კოლოსელების მიმართ
1 პავლე, ქრისტე იესოს მოციქულად დანიშნული ღვთის ნებით, და ძმა ტიმოთე,+ 2 ქრისტესთან ერთობაში მყოფ წმინდებსა და ერთგულ ძმებს კოლოსეში:
წყალობა და მშვიდობა არ მოგკლებოდეთ ღვთისგან, ჩვენი მამისგან!
3 ყოველთვის, როცა თქვენთვის ვლოცულობთ, ვმადლობთ ღმერთს, ჩვენი უფლის, იესო ქრისტეს, მამას, 4 რადგან მოვისმინეთ ქრისტე იესოსადმი თქვენი რწმენისა და წმინდებისადმი თქვენი სიყვარულის შესახებ, 5 რომელიც ზეცაში თქვენთვის შემონახული იმედის გამო გაქვთ.+ ამ იმედის შესახებ მაშინ გაიგეთ, როცა მოისმინეთ სასიხარულო ცნობის ჭეშმარიტება. 6 ამ სასიხარულო ცნობას ნაყოფი გამოაქვს და ვრცელდება მთელ მსოფლიოში,+ როგორც ეს თქვენ შორისაც ხდება იმ დღიდან მოყოლებული, რაც მოისმინეთ ღვთის ჭეშმარიტი წყალობის შესახებ და ჩასწვდით მას. 7 ეს ნასწავლი გაქვთ საყვარელი ძმისგან, ქრისტეს ერთგულ მსახურ ეპაფრასგან,+ ჩვენნაირივე მონისგან, რომელიც ჩვენ მაგივრობას სწევს. 8 სწორედ მან გვამცნო თქვენ მიერ გამოვლენილი ღვთიური სიყვარულის შესახებ.
9 იმ დღიდან, რაც ეს გავიგეთ, არ შეგვიწყვეტია თქვენთვის ლოცვა,+ რომ აღივსოთ ღვთის ნების შესახებ საფუძვლიანი ცოდნით+ და შეიძინოთ ყოველგვარი სიბრძნე და ღვთის სულით ბოძებული გამჭრიახობა,+ 10 რათა იეჰოვას* ღირსად იცხოვროთ და ყოველმხრივ ასიამოვნოთ მას — ყოველ კარგ საქმეში ნაყოფი გამოიღოთ და ღვთის შესახებ ცოდნა*+ გაიღრმაოთ. 11 იმაზეც ვლოცულობთ, რომ მან თავისი განუზომელი ძალით გაგაძლიეროთ,+ რათა მოთმინებითა და სიხარულით აიტანოთ ყველაფერი, 12 და მადლობას სწირავდეთ ღმერთს, მამას, რომელმაც იმ მემკვიდრეობის ღირსი გაგხადათ, სინათლეში მყოფ წმინდებს+ რომ ეკუთვნით.
13 მან დაგვიხსნა სიბნელის ძალაუფლებისგან+ და გადაგვიყვანა თავისი საყვარელი ძის სამეფოში; 14 ძემ გამოსასყიდით გაგვათავისუფლა და გვეპატია ჩვენი ცოდვები.+ 15 ის უხილავი ღვთის ანარეკლია,+ ყველა სხვა ქმნილებაზე უწინ შობილი*.+ 16 მისი მონაწილეობით შეიქმნა სხვა ყველაფერი ზეცაში და დედამიწაზე, ხილულიც და უხილავიც+ — ტახტები თუ მმართველობები, მთავრობები თუ ხელისუფლებები. ყველაფერი მისი მეშვეობით+ და მისთვის შეიქმნა. 17 ის სხვა ყველაფერზე უწინ არსებობდა+ და ყველაფერი მისი მონაწილეობით შეიქმნა. 18 ის არის სხეულის ანუ კრების თავი.+ ის არის დასაწყისი, პირმშო ანუ პირველი მკვდრეთით აღმდგართა შორის,+ რათა ის ყოფილიყო ყველაფერში პირველი, 19 რადგან ღმერთმა მოისურვა, რომ მასში დამკვიდრებულიყო ყოველივე მთელი სისავსით,+ 20 და მისი მეშვეობით, მის მიერ წამების ძელზე* დაღვრილი სისხლით,+ მშვიდობა აღედგინა და ასე შემოერიგებინა ყოველივე+ დედამიწაზე თუ ზეცაში.
21 თქვენ, ვინც თქვენი ბოროტი ზრახვების გამო ღვთისგან გაუცხოებულები და მისი მტრები იყავით, 22 ღმერთმა ახლა შეგირიგათ მისი მეშვეობით, ვინც თავისი ხორციელი სხეული გაიღო სასიკვდილოდ, რათა წმინდები, უმანკოები და ბრალდაუდებლები წარმდგარიყავით მის წინაშე;+ 23 ოღონდ კვლავაც თქვენი რწმენისამებრ იცხოვრეთ+ საძირკველზე დაფუძნებულებმა+ და განმტკიცებულებმა,+ და არ დაკარგოთ სასიხარულო ცნობით მიღებული იმედი. მე, პავლე, ამ სასიხარულო ცნობის მსახური გავხდი,+ რომელიც მოისმინეთ და, რომელიც ექადაგა ყველა ხალხს ცისქვეშეთში.+
24 ახლა ვხარობ, თქვენ გამო რომ ვიტანჯები,+ თუმცა ჯერ ბოლომდე არ დავტანჯულვარ ქრისტეს გულისთვის, მისი სხეულის,+ კრების+ სასიკეთოდ. 25 მე ამ კრების მსახური გავხდი, ვინაიდან ღმერთმა დამაკისრა ეს პასუხისმგებლობა+ თქვენ სასარგებლოდ, რათა მთელი გულით მექადაგა ღვთის სიტყვა, 26 წმინდა საიდუმლო,+ რომელიც დაფარული იყო წარსული ქვეყნიერებისა*+ და თაობებისთვის, ახლა კი ცხადი გახდა მისი წმინდებისთვის.+ 27 ღმერთმა მოისურვა, რომ ხალხებს შორის სწორედ მათთვის გაეცხადებინა ეს წმინდა საიდუმლო,+ დიდებული საუნჯე. ეს საიდუმლო ქრისტეა, თქვენთან ერთობაში მყოფი, რაც მასთან ერთად განდიდების იმედს გაძლევთ.+ 28 ჩვენ ვაუწყებთ მის შესახებ, შევაგონებთ და მთელი სიბრძნით ვასწავლით ყველას, რათა ქრისტეს მოწიფულ მიმდევრებად წარვუდგინოთ ისინი ღმერთს.+ 29 მეც ამისთვის ვირჯები და თავს არ ვზოგავ მისგან გაძლიერებული.+