Qajeelto Kaddebaaxxa Hedino Injifata Dandeetatton

1-2. Mitte mitte yanna hawaarya Phawuloosixxe qalbebaꞌa hitta hedheeki yaadi dagaammaꞌa? Jeeji noꞌokinna Phawuloosi ifiꞌa borreesseexxe yaanenni fakkaataki hittate? (Roome 7:21-24)

HAWAARYA Phaawuloosii heddatto wodda sammo atixxibaꞌa daggaꞌneexxi yaane maachcho? Phawuloosi worba miisoonichcho, jabaxxa egeꞌna afeeke barsiisanjo yookiin Maxaafi Qullichchiinxe kuta kadeeka heddo maxaafuwwa borreesseeke manjo ateꞌni fakkaataꞌne? Iitta heddoottole tinni dhugaaten. Kaddomaleꞌe, Phawuloosi yaadeemmaxxinna ifiꞌni adde woxeemmaxxi yanna hexxemman. Noꞌoshshanni isoonna mitte mitte yanna qajeellichcha kadebaaki yaadi rakkisaamman.

² Roome 7:21-24 yaansis. Phawuloosi, Roomike manniꞌa borreesseexxe daddaabbeꞌni noꞌo giddiiꞌni heddo manjoꞌni laqemaꞌneeka yaada borreesseen. Isi addatemeeke Kirsitaana kadoolenna, gama mittenaaꞌni Mageniinxa fedhii muuxatixxe jabaxxe halchanni wele darrenaaꞌni kinni elobaaxxa yaane hujaashsha tirtirsaꞌneeke fuggoke yaadinni rakkataamman. Tennee calla kaddebaaki, Phawuloosi edo hujeexxe balleessanaaꞌni kexxeexxa qajeela kadebaake yaadinninna isonaaꞌni gargariti higgaꞌnebaaxxe jabaxxe rakkonni hega uudemaamman.

3. Tenne qoꞌneꞌni mariꞌantaannexxi yaanuwwa maachcho? (“Ifisemeeka Yaada” hitaꞌneexxa kollonna uudi.)

³ Phawuloosi, giddo isixxa nageꞌa kuttaaxxi yaane hexxoolenna, qajeellichcha kadebaaki yaadia hedino isixxa boojiꞌoꞌaa waaleemmabaan. Tenne qoꞌneꞌni konneechchinni buttiꞌaa hedheeka qortumuwwa mariꞌantannon: Phawuloosi mitte mitte yanna ‘laꞌo afeebaake’ manjishsha asse ifi hedaashsha assiteexxi yaane maachcho? Phawuloosi qajeellichcha kadebaaka yaada injifataashsha gargaarteexxi yaane maachcho? Qajeellichcha kadebaaka yaada injifantannoki hittate?

PHAWULOOSI IFIꞌNI YAADAASHSHA ASSITEEXXI YAANE MAACHCHO?

4. Phawuloosi ifiꞌni yaadaashsha assiteexxi yaane maachcho?

⁴ Edo hujeexxi balleessa. Phawuloosi, Kirsitaana kadebaa edi darre Saꞌooli hiyyemaamman, okkone wodda yannati uduma ifiꞌni yaadaaxxa yaanuwwa hujeen. Fakkeennakeꞌe, Isxifaanoosiꞌi kinjiki gannaꞌni shinneexxa yanna isinna gammashshoti uudaamman. (Huj. 7:58; 8:1) Ittan Saꞌooli heddo Kirsitaanaꞌni shorrichcho geessiseꞌeen.—Huj. 8:3; 26:9-11.

5. Edo hujeexxi balleessa Phawuloosii miiteeki hittate?

⁵ Phawuloosi Kirsitaana kadeechchi uduma, edo hujemmaxxe balleessaꞌnaaꞌni kexxeexxa mitte mitte wodda yaadaamman. Edi wodda mararte belo Kirsitaanakeꞌni shorrichcho geessisaammaxxi yaane, udumiiꞌni yanna saxxaꞌni metaashshanni isooꞌo diipho kuta gophpheebaan. Fakkeennakeꞌe, 55 GW baa, Qorontoosike Kirsitaaniꞌa, taakkaa daddaabbe borreessee wodda “Ani Mageniinxa gubaꞌe shorraannake manjo kadennaxxeꞌe hawaaryaate duuchchanaaꞌni jala hedhennekenna hawaaryaatichcho hiyyemeꞌe yeꞌema hasissaake manjobaan” hiyyeen. (1 Qo. 15:9) Effesoonike Kirsitaaniꞌa borreesseexxe daddaabbeꞌni ifi ‘Qulliyye duuchchanaaꞌni jala hedhenneken’ hiyyeen. (Eff. 3:8) Ximootwosiꞌa daddaabbe borreessee wodda kinni “Mageno yowwaannake, shorraannakenna kijiba manjomman” hiyyeen. (1 Xi. 1:13) Phawuloosi gubaꞌe mammaremaꞌni toꞌataamma wodda edo shorraammake manninni yookiin shorraamma mannike mini haduwwinni afemaa wodda maachchi isoꞌni laqemaaxxa hedde.

6. Phawuloosi yoꞌoshsha yaadaashsha assiteexxi wele yaane heente kadda? (Lekkatibaꞌika qallassanjonna uudi.)

⁶ Maala isika ottaꞌneexxi ute. Phawuloosi isi yoꞌoshsha yaadaashsha assiteexxa yaane ‘maala isika ottaꞌneexxe utenni’ fakkeesseen. (2 Qo. 12:7) Phawuloosi isoꞌni gelteexxi yaane maachcho kaddeexxa kulanna gophoole, isi laꞌoonfateexxi hiyya; bisiinxa dhibo, qalbe isixxa miiteexxa yaane yookiin wele isooꞌo miitaꞌneexxi yaane hexxeexxa ifissaaxxeenb

7. Phawuloosi duuchchinii wodda eloxxa yaane assoꞌa hasaaꞌnaanni yaane isoꞌni haꞌurtaammaki mayeete? (Roome 7:18, 19)

⁷ Qullichcha kada gopha. Phawuloosi Addaaminaaꞌni dhaaleexxi cubbo hasaꞌneexxa eloxxa yaane assa isoꞌni haꞌurtaashsha assitaamman. (Roome 7:18, 19 yaansis.) Phawuloosi eloxxa yaane assa hasoolenna, cubbichcha kadeeki maali isiki hasaꞌneexxa eloxxa yaane assabaashsha isooꞌo udumiꞌa harkisaamman. Phawuloosi maali isikixxi yorte isixxi eloxxa yaane assatixxi halchanna duuchchinii wodda weli falammaꞌneexxa addateꞌeen. Kaddoolenna Phawuloosi eloxxa yaane assateꞌe jabaxxa woꞌlaancho assaamman. (1 Qo. 9:27) Isi hasaꞌnebaaxxi elobaaxxa yaane assatixxi yorte sammo isixxibaꞌa daggaa wodda hittee qico yaadaaxxa hedde!

PHAWULOOSI QAJEELLICHCHA KADEBAAKA YAADA INJIFATAASHSHA GARGAARTEEXXI YAANE MAACHCHO?

8. Phawuloosi gonphe ifixxa injifatateꞌe maa asseexxa daddaabbe isixxi maa leellishsha?

⁸ Phawuloosi manfasi qullichchi, isinna isiki addetiki jaaluwwi elobaaxxa yorte faachcheeffantaashshanna injifantaashsha gargaaraaki hittate kaddeexxa adda hedeexxa daddaabbe isixxi leellishshaan. (Rom. 8:13; Gel. 5:16, 17) Phawuloosi, Kirsitaani Yihowwaꞌa gammachchiisa hasaꞌnoole, heene elobaaxxe halchanaaꞌninna hujenaaꞌni ifi heqqedha hasissaaxxa heddole haasoꞌeen. (Gel. 5:19-21, 26) Phawuloosi gonphe ifixxa hedeexxi, Maxaafi Qullichchi giddo hedheeka gorsa qoꞌniseexxinna gonphe injifataashsha gargaaraaka oruwwa adda hedeexxi egeꞌnendeexxen. Welekeꞌe uwweeka gorsa isinna hujeteꞌni hosiseexxa addata dandeennannon

9-10. Phawuloosi yaaddoti ifiꞌni adde woxabaashsha gargaarteexxi yaane maachcho? (Effesooni 1:7) (Fakketanna uudi.)

⁹ Phawuloosi ifiꞌni yaadaammaxxi mitte mitte yanna hexxoolenna, gammashshoti hedhaashsha assitaaxxi heddo yaane hexxemman. Fakkeennakeꞌe bayya hexxeexxe gubaꞌuwwanaaꞌni eloxxi rippoorte daggaa wodda gammadaamman. (2 Qo. 7:6, 7) Addetike jaaluwwinni afeemmaxxe mittunteꞌninna gammadaamman. (2 Xi. 1:4) Ittan Yihowwanna isoꞌni gammadaꞌneexxa egeꞌneemman. Dhugaaten, Phawuloosi “caꞌichchi wodaninni” Magenokeꞌe ergatema dandeꞌeexxeꞌe yoꞌoshsha gammadaamman. (2 Xi. 1:3) Matanga Roome usurriinke mineꞌni hedheꞌe addetika jaaluwwa isika “Goottakeꞌni gammadde” hiyye jajjabeesseen. (Flp. 4:4) Phawuloosi borreesseexxi daddaabbe isi duuchchinii wodda isoꞌni gelteexxa rakkonna hujeeka dedha calla hedaammabaaxxa leellishshaan. Qajeellichcha kadebaaki yaadi sammo isixxibaꞌa dagaa wodda qajeellichcha yaadaꞌni miꞌlachcho assaamman.

¹⁰ Phawuloosi qajeellichcha kadebaaka yaada injifataashsha gargaarteexxi wele yaane kinni wodo isiꞌa qofinni uwwendeexxe uwwashsha asse addataten. (Gel. 2:20; Effesooni 1:7 yaansis.) Tennenaaꞌni kexxeexxa, Yesuusi Kirsitoosi darreeꞌni Yihowwa isiꞌaa gattowwaali hiyyaaxxa addataamman. (Rom. 7:24, 25) Phawuloosi edo balleessa hujeekenna, qullichcha manjo kadanna gophoole, “qullitte ergachcho” gammashshoti Magenokeꞌe shiqisa dandeꞌeen.—Ibr. 9:12-14.

11. Phawuloosiki fakkeenni ‘noꞌoo jajjabeessaan’ hinaanneki mayeete?

¹¹ Phawuloosishshanni noꞌo giddonna elokinna elobaaki yaadi duuchchinii wodda weli moromaꞌneeshsha fakkaattaaxxi hexxaan. Noꞌoꞌni iitta fakkaattaaki hendaannexxe, assinaannexxenna haasoonaannexxe yaanenaaꞌni kexxeexxinnite kada dandeettaan. Noꞌonna Phawuloosishshanni “Ani hittatta geeraremeenne manjosi!”, hinannoxxi hexxaan. Eliizac hiyyendaaxxi 20 wogabaa hexxeexxi dayyo iseꞌni laqemaꞌneeka yaada uuddaaxxa iitta hiteen: “Anee jajjabeessiteexxi yaane Phawuloosi hitta hedhee jeeji giddo hedhemmaxxa hedaten. Iitta hedheeki yaadi laqemaꞌneeki aneꞌni calla kadebaaxxa egeꞌna hafuura adhdhannoshsha assiteen. Tinni kinni Yihowwa ardi isiki hitta hedhee jeeji giddo hedheexxa egeꞌneexxa leellishshaaxxen.” Noꞌonna qajeellichcha kadebaaki yaadi laqemoolenna, Phawuloosishshani caꞌichcha wodananna gammashsho anfannoshsha maa assa dandeennano?

QAJEELLICHCHA KADEBAAKA YAADA INJIFATA DANDEENNANNOKI HITTATE?

12. Qajeellichcha kadebaaka yaada injifatateꞌe duuchchini wodda maa assa hasissa?

¹² Manfasiinxe hedhoꞌa kaddaaxxa yaanuwwa assatixxa aadda duuchchinii wodda nossedhdhe. Manfasiinxa sagale itatixxa eloxxa aada nosseꞌnanno wodda qajeela kadee yaadaꞌni irran caala miꞌlachcho assinannon. Iitta hexxeexxa aada, noꞌoke bisixxa fayyunte heqqedhateꞌe assinaannexxe yaanenni welti fakkeessa dandeennannon. Eloxxa sagale indaannole, duuchchini wodda ispoorte hunjaannolenna eloka diipho diinphaannole, sammo noꞌoxxeꞌni eloxxi yaane laqendaashsha assitaan. Weli fakaataanxa, noꞌo duuchiingi duuchchinii wodda; Mageninxa Qaale yaansinsaannole, gubaꞌeteꞌe qoophpheesseꞌnannole, afeemaannolenna yaada uunaannole, ittan ergatensha fullaannole qajeellichcha kadebaaka yaada injifanteꞌe gammashsho alfa dandeennannon. Iitta fakkaattaaxxa yaanuwwa assati qajeellichcha kadebaaka yaada injifanteꞌe gammandeenneke kada dandeennannon.—Rom. 12:11, 12.

13-14. Mitti mitti addatemeeki Kirsitaani manfasiinxe hedhoꞌa hasissaaxxa yaanuwwa duuchchinii wodda assatixxa aada nossedhati laꞌo alfeeki hittate?

¹³ Jabake kanseretike dhukkubinni dhibemaammaka 39 woggaaka Jooni hiyyeemaake dayyika fakkeenna uundo. Taakka wodda qajeela kadebaaki yaadi sammo isixxibaa dagaꞌni isoo mekki assaammaan. ‘Tenne kaꞌumummatixxe yannaꞌni hitta iitta dhibemanno?’ hiyyaꞌni ifi qoraamman. Eettene yanna belti isiki sase wogga callamman. Jooni qajeellichcha kadebaaka yaada injifataashsha gargaarteexxi yaane maachcho? Jooni iitta hiyyeen: “Dhibemoonnolenna mini hadi anki manfasiinxe hedhoꞌa hasissaaxxa yaane duuchchinii wodda assaashsha gargaaraannan. Duuchchiniinxe bukkiiꞌni afemmaannan, torba torbandeꞌni ergatensha fullaannan, ittan progiraama hordofa haꞌurtoolenna duuchchinii wodda mini hadixxa mageneeffachcho asseꞌnaannan.” Saxxemmaxxa yanna hedaꞌni Jooni iitta hiyyeen: “Sodaꞌa anenaaꞌni baxxeechchi uduma, aneꞌe memmi mekki assaammaki yaadi, Yihowwake jabeennaꞌninna jaalalaꞌni tukkeessemeen. Yihowwa aneꞌe jabeessemmashshanni haꞌnoonna jabeessaan.”

¹⁴ Iimiiꞌni uundeennaxxi Eliiza iitta hiteen: “Duuchchinii wodda gubaꞌe maraannan, ifixxa Maxaafi Qullichchiinxa qoꞌne assedhaannan, ittan Yihowwa kadha anxa laqaꞌneexxanna qalbe giddixxenni aneꞌe eeyyaꞌneexxa ifi qalli assaannan. Tinninna gammadannoshsha assiteen.” Afiriki giddo rogiinke iimike toꞌatallo kadeꞌe ergatemaꞌneeki Nolaani, isoonna isixxa miniinxa ama gargaarteexxa yaane haasoꞌeen: “Adde wonxannoxxa yannanna Yihowwabaꞌa kadhata, Maxaafa Qullichcha yaansisa, gubaꞌe maranna ergatensha fula waalleꞌe egennebeꞌnon. Yihowwa gammashshoti heꞌnannoshsha noꞌoo gargaaraꞌneexxa duuchchinii wodda leellishaamman. Yihowwa noꞌoo gargaaraaxxanna eebbisaaxxa qalli hiyyateꞌe woꞌlaannaannan, tennee yaane assaaki hittate kaddeexxa egeꞌna gonphonnolenna, iitta assaaxxa kinni egenneennen.”

15. Qajeellichcha kadebaaka yaada injifatateꞌe maa assa hasissaaxxi hexxa? Fakkeenniki kuli.

¹⁵ Qajeellichcha kadebaaka yaada injifatateꞌe hundaayye kaddeexxe yaanuwwanaaꞌni caaldeexxa yaane assa hasissaan. Fakkeennakeꞌe, hidhi atee dhibeen hino. Dhibo tinni atee waaldaashsha, manji atee qushshaashsha assatenaaꞌni caaldeexxa yaane assa hasissaan. Hidhi atee dhibaꞌneeki mayeete kaddeexxa egeꞌnateꞌe, mitte mitte qoꞌne assanna matanga dokiteere mare haasoossa hasissaaxxi hexxaan. Weli fakkaattaanxa, qajeellichcha kadebaake yaadanaaꞌni hafuura adhdhateꞌe, Maxaafa Qullichchanna borreessiluwwa noꞌoxxa qoꞌnisa, ittan mitte galfateeka Kirsitaana haasoossa hasissaan. Noꞌoo gargaartaaxxa wele yaanuwwanna uundo.

16. Qajeellichcha kadebaaka yaada heddattoshsha assitaꞌneexxa yaane gargari hiissiteꞌe egendattoshsha gargaartaaxxi yaane maachcho? (Faaro 139:1-4, 23, 24)

¹⁶ Hassaattexxa yaane egendattoshsha Yihowwa gargaaroꞌa kadhat. Mootichchi Daawiti Yihowwa isooꞌo adda egeꞌneexxa hubateemman. Tenneꞌa Daawiti isooꞌo ‘yaadissaꞌneexxa’ yaane egeꞌnaashsha Yihowwa gargaaroꞌa kadhateemman. (Faaro 139:1-4, 23, 24 yaansis.) Atinna atee yaadissaꞌneexxa yaanuwwa egendattoshshanna tennee yaanuwwa injifattattoshsha Yihowwa atee gargaaroꞌa kadhata dandeettatton. Ifi iitta hiteꞌe qori: ‘Ani yaadannoshsha assitaꞌneexxi yaane maachcho? Duuchchinii wodda qajeellichcha kadebaaki yaadi sammo anxibaꞌa dagaashsha assitaꞌneexxi yaanuwwa hexxee? Qajeellichcha kadebaaki yaadi dagaa wodda isoo balleessati irra sammi hiyyee hedaanne?

17. Jajjabeesaake yaadaꞌni miꞌlachcho assitattoshsha gargaaraaki qoꞌnissattoki umi yaaduwwi hoonte? (Fakketanna uudi.)

¹⁷ Atee gargaaraake Maxaafi Qullichchiinke yaadaꞌni qoꞌne assi. Yanna yannandeꞌni mitte mitte Yihowwaka adabuwwa qoꞌnisa laꞌo affeexxa hubattattoxxi hexxaan. Fakkeennakeꞌe, hawaarya Phawuloosi wodonna Yihowwaxxa gattowwaali hedati lumoxxa laꞌo alfeen. Atinna iitta assa dandeettatton. Qoꞌne Kiphaaka Miya Yihowwaxxe Naqaasheꞌa, Heqqecatixxe Xellephoke Maabirika Borrotika Fulchanjo (Ingilizuffati) yookiin Maxaafa Qullichcha qoꞌnisateꞌe ittan laagadi atikinni afendaaxe borreessiluwwaꞌni; Mageniinxa mararte, Gattowwaaliinna addatendeexxa jaalala hiyyaake yaaduwwaꞌni qoꞌne assi. Atiꞌa laꞌo affeexxa borreessile affettechchi uduma deetabexxoshsha borreessiteꞌe abixxi, qallassanjo atika leellaaba edo uggi, ittan yaaddattoxxa yanna borreessitettaxxe borreessileꞌni qoꞌne assi. Okkooꞌni yaansissettexxa yaane hujeteꞌni hosisateꞌe woꞌlaan.—Flp 4:8.

18. Mitti mitti Kirsitaani laꞌo affeexxa hubateexxi hitta hexxeexxe qoꞌnetixxe projekte?

¹⁸ Iimiiꞌni uundeennaxxi Eliiza Iyyoobike fakkeennaꞌni ifixxa qoꞌnetixxa projekite assiteen. Isenna iitta hiteen: “Iyyoobika raaga adda hedennen. Heddo rakko weli duuka isoꞌni gelteen. Kaddomaleꞌe, Iyyoobi yoꞌoshsha yaadoolenna matanga rakko isoꞌni geltaꞌneeki mayeete kaddeexxa egeꞌna gophoolenna Yihowwabaꞌa uuda ijjenda waaleemmabaan.” (Iyo. 42:1-6) Iimiiꞌni uundennake Noolanixxi miniinxi ama Dayani iita hiteen: “Aninna anki miniinki anni Yihowwabaꞌa Shiqi hiyyaꞌneeka maxaafa laꞌoonfanteꞌe qoꞌnetixxa projekite assinaannan. Faariki odulchuwwa giissammake manjishsha Yihowwanna noꞌoo giisseꞌe toggi assaꞌneexxeꞌe yoꞌoshsha gammandennen. Ifiꞌni yaadati irra, Yihowwa noꞌoo toggi assaꞌneekenna eloke manna kandannoshsha assaꞌneeke oraꞌni miꞌlachcho assateꞌe woꞌlaannennen. Tinninna edi irra isibaꞌa shinqannoshsha assiteen”—Isa. 64:8.

EDIꞌA HEXXEEXXA YANNA QALBE MITTEN HEQQEDHDHE

19. Mitte egeꞌna hasissaaxxi yaane heente?

¹⁹ Gubaꞌe marronnolenna, Maxaafa Qullichcha qoꞌninsonnolenna, ergatensha fullonnolenna, mitte mitte yanna yaadissaaxxi yaanenna qajeellichcha kadebaaki yaadi sammo noꞌoxxibaa dagaaxxa egeꞌna hasissaan. Mitte mitte barra ifiꞌni adde wonxannoxxi hexxaan! Kaddomaleꞌe, Yihowwake gargaarsinni qajeellichcha kadebaaki yaadi sammo noꞌoxxibaꞌa dagaa wodda ifi iimiiꞌni hoyyedha dandeennannon. Yihowwa eloke jaalo noꞌoke kademmaxxeenna isiꞌa assinaannexxe yaaneꞌni isi gammadaaxxa egenneennaxxeꞌe duuchchinii wodda gammandaꞌni heꞌnannoxxa buuto anfeennen.

20. Maa assateꞌe mudhdhiteette?

²⁰ Taꞌa yoona edo hunjennexxe balleessaxxe sultonni dagaaki qajeellichcha kadebaaki yaadi, rakko noꞌoni geltaꞌneexxi yookiin dhaallennexxi cubbo noꞌoo boojiitabaashsha ifi heqqedhateꞌe murteesseꞌno. Yihowwa qajeellichcha kadebaake yaadinni liqiinsemmabeꞌnoshsha noꞌoo gargaaraan. (Far. 143:10) Ediꞌa haarooxxe buttaꞌni hendaannexxi yaane duuchchi noꞌoo gammachchiissaaxxe kaddaan. Okkone wodda gorsa diiphiiꞌni keꞌnannoki yaaddotite keddebaaki, jaalalatike Mageno noꞌoke Yihowwaꞌa gammashshoti ergatemateeten!