ეზეკიელი

17 კვლავ მეუწყა იეჰოვას სიტყვა: 2 «კაცის ძეო, მოჰყევი იგავს ისრაელებზე;+ 3 თქვი, აი, რას ამბობს-თქო უზენაესი უფალი იეჰოვა: „დიდი არწივი,+ დიდფრთიანი, გრძელბუმბულიანი, ხშირი და ჭრელი ბუმბულით დაფარული, მიფრინდა ლიბანში+ და მოწყვიტა კედრის კენწერო.+ 4 მოაწყვიტა მას ზემოთა ყლორტი, ვაჭართა ქვეყანაში* წაიღო და ვაჭართა ქალაქში დარგო.+ 5 შემდეგ აიღო იმ მიწის თესლი+ და დათესა ნოყიერ მიწაზე წყალთან ახლოს, სადაც ტირიფებს რგავენ. 6 აღმოცენდა ის და მიწაზე გართხმულ ტანდაბალ ვაზად იქცა;+ თავისკენ ხრიდა ფოთლებს და ქვემოთ უშვებდა ფესვებს. ვაზად იქცა, ლერწები გამოიღო და დაიტოტა.+

7 მოფრინდა სხვა დიდი არწივი,+ დიდფრთიანი და დიდბუმბულიანი.+ ვაზმა ბაღის კვლებიდან, სადაც დარგული იყო, ფესვები არწივისკენ გაუშვა და ფოთლებიც მისკენ გაიშვირა, რათა მას მოერწყო ის.+ 8 ის ნოყიერ მიწაზე წყალთან ახლოს იყო დარგული, რომ დატოტვილიყო, ნაყოფი გამოეღო და დიდებულ ვაზად ქცეულიყო“.+

9 თქვი, აი, რას ამბობს-თქო უზენაესი უფალი იეჰოვა: „განა გაიხარებს ის?! განა არ ამოთხრიან მის ფესვებს,+ არ დაალპობენ მის ნაყოფს და არ გაახმობენ მის ყლორტებს?!+ ისე გახმება, რომ მის ამოსაძირკვად არც ძლიერი მკლავი იქნება საჭირო და არც ხალხი. 10 გადარგული კი არის, მაგრამ გაიხარებს?! განა არ გაახმობს მას აღმოსავლეთის ქარი?! გახმება ბაღის კვლებში, იქ, სადაც აღმოცენდა“».

11 კვლავ მეუწყა იეჰოვას სიტყვა: 12 «ურჩ ხალხს გადაეცი, არ იცით, ეს რას ნიშნავს-თქო?! უთხარი: „ბაბილონის მეფე მოვიდა იერუსალიმში, წაიყვანა მისი მეფე და მისი მთავრები და ბაბილონში ჩაიყვანა.+ 13 მან სამეფო შთამომავალთაგან გამოარჩია ერთი მათგანი,+ შეთანხმება დაუდო და ფიცი დაადებინა.+ ქვეყნის დიდებულებიც წაიყვანა,+ 14 რათა სამეფო დასუსტებულიყო, ფეხზე ვეღარ დამდგარიყო და მხოლოდ ამ შეთანხმების წყალობით ეარსება.+ 15 მაგრამ მეფე განუდგა მას,+ მაცნეები გაგზავნა ეგვიპტეში ცხენებისა+ და დიდძალი ჯარის ჩამოსაყვანად.+ მოემართება მას ხელი?! განა დააღწევს თავს სასჯელს ამის გამკეთებელი?! გადარჩება შეთანხმების დამრღვევი?!+

16 ჩემს თავს ვფიცავ*, — ამბობს უზენაესი უფალი იეჰოვა, — მოკვდება ის* ბაბილონში, მის* სამფლობელოში, ვინც ის გაამეფა, ის ვინც არაფრად ჩააგდო ფიცი და დაარღვია შეთანხმება.+ 17 როცა მიწაყრილს გააკეთებენ და გალავანს აღმართავენ მრავალთა შესამუსრად, ვერ დაეხმარება მას ფარაონი თავისი დიდძალი ჯარით,+ მრავალრიცხოვანი ლაშქრით. 18 არად ჩააგდო მან ფიცი და დაარღვია შეთანხმება. არ შეასრულა დადებული პირობა და ვერ გადარჩება“.

19 ამიტომ აი, რას ამბობს უზენაესი უფალი იეჰოვა: „ჩემს თავს ვფიცავ, რაკი არაფრად ჩააგდო ჩემ წინაშე დადებული ფიცი* და დაარღვია ჩემ წინაშე დადებული შეთანხმება*,+ იწვნევს თავისი საქციელის შედეგებს. 20 დავუგებ სანადირო ბადეს და ისიც გაებმება.+ წავიყვან მას ბაბილონში და ჩემი ღალატისთვის პასუხს მოვკითხავ.+ 21 მისი ჯარიდან გაქცეული მეომრები მახვილით შეიმუსრებიან, გადარჩენილნი კი ყველა მიმართულებით გაიფანტებიან.+ მაშინ მიხვდებით, რომ მე, იეჰოვა, ვამბობდი ამას“.+

22 აი, რას ამბობს უზენაესი უფალი იეჰოვა: „მოვწყვეტ ყლორტს ცადაზიდული კედრის კენწეროდან+ და დავრგავ, მოვაწყვეტ მას ყლორტს ზედა ტოტებიდან+ და დავრგავ დიდ, მაღალ მთაზე.+ 23 ისრაელის მაღალ მთაზე დავრგავ მას; დაიტოტება, ნაყოფს გამოიღებს და დიდებულ კედრად იქცევა. მას შეაფარებს თავს ყველანაირი ფრთოსანი და მის ფოთოლთა ჩრდილქვეშ დაიბუდებს. 24 გაიგებენ მინდვრის ხეები, რომ მე, იეჰოვა, ვამდაბლებ მაღალ ხეს და ვამაღლებ დაბალ ხეს;+ მე ვახმობ შეფოთლილ ხეს და მე ვმოსავ ფოთლებით გამხმარ ხეს.+ მე, იეჰოვა, რასაც ვამბობ, ვასრულებ კიდეც“».