ფსალმუნები

107 მადლობა შესწირეთ იეჰოვას, რადგან კარგია* იგი,+

მარადიული და ურყევია მისი სიყვარული*!+

 2 ილაპარაკონ ეს იეჰოვას გამოსყიდულებმა,

მოწინააღმდეგეთა ხელიდან დახსნილებმა,+

 3 სხვადასხვა ქვეყნიდან რომ შეკრიბა მან,+

აღმოსავლეთიდან და დასავლეთიდან,

ჩრდილოეთიდან და სამხრეთიდან.+

 4 დაეხეტებოდნენ ისინი უდაბნოში, უკაცრიელ ადგილას;

გზას ვერ იგნებდნენ ქალაქისკენ, სადაც დამკვიდრდებოდნენ.

 5 მშიერ-მწყურვალნი იყვნენ,

ღონემიხდილნი და დაუძლურებულნი.

 6 გასაჭირში იეჰოვას შეღაღადებდნენ+

და ისიც იხსნიდა მათ გაჭირვების ჟამს.+

 7 სწორი გზით დაატარებდა,+

რათა მიეყვანა ქალაქში, სადაც დამკვიდრდებოდნენ.+

 8 მადლობდეს ხალხი იეჰოვას+ მისი ურყევი სიყვარულისა*

და კაცთათვის გაკეთებული საოცარი საქმეებისთვის!+

 9 მან წყალი მისცა მწყურვალს

და სიკეთე არ მოაკლო მშიერს.+

10 ბნელსა და უკუნში ცხოვრობდნენ

ტანჯული და შებორკილი ტყვეები,

11 რადგან ეურჩნენ ღვთის სიტყვას

და უზენაესის რჩევა არაფრად ჩააგდეს.+

12 მან გასაჭირით მოდრიკა მათი გული;+

დაეცნენ ისინი და არავინ იყო მათი მშველელი.

13 საშველად მოუხმეს იეჰოვას

და მანაც იხსნა ისინი გაჭირვების ჟამს.

14 ბნელიდან და უკუნიდან გამოიყვანა და დახსნა ბორკილები.+

15 მადლობდეს ხალხი იეჰოვას მისი ურყევი სიყვარულისა*+

და კაცთათვის გაკეთებული საოცარი საქმეებისთვის!

16 მან დალეწა სპილენძის კარები

და დაამტვრია რკინის ურდულები.+

17 უგუნურები იყვნენ და უბედურება დაიტეხეს თავს+

თავიანთი შეცდომებისა და დანაშაულის გამო.+

18 შესძაგდათ ყოველგვარი საკვები;

სიკვდილის კარიბჭეებს მიადგნენ.

19 საშველად უხმობდნენ იეჰოვას

და ისიც იხსნიდა მათ გაჭირვების ჟამს.

20 ბრძანებდა და ისინიც მისი სიტყვისამებრ იკურნებოდნენ,+

ამოჰყავდა ორმოში ჩაცვენილნი.

21 მადლობდეს ხალხი იეჰოვას მისი ურყევი სიყვარულისა*

და კაცთათვის გაკეთებული საოცარი საქმეებისთვის!

22 სამადლობელი მსხვერპლი შესწირონ მას+

და სიხარულის ყიჟინით აუწყონ მისი საქმეები.

23 ვინც ზღვაში მოგზაურობენ

და ხომალდებით აპობენ წყლებს სავაჭროდ,+

24 ხედავენ იეჰოვას საქმეებს,

ამჩნევენ მის საოცრებებს წყლის სიღრმეებში,+

25 როგორ ვარდება ქარიშხალი მის სიტყვაზე+

და როგორ ზვირთდებიან ზღვის ტალღები.

26 ხან ცად ტყორცნის მათ ტალღები

და ხანაც ზღვის სიღრმეში ინთქმებიან;

27 მთვრალი კაცივით ქანაობენ და ბარბაცებენ,

აღარაფერში არგიათ თავიანთი სიმარჯვე.+

28 საშველად უხმობენ იეჰოვას+

და ისიც იხსნის მათ.

29 ის აცხრობს ქარიშხალს

და წყნარდებიან ზღვის ტალღები.+

30 სიმშვიდე ისადგურებს და ხარობენ ისინი;

უსაფრთხო ნავსაყუდლისკენ მიუძღვის მათ.

31 მადლობდეს ხალხი იეჰოვას მისი ურყევი სიყვარულისა*

და კაცთათვის გაკეთებული საოცარი საქმეებისთვის!+

32 ადიდონ იგი შესაკრებელში+

და აქონ უხუცესთა კრებულში.

33 მდინარეებს უდაბნოდ აქცევს

და წყაროებს — ხრიოკად,+

34 ნაყოფიერ მიწას — მარილოვან მიწად+

იქ მცხოვრებთა ბოროტების გამო.

35 უდაბნოს ლერწმიან ტბორად აქცევს

და უწყლო მიწას — წყაროებად.+

36 იქ ასახლებს მშივრებს,+

რათა დააარსონ ქალაქი და იცხოვრონ იქ.+

37 თესავენ ხორბალს და ყრიან ვაზს;+

იღებენ უხვ მოსავალს.+

38 აკურთხებს მათ და მრავლდებიან;

არ აკლდებათ პირუტყვი.+

39 მაგრამ ჩაგვრის, უბედურებისა და მწუხარების გამო

კვლავ დაცოტავდება და დამცირდება ხალხი.

40 თავლაფს ასხამს დიდებულებს

და ახეტიალებს უკაცრიელ ადგილას.+

41 საწყალს კი იცავს ჩაგვრისგან+

და ფარასავით ამრავლებს მის ოჯახს.

42 მართლები ხედავენ ამას და ხარობენ,+

უმართლოები კი კრინტსაც ვერ ძრავენ.+

43 დააკვირდება ყოველივეს ბრძენი+

და ჩაუკვირდება იეჰოვას ურყევ სიყვარულს*.+