammadaamman. (Far. 16:11; Fak. 8:30) Kaddoolenna, Filphisiyuusi 2:7, Yesuusi iimateꞌni afeemmaxxa bakka waaleexxi buttateꞌni qullichcha kadebaake manjinni hedhateꞌe hiyyeꞌe “ifi duwwike” asseexxa haasoꞌaan.

⁴ Fakkeennakeꞌe, Yesuusi ilemeexxe mitte woggabaꞌa kaddeexxa yaane hedde meen. Yesuusi ilemeechchi uduma hadi isiki shiqiseeki tolchi leellishaꞌneeshshanni, hadi isiki hiyyeessakemman. (Zel. 12:8; Luq. 2:24) Fuggichchi Mootichchi Herodisi, Yesuusi ilemeexxa laqeexxi isoꞌo shiyateꞌe hasaamman. Hadi isiki Herodisixxe anganaaꞌni isoꞌo gatisateꞌe hiyyeexxi heenoxxe yannaꞌa Gibtseke bogaꞌni baqatake kade tureen. (Mat. 2:13, 15) Tinni hedho, Yesuusi iima hedhemma woddixxenaaꞌni haranga gargariti hexxeexxen!

5. Yesuusi buttateꞌni heenee yaanuwwa uudee? Tinni hedho isixxeꞌni uudeexxi yaanuwwa, lumoke kahinaatichcho kade ergatemmaashsha isoꞌo qopheesiteeki hittate? (Fakketanna uudi.)

⁵ Yesuusi buttateꞌni hedhemma wodda heddo manjoꞌni rakko geltaaꞌnaꞌa uudeꞌeen. Dedha isi eeyyaꞌneeki manji, matanga isoꞌo nosseeki Yooseefi reyeeꞌnaꞌa uuda gopheebaan. Yesuusi buttateꞌni ergatemaamma wodda, soomi abideeka, ille baꞌeeka, naafeeka mannanna finni ifiki reyeeꞌnaꞌa yaadaꞌneeka hado uudeꞌeen, ittan isinna konne manniꞌa hittee qico mararaꞌneexxa leellisheꞌeen. (Mat. 9:2, 6; 15:30; 20:34; Mar. 1:40, 41; Luq. 7:13) Yesuusi iimanna hedhema wodda manjokeꞌni rakko geltaaꞌnaꞌa uudeexxi egeꞌnendeexxen. Kaddomaleꞌe, manjo kadeꞌe butta hedhemma wodda rakko geltaa wodda manji hittee qico yaadaꞌneexxa hubateꞌeen. (Isa. 53:4) Yesuusi buttiꞌa dage uudeexxi yaane manjiinxa yaaddo, sodaꞌanna rakko egeꞌnaashsha assiteen. Duuchchiinge manjoꞌni geltaꞌneexxi rakko, gonphenna yaaddo isoꞌninna gelteeꞌnaꞌa uudeꞌeen.

YESUUSI MANJOKEE HEDAꞌNEEXXA LEELLISHAAMMAN

6. Isayaasixxe tinbiiteꞌni hedheeki fakkeenniinki haasoꞌi Yesuusixxa mararte uuddaaxxa maa barsiisa? (Isa. 42:3)

⁶ Yesuusi buttateꞌni hedhemma wodda gophaaleeyyeteenna manji miicaammake manniꞌa qalbe giddixxenni mararaꞌneexxa leellisheꞌeen. Konne orinni haasoꞌendeexxi tinbiite muuxendaashsha asseꞌeen. Ibrayisixetixxi Qullitte Borruwwa, duroommateekanna jabake kadeeka manna, mitte mitte yanna shaqqake buttinixxe karran yookiin jabaxxenna lumollamma haqqeni fakkeessitaan. (Far. 92:12; Isa. 61:3; Er. 31:12) Kaddomaleꞌe, hiyyeeyyenna manji miicaꞌneeka manna kinni, cancaqemeeke shombooqinninna xoꞌa shiqqeꞌe wiliildaꞌneexxe xassiinxe kirrenni fakkeessitaan. Tinni laminiinxi yaane okkone qico ayyiꞌaanna laꞌo affeexxe yaanebaan. (Isayaasi 42:3 yaansis. Mat. 12:20) Yihowwa, Isayaasi tenne fakkeenniinxe hiyyuwwanni tinbiite hasoꞌaashsha akeekeeki, weli manni tuffataꞌneekenna laꞌo afebaashsha laakkoꞌaꞌneeke manniꞌa, Yesuusi jaalalanna mararte afeexxa leellishaaxxa kulateeten.

7-8. Isayaasi haasoꞌeexxa tinbiite Yesuusi muuxeeki hittate?

⁷ Wengeeletiki borreessalli Matwoosi; Isayaasi “Cancaqemeeka shombooqo enqabaan, xoꞌa shiqqe wiliildaꞌneexxa xassiinxa kirrenna xorsabaan” hiyye haasoꞌeexxi tinbiite Yesuusiꞌni muuxendeexxa borreesseen. Yesuusi hujeexxe masonaaꞌni laꞌo alfeeki mitti mitti manni, miiccami geyaaꞌnaꞌa ifi cancaqemeeke shonbooqishsha laakkoꞌaammakenna xoꞌa shiqqeꞌe wiliildaꞌneexxe xassiinxe kirreeshsha laꞌo afebaashsha ifi uudaammake manna kada gopheebaan. Yesuusi masoti fayyiseeke manni goddo biso soomiinki dhukkubi bireemmaki manjichchi hedhemman. Kunni manji fayyeꞌe mini hado isikinninna jaaluwwiki welti gammadaꞌni hedhaaxxa hedeemmaꞌa? (Luq. 5:12, 13) Ittan mansha laqqaammabaakinna haasoꞌa dandeꞌaammabaaki manjichchi hedhemman. Weli manji weliꞌaan weli hasoꞌaꞌni geebaa wodda isi kinni haasoonnaꞌneexxa yaane laqa gophphaa wodda maachchi isoꞌni laqemaaxxa hedde. (Mar. 7:32, 33) Rakko insaꞌnexxi tenne callammabaan.

⁸ Yesuusi butta hedhemmaka baro, heddi Ayhuudooti mitti manji iitta hexxeexxa rakko afaaki ‘isi ifiꞌa yookiin hadi isiki hujeexxe cubboxxe buutonniten’ hiyyeꞌe addataamman. (Yoh. 9:2) Tenne seeri beloxxe addenaaꞌni kexxeexxa bisokeꞌni iitta hexxeexxa koꞌo afeeki manji ifi laꞌo afebaashsha assee hedaamman. Isayaasi tinbiite haasoꞌemmashshanni, Yesuusi iitta hexxeexxa koꞌo afeeka manna fayyiseꞌeen, ittan higgeen Magenokeꞌni addantaashsha asseꞌen. Tinni yaane techcho noꞌoꞌninna geltaꞌneexxa rakko, Yesuusi hitta uudaꞌneexxa maa barsiissa?

9. Ibraawiyaane 4:15, 16 keꞌni hedheeki yaadi, iimateꞌni hedheeki noꞌoki Lumoki Kahnaatichchi, qullichcha kadeebaake manjiinke beltiꞌaa qalbe giddixxenni mararaꞌneexxa leellishaaki hittate?

⁹ Ibraawiyaane 4:15, 16 yaansis. Yesuusi duuchchinii wodda noꞌaa mararaaxxa addata dandeennannon. Iitta hiyyo maa hiyyote? Marartichchake hinaaki manji wele manjoꞌni rakko geltaa wodda yaadaaken. Giriketike laagadinni “mararte” hitaaxxi hiyya weli manjixxa rakkonna yaaddo ifixxishsha asse uuda hitaaxxa tika affeen. (Phawuloosi Ibraawiyaane 10:34 keꞌni weli fakkaattaanxa Giriketixxa hiyya laꞌoonfateexxa uudi) Yesuusi hujeexxi masuwwa, isi manjokeꞌni geltaꞌneexxe rakkoꞌa hittee qico yaadaammaxxa leellishshaan. Isi manjo fayyisaammaki fayyisa hasissammanxee callabaan. Isi manjokee hedaamman, ittan gargaaroꞌaanna hasaamman. Fakkeennakeꞌe, Soomi abideeka manjichcho fayyisee wodda bayyanni hedheꞌe fayyisa dandeꞌamman, kaddomaleꞌe manjichcho konnee fayyiseeki biso isika tuqeeten. Dedha heddo wogga uduma, konne majichchika biso taakkaꞌa tuqeeki Yesuusite kada gopheebaan! Yesuusi mansha laqqaꞌnebaake manjichchiꞌa marareexxi, manni hogisaꞌneebaaꞌni gamakeꞌni adhdhe meꞌeexxi qofiba fayyiseen. Ittan, Yesuusi lekka isixxa indiddoti shanshitaꞌni umiki bassitaammaxxa aadde aaggeemmaxxa manjichcho, Feriisawooti fuggoxxinni haasoꞌeexxa yaana Yesuusi iseꞌa baasseen. (Mat. 8:3; Mar. 7:33; Luq. 7:44) Yesuusi bisokeꞌni koꞌo afeemmakanna jabaxxa cubbo hujeemmaka manna jibbaammabaan. Matanga isibaꞌa shinqaashsha hasaamman, ittan insaꞌnaꞌa mararte afeexxa kokeessaamman. Yesuusi noꞌaanna iittani mararaꞌneexxa addata dandeennannon.

NOꞌOKE LUMOKE KAHNAATICHCHIKA FAKKEENNA HORDONFANNO QICO

10. Techchixxe yannaꞌni mansha laqqabaakanna ille affabaaka manna gargaarannoxxa heenee yaanuwwa anfeenne? (Fakketanna uudi.)

¹⁰ Noꞌo Yesuusixxe hordofoole kandennaxxeꞌe, isishshanni welekee jaalalanna mararte leellishateꞌe woꞌlaana hasissaan. (1 Ph. 2:21; 3:8) Mansha laqqaꞌnebaakanna ille affabaaka manna fayyissa dandeennabeꞌnon, kaddoolenna manfasiinxe hedhonni insaꞌnee gargara dandeennannon. Fakkeennakeꞌe, Maxaafa Qullichchakeꞌni hundeessendeexxi borreessiluwwa taꞌixxe yannaꞌni 100 caalaake beesisiinke laagadinni afendaan. Ittan, ille affabaake manniꞌaa kinni bireeleti qophpheessendeexxi borreessiluwwa 60 iimi darre hedheeke laagadinni afendaan. Fuldaꞌneexxe noꞌoxxe viidiyuwwaꞌni konne manniꞌa 100 caalaake laagadini oodiyotiki ifisanjuwwi qophpheessemeen. Tinni qophphe mansha laqqabaakinna ille affabaaki manni Yihowwabaanna Belti isikibaꞌa shiqaashsha gargaartaan.

11. Yihowwaxxi orga Yesuusishshanni duuchchiinge manjiꞌa heddaꞌneexxa leellishshaꞌneeki hittate? (Ergantooletixxa Huje 2:5-7, 33) (Fakkuwwatanna uudi.)

¹¹ Yihowwaxxi orga duuchchiinga manjo gargaarateꞌe jabaxxa woꞌlaancho assateꞌni hexxeen. Yesuusi reyotenaaꞌni keꞌeechchi uduma, Phenxeqosixeke ayyaaniꞌa bukki hiyyeemmaki ardi duuchchi “ifi ifinge laagadinni” gammachchiissaaxxa odo laqaashsha manfasa duneexxa qalliyye. (Ergantooletixxa Huje 2:5-7, 33 yaansis.) Akeette isixxa hordoffeexxi, techchixxe yannaꞌni orga 1,000 caalaake laagadinni Maxaafa Qullichchakeꞌni hundeessendeexxa borreessiluwwa qophpheessitaꞌneen. Konne laagaduwwi giddiiꞌni mitti mitti, heenoki manji calli haasoꞌaaken. Fakkeennakeꞌe, mitte mitte Amerindiyaan hiyyemaaka laagaduwwa haasoꞌaaki Middikenna Bitaꞌike Ameerikaꞌni hedhaake heenoke manna callan. Kaddomaleꞌe, konnee laagaduwwa haasoꞌaꞌneeki manni gammachchiissaaxxa odo laqaashsha, konne laagaduwwi giddiiꞌni 160 iimi darre hedheeke laagadinni borreessiluwwa qophpheessendaꞌneen. Borreessiluwwa noꞌoxxi 20 iimi darre hedheeke Romaniyiinke laagaduwwinninna afendaan. Konnee laagaduwwa haasoꞌaake manni giddiiꞌni heddi Yihowwaa ergatemaꞌneen.

12. Techchixxe yannaꞌni Yihowwaxxi orga manjo gargaarateꞌe assitaꞌneexxi wele yaane heente?

¹² Yihowwaxxi orga gammachchiissaaxxa odo mannakee kulendaashsha assa calla kaddebaaki, dadumiinxi bala geltaa woddanna gargaarsa assitaan. Iitta hexxeexxi bala geltaa wodda rakko gelteexxa dayyuwwa gargaarateꞌe, heddi kuminni lakkoꞌemaaki manni ifi shiqisaan. Yihowwaxxi orga Mageni manjokee afeexxa jaalala adda egeꞌnateꞌe hasaaki manni bukki hiyyeꞌe, mageneeffataaka eloka bukkiiti galmanna qophpheessitaan.

NOꞌOKI LUMOKI KAHNAATICHCHI NOꞌOO GARGAARAAN

13. Yesuusi noꞌoo gargaaraaki mitti mitti oruwwi hoonte?

¹³ Noꞌoki eloki allalisanji Yesuusi, noꞌo duuchchiingixxe manfasiinxe hedhoꞌaa hasissaaxxe yaaneꞌaa miꞌlachcho uwwaan. (Yoh. 10:14; Eff. 4:7) Mitte mitte yanna hedho noꞌoxxeꞌni geltaaxxi yaane xoꞌa shiqqeexxe wiliildaꞌneexxe kirreshshanna caccabeeke shombooqishsha kandeenneshsha assitaaxxi hexxaan. Dedha jabaxxe dhibonaaꞌninna gonphe ifixxenaaꞌni kexxeexxa, ittan gubaꞌe giddo hedheeke mitte manjinni weli gonpheꞌe yoꞌoshsha yaandannoxxi hexxaan. Taꞌixxe yannaꞌni noꞌoo rakkissaꞌneexxenna yaadissaꞌneexxe yaaneꞌni kaddebaaki, ediꞌa hedheeke tasfaꞌni miꞌlachcho assa haꞌura dandeettaan. Yesuusi hitta hedheeke jeeji giddo hexxettexxa uudaaxxanna qalbe atixxi giddo hedheeka yaada duuchcha egeꞌnaaxxa qalliyyi. Yesuusi mararte afeemmaxxeꞌe ateꞌe gargaaraan. Fakkeennakeꞌe, gophattoxxa yanna manfasi qullichchi isikinni ateꞌe jajjabeessaan. (Yoh. 16:7; Tit. 3:6) Ittan lebendaaxxa, Yesuusi “uwwate kadeeke manninni” ittan wele addetike jaaluwwi darreeꞌni ateꞌe jajjabeessaan, kiphaan ittan gargaaraan.—Eff. 4:8.

14. Adde wonxannoxxa yanna qalliyya hasissaaxxi yaane hente?

¹⁴ Adde woxxoottole Yesuusi Lumoke Kahnaatichcho kada atiꞌa maa laꞌo affeexxa hedi. Yihowwa isoꞌo buttiꞌa ergeeki hedho isixxa wodote asse uwwaashsha calla kadebaaki, qullichcha kadebaake manjiinke beltoꞌni hitta hexxeexxi rakko geltaꞌneexxa adda egeꞌnaashshate kaddeexxa qalliyyi. Cubboti yookiin gonphe ifixxinni adde wonxanno wodda Yesuusi “hasissaaxxe yannaꞌni” noꞌoo gargaaroꞌa qophphoꞌee heqqaꞌneen.—Ibr. 4:15, 16.

15. Yihowwanaaꞌni bayyateeki mitti manji gubaꞌetibaꞌa higaashsha gargaarteexxi yaane maachcho kaddeexxa leellishaaka fakkeenna haasoꞌi.

¹⁵ Yesuusi, Yihowwake gedhebi giddiiꞌni miliqeeka manjo ardi isiki hasaashshanna gargaaraashsha akeekaan. (Mat. 18:12, 13) Isitefaanoxxab hedhotixxa baranno uundo. Gubaꞌetenaaꞌni fulchineexxe 12 wogga uduma bukkii marateꞌe hedeen. Isinna iitta hiyyeen “Sodaatonnolenna, jaalala afeeke Yihowwake ardixxe una kadonnaꞌa haseennan. Afemennexxi geedhe anee haasoossiteeki sodaatabeꞌnoshsha assaake orinniten. Mitte mitte yanna Yihowwaꞌa waalennexxeꞌe ifiꞌni yaadaannan, ittan adde woxonnaatemman. Kaddomaleꞌe, gubaꞌetixxi geedhe Yihowwanna Yesuusi jabaate ossonnaa hansaꞌneexxa qalliyyannoshsha assiteen. Gubaꞌetibaꞌa higennexxa yanna dayyuwwa aneenna mini hado anka gammashshoti adhdhiteen. Udumiiꞌni anxi miniinxi amanna Maxaafa Qullichcha barata saffeen, taꞌa maate anxinni welti Yihowwaa mageneeffatateꞌni hedhennen.” Noꞌoki jaalalati Lumoki Kahnaatichchi, aadde aageeki manni gubaꞌetibaa higateꞌe hasisaaka gargaarsa alfaꞌneexxa toꞌataꞌneexxa egeꞌna hittatta gammachchiissaaxxe yaane!

16. Iitta hedheeka marartetika Lumoka Kahnaatichcho affettexxee galateeffattaatteki mayeete?

¹⁶ Yesuusi butta hedhamma wodda hasissaaxxe yannaꞌni heddo manna gargaareen. Techchonna gargaarsi noꞌa hasissaaxxa yanna noꞌoo gargaaraaxxa mitte qalbenni addantaannen. Ittan shiqixxe yannaꞌni haarooxxi butta daggaan, okkone wodda Magenokee ajajemaaki manni cubbotenaaꞌninna cubbo idageexxe yaanenaaꞌni qullo fullaashsha gargaaraan. Mageni noꞌoki Yihowwa noꞌa afeexxe jaalalanna marartenni, Belti isiki noꞌoke Marartetike Lumoke Kahnaatichcho kadaashsha baalloonseexxeꞌe lumminsee galateeffantaannen!