მეფეები — წიგნი პირველი

14 იმ დროს იერობოამის ვაჟი აბია ავად გახდა. 2 სთხოვა იერობოამმა ცოლს: „ისე ჩაიცვი, რომ ვერ გიცნონ, რომ ჩემი ცოლი ხარ. წადი შილოში ახია წინასწარმეტყველთან, რომელმაც მიწინასწარმეტყველა ამ ხალხზე გამეფება.+ 3 თან წაიღე ათი პური, კვერები, ერთი ქილა თაფლი და მიდი მასთან, ის კი გეტყვის, რა მოელის ყმაწვილს!“

4 ასეც მოიქცა იერობოამის ცოლი. ადგა, წავიდა შილოში+ და მივიდა ახიას სახლში. ახიას სიბერისგან თვალისჩინი წართმეოდა და ვეღარ ხედავდა.

5 უთხრა იეჰოვამ ახიას: „იერობოამის ცოლი მოდის შენთან თავისი ავადმყოფი ვაჟის ამბის შესატყობად; გეტყვი, რა უნდა უთხრა მას. როცა მოვა, სხვად მოგაჩვენებს თავს“.

6 ქალი კართან რომ მივიდა, გაიგო ახიამ მისი ფეხის ხმა და უთხრა: «შემოდი, იერობოამის ცოლო! რატომ გინდა, სხვად მომაჩვენო თავი?! მძიმე ამბავი უნდა გამცნო. 7 წადი და უთხარი იერობოამს, ასე ამბობს-თქო იეჰოვა, ისრაელის ღმერთი: „მე გამოგარჩიე შენი ხალხიდან, რათა ჩემი ხალხის, ისრაელის, წინამძღოლი გამხდარიყავი.+ 8 მე წავართვი სამეფო დავითის საგვარეულოს და შენ მოგეცი,+ შენ კი არ იქცეოდი ჩემი მსახური დავითივით, რომელიც იცავდა ჩემს მცნებებს, მთელი გულით მცემდა თაყვანს და მხოლოდ იმას აკეთებდა, რაც სწორი იყო ჩემს თვალში;+ 9 შენს ყველა წინამორბედზე უარესად მოიქეცი, წახვედი და სხვა ღმერთი გაიჩინე, ჩამოსხმულ ქანდაკებებს დაუწყე თაყვანისცემა, ზურგი მაქციე+ და შეურაცხმყავი;+ 10 ამიტომ უბედურებას დავატეხ იერობოამის სახლეულობას, ამოვუწყვეტ იერობოამს ყველა მამაკაცს* ისრაელში, უმწეოსაც და უსუსურსაც; პირწმინდად,+ ნეხვივით გავხვეტ იერობოამის შთამომავლობას. 11 ვინც ქალაქში მოუკვდება იერობოამს, ძაღლები შეჭამენ, ხოლო ვინც მინდორში — ცის ფრინველები, რადგან თავად იეჰოვამ თქვა ეს!“

12 ახლა ადექი და წადი სახლში. როცა ქალაქში შეხვალ, მოკვდება ბავშვი. 13 მთელი ისრაელი იგლოვებს მას და დამარხავს; მხოლოდ ის დაიმარხება იერობოამის სახლეულობიდან, რადგან იეჰოვამ, ისრაელის ღმერთმა, იერობოამის მთელი სახლეულობიდან მხოლოდ მასში დაინახა რაღაც კარგი. 14 დადგება დღე და აი, დადგა კიდეც, როცა იეჰოვა დანიშნავს ისრაელში მეფეს, რომელიც მოსპობს იერობოამის სახლეულობას.+ 15 დასცემს იეჰოვა ისრაელს და წყალში მოქანავე ლერწამს დაამსგავსებს; ამოძირკვავს მას იმ მადლიანი მიწიდან, მათ მამა-პაპას რომ მისცა,+ და მდინარის* გაღმა გაფანტავს,+ რადგან სათაყვანო ბოძები გაიკეთეს+ და შეურაცხყვეს იეჰოვა. 16 მიატოვებს იგი ისრაელს იერობოამის გამო, რადგან თვითონაც სცოდავდა და ისრაელიც გახვია ცოდვაში!»+

17 ადგა იერობოამის ცოლი და წავიდა თირცაში. სახლის ზღურბლს რომ მიადგა, მოკვდა ბავშვი. 18 დამარხეს იგი; დასტიროდა მას მთელი ისრაელი, როგორც იეჰოვას ჰქონდა ნაწინასწარმეტყველები თავისი მსახურის, ახია წინასწარმეტყველის პირით.

19 იერობოამის დანარჩენი საქმეების, ომებისა+ თუ მეფობის შესახებ, ისრაელის მეფეთა მატიანეშია ჩაწერილი. 20 იერობოამმა 22 წელი იმეფა, რის შემდეგაც თავისი მამა-პაპის გვერდით განისვენა.+ მის შემდეგ მისი ვაჟი ნადაბი გამეფდა.+

21 იუდაში სოლომონის ვაჟი რობოამი მეფობდა. 41 წლისა გამეფდა რობოამი და 17 წელი მეფობდა იერუსალიმში, ქალაქში, რომელიც ისრაელის ტომთა სამკვიდროებიდან ამოარჩია იეჰოვამ+ თავისი სახელის დასავანებლად.+ რობოამის დედა ამონელი ნაამა იყო.+ 22 ბოროტებას სჩადიოდა იუდა იეჰოვას თვალში+ და ჩადენილი ცოდვებით თავის მამა-პაპაზე მეტად განარისხებდა მას.+ 23 ისინიც იშენებდნენ სათაყვანო მაღლობებს, სვეტებსა და სათაყვანო ბოძებს+ ყოველ გორაზე+ და ყოველი ფოთოლხშირი ხის ქვეშ.+ 24 იმ მიწაზე ტაძრის მეძავი კაცებიც იყვნენ,+ რომლებიც იმავე სისაძაგლეს სჩადიოდნენ, რასაც ის ერები, მათ რომ მოაშორა იეჰოვამ.

25 მეფე რობოამის მეფობის მეხუთე წელს ეგვიპტის მეფე შიშაკმა+ გაილაშქრა იერუსალიმზე.+ 26 წაიღო იეჰოვას ტაძრისა და მეფის სასახლის საგანძური;+ ყველაფერი წაიღო, მათ შორის სოლომონის მიერ გაკეთებული ოქროს ფარები.+ 27 მათ სანაცვლოდ მეფე რობოამმა სპილენძის ფარები გააკეთა და მცველთა ზედამხედველებს ჩააბარა, რომლებიც მეფის სასახლის შესასვლელს სდარაჯობდნენ. 28 როცა მეფე იეჰოვას ტაძარში მიდიოდა, მცველებს გამოჰქონდათ ისინი, შემდეგ კი სადარაჯო ოთახში აბრუნებდნენ.

29 რობოამის დანარჩენი საქმეები, ყოველივე, რაც მან გააკეთა, იუდას მეფეთა მატიანეშია ჩაწერილი.+ 30 გაუთავებელი ომი იყო რობოამსა და იერობოამს შორის.+ 31 განისვენა რობოამმა თავისი მამა-პაპის გვერდით და დამარხეს ის დავითის ქალაქში.+ დედამისი ამონელი ნაამა იყო.+ მის შემდეგ მისი ვაჟი აბიამი*+ გამეფდა.