36 ელიჰუმ განაგრძო:
2 „ცოტაც მოითმინე და ბოლომდე აგიხსნი,
კიდევ მაქვს სათქმელი ღვთის სასარგებლოდ.
3 საფუძვლიანად აგიხსნი ყველაფერს, რაც ვიცი,
და ჩემი შემოქმედის სიმართლეს გავაცხადებ.+
4 რასაც ვამბობ სიმართლეა;
ეს ყველაფერი მისგან ვიცი,
ვინც სრულყოფილ ცოდნას ფლობს.+
5 ღმერთი ძლევამოსილია+ და ზურგს არავის აქცევს,
მისთვის ჩაუწვდომელი არაფერია.
6 ბოროტებს არ აცოცხლებს,+
ჩაგრულთ კი სამართალს უჩენს.+
7 თვალს არ აშორებს მართლებს,+
მეფეებთან სხამს ტახტზე+ და განდიდებულნი არიან.
8 მაგრამ, თუ მათ ბორკილები დაედებათ
და ჩაგვრის თოკებით შეიბოჭებიან,
9 ის ეტყვის მათ, რა შესცოდეს
და რა დანაშაული ჩაიდინეს სიამაყით.
10 გაუხსნის მათ ყურს, რომ შეაგონოს
და ეტყვის, რომ ზურგი აქციონ ბოროტებას.+
11 თუ დაემორჩილებიან და ემსახურებიან მას,
ცხოვრებას კეთილდღეობაში გალევენ
და წლები სიამოვნებას მოჰგვრით.+
12 მაგრამ, თუ არ დაემორჩილებიან, მახვილით+ დაიღუპებიან
და უმეცრებაში დაიხოცებიან.
13 უღვთოები გულში ბოღმას იდებენ,
ღვთისგან ბორკილდადებულნიც კი არ ითხოვენ შველას;
14 სიყმაწვილეში იხოცებიან,+
ცხოვრებას ტაძრის მეძავი კაცების გვერდით ატარებენ.+
15 მაგრამ საწყლებს ღმერთი გასაჭირში შველის
და ჩაგრულებს ყურს უხსნის.
16 გასაჭირის პირისპირ მყოფს გშველის+
და ვრცელ ადგილზე გაჰყავხარ, რომ თავისუფლად იყო.+
სუფრას ნოყიერი საკვებით გივსებს, რომ განუგეშოს.+
17 კმაყოფილებას მოგგვრის ბოროტთათვის
გამოტანილი განაჩენი,+
როცა აღსრულდება განაჩენი და სამართალი იზეიმებს.
18 ფრთხილად იყავი, რომ ბრაზი სიძულვილში არ გადაგეზარდოს+
და ქრთამმა გზიდან არ გადაგიყვანოს,
19 თორემ მერე ვეღარც ღაღადი გიშველის
და ვერც ვერანაირი ძალისხმევა.+
20 ნუ ესწრაფი ღამეს,
როცა ხალხი თავისი ადგილსამყოფლიდან უჩინარდება.
21 ფრთხილად იყავი, რომ ცუდ გზას არ დაადგე,
ამას გაჭირვება გერჩივნოს.+
22 ღმერთი თავისი ძლევამოსილებითაა განდიდებული;
ვინ არის მისნაირი მოძღვარი?!
23 ვინ უკარნახებს, რა გზას დაადგეს?!+
ან ვინ ეტყვის, არასწორად მოიქეციო?!+
24 არ დაგავიწყდეს ღვთის განდიდება მისი ნამოქმედარის გამო,+
რასაც ხალხი უმღერის.+
25 მთელი კაცობრიობა ხედავს მის ნამოქმედარს;
მოკვდავი კაცი შორიდან შესცქერის.
26 ღმერთი იმაზე დიდებულია, ვიდრე წარმოგვიდგენია;+
ჩაუწვდომელია მის წელთა რიცხვი.+
27 მაღლა ააქვს წყლის წვეთები+
და ნისლი წვიმად იქცევა.
28 შემდეგ ღრუბლებიდან იღვრება წვიმა+
და კაცობრიობას ესხურება.
29 ვინ გაიგებს, რამდენ ფენად იშლება ღრუბელი
და როგორ გამოდის ქუხილი მისი კარვიდან?!+
30 შეხედე, როგორ განავრცობს ელვას+
და როგორ ავსებს ზღვის სიღრმეებს.
31 მათით ასაზრდოებს ხალხს;
უხვად აძლევს მათ საკვებს.+
32 ხელში უჭირავს ელვა
და თავდასხმის ბრძანებას აძლევს.+
33 მის შესახებ გრგვინვა გვაუწყებს,
პირუტყვიც კი გვეუბნება, თუ ვინ მოდის“.