მატიანე — წიგნი მეორე
28 ახაზი+ 20 წლის გამეფდა და 16 წელი იმეფა იერუსალიმში. თავისი წინაპრისგან, დავითისგან განსხვავებით ის არასწორად იქცეოდა იეჰოვას თვალში.+ 2 ის ისრაელის მეფეების კვალს მიჰყვებოდა+ და ბაალის ქანდაკებებიც კი ჩამოასხა.+ 3 შესაწირავს სწირავდა ჰინომის* ძის ველზე და საკუთარ ვაჟებს ცეცხლში წვავდა+ იმ ხალხთა საძულველი წესისამებრ,+ რომლებიც იეჰოვამ ჩამოაშორა ისრაელებს. 4 შესაწირავს წვავდა და აბოლებდა სათაყვანო მაღლობებზე,+ გორებზე და ყველა ფოთოლხშირი ხის ქვეშ.+
5 სირიის მეფეს ჩაუგდო ხელში ახაზი მისმა ღმერთმა იეჰოვამ;+ დამარცხდა ის და მისი ხალხიდან მრავალი წაასხეს ტყვედ დამასკოში.+ ღმერთმა ის ისრაელის მეფის ხელშიც ჩააგდო, რომელმაც დაამარცხა იგი და დიდძალი ხალხი დაუხოცა. 6 ფეკახმა,+ რემალიას ვაჟმა, ერთ დღეში იუდაში 120 000 ვაჟკაცი მოკლა, რადგან ზურგი აქციეს მათ იეჰოვას, თავიანთი მამა-პაპის ღმერთს.+ 7 ზიქრიმ, ეფრემელმა მეომარმა, დახოცა უფლისწული მაასეია, სახლთუხუცესი აზრიკამი და ელკანა, მეფის შემდეგ პირველი კაცი. 8 ისრაელებმა თავიანთ მოძმეთაგან ტყვედ წაასხეს 200 000 ქალი და ბავშვი — ვაჟები და ასულები; დიდი ნადავლიც წაიღეს სამარიაში.+
9 იქ იყო იეჰოვას წინასწარმეტყველი, სახელად ოდედი. წინ გადაუდგა ის სამარიისკენ მიმავალ ჯარს და უთხრა: „იეჰოვა, თქვენი მამა-პაპის ღმერთი, განრისხებული იყო იუდაზე და ამიტომაც ჩაგიგდოთ ისინი ხელში,+ თქვენ კი ისე დაუნდობლად ხოცეთ ისინი, რომ ცას მისწვდა თქვენი სისასტიკე! 10 ახლა გინდათ, რომ იუდასა და იერუსალიმის მკვიდრნი მსახურებად გაიხადოთ.+ განა თავად არ მიგიძღვით ბრალი იეჰოვას, თქვენი ღვთის წინაშე?! 11 ახლა მისმინეთ და დააბრუნეთ დატყვევებული მოძმეები, რადგან იეჰოვა განრისხებულია თქვენზე!“
12 მაშინ ეფრემელთა ზოგიერთი თავკაცი — იეჰოხანანის ვაჟი აზარია, მეშილემოთის ვაჟი ბერექია, შალუმის ვაჟი იეხიზკია და ხადლაის ვაჟი ამასა წინ აღუდგნენ ლაშქრობიდან დაბრუნებულებს 13 და უთხრეს: „ნუ მოიყვანთ აქ ტყვეებს, რადგან შევცოდავთ იეჰოვას წინაშე! გინდათ, ცოდვას ცოდვა დავუმატოთ და დანაშაულს — დანაშაული, როცა ისედაც დიდია ჩვენი დანაშაული და განრისხებულია ღმერთი ისრაელზე?!“ 14 მაშინ მეომრებმა მთავრებსა და იქ შეკრებილთ გადასცეს ტყვეები და ნადავლი.+ 15 ადგნენ შერჩეული მამაკაცები და ჩაიბარეს ტყვეები. ჩააცვეს შეუმოსავ ტყვეებს ნადავლიდან აღებული ტანისამოსი და სანდლები; მისცეს საჭმელ-სასმელი, და ზეთი საცხებად, ღონემიხდილნი სახედრებზე შესხეს და თავიანთ მოძმეებთან ჩაიყვანეს იერიხონში, პალმების ქალაქში, რის შემდეგაც სამარიაში დაბრუნდნენ.
16 მაშინ მეფე ახაზმა დახმარების სათხოვნელად მაცნეები გაუგზავნა ასურეთის მეფეებს.+ 17 იუდაში ედომელებიც შეიჭრნენ, დაამარცხეს მათ იუდა და წაასხეს ტყვეები. 18 ფილისტიმელებიც+ დაესხნენ თავს იუდაში შეფელასა+ და ნეგების ქალაქებს. მათ აიღეს ბეთ-შემეში,+ აიალონი,+ გედეროთი, სოქო მიმდებარე ქალაქებით, თიმნა+ მიმდებარე ქალაქებით და გიმზო მიმდებარე ქალაქებით, და თავად ჩასახლდნენ იქ. 19 დაამდაბლა იეჰოვამ იუდა ისრაელის მეფე ახაზის გამო, რომელმაც თავის ნებაზე მიუშვა იუდა და ხალხიც დიდად ორგულობდა იეჰოვას.
20 მის წინააღმდეგ გაილაშქრა ასურეთის მეფე თილგათ-ფილნესერმაც+ და იმის ნაცვლად, რომ დახმარებოდა, შეავიწროვა იგი.+ 21 გამოაცარიელა ახაზმა იეჰოვას ტაძარი, მეფის სასახლე,+ მთავართა სახლები და ყველაფერი ძღვნად მიართვა ასურეთის მეფეს, მაგრამ ვერც ამან უშველა. 22 შევიწროებული იყო მეფე ახაზი, მაგრამ კიდევ უფრო ორგულობდა იგი იეჰოვას. 23 მსხვერპლს სწირავდა დამასკოს ღმერთებს,+ რომლებმაც დაამარცხეს იგი,+ და ამბობდა: რაკი სირიის მეფეებს თავიანთი ღმერთები ეხმარებიან, მეც მათ შევწირავ მსხვერპლს, რომ დამეხმარონო;+ დაბრკოლებად ექცნენ ისინი მას და მთელ ისრაელს. 24 მოაგროვა ახაზმა ღვთის ტაძრის ნივთები და დალეწა ისინი,+ გამოკეტა იეჰოვას ტაძრის კარი+ და იერუსალიმის ყოველ კუთხე-კუნჭულში სამსხვერპლოები დადგა. 25 იუდას ყველა ქალაქში სათაყვანო მაღლობები მოაწყო სხვა ღმერთებისთვის მსხვერპლის შესაწირავად+ და ამგვარად შეურაცხყო იეჰოვა, თავისი მამა-პაპის ღმერთი.
26 მისი დანარჩენი საქმეები, პირველიდან უკანასკნელამდე, იუდასა და ისრაელის მეფეთა მატიანეშია ჩაწერილი.+ 27 ბოლოს განისვენა ახაზმა თავისი მამა-პაპის გვერდით; დამარხეს ის ქალაქ იერუსალიმში, თუმცა იგი ისრაელის მეფეთა სამარხში არ დაუკრძალავთ.+ ახაზის შემდეგ მისი ვაჟი ხიზკია გამეფდა.