ეზეკიელი

22 კვლავ მეუწყა იეჰოვას სიტყვა: 2 «კაცის ძეო, მზად ხარ სისხლისმღვრელი ქალაქის+ განსასჯელად და მისთვის იმის სათქმელად, რა საძულველ საქმეებსაც სჩადის?+ 3 უთხარი, აი, რას ამბობს-თქო უზენაესი უფალი იეჰოვა: „გიახლოვდება აღსასრული,+ სისხლისმღვრელო ქალაქო,+ საზიზღარ კერპებს* რომ ამზადებ და თავს იბილწავ;+ 4 დამნაშავე ხარ სისხლის ღვრაში,+ გაგაუწმინდურა შენმა საზიზღარმა კერპებმა.+ იწურება შენი დღეები, მოაწია შენმა აღსასრულმა. ყველა ერი დაგძრახავს და მასხრად აგიგდებს.+ 5 სახელგატეხილო და შფოთიანო ქალაქო, მასხრად აგიგდებენ მეზობელი+ და შორეული ქვეყნები. 6 ისრაელის თავკაცები, თქვენ შორის რომ არიან, თავიანთ ძალაუფლებას სისხლის დასაღვრელად იყენებენ,+ 7 დედ-მამას აგდებულად ექცევიან,+ თქვენ გვერდით მცხოვრებ უცხოელებს სძალავენ და ქვრივ-ობოლს ჩაგრავენ.+

8 ჩემს წმინდა ადგილებს შეურაცხყოფენ და ჩემს შაბათებს ბილწავენ.+ 9 თქვენ შორის სისხლმოწყურებული ცილისმწამებლები არიან;+ მთებზე ჭამენ შესაწირავებს და უმსგავსოდ იქცევიან,+ 10 ბღალავენ თავიანთი მამის საწოლს+ და ყოველთვიური სისხლდენით გაუწმინდურებულ ქალზე ძალადობენ,+ 11 ამაზრზენ საქციელს სჩადიან თავიანთი მოძმეების ცოლებთან,+ თავიანთ რძლებთან,+ ძალადობენ დებზე, თავიანთი მამების ასულებზე.+ 12 ქრთამს იღებთ და სისხლს ღვრით.+ სარგებელსა და ვახშს იღებთ,+ მოძმეს ფულს სძალავთ.+ სულ დამივიწყეთ, — ამბობს უზენაესი უფალი იეჰოვა. —

13 სიძულვილისგან ხელი ხელს შემოვკარი, რადგან უკანონო შემოსავალს იღებთ და სისხლს ღვრით. 14 შეგრჩება მხნეობა და მკლავში ძალა, როცა შენ წინააღმდეგ გამოვალ? გამოვალ შენ წინააღმდეგ,+ ამას მე ვამბობ, იეჰოვა. 15 გაგფანტავ ხალხებში და მიმოგფანტავ სხვადასხვა მიწაზე,+ ბოლოს მოვუღებ შენს უწმინდურებას.+ 16 შერცხვები ხალხების თვალში და გაიგებ, რომ მე ვარ იეჰოვა“».+

17 კვლავ მეუწყა იეჰოვას სიტყვა: 18 «კაცის ძეო, ისრაელი ხენჯად იქცა. ყველანი ისე არიან, როგორც ღუმელში სპილენძი, კალა, რკინა და ტყვია. ვერცხლის ხენჯად იქცნენ ისინი.+

19 ამიტომ აი, რას ამბობს უზენაესი უფალი იეჰოვა: „ყველანი ხენჯად იქეცით,+ ამიტომ შეგკრებთ იერუსალიმში. 20 როგორც ვერცხლს, სპილენძს, რკინას, ტყვიასა და კალას აგროვებენ და ღუმელში ყრიან, ცეცხლს ანთებენ და ადნობენ, ასევე შეგაგროვებთ ჩემი რისხვითა და მრისხანებით, ცეცხლს შეგინთებთ და დაგადნობთ.+ 21 შეგაგროვებთ, ჩემი რისხვის ცეცხლს შეგინთებთ+ და დადნებით.+ 22 როგორც ვერცხლი დნება ღუმელში, თქვენც ისევე დადნებით; გაიგებთ, რომ მე, იეჰოვამ, გადმოვღვარე ჩემი რისხვა თქვენზე“».

23 კვლავ მეუწყა იეჰოვას სიტყვა: 24 «კაცის ძეო, უთხარი მას: „შენ ის მიწა ხარ, რომელიც არ განიწმინდება და რომელზეც არ იწვიმებს ჩემი რისხვის დღეს. 25 შეთქმულან წინასწარმეტყველნი,+ მსხვერპლის მგლეჯელ მბრდღვინავ ლომებს ჰგვანან;+ ადამიანებს შთანთქავენ, განძსა და ძვირფასეულობას იტაცებენ; მრავალი დააქვრივეს. 26 მღვდლები ჩემს კანონს არღვევენ+ და ჩემს წმინდა ადგილებს ბილწავენ.+ ვერ არჩევენ წმინდას ჩვეულებრივისგან,+ არ ასწავლიან, რა არის წმინდა და რა — უწმინდური,+ არ იცავენ ჩემს შაბათებს; შეურაცხმყოფენ. 27 მთავრები მსხვერპლის მგლეჯელ მგლებს ჰგვანან, სისხლს ღვრიან და ფულის გულისთვის ხალხს ხოცავენ.+ 28 წინასწარმეტყველნი ბათქაშით ფარავენ მათ საქმეებს; ცრუ ხილვებს ხედავენ და ცრუდ მკითხაობენ.+ ამბობენ, აი, რას ამბობსო უზენაესი უფალი იეჰოვა, როცა იეჰოვას არაფერი უთქვამს. 29 იმ მიწის მკვიდრნი გამომძალველნი და ყაჩაღები არიან.+ ჩაგრავენ საწყალსა და ღარიბს. სძალავენ მათ შორის მცხოვრებ უცხოელს და სამართალს არ უჩენენ მას“.

30 ვეძებდი მათ შორის ისეთ კაცს, რომელიც ან ქვის გალავანს შეაკეთებდა, ან გარღვეულ გალავანთან დადგებოდა ამ მიწის დასაცავად ჩემ წინაშე, რომ არ განადგურებულიყო აქაურობა,+ მაგრამ ვერ ვიპოვე. 31 ამიტომ გადმოვღვრი მათზე ჩემს რისხვას და მრისხანების ცეცხლით გადავბუგავ. იწვნევენ თავიანთი საქციელის შედეგებს, — ამბობს უზენაესი უფალი იეჰოვა».