“Manfasiinxa Mittunte Heqqateꞌe Jabaxxa Woꞌlaancho Asse”
HAWAARYA Phawuloosi Effesoonika Kirsitaana “weliꞌaan weli jaalalati dandeettine hedhdhe, mitteba guduunfaake nageꞌinke usurrinni manfasiinxa mittunte heqqateꞌe jabaxxa woꞌlaancho asse” hiyyeꞌe jajjabeesseen.”—Eff. 4:2, 3.
Noꞌo anfeennexxi “mittunte” “manfasiinxen.” Iitta hiyyonna mittunte afa dandeennenneki, Mageniinke manfasike gargaarsinniten hiyyoten. Kaddomaleꞌe, hawaarya Phawuloosi, hiyyemmashshanni, mittunte noꞌoxxa heqqateꞌe jabaxxa woꞌlaancho assa hasissaan. Heqqaaki ayyete? Duuchchingi Kirsitaani “manfasiinxa mittunte heqqateꞌe jabaxxa woꞌlaancho” assa hasissaan.
Fakkeennakeꞌe, mitti manji haarooxxa kaamole atiꞌa uwween hino. Tennee kaamole elo qicinni abidatixxa maganne afeeki ayyete? Atenden. Ati kaamole tennee seeriki abida gophpheeꞌnaꞌa enqendoole atiꞌa uwwemmaka manjo aallattabexxon.
Weli fakkaattaanxa, noꞌo anfeennexxi mittunte uwwa Mageniinxe kaddoolenna, duuchchingi isee heqqatixxa maganne anfeennen. Mitti dayyinni yookiin mitte dayyonni weli gonphonnole, ‘yaane tikati manfasiinxa mittunte heqqateꞌe jabbaxxa woꞌlaancho assaanne?’ hine ifi qora hasissaan.
MITTUNTE HEQQATEꞌE ‘JABAXXA WOꞌLAANCHO’ ASSE
Phawuloosi hiyyemmashshanni, manfasiinxa mittunte heqqateꞌe jabaxxa woꞌlaancho assa hasissaaxxi yanna hexxaan. Giddiiꞌninni iitta assa haꞌurtaaki, mitti dayyi yookiin mitte dayyo noꞌoo mufachchiinsaa woddaten. Mittunte heqqateꞌe noꞌoo mufachchiseeka manjo duuchchinii wodda marre haasoossa hasissaa? waawwot. ‘Weli gonpheennexxa yaane haasoꞌa, mittunte jabaattaashsha assitaa moo, yaane yoxxaꞌni metaashsha assita?’ hiteꞌe ifi qori. Mitte mitte wodda yaane tuffate saꞌa yookin gattowwaali hiyya eloxxen.—Fak. 19:11; Mar. 11:25.
Weli gonpheennexxa yaane haasoꞌa, mittunte jabaattaashsha assitaa moo, yaane yoxxaꞌni metaashsha assita?’ hiteꞌe ifi qori.
Hawaariya Phawuloosi hiyyemmashshanni, ‘weliꞌaan weli jaalalati dandeenne hedha’ hansaannen. (Eff. 4:2) Mitti maxaafi tenne hiyya “insaꞌneꞌe heꞌneeshshanni adhdhe” hiyyee tikeen. Iitta hiyyonna, noꞌoki addetiki jaaluwwi noꞌoshshanni qulliyye kaddeebaxxa addatate hiyyoten. Dhugaaten, “haarooxxa ayyunte” oddoꞌwateꞌe jabaxxa woꞌlaancho assinannon. (Eff. 4:23, 24) Kaddoolenna, woꞌma kaddee garinni iitta assaaki ayyinna hedhebaan. (Rom. 3:23) Tennee addantaannole, weliꞌaan weli dandeꞌatinna, gattowwaali hiyyati “manfasiinxa mittunte” heqqa dandeennannon.
Weli manji noꞌoo mufachchiiseexxa yaane gattowwaali hinaannolenna tuffaante saꞌnaannole gubaꞌe giddo “nageꞌinki usurri” hedhaashsha assinannon. Effesooni 4:3 keꞌni usurra hiyyende tikendeexxi Giriketixxi hiyya Qolaasiysi 2:19 keꞌni “morgeꞌa” hiyyende tikendeen. Morgeꞌi micci, weliꞌaan weli abide hedhaashsha assitaaxxe jabaxxe yaanen. Weli fakkaattaanxa, oddo noꞌoxxeꞌni fedheexxi gargaruunte hexxoolenna, nageꞌinna dayyuwummatike mabariꞌa anfeennexxi jaalala, mittunteti heꞌnannoshsha assitaan.
Tenneꞌaa mitti addetiki jaali mufattattoshsha yookiin hifattattoshsha assitaaxxa yaane assa wodda, yookinni isini hifataa wodda, gonphe isixxeꞌni miꞌlachcho assati irra isoo mararteti abidi. (Qol. 3:12) Manji duuchchi qullichcha kada gophemmaxxeꞌe, atinna wele manjo mufachchiissaaxxa yaane haasoottattoxxi egeꞌnendeexxen. Tenne yaane duuchchinii wodda qalli hinaannexe kaddoole, “Manfasiinxa mittunte Heqqateꞌe Jabaxxa Woꞌlaancho” assa dandeennannon.