მატიანე — წიგნი პირველი

10 შეებრძოლნენ ფილისტიმელები ისრაელებს. უკუიქცნენ ისრაელები და მრავალი დაეცა გილბოას მთაზე.+ 2 დაეწივნენ ფილისტიმელები საულსა და მის ვაჟებს და დახოცეს საულის ვაჟები: იონათანი, აბინადაბი და მალქი-შუა.+ 3 სასტიკი ბრძოლა გაუმართეს საულს. დაინახეს იგი მშვილდოსნებმა და დაჭრეს.+ 4 მაშინ საულმა თავის საჭურველთმტვირთველს უთხრა: „იშიშვლე მახვილი და გამიყარე, რომ ეს წინადაუცვეთელები არ მოვიდნენ და უმოწყალოდ+ არ მომექცნენ“. არ უნდოდა მის საჭურველთმტვირთველს ამის გაკეთება, რადგან ძალიან ეშინოდა. ამიტომ საულმა თვითონ აიღო მახვილი და ზედ დაეგო.+ 5 როცა დაინახა საჭურველთმტვირთველმა, რომ მოკვდა საული, თვითონაც ზედ დაეგო თავის მახვილს და მოკვდა. 6 ერთად დაიხოცნენ საული, მისი სამი ვაჟი და ყველა, ვინც მასთან ერთად იყო მისი სახლეულობიდან.+ 7 როცა დაინახეს ბარში მცხოვრებმა ისრაელებმა, რომ ყველა უკუიქცა და დაიხოცნენ საული და მისი ვაჟები, თვითონაც დატოვეს ქალაქები და გაიქცნენ. მივიდნენ ფილისტიმელები და დაეპატრონნენ იმ ქალაქებს.

8 მეორე დღეს, როცა ფილისტიმელები დახოცილთა გასაძარცვად მივიდნენ, საული და მისი ვაჟები გილბოას მთაზე ნახეს დახოცილები.+ 9 გაძარცვეს ის, თავი მოჰკვეთეს, წაიღეს მისი საჭურველი და დაგზავნეს მაცნეები ფილისტიმელთა მთელ მიწაზე, რომ ეს ამბავი საკერპოებსა+ თუ ხალხში გაევრცელებინათ. 10 მისი საჭურველი თავიანთი ღვთის ტაძარში დადეს, მისი თავის ქალა კი დაგონის საკერპოში ჩამოკიდეს.+

11 როდესაც გაიგეს გალაადის იაბეშის+ მკვიდრებმა ყველაფერი, რაც ფილისტიმელებმა საულის ცხედარს დამართეს,+ 12 ადგა ყველა მებრძოლი, წამოიღეს საულისა და მისი ვაჟების გვამები, მიიტანეს იაბეშში, იქვე, დიდი ხის ქვეშ დამარხეს მათი ძვლები+ და შვიდი დღე იმარხულეს.

13 იეჰოვასადმი ორგულობის გამო მოკვდა საული, რადგან არ დაემორჩილა იეჰოვას;+ მან სულების გამომძახებელსაც მიმართა,+ 14 ნაცვლად იმისა, რომ იეჰოვას დაჰკითხვოდა. ამიტომაც აღარ აცოცხლა იგი ღმერთმა და მეფობა დავითს, იესეს ძეს, გადასცა.+