მასქილი. ეზრახელი ეთანის+ ფსალმუნი.
89 იეჰოვას ურყევ სიყვარულზე ვიმღერებ მარადიულად;
თაობებს ვაუწყებ შენი ერთგულების შესახებ,
2 რადგან ვთქვი: „მარადიული და ურყევია შენი სიყვარული+
და შენი ერთგულება ცაშია განმტკიცებული“.
3 შენ თქვი: „შეთანხმება დავუდე ჩემს რჩეულს,+
შევფიცე ჩემს მსახურს, დავითს:+
4 სამარადისოდ განვამტკიცებ შენს შთამომავლობას+
და თაობიდან თაობაში გასტანს შენი ტახტი!“+ (სელა)
5 ზეცა ხოტბას ასხამს შენს გასაოცარ საქმეებს, იეჰოვა,
წმინდათა კრებული განადიდებს შენს ერთგულებას.
6 ვინ შეედრება ზეცაში იეჰოვას?!+
ვინ შეედრება იეჰოვას ღვთის ძეებს+ შორის?!
7 ღვთის შიში აქვს წმინდათა კრებულს,+
დიდებული და შიშის მომგვრელია ის მის ირგვლივ მყოფთათვის.+
8 იეჰოვა, ლაშქართა ღმერთო,
ვინ არის შენსავით ძლიერი, იაჰ?!+
ყოველმხრივ ერთგული ხარ.+
9 შენ მართავ მღელვარე ზღვას+
და შენ ამშვიდებ მის აქოჩრილ ტალღებს.+
10 შენ დაამარცხე რახაბი+ და მოკალი.+
ძლიერი მკლავით გაფანტე შენი მტრები.+
11 შენია ცა და შენია მიწა;+
შენ შექმენი ნაყოფიერი მიწა და ყოველივე მასზე არსებული.+
12 შენ შექმენი ჩრდილოეთი და სამხრეთი;
თაბორი+ და ხერმონი+ სიხარულით ადიდებენ შენს სახელს.
13 ძლევამოსილია შენი მკლავი,+
ძლიერია შენი ხელი;+
შემართულია შენი მარჯვენა.+
14 სიმართლესა და სამართლიანობაზეა დაფუძნებული შენი ტახტი;+
შენ წინაშე დგანან სიყვარული და ერთგულება.+
15 ბედნიერია მხიარულად მოყიჟინე ხალხი.+
იეჰოვა, შენი სახის ნათელში დადიან ისინი.
16 შენი სახელით ხარობენ მთელი დღე
და შენი სიმართლით არიან განდიდებულნი.
17 შენ ხარ მათი ძალა და დიდება,+
შენი წყალობა გვაძლიერებს.+
18 იეჰოვასგან არის ჩვენი ფარი
და ისრაელის წმინდისგან — ჩვენი მეფე.+
19 მაშინ შენ ხილვაში ელაპარაკე შენს ერთგულებს და უთხარი:
«ძალა ვუბოძე ძლიერს,+
განვადიდე ხალხს შორის რჩეული.+
20 ამოვირჩიე დავითი, ჩემი მსახური,+
ჩემი წმინდა ზეთი ვცხე მას.+
21 ჩემი ხელი განამტკიცებს+
და ჩემი მკლავი გააძლიერებს მას;
22 მტერი მოხარკედ ვერ გაიხდის
და ბოროტი ვერ დაჩაგრავს.+
23 მის წინაშე შევმუსრავ მის მტრებს+
და დავცემ მის მოძულეებს.+
24 ვუერთგულებ და სიკეთეს არ მოვაკლებ,+
ჩემი სახელით შეემატება ძალა.
25 ზღვაზე განვავრცობ მის ძალაუფლებას
და მდინარეებზე — მის მმართველობას.+
26 ის დამიძახებს: „შენ მამაჩემი ხარ,
ჩემი ღმერთი, ჩემი კლდე და მხსნელი!“+
27 პირმშოობას ვუბოძებ,+
აღვაზევებ დედამიწის მეფეთა შორის.+
28 მარადიულად გამოვიჩენ სიყვარულს მის მიმართ,+
არასდროს დაირღვევა მასთან დადებული ჩემი შეთანხმება.+
29 მარადიულად განვამტკიცებ მის შთამომავლობას,
მანამ იდგება მისი ტახტი, ვიდრე ცა არსებობს.+
30 თუ მისი ძეები აღარ დაიცავენ ჩემს კანონს
და არ დაემორჩილებიან ჩემს ბრძანებებს,
31 თუ დაარღვევენ ჩემს წესებს
და არ დაიცავენ ჩემს მცნებებს,
32 მაშინ გავჯოხავ ურჩობისთვის+
და გავშოლტავ — დანაშაულისთვის,
33 მაგრამ მუდამ ურყევი იქნება მის მიმართ ჩემი სიყვარული+
და არ ვუღალატებ ჩემს დანაპირებს.
34 არ დავარღვევ ჩემს შეთანხმებას+
და არ შევცვლი ჩემი ბაგით ნათქვამს.+
35 ჩემი სიწმინდე დავიფიცე, ტყუილს არ ვეტყვი დავითს.+
36 მარადიულად იარსებებს მისი შთამომავლობა,+
მანამ იდგება მისი ტახტი ჩემ წინაშე, ვიდრე მზე არსებობს;+
37 მარადიულად განმტკიცდება მთვარესავით,
სანდო მოწმესავით ზეცაში». (სელა)
38 მაგრამ შენ მიაგდე და ზურგი აქციე მას,+
განურისხდი შენს ცხებულს.
39 არად ჩააგდე შენს მსახურთან დადებული შეთანხმება,
მიწაზე დაანარცხე მისი გვირგვინი და შებღალე.
40 შენ დაუნგრიე მას ქვის ზღუდეები;
ნანგრევებად უქციე ციხესიმაგრეები.
41 ყველა გამვლელმა გაძარცვა იგი;
მეზობლების დასაძრახი გახდა.+
42 შენ გაამარჯვებინე მის მტრებს,+
გაახარე ყველა მისი მოწინააღმდეგე.
43 შენ დაუჩლუნგე მას მახვილი
და უკუაქციე ბრძოლაში.
44 შენ გააქრე მისი დიდება
და მიწასთან გაასწორე მისი ტახტი.
45 შენ შეუმოკლე სიყმაწვილის ხანა,
შემოსე სირცხვილით. (სელა)
46 იეჰოვა, როდემდე დაგვემალები? სამარადისოდ?+
კვლავ ცეცხლივით იგიზგიზებს შენი რისხვა?
47 ნუ დაივიწყებ, რა დღემოკლე ვარ!+
ნუთუ ამაოებისთვის შექმენი კაცი?!
48 ცოცხალთაგან ვინ გადაურჩება სიკვდილს?!+
ვინ დაიხსნის თავს სამარის ხელიდან?! (სელა)
49 სადაა შენი ურყევი სიყვარული, იეჰოვა,
როგორც დავითს აღუთქვი ფიცით, ერთგულო ღმერთო?!+
50 არ დაივიწყო, იეჰოვა, როგორ დასცინიან შენს მსახურებს,
როგორ მიგდებს მასხრად ყველა ხალხი,
51 როგორ შეურაცხყოფენ შენი მტრები შენს ცხებულს, იეჰოვა,
როგორ შეურაცხყოფენ მის ყოველ ნაბიჯს.
52 მარადიულად იდიდოს იეჰოვამ! ამინ, ამინ!+