ეზეკიელი
23 კვლავ მეუწყა იეჰოვას სიტყვა: 2 «კაცის ძეო, იყო ორი ქალი; ისინი ერთი დედის შვილები იყვნენ;+ 3 ეგვიპტეში გამეძავდნენ.+ ახალგაზრდობიდანვე მეძაობდნენ. იქ დაუჭყლიტეს ძუძუები, იქ დაუსრისეს ქალწულობის მკერდი. 4 უფროსს ოჰოლა* ერქვა, უმცროსს — ოჰოლიბა*. ჩემები გახდნენ ისინი და გააჩინეს ვაჟები და ასულები. ოჰოლა სამარიაა,+ ოჰოლიბა კი — იერუსალიმი.
5 ოჰოლა მაშინ გამეძავდა,+ როცა ჯერ კიდევ მე მეკუთვნოდა. ილტვოდა თავისი ვნებიანი საყვარლებისკენ,+ მეზობელი ასურელებისკენ.+ 6 მისი საყვარლები მმართველები და ლურჯ სამოსში გამოწყობილი გამგებლები იყვნენ — ცხენებზე ამხედრებული მიმზიდველი ჭაბუკები. 7 მეძაობდა ის ასურეთის გამორჩეულ ვაჟკაცებთან; თავისი ვნებიანი საყვარლების საზიზღარი კერპებით* თავი წაიბილწა.+ 8 არ შეუწყვეტია ეგვიპტეში ახალგაზრდობის დროს დაწყებული მეძაობა; წვებოდნენ მასთან, ქალწულობის მკერდს უსრესდნენ და ვნებიანად სჩადიოდნენ გარყვნილებას მასთან.+ 9 ამიტომაც ჩავუგდე ის ხელში თავის ვნებიან საყვარლებს, ასურელებს,+ რომლებისკენაც ილტვოდა; 10 გააშიშვლეს,+ ვაჟები და ასულები წაართვეს,+ ის კი მახვილით განგმირეს. ქალებს შორის სახელი გაუტყდა და მათ აღასრულეს მასზე განაჩენი.
11 როცა ეს მისმა დამ, ოჰოლიბამ, დაინახა, უფრო მეტად მიეცა ავხორცობას; მეძაობაში თავის დას გადააჭარბა.+ 12 ილტვოდა მეზობლებისკენ, ასურელებისკენ,+ საუცხოოდ ჩაცმული გამგებლებისა და მმართველებისკენ, ცხენებზე ამხედრებული მიმზიდველი ჭაბუკებისკენ. 13 მანაც გაიუწმინდურა თავი; ორივე ერთ გზას ადგა;+ 14 მეძაობდა და მეძაობდა. დაინახა მან კედელზე ამოკვეთილი კაცების გამოსახულებები, ალისფრად შეღებილი ქალდეველთა გამოსახულებები, 15 რომელთაც წელზე სარტყლები ერტყათ და დიდი თავსაბურავები ეხურათ; ყველანი მეომრებს ჰგავდნენ, ბაბილონელ მეომრებს, ქალდეაში დაბადებულებს. 16 დაინახა თუ არა, ვნება აღეძრა მათდამი და ქალდეაში მაცნეები გაუგზავნა მათ.+ 17 მოდიოდნენ ბაბილონელები მის სასიყვარულო სარეცელთან და ვნებააშლილნი ბილწავდნენ მას. მათგან წაბილწულს შეზიზღდა ისინი და ზურგი აქცია მათ.
18 უტიფრად რომ განაგრძობდა მეძაობას და შიშვლდებოდა,+ ისიც მის დასავით შევიზიზღე და მასაც ისევე ვაქციე ზურგი, როგორც მის დას.+ 19 ახსენდებოდა ახალგაზრდობა, ეგვიპტეში რომ მეძაობდა,+ და უფრო მეტ გარყვნილებას სჩადიოდა.+ 20 იმ ხარჭებივით ილტვოდა მათკენ, რომელთა პატრონებსაც ასო მამალი ვირის ასოსავით აქვთ და რომელთა სასქესო ორგანოც ულაყის სასქესო ორგანოსავითაა. 21 მისტიროდი იმ დროს, როცა ახალგაზრდა იყავი და ეგვიპტეში გარყვნილებას სჩადიოდი,+ როცა მკერდს ასრესინებდი, შენი სიყმაწვილის ძუძუებს.+
22 ამიტომ, ოჰოლიბა, აი, რას გეუბნება უზენაესი უფალი იეჰოვა: „აღვძრავ შენს ვნებიან საყვარლებს,+ რომელთაც ზიზღით ზურგი აქციე, და ყოველი მხრიდან მოგისევ მათ,+ 23 ბაბილონელებს,+ ყველა ქალდეველს,+ ფეკოდელებს,+ შოელებსა და კოელებს, აგრეთვე ასურელებს. ისინი ცხენებზე ამხედრებული მიმზიდველი ჭაბუკები, გამგებლები და მმართველები, მეომრები და საუკეთესო მრჩევლები არიან. 24 საომარი ეტლებით მოგრიალდებიან, თავს დაგესხმებიან დიდძალი ჯარით, დიდი თუ პატარა ფარებით და მუზარადებით. ყოველი მხრიდან მოგადგებიან; მივცემ მათ შენი გასამართლების უფლებას და თავიანთი კანონებით გაგასამართლებენ.+ 25 გადმოვღვრი შენზე ჩემს რისხვას და ისინი განრისხებულნი გაგისწორდებიან. დაგაჭრიან ცხვირსა და ყურებს, და ვინც გადარჩება, მახვილი მოუღებს ბოლოს. წაასხამენ შენს ვაჟებსა და ასულებს, და ვინც გადარჩება, ცეცხლი შთანთქავს.+ 26 სამოსელს გაგხდიან+ და ლამაზ სამკაულებს წაგართმევენ.+ 27 ბოლოს მოვუღებ შენს გარყვნილებას და შენს მეძაობას,+ ეგვიპტეში რომ დაიწყე.+ აღარ გაიხედავ მათკენ და აღარ გაიხსენებ ეგვიპტეს“.
28 აი, რას ამბობს უზენაესი უფალი იეჰოვა: „ჩაგაგდებ მათ ხელში, ვინც გძულს, მათ ხელში, ვინც შეგზიზღდა და ვისაც ზურგი აქციე.+ 29 სიძულვილის გამო ცუდად მოგექცევიან, დაიტაცებენ მთელ შენს ნაშრომს+ და შიშველ-ტიტველს დაგტოვებენ. ყველა დაინახავს შენს სიშიშვლეს, შენს თავაშვებულობას და შენს მეძაობას.+ 30 აი, ასე მოგექცევიან, რადგან მეძავივით დასდევდი ხალხებს+ და მათი საზიზღარი კერპებით იუწმინდურებდი თავს.+ 31 შენი დის სასმისს დაგაჭერინებ,+ რადგან მის გზას დაადექი“.+
32 აი, რას ამბობს უზენაესი უფალი იეჰოვა:
„შესვამ შენი დის სასმისს, ღრმას და განიერს;+
დაგცინებენ და მასხრად აგიგდებენ, რადგან სასმისი ამ ყოველივეთია სავსე;+
33 გშთანთქავს სიმთვრალე და მწუხარება,
თავზარდაცემისა და გაპარტახების სასმისი,
შენი დის, სამარიის, სასმისი.
ამას მე ვამბობ, — ამბობს უზენაესი უფალი იეჰოვა“.
35 ამიტომ აი, რას ამბობს უზენაესი უფალი იეჰოვა: „რაკი დამივიწყე და უპატივცემულოდ მომექეცი,+ იწვნევ შენი აღვირახსნილობისა და მეძაობის შედეგებს“».
36 იეჰოვამ მკითხა: «კაცის ძეო, განსჯი ოჰოლას და ოჰოლიბას+ და ამხელ მათ მათი საძულველი საქმეების გამო? 37 მრუშობდნენ,+ ხელები სისხლში აქვთ გასვრილი. ისინი მხოლოდ საზიზღარ კერპებთან კი არ მრუშობდნენ, მათ გამოსაკვებად თავიანთ შვილებსაც კი, რომლებიც მე გამიჩინეს, ცეცხლში წვავდნენ.+ 38 აი, კიდევ რა გამიკეთეს: იმ დღეს წაბილწეს ჩემი წმინდა ადგილი და შებღალეს ჩემი შაბათები. 39 როცა თავიანთი ვაჟები დახოცეს და საზიზღარ კერპებს მსხვერპლად შესწირეს,+ მოვიდნენ ჩემს წმინდა ადგილზე და ისიც წაბილწეს+ იმავე დღეს. აი, რა ჩაიდინეს ჩემს ტაძარში. 40 მაცნეც კი გაგზავნეს შორიდან კაცების მოსაყვანად.+ ისინი გზაში იყვნენ, შენ რომ იბანავე, თვალები შეიღებე და სამკაულებით მოირთე.+ 41 დიდებულ ტახტზე დაჯექი,+ წინ სუფრა გქონდა გაშლილი+ და ზედ ჩემი საკმეველი+ და ზეთი გელაგა.+ 42 უდარდელი ხალხის ხმა გაისმა, მათ შორის იყვნენ უდაბნოდან მოყვანილი ლოთები; ქალებს სამაჯურები გაუკეთეს და ლამაზი გვირგვინები დაადგეს.
43 მაშინ ვთქვი მასზე, მრუშობით დაქანცულზე, ის არ შეწყვეტს-მეთქი მრუშობას. 44 მოდიოდნენ და მოდიოდნენ მასთან, როგორც მეძავთან დადიან. აი, ასე მოდიოდნენ ოჰოლასთან და ოჰოლიბასთან, თავაშვებულ ქალებთან. 45 მართალი კაცები მას მრუშობისა+ და სისხლის ღვრისთვის+ საკადრის განაჩენს გამოუტანენ; მრუშები არიან და ხელები სისხლში აქვთ გასვრილი.+
46 აი, რას ამბობს უზენაესი უფალი იეჰოვა: „აღდგება ჯარი მათ წინააღმდეგ და საქმეს ისე გაუხდიან, რომ გაიძარცვონ და მათ დანახვაზე ყველას თავზარი დაეცეს.+ 47 ჯარი ქვებს დაუშენს მათ+ და მახვილით ამოხოცავენ; გაუწყვეტენ ვაჟებსა და ასულებს+ და ცეცხლს მისცემენ მათ სახლებს.+ 48 ბოლოს მოვუღებ თავაშვებულობას იმ მიწაზე, ჭკუას ისწავლის ყველა ქალი და არცერთი მათგანი არ მოგბაძავთ თავაშვებულობაში.+ 49 გაწვნევინებენ ისინი თქვენი თავაშვებულობისა და საზიზღარ კერპებთან ჩადენილი ცოდვის შედეგებს. მაშინ გაიგებთ, რომ მე ვარ უზენაესი უფალი იეჰოვა“».+