სამუელი — წიგნი მეორე
6 დავითმა კვლავ შეკრიბა ისრაელის ყველა რჩეული ვაჟკაცი, სულ 30 000 კაცი. 2 გაემართნენ დავითი და მისი ხალხი ბაალე-იუდასკენ ღვთის კიდობნის წამოსაღებად,+ რომლის წინაშეც ხალხი ქერუბიმებს ზემოთ*+ ტახტზე მჯდომი ლაშქართა ღვთის სახელს, იეჰოვას,+ უხმობს. 3 ღვთის კიდობანი ახალ ურემზე დადეს+ და წამოიღეს აბინადაბის სახლიდან,+ გორაზე რომ იდგა. ურემს აბინადაბის ვაჟები, უზა და ახიო, მოუძღოდნენ.
4 წამოიღეს ღვთის კიდობანი აბინადაბის სახლიდან, გორაზე რომ იდგა; კიდობანს ახიო მოუძღოდა. 5 ზეიმობდნენ დავითი და ისრაელის მთელი სახლეულობა იეჰოვას წინაშე; უკრავდნენ ღვიის ხის ყველანაირ საკრავს, ქნარებსა თუ სხვა სიმებიან საკრავებს,+ დაირებს,+ სისტრებსა* და წინწილებს.+ 6 ნაქონის კალოსთან რომ მივიდნენ, უზამ ხელი შეაშველა ღვთის კიდობანს,+ რადგან კინაღამ ჩამოაგდო საქონელმა. 7 განრისხდა იეჰოვა უზაზე და იქვე დასცა ის ღმერთმა+ უპატივცემულო საქციელისთვის;+ იქვე, ღვთის კიდობანთან, მოკვდა ის. 8 გული მოუვიდა დავითს, იეჰოვა რომ განურისხდა უზას; იმ ადგილს დღემდე ფერეც-უზა* ეწოდება. 9 შეეშინდა იმ დღეს დავითს იეჰოვასი+ და თქვა: „როგორღა წავიღო იეჰოვას კიდობანი ჩემთან!“+ 10 არ ისურვა მან იეჰოვას კიდობნის თავისთან, დავითის ქალაქში, გადატანა,+ და ის გათელი ობედ-ედომის+ სახლში გადაატანინა.
11 სამი თვე იყო იეჰოვას კიდობანი გათელი ობედ-ედომის სახლში; კურთხევას არ აკლებდა იეჰოვა ობედ-ედომს და მთელ მის სახლეულობას.+ 12 შეატყობინეს მეფე დავითს, აკურთხა იეჰოვამ ღვთის კიდობნის გამო ობედ-ედომის სახლეულობა და მთელი მისი საბადებელიო. ამიტომ წავიდა დავითი და ობედ-ედომის სახლიდან ზარ-ზეიმით წამოიღო ღვთის კიდობანი დავითის ქალაქში.+ 13 ექვსი ნაბიჯი რომ გადადგეს მათ, ვისაც იეჰოვას კიდობანი მიჰქონდათ,+ დავითმა მოზვერი და ნასუქი პირუტყვი შესწირა.
14 მთელი მონდომებით ცეკვავდა დავითი იეჰოვას წინაშე; სელის ეფოდი ემოსა მას.+ 15 დავითსა და მთელ ისრაელს მხიარული ყიჟინითა+ და საყვირების თანხლებით+ მიჰქონდათ იეჰოვას კიდობანი.+ 16 როცა იეჰოვას კიდობანი დავითის ქალაქში მიიტანეს, საულის ასულმა მიქალმა+ სარკმლიდან გადმოიხედა და დაინახა მეფე, რომელიც იეჰოვას წინაშე ხტოდა და ცეკვავდა, და დამცირდა იგი მის თვალში.+ 17 მიიტანეს იეჰოვას კიდობანი და იმ კარავში დადგეს, რომელიც დავითს კიდობნისთვის ჰქონდა გაშლილი.+ შემდეგ დასაწვავი მსხვერპლი+ და სამშვიდობო მსხვერპლი+ შესწირა დავითმა იეჰოვას.+ 18 დაასრულა დავითმა დასაწვავი მსხვერპლისა და სამშვიდობო მსხვერპლის შეწირვა და დალოცა ხალხი ლაშქართა ღვთის, იეჰოვას, სახელით. 19 ჩამოურიგა მთელ ხალხს, მთელ ისრაელს, კაცსაც და ქალსაც, თითო რგოლისებრი პური და ფინიკისა და ქიშმიშის თითო-თითო კვერი*, რის შემდეგაც ყველანი თავ-თავიანთ სახლებში წავიდ-წამოვიდნენ.
20 როცა დაბრუნდა დავითი, რომ დაელოცა თავისი სახლეულობა, გამოეგება მას საულის ასული მიქალი+ და უთხრა: „როგორ განდიდდა დღეს ისრაელის მეფე, ქარაფშუტასავით რომ გაშიშვლდა თავის მსახურთა მხევლების თვალწინ!“+ 21 მიუგო დავითმა მიქალს: „იეჰოვას წინაშე ვზეიმობდი, რომელმაც მე ამომირჩია იეჰოვას ხალხის, ისრაელის, წინამძღოლად და არა — მამაშენი და მისი სახლეულობა.+ ამიტომ კვლავაც ვიზეიმებ იეჰოვას წინაშე! 22 უფრო მეტად დავიმდაბლებ თავს და საკუთარ თვალშიც კი დავმდაბლდები, ხოლო იმ მხევლების თვალში, შენ რომ ახსენე, განვდიდდები!“ 23 უშვილოდ მოკვდა საულის ასული მიქალი.+