ᲜᲔᲔᲛᲘᲐ

1 ნეემიას*,+ ხაქალიას ვაჟის, სიტყვები: მე-20 წელს, ქისლევის თვეში, შუშანის* ციხე-დარბაზში ვიყავი.+ 2 იუდადან ჩემი ერთ-ერთი ძმა, ხანანი,+ ჩამოვიდა სხვებთან ერთად. გამოვკითხე იერუსალიმისა და იმ იუდეველების ამბები, ტყვეობას რომ დააღწიეს თავი.+ 3 მათ მითხრეს: „იუდას სამთავროში მყოფნი, ისინი, ვინც ტყვეობას დააღწია თავი, დიდად შევიწროებულნი და დამცირებულნი არიან.+ იერუსალიმის გალავანი დანგრეულია,+ ხოლო კარიბჭეები — დამწვარი“.+

4 ეს რომ მოვისმინე, დავჯექი, ავტირდი და რამდენიმე დღე ვგლოვობდი, ვმარხულობდი+ და ვლოცულობდი ზეციერი ღვთის წინაშე; 5 ვთქვი: «იეჰოვა, ზეციერო ღმერთო, დიდებულო და შიშის მომგვრელო, შეთანხმებას რომ იცავ და ურყევი რომაა შენი სიყვარული* შენს მოყვარულთა, შენი მცნებების დამცველთა მიმართ!+ 6 გთხოვ, ყური მომაპყარი და თვალს ნუ მომარიდებ! ისმინე შენი მსახურის ლოცვა, დღეს რომ მოგმართავს! დღედაღამ მოგმართავ+ შენი მსახურების, ისრაელების გამო და ვაღიარებ შენ წინაშე ისრაელების მიერ ჩადენილ ცოდვებს; შევცოდეთ მეც და ჩემმა ხალხმაც*.+ 7 დიდად შეგცოდეთ,+ რომ არ დავიცავით შენი მსახური მოსესთვის მიცემული მცნებები, წესები და სამართალი.+

8 გთხოვ, გაიხსენე, რაც შენს მსახურ მოსეს უთხარი: „თუ ორგულად მოიქცევით, ხალხებში გაგფანტავთ,+ 9 მაგრამ, თუ დამიბრუნდებით, დაიცავთ და შეასრულებთ ჩემს მცნებებს, ცის კიდემდეც რომ იყოთ დაფანტულნი, მაინც შეგკრებთ+ და მიგიყვანთ ადგილზე, რომელიც ჩემი სახელის განსადიდებლად ამოვირჩიე“.+ 10 შენი მსახურები და შენი ხალხი არიან ისინი, შენი დიდი ძალითა და ძლიერი მკლავით რომ გამოისყიდე.+ 11 იეჰოვა, გთხოვ, ყური მოაპყარი შენი მსახურის ლოცვას და მათ ლოცვებს, რომელთაც შენი სახელის მოშიშება ახარებთ! გთხოვ, ხელი მოუმართე დღეს შენს მსახურს და მისდამი სიბრალული აღუძარი ამ კაცს!»+

მე მაშინ მეფის მერიქიფე გახლდით.+

2 ნისანის თვეში, მეფე არტაქსერქსეს მეფობის+ მე-20 წელს,+ ღვინო იდგა მის წინ. მეც ჩვეულებისამებრ ავიღე ღვინო და მეფეს მივაწოდე.+ რაკი პირველად მნახა დაღვრემილი, 2 მკითხა მეფემ: „ავად არა ხარ და რატომ დაგღვრემია სახე? რაღაც გიფორიაქებს სულს!“ მაშინ ძლიერ შევშინდი.

3 მივუგე მეფეს: „დღეგრძელი იყოს მეფე! როგორ არ ვიქნები დაღვრემილი, როცა ქალაქი, სადაც ჩემი მამა-პაპაა დამარხული, ნანგრევებადაა ქცეული, მისი კარიბჭეები კი — გადაბუგული?!“+ 4 მეფემ მომიგო: „თქვი, რა გსურს“. მაშინვე ლოცვით მივმართე ზეციერ ღმერთს.+ 5 შემდეგ მეფეს ვუთხარი: „თუ მეფე ინებებს, და, თუ წყალობა მიპოვია მის თვალში, გამიშვი იუდაში, იმ ქალაქში, სადაც ჩემი მამა-პაპაა დამარხული, რომ აღვადგინო ის“.+ 6 მეფემ, რომელსაც გვერდით დედოფალი ეჯდა, მკითხა: „რამდენი ხანი დაგჭირდება მგზავრობისთვის და როდის დაბრუნდები?“ დრო დავუთქვი მეფეს+ და მანაც ინება ჩემი გაშვება.+

7 ვუთხარი მეფეს: „თუ მეფე ინებებს, გამატანოს წერილები მდინარისგაღმელ* გამგებლებთან,+ რათა მათ გზა მომცენ და იუდაში მშვიდობით ჩავიდე. 8 გამატანოს წერილი ასაფთანაც, სამეფო ტყის მცველთან, რომ მომცეს ხე-ტყე ტაძრის ციხესიმაგრის* კარიბჭეების,+ ქალაქის გალავნისა+ და ჩემი სახლის აღსადგენად“. მომცა მეფემ წერილები,+ რადგან ჩემმა ღმერთმა მომიმართა ხელი.+

9 მივედი მდინარისგაღმელ გამგებლებთან და გადავეცი მათ მეფის წერილები. მეფემ თან ჯარის მეთაურები და მხედრები გამაყოლა. 10 როცა ხორონელმა სანბალატმა+ და ამონელმა+ მოხელე ტობიამ+ გაიგეს ამის შესახებ, დიდად არ ესიამოვნათ, რომ ისრაელთა დასახმარებლად კაცი იყო მისული.

11 ბოლოს ჩავედი იერუსალიმში; გავიდა სამი დღე. 12 ღამით ავდექი რამდენიმე კაცთან ერთად, თან რომ მახლდნენ, მაგრამ არავისთვის მითქვამს, რისი გაკეთება ჩამიდო გულში ღმერთმა იერუსალიმისთვის. იმ პირუტყვის გარდა, რომელზეც ვიჯექი, სხვა პირუტყვი თან არ წამიყვანია. 13 იმ ღამით ველის კარიბჭით+ გავედი ქალაქიდან, გავუარე დიდი გველის წყაროს და წავედი ნაცრის კარიბჭისკენ.+ ვამოწმებდი იერუსალიმის დანგრეულ გალავანსა და გადაბუგულ კარიბჭეებს.+ 14 ჩავუარე წყაროს კარიბჭეს+ და მეფის წყალსატევს, მაგრამ აღარ იყო გასავლელი ადგილი პირუტყვისთვის, რომელზეც ვიჯექი. 15 ჯერ კიდევ ღამე იყო, ხევს რომ ავუყევი+ და თან გალავანს ვამოწმებდი. შემდეგ გამოვტრიალდი და ველის კარიბჭით უკან დავბრუნდი.

16 მმართველებმა+ არ იცოდნენ, სად ვიყავი წასული და რას ვაკეთებდი, რადგან ჯერ არაფერი მქონდა ნათქვამი იუდეველებისთვის, მღვდლებისთვის, დიდებულებისთვის, მმართველებისა და სამუშაოთა შემსრულებლებისთვის. 17 ბოლოს მათ ვუთხარი: „ხედავთ, რა დღეში ვართ! იერუსალიმი ნანგრევებადაა ქცეული, მისი კარიბჭეები კი — გადაბუგული! მოდით აღვადგინოთ იერუსალიმის გალავანი, რომ ბოლო მოეღოს ჩვენს დამცირებას!“ 18 ვუამბე მათ, როგორ მომიმართა ჩემმა ღმერთმა ხელი,+ და მეფის ნათქვამიც ვუთხარი.+ მაშინ მითხრეს, მოდი ავაშენოთო, და მხნეობა მოიკრიბეს კარგი საქმის საკეთებლად.+

19 შეიტყვეს ამის შესახებ ხორონელმა სანბალატმა, ამონელმა+ მოხელე ტობიამ+ და არაბმა გეშემმა+ და დაცინვა+ და ზიზღით ყურება დაგვიწყეს; გვეუბნებოდნენ, ამას რას აკეთებთ, მეფეს უჯანყდებითო?!+ 20 ვუპასუხე მათ: „ზეციერი ღმერთი მოგვიმართავს ხელს+ და ჩვენ, მისი მსახურები, ავაშენებთ, თქვენ კი არაფერი გაკავშირებთ იერუსალიმთან, არც წილი გაქვთ და არც რაიმეს მოთხოვნის უფლება!“+

3 მღვდელმთავარი ელიაშიბი+ და მისი მოძმეები, მღვდლები, ცხვრის კარიბჭის+ მშენებლობას შეუდგნენ. განწმინდეს*+ ის და ჩადგეს კარები. განაგრძეს მშენებლობა მეას კოშკამდე+ და ხანანელის კოშკამდე,+ და განწმინდეს ის, რაც ააშენეს. 2 გვერდით იერიხონელები+ აშენებდნენ, მათ გვერდით კი იმრის ვაჟი ზაქური აშენებდა.

3 თევზის კარიბჭე+ ჰასენაას ვაჟებმა ააშენეს; ხის ჩარჩო გაუკეთეს,+ კარები ჩადგეს და კლიტეები და ურდულები დაუყენეს. 4 მათ გვერდით აღდგენით სამუშაოებს მერემოთი,+ ჰაკოცის ძის, ურიას, ვაჟი ასრულებდა, მის გვერდით — მეშულამი,+ მეშეზაბელის ძის, ბერექიას, ვაჟი, მის გვერდით კი — ბაანას ვაჟი ცადოკი. 5 მის გვერდით აღდგენით სამუშაოებს თეკოელები+ ასრულებდნენ, თუმცა მათი დიდებულები უკადრისობდნენ ზედამხედველთა მითითებების შესრულებას და მათ გვერდით მუშაობას.

6 ფასეას ვაჟმა იოიადამ და ბესოდეიას ვაჟმა მეშულამმა ძველი ქალაქის კარიბჭე აღადგინეს;+ ხის ჩარჩო გაუკეთეს, კარები ჩადგეს და კლიტეები და ურდულები დაუყენეს. 7 მათ გვერდით გაბაონელი+ მელატია და მერონოთელი იადონი ასრულებდნენ აღდგენით სამუშაოებს, გაბაონელი და მიცფელი+ კაცები, რომლებიც მდინარისგაღმელი* გამგებლის ქვეშევრდომები იყვნენ.+ 8 გვერდით ოქრომჭედელი უზიელი, ხარჰაიას ვაჟი, ასრულებდა აღდგენით სამუშაოებს, მის გვერდით — ხანანია, ერთ-ერთი მენელსაცხებლე; მათ ქვაფენილი დააგეს იერუსალიმში ფართო კედლამდე.+ 9 მათ გვერდით აღდგენით სამუშაოებს ასრულებდა ხურის ვაჟი რეფაია, რომელიც იერუსალიმის სამთავროს ნახევარს მართავდა. 10 მის გვერდით თავისი სახლის წინ ხარუმაფის ვაჟი იედაია ასრულებდა აღდგენით სამუშაოებს, მის გვერდით კი — ხაშაბნეიას ვაჟი ხატუში.

11 ერთი მონაკვეთი ხარიმის+ ვაჟმა მალქიამ და ფახათ-მოაბის+ ვაჟმა ხაშუბმა აღადგინეს; მათვე აღადგინეს ღუმელთა კოშკი.+ 12 მათ გვერდით ჰალოხეშის ვაჟი შალუმი, რომელსაც იერუსალიმის სამთავროს მეორე ნახევარი ებარა, თავის ასულებთან ერთად ასრულებდა აღდგენით სამუშაოებს.

13 ველის კარიბჭე+ ხანუნმა და ზანოახელებმა+ აღადგინეს. მათ ააშენეს ის, კარები ჩადგეს და კლიტეები და ურდულები დაუყენეს; მათ 1 000 წყრთაზე* აღადგინეს გალავანი ნაცრის კარიბჭემდე.+ 14 ნაცრის კარიბჭე ბეთ-ჰაქერემის+ სამთავროს მთავარმა მალქიამ, რექაბის ვაჟმა, აღადგინა; მან ააშენა ის, კარები ჩადგა და კლიტეები და ურდულები დაუყენა.

15 წყაროს კარიბჭე+ მიცფის სამთავროს+ მთავარმა შალუნმა, ქოლხოზეს ვაჟმა, აღადგინა. მან ააშენა ის, გადახურა, კარები ჩადგა და კლიტეები და ურდულები დაუყენა. მანვე აღადგინა არხის წყალსატევის+ გალავანი მეფის ბაღამდე+ და კიბემდე,+ რომელიც დავითის ქალაქიდან+ ეშვება.

16 მის იქით ბეთ-ცურის+ ნახევარი სამთავროს მთავარი ნეემია, აზბუკის ვაჟი, ასრულებდა აღდგენით სამუშაოებს დავითის სამარხის+ წინა მხრიდან წყალსაცავამდე+ და მეომართა სახლამდე.

17 მის იქით ბანის ვაჟის, რეხუმის, ზედამხედველობით ლევიანები ასრულებდნენ აღდგენით სამუშაოებს. მის გვერდით კეილის+ ნახევარი სამთავროს მთავარი ხაშაბია თავისი სამთავროს სახელით ასრულებდა აღდგენით სამუშაოებს. 18 მის იქით სხვა ლევიანები ასრულებდნენ აღდგენით სამუშაოებს. მათ ხელმძღვანელობდა ხენადადის ვაჟი ბავაი, რომელსაც კეილის სამთავროს მეორე ნახევარი ებარა.

19 მის გვერდით მიცფის მთავარმა ეცერმა, იეშუას ვაჟმა,+ ერთი მონაკვეთი აღადგინა იმ აღმართის წინ, რომელიც გალავნის ბურჯთან+ მდებარე იარაღის საცავისკენ ადიოდა.

20 მის იქით გულმოდგინედ მუშაობდა ზაბაის+ ვაჟი ბარუქი, რომელმაც კიდევ ერთი მონაკვეთი აღადგინა გალავნის ბურჯიდან მღვდელმთავარ ელიაშიბის+ სახლის შესასვლელამდე.

21 მის იქით მერემოთმა,+ ჰაკოცის ვაჟის, ურიას, ვაჟმა, კიდევ ერთი მონაკვეთი აღადგინა ელიაშიბის სახლის შესასვლელიდან ელიაშიბის სახლის ბოლომდე.

22 მის იქით იორდანის* მხარიდან+ ჩამოსული მღვდლები ასრულებდნენ აღდგენით სამუშაოებს. 23 მათ გვერდით ბენიამინი და ხაშუბი ასრულებდნენ აღდგენით სამუშაოებს თავიანთი სახლის წინ. მათ გვერდით აზარია, ანანიას ვაჟის, მაასეიას, ვაჟი ასრულებდა აღდგენით სამუშაოებს თავის სახლთან ახლოს. 24 მის იქით ხენადადის ვაჟმა ბინუიმ კიდევ ერთი მონაკვეთი აღადგინა აზარიას სახლიდან გალავნის ბურჯამდე+ და კუთხემდე.

25 მის იქით უზაის ვაჟი ფალალი ასრულებდა აღდგენით სამუშაოებს გალავნის ბურჯისა და მეფის სასახლის+ ზემო კოშკის წინ, რომელიც მცველთა ეზოშია.+ მის იქით ფაროშის ვაჟი ფედაია მუშაობდა.+

26 ტაძრის მსახურები*,+ რომლებიც ოფელში+ ცხოვრობდნენ, აღმოსავლეთით, წყლის კარიბჭის+ წინა მხარემდე და გალავნიდან გამოწეულ კოშკამდე ასრულებდნენ აღდგენით სამუშაოებს.

27 მათ იქით თეკოელებმა+ აღადგინეს კიდევ ერთი მონაკვეთი დიდი გამოწეული კოშკის წინა მხრიდან ოფელის გალავნამდე.

28 ცხენის კარიბჭის+ ზემოთ მღვდლები ასრულებდნენ აღდგენით სამუშაოებს, თითოეული თავისი სახლის წინ.

29 მათ იქით იმერის ვაჟი ცადოკი+ ასრულებდა აღდგენით სამუშაოებს თავისი სახლის წინ.

მის იქით აღმოსავლეთი კარიბჭის+ მცველი შემაია, შექანიას ვაჟი, ასრულებდა აღდგენით სამუშაოებს.

30 მის იქით შელემიას ვაჟმა ხანანიამ და ზალაფის მეექვსე ვაჟმა ხანუნმა კიდევ ერთი მონაკვეთი აღადგინეს.

მის იქით ბერექიას ვაჟი მეშულამი+ ასრულებდა აღდგენით სამუშაოებს თავისი დარბაზის წინ.

31 მის იქით მალქია, ოქრომჭედელთა ამქრის წევრი, ასრულებდა აღდგენით სამუშაოებს ტაძრის მსახურთა+ და ვაჭართა სახლამდე შემოწმების კარიბჭის წინ და გალავნის კუთხის ზემო ოთახამდე.

32 გალავნის კუთხის ზემო ოთახსა და ცხვრის კარიბჭეს+ შორის ოქრომჭედლები და ვაჭრები ასრულებდნენ აღდგენით სამუშაოებს.

4 გაიგო სანბალატმა,+ რომ გალავნის აღდგენაზე ვმუშაობდით, ძლიერ შეშფოთდა, განრისხდა და იუდეველებს დაცინვა დაუწყო. 2 უთხრა თავის მოძმეებსა და სამარიის ჯარს: „რას აკეთებენ ეს უსუსური იუდეველები? ჰგონიათ, რამე გამოუვათ?! მსხვერპლის შეწირვა სურთ? რა, ერთ დღეში დაასრულებენ საქმეს?! სად იპოვიან ვარგის ქვებს ამ გადამწვარი ნანგრევების გროვაში?!“+

3 ამონელმა+ ტობიამ,+ რომელიც მის გვერდით იდგა, თქვა: „მელაც რომ აძვრეს მათ აშენებულ გალავანზე, დაინგრევა!“

4 ისმინე, ჩვენო ღმერთო, როგორ გვამცირებენ!+ დაე თავად გახდნენ დასაცინნი!+ სხვა ქვეყნის ნადავლად, ტყვეებად აქციე ისინი! 5 თვალს ნუ დახუჭავ მათ დანაშაულზე და ნუ მიუტევებ ცოდვას იმ შეურაცხყოფის გამო,+ მშენებლებს რომ მიაყენეს!

6 ჩვენ კვლავ ვაგრძელებდით შენებას; შევკარით და სანახევროდ ამოვაშენეთ გალავანი. კვლავაც მთელი გულით მუშაობდა ხალხი.

7 გაიგეს სანბალატმა, ტობიამ,+ არაბებმა,+ ამონელებმა და აშდოდელებმა,+ რომ წინ მიიწევდა იერუსალიმის გალავნის აღდგენის საქმე, რომ ივსებოდა ნაპრალები, და გაცეცხლდნენ. 8 მათ პირი შეკრეს, რომ გამოელაშქრათ იერუსალიმისკენ და არეულობა გამოეწვიათ. 9 ჩვენ ლოცვით მივმართეთ ჩვენს ღმერთს და დაცვა დავაყენეთ, რომ დღისითაც და ღამითაც დავეცავით.

10 იუდას მკვიდრები ჩიოდნენ: მშენებლებს ძალა გამოეცალათ, აქაურობა ნანგრევებითაა სავსე; ვერასდროს აღვადგენთ გალავანსო.

11 ჩვენი მტრები ამბობდნენ: სანამ რამეს მიხვდებიან ან დაგვინახავენ, ჩვენ უკვე იქ ვიქნებით; დავხოცავთ და მუშაობაც შეწყდებაო.

12 ყოველთვის, როცა ჩვენი მტრების სიახლოვეს მცხოვრები იუდეველები ჩამოდიოდნენ, გვიმეორებდნენ, ყოველი მხრიდან შემოგვიტევენო.

13 დავაყენე კაცები გალავნის უკან ყველაზე დაბალ, მოშიშვლებულ ადგილებში; საგვარეულოთა მიხედვით დავაყენე ისინი მახვილებით, შუბებითა და მშვილდებით აღჭურვილნი. 14 როცა დავინახე, რომ ხალხი შეშინებული იყო, მაშინვე წამოვდექი და მივმართე დიდებულებს,+ მმართველებსა და დანარჩენ ხალხს: „ნუ შეგეშინდებათ მათი,+ გახსოვდეთ იეჰოვა, დიდებული და შიშის მომგვრელი ღმერთი;+ იბრძოლეთ თქვენი მოძმეებისთვის, თქვენი ვაჟებისა და თქვენი ასულებისთვის, თქვენი ცოლებისა და თქვენი სახლებისთვის!“

15 გაიგეს ჩვენმა მტრებმა, რომ შევიტყვეთ მათი გეგმის შესახებ და რომ ჭეშმარიტმა ღმერთმა ჩაშალა მათი გეგმა. ამის შემდეგ ჩვენ კვლავ გალავნის აღდგენა განვაგრძეთ. 16 იმ დღიდან მოყოლებული ჩემი ხალხის ნახევარი მუშაობდა,+ ნახევარი კი შუბებით, ფარებითა და მშვილდებით იყო აღჭურვილი და ჯავშნები ეცვათ. მთავრები+ მხარს უჭერდნენ იუდეველებს, 17 რომლებიც გალავნის კედლებს აღადგენდნენ. მზიდავები ცალი ხელით ტვირთს ეზიდებოდნენ, ცალ ხელში კი საბრძოლო იარაღი ეჭირათ. 18 მშენებლები თეძოზე მახვილშემორტყმულნი მუშაობდნენ; გვერდით მესაყვირე+ მედგა.

19 ვუთხარი დიდებულებს, მმართველებსა და დანარჩენ ხალხს: „საქმე დიდია და შრომატევადი, ჩვენ კი გაფანტულნი ვართ გალავანზე და შორიშორს ვართ ერთმანეთისგან. 20 როდესაც საყვირის ხმას გაიგონებთ, ჩვენთან მოგროვდით. ჩვენი ღმერთი იბრძოლებს ჩვენთვის!“+

21 ჩვენ ვმუშაობდით, ხალხის ნახევარს კი შუბი ეჭირა გარიჟრაჟიდან ვარსკვლავების გამოჩენამდე. 22 მაშინ ვუთხარი ხალხს: „თითოეულმა კაცმა თავის მსახურთან ერთად გაათიოს ღამე იერუსალიმში, რომ ღამით დაგვიცვან, დღისით კი იმუშაონ“. 23 არც მე, არც ჩემს მოძმეებს, არც ჩემს მსახურებს+ და არც მცველებს, თან რომ მახლდნენ, ტანსაცმელი არ გაგვიხდია, ყველას საბრძოლო იარაღი გვეჭირა მარჯვენაში.

5 ხმამაღლა უჩიოდნენ თავიანთ მოძმეებს იუდეველი კაცები და მათი ცოლები.+ 2 ზოგი ამბობდა, ბევრი ვაჟი და ასული გვყავს, მარცვლეული გვჭირდება, რომ ვჭამოთ და ვიცოცხლოთო. 3 იყვნენ ისეთებიც, რომლებიც ამბობდნენ, ჩვენს ყანებს, ვენახებსა და სახლებს გირაოდ გავცემთ, რათა შიმშილის დროს მარცვლეული ვიშოვოთო. 4 ზოგიც ამბობდა: „ჩვენს ყანებსა და ვენახებს ვაგირავებთ, მეფეს ხარკი რომ გადავუხადოთ.+ 5 ჩვენსა და ჩვენს მოძმეთა ძარღვებში ხომ ერთი სისხლი ჩქეფს, ან რამ გაყო ჩვენი და მათი შვილები?! მაგრამ ჩვენ ჩვენი ვაჟები და ასულები მონებად უნდა გავყიდოთ, ზოგი ჩვენს ასულთაგან უკვე დამონებულია კიდეც.+ ძალა არ შეგვწევს, წინ აღვუდგეთ ამას, რადგან ჩვენი ყანები და ვენახები სხვების ხელშია“.

6 ძლიერ განვრისხდი, როცა მოვისმინე მათი გასაჭირი. 7 ავწონ-დავწონე ყველაფერი და დიდებულებსა და მმართველებს ბრალი დავდე, თქვენივე მოძმეებისგან სარგებელს იღებთ-მეთქი.+

ამის შემდეგ, დიდძალი ხალხი შევკრიბე მათ გამო. 8 ვუთხარი: „ჩვენ, რამდენადაც შევძელით, გამოვისყიდეთ ჩვენი იუდეველი მოძმეები, სხვა ხალხებს რომ იყვნენ მიყიდულნი, თქვენ კი ამ დროს თქვენს მოძმეებს უნდა ყიდდეთ, რომლებიც მერე ისევ ჩვენი გამოსასყიდი გახდებიან?!“+ დადუმდნენ ისინი და სათქმელს ვერ პოულობდნენ. 9 შემდეგ ვუთხარი: „არასწორად იქცევით! განა არ უნდა გეშინოდეთ ჩვენი ღვთისა,+ რომ სხვა ხალხებმა, ჩვენმა მტრებმა, არ შეურაცხგვყონ?! 10 მე, ჩემი ძმები და ჩემი მსახურები სარგებლის გარეშე ვაძლევთ სესხად მათ ფულსა და მარცვლეულს. მოდი აღარ გავცეთ სარგებლით სესხი!+ 11 გთხოვთ, დღესვე დაუბრუნეთ მათ თავიანთი ყანები,+ ვენახები, ზეთისხილის კორომები და სახლები, აგრეთვე ფულის, მარცვლეულის, ახალი ღვინისა და ზეთის მეასედი, რომელსაც სარგებლად იღებდით მათგან!“

12 მათ მომიგეს: „ყველაფერს დავაბრუნებთ და უკან არავის არაფერს მოვთხოვთ! ყველაფერს ისე გავაკეთებთ, როგორც შენ ამბობ!“ მოვუხმე მღვდლებს და დავაფიცე ამ კაცებს, რომ დადებულ პირობას შეასრულებდნენ. 13 უბე გადმოვიბერტყე და ვთქვი: „ასე გამოგბერტყოთ ღმერთმა თქვენ-თქვენი სახლებიდან და საკუთრებიდან ყველა, ვინც არ შეასრულებთ დადებულ პირობას! ასე გამოგბერტყოთ და ხელცარიელი დაგტოვოთ!“ ამაზე მთელმა ხალხმა თქვა: „ამინ!“ ხალხმა განადიდა იეჰოვა და შეასრულა დადებული პირობა.

14 ამასთანავე, იმ დღიდან, რაც მეფემ იუდას მიწაზე გამგებლად დამნიშნა,+ მეფე არტაქსერქსეს+ მეფობის მე-20 წლიდან+ 32-ე წლამდე,+ 12 წელი, მე და ჩემს მოძმეებს გამგებლისთვის განკუთვნილი საკვები არ გვიჭამია.+ 15 იმ გამგებლებმა, რომლებიც ჩემამდე იყვნენ, შეაჭირვეს ხალხი და პურისა და ღვინისთვის ყოველდღიურად 40 შეკელ* ვერცხლს ართმევდნენ; მათი მსახურებიც ჩაგრავდნენ ხალხს. მე კი ღვთის შიშის გამო+ ასე არ მოვქცეულვარ.+

16 გარდა ამისა, გალავნის აღდგენაზეც ვმუშაობდი. ყანა არ შეგვიძენია+ და ჩემი ყველა მსახურიც სამუშაოდ იყო გამოსული. 17 იუდეველები და მმართველები, 150 კაცი, აგრეთვე ჩვენს მეზობელ ხალხთაგან მოსულნი, ჩემი სუფრიდან ჭამდნენ. 18 აი, რა მზადდებოდა ყოველდღიურად ჩემი ხარჯებით*: ერთი ხარი, ექვსი საუკეთესო ცხვარი და ფრინველები; ათ დღეში ერთხელ უხვად გვქონდა ნაირ-ნაირი ღვინო. არ მომითხოვია გამგებლისთვის განკუთვნილი საკვები, რადგან ხალხს ისედაც მძიმე ტვირთი აწვა კისერზე. 19 ნუ დამივიწყებ ღმერთო და მაკურთხე იმ ყველაფრისთვის, რაც ამ ხალხისთვის გამიკეთებია!+

6 შეატყობინეს თუ არა სანბალატს, ტობიას,+ არაბ გეშემსა+ და ჩვენს დანარჩენ მტრებს, რომ აღვადგინე გალავანი+ და ამოვავსე ყველა ნაპრალი (თუმცა იმ დროისთვის კარიბჭეებში ჯერ არ იყო ჩადგმული კარები),+ 2 სანბალატმა და გეშემმა შემომითვალეს: „მოდი და დავთქვათ შეხვედრა ონოს ველზე+ ერთ-ერთ სოფელში“. ბოროტება ჰქონდათ ჩემთვის განზრახული, 3 ამიტომ მაცნეების პირით შევუთვალე მათ: „დიდ საქმეს ვარ შეჭიდებული და ვერ ჩამოვალ. რატომ უნდა ჩამოვიდე თქვენთან და შეჩერდეს საქმე?!“ 4 მათ ოთხჯერ შემომითვალეს ეს და მეც ერთსა და იმავეს ვპასუხობდი.

5 ბოლოს სანბალატმა მეხუთედ შემომითვალა იგივე; თავისი მსახური გამომიგზავნა, რომელსაც ხელში გახსნილი წერილი ეჭირა. 6 წერილში ეწერა: „ხალხებში ხმა დაირხა, და გეშემიც+ იმას ამბობს, რომ იუდეველებთან ერთად აჯანყებას აპირებ,+ ამიტომაც აშენებთ გალავანს. როგორც ამბობენ, შენ უნდა გახდე მათი მეფე. 7 წინასწარმეტყველებიც კი დაგინიშნავს, რომ იერუსალიმში შენზე თქვან, იუდას მეფეაო. მეფის ყურამდეც მიაღწევს ხმა, ამიტომ, მოდი და მოვითათბიროთ!“

8 მეც შევუთვალე, არ მომხდარა ის, რასაც შენ ამბობ, და შენ თვითონ იგონებ-მეთქი ამას. 9 ისინი ჩვენს დაშინებას ცდილობდნენ და ამბობდნენ: გული გაუტყდებათ, მუშაობას შეწყვეტენ და საქმე აღარ გაკეთდებაო.+ გევედრები, ღმერთო, მომეცი გამბედაობა!+

10 შემდეგ მივედი შემაიას, მეჰეტაბელის ვაჟ დელაიას ვაჟის, სახლში; ის შინ ჩაკეტილი დამხვდა. მან მითხრა: „ღვთის სახლში, ტაძარში, დავთქვათ შეხვედრა და ჩავკეტოთ ტაძრის კარები, რადგან შენს მოკვლას აპირებენ; ღამით მოვლენ შენ მოსაკლავად“. 11 მე კი მივუგე: „განა შეშვენის ჩემნაირ კაცს გაქცევა?! განა შევა ჩემნაირი კაცი ღვთის ტაძარში და კვლავაც იცოცხლებს?!+ მე იქ არ შევალ!“ 12 მერეღა მივხვდი, რომ ღვთისგან არ იყო გამოგზავნილი ეს წინასწარმეტყველი; ტობიასა და სანბალატს+ ჰყავდათ მოსყიდული ჩემ მოსატყუებლად. 13 შემაია იმისთვის მოესყიდათ, რომ შემშინებოდა და ცოდვა ჩამედინა, რითაც სახელს გამიტეხდნენ და ამას ჩემ საწინააღმდეგოდ გამოიყენებდნენ.

14 ჩემო ღმერთო, შენ მოჰკითხე ტობიასა+ და სანბალატს, ნურც წინასწარმეტყველ ქალ ნოადიასა და სხვა წინასწარმეტყველებს დაივიწყებ, რომლებიც მუდამ ჩემს დაშინებას ცდილობდნენ.

15 გალავნის აღდგენა 52 დღეში, ელულის თვის 25-ე დღეს, დასრულდა.

16 ეს რომ ჩვენმა მტრებმა გაიგეს და მეზობელმა ხალხებმა დაინახეს, დამცირდნენ+ და მიხვდნენ, რომ ეს საქმე ჩვენი ღვთის წყალობით შესრულდა. 17 იმ დროს იუდას დიდებულები+ მრავალ წერილს უგზავნიდნენ ტობიას და ტობიასგანაც მოსდიოდათ წერილები. 18 იუდაში მრავალს ჰქონდა მისთვის ერთგულების ფიცი მიცემული, რადგან ის არახის+ ვაჟის, შექანიას, სიძე იყო, და მის ვაჟს, იეჰოხანანს, ბერექიას ვაჟის, მეშულამის,+ ასული ჰყავდა ცოლად. 19 ყოველთვის მიქებდნენ მას, ჩემი სიტყვები კი მასთან მიჰქონდათ და ტობიაც ჩემ დასაშინებლად წერილებს აგზავნიდა.+

7 დავასრულე თუ არა გალავნის აღდგენა,+ ჩავდგი კარები+ და დავნიშნე კარიბჭის მცველები,+ მგალობლები+ და ლევიანები.+ 2 იერუსალიმზე დავაყენე ჩემი ძმა ხანანი+ და ციხესიმაგრის მთავარი ხანანია,+ რადგან ის ყველაზე სანდო კაცი იყო და ბევრ სხვაზე მეტად ეშინოდა ღვთისა.+ 3 ვუთხარი მათ: „იერუსალიმის კარიბჭეები არ უნდა გაიღოს შუადღის დადგომამდე. მცველებმა ის თავიანთი ცვლის დასრულებამდე უნდა დახურონ და ჩარაზონ. მცველებად იერუსალიმის მკვიდრნი დანიშნეთ, ზოგი სადარაჯოებზე და ზოგიც თავისი სახლის წინ“. 4 იერუსალიმი ვრცელი ქალაქი იყო, მაგრამ ხალხი ცოტა იყო იქ,+ და არც სახლები იყო აღდგენილი.

5 ჩემმა ღმერთმა აღმძრა, რომ შემეკრიბა დიდებულები, მმართველები და ხალხი, რათა საგვარეულოთა მიხედვით აღრიცხულიყვნენ.+ ვიპოვე მათი საგვარეულო ნუსხა, ვინც პირველები დაბრუნდნენ. აი, რა ეწერა მასში:

6 „ესენი იყვნენ სამთავროში მცხოვრები, ბაბილონის მეფე ნაბუქოდონოსორის+ მიერ გადასახლებული ხალხი,+ რომლებიც ტყვეობიდან გათავისუფლების შემდეგ იერუსალიმსა და იუდაში, თავ-თავიანთ ქალაქებში დაბრუნდნენ+ 7 ზერუბაბელთან,+ იეშუასთან,+ ნეემიასთან, აზარიასთან, რაამიასთან, ნახამანისთან, მორდოქაისთან, ბილშანთან, მისფერეთთან, ბიგვაისთან, ნეხუმთან და ბაანასთან ერთად.

აი ამ ებრაელ მამაკაცთა რიცხვი:+ 8 ფაროშის შთამომავლები — 2 172; 9 შეფატიას შთამომავლები — 372; 10 არახის+ შთამომავლები — 652; 11 ფახათ-მოაბის+ შთამომავლები იეშუასა და იოაბის+ საგვარეულოებიდან — 2 818; 12 ელამის+ შთამომავლები — 1 254; 13 ზათუს შთამომავლები — 845; 14 ზაქაის შთამომავლები — 760; 15 ბინუის შთამომავლები — 648; 16 ბებაის შთამომავლები — 628; 17 აზგადის შთამომავლები — 2 322; 18 ადონიკამის შთამომავლები — 667; 19 ბიგვაის შთამომავლები — 2 067; 20 ადინის შთამომავლები — 655; 21 ატერის შთამომავლები ხიზკიას საგვარეულოდან — 98; 22 ხაშუმის შთამომავლები — 328; 23 ბეცაის შთამომავლები — 324; 24 ხარიფის შთამომავლები — 112; 25 გაბაონის+ შთამომავლები — 95; 26 ბეთლემელები და ნეტოფელები — 188; 27 ანათოთელები+ — 128; 28 ბეთ-აზმავეთელები — 42; 29 კირიათ-იეარიმელები,+ ქეფირელები და ბეეროთელები+ — 743; 30 რამელები და გებელები+ — 621; 31 მიქმასელები+ — 122; 32 ბეთელელები+ და აიელები+ — 123; 33 სხვა ნებოს მკვიდრნი — 52; 34 სხვა ელამის შთამომავლები — 1 254; 35 ხარიმის შთამომავლები — 320; 36 იერიხონელები — 345; 37 ლოდის, ხადიდისა და ონოს+ მკვიდრნი — 721; 38 სენაას შთამომავლები — 3 930.

39 მღვდლები:+ იედაიას შთამომავლები იეშუას საგვარეულოდან — 973; 40 იმერის შთამომავლები — 1 052; 41 ფაშხურის+ შთამომავლები — 1 247; 42 ხარიმის+ შთამომავლები — 1 017.

43 ლევიანები:+ იეშუას შთამომავლები, კადმიელის+ შთამომავლები, ჰოდევას საგვარეულოდან — 74. 44 მგალობლები:+ ასაფის შთამომავლები+ — 148. 45 კარიბჭის მცველები:+ შალუმის, ატერის, თალმონის, აკუბის,+ ხატიტასა და შობაის შთამომავლები — 138.

46 ტაძრის მსახურნი*:+ ციხას, ხასუფას, ტაბაოთის, 47 კეროსის, სიას, ფადონის, 48 ლებანას, ხაგაბას, სალმაის, 49 ხანანის, გიდელის, გახარის, 50 რეაიას, რეცინის, ნეკოდას, 51 გაზამის, უზას, ფასეას, 52 ბესაის, მეუნიმის, ნეფიშესიმის, 53 ბაკბუკის, ხაკუფას, ხარხურის, 54 ბაცლითის, მეხიდას, ხარშას, 55 ბარკოსის, სისერას, თამახის, 56 ნეციასა და ხატიფას შთამომავლები.

57 სოლომონის მსახურთა შთამომავლები:+ სოტაის, სოფერეთის, ფერიდას, 58 იაალას, დარკონის, გიდელის, 59 შეფატიას, ხატილის, ფოქერეთ-ჰაცებაიმისა და ამონის შთამომავლები. 60 ტაძრის მსახურნი+ და სოლომონის მსახურთა შთამომავლები სულ 392 იყვნენ.

61 აი, ესენი იყვნენ თელ-მელახიდან, თელ-ხარშიდან, ქერუბიდან, ადონიდან და იმერიდან წამოსულები, რომლებიც ვერ ამტკიცებდნენ, რომელ საგვარეულოს მიეკუთვნებოდნენ და იყვნენ თუ არა წარმოშობით ისრაელები:+ 62 დელაიას, ტობიას და ნეკოდას შთამომავლები — 642. 63 მღვდელთაგან: ხაბაიას შთამომავლები, ჰაკოცისა+ და იმ ბარზილაის შთამომავლები, რომელმაც გალაადელი ბარზილაის+ ერთ-ერთი ასული მოიყვანა ცოლად და სიმამრის სახელი დაერქვა. 64 ისინი ეძებდნენ ნუსხას თავიანთი წარმომავლობის დასამტკიცებლად, მაგრამ ვერ იპოვეს, ამიტომ ისინი მღვდლობისთვის შეუფერებლად მიიჩნიეს.+ 65 თირშათამ*+ უთხრა მათ, რომ არ ეჭამათ ის, რაც წმინდად ითვლებოდა,+ სანამ მღვდელი ურიმითა და თუმიმით*+ არ დაეკითხებოდა ღმერთს.

66 მთელი ხალხის რიცხვი 42 360-ს შეადგენდა,+ 67 თუ არ ჩავთვლით მათ მონებსა+ და მხევლებს, რომელთა რიცხვიც 7 337 იყო; მათ 245 მომღერალი კაცი და ქალიც ჰყავდათ,+ 68 აგრეთვე 736 ცხენი, 245 ჯორი, 69 435 აქლემი და 6 720 ვირი.

70 საგვარეულოთა ზოგიერთმა თავკაცმა შესაწირავი გაიღო საქმის შესასრულებლად.+ თირშათამ საგანძურისთვის გაიღო 1 000 ოქროს დრაქმა*, 50 ჯამი და 530 ხელი გრძელი სამღვდელო სამოსი.+ 71 საგვარეულოთა ზოგიერთმა თავკაცმა საქმის შესასრულებლად საგანძურში შეიტანა 20 000 ოქროს დრაქმა და 2 200 მინა* ვერცხლი, 72 დანარჩენმა ხალხმა კი გაიღო 20 000 ოქროს დრაქმა, 2 000 მინა ვერცხლი და 67 ხელი გრძელი სამღვდელო სამოსი.

73 მღვდლები, ლევიანები, კარიბჭის მცველები, მომღერლები,+ ტაძრის მსახურები თუ სხვა ისრაელები თავ-თავიანთ ქალაქებში დასახლდნენ;+ ასე დასახლდა მთელი ისრაელი თავიანთ ქალაქებში. მე-7 თვეს+ ისინი უკვე თავ-თავიანთ ქალაქებში იყვნენ“.+

8 მთელი ხალხი შეიკრიბა წყლის კარიბჭის+ წინ მოედანზე და უთხრეს გადამწერ ეზრას,+ რომ მოეტანა იეჰოვას მიერ ისრაელისთვის მიცემული+ მოსეს კანონის+ წიგნი. 2 მღვდელმა ეზრამ მე-7 თვის პირველ დღეს+ გამოიტანა კანონი მთელი ხალხის+ — კაცების, ქალებისა და მათ წინაშე, ვინც ჩასწვდებოდა მოსმენილს. 3 გამთენიიდან შუადღემდე ხმამაღლა კითხულობდა ეზრა+ წყლის კარიბჭის წინ მოედანზე, კაცების, ქალებისა და მათ წინაშე, ვინც სწვდებოდა მოსმენილს; ხალხი ყურადღებით ისმენდა+ კანონის წიგნიდან წაკითხულს. 4 გადამწერი ეზრა საგანგებოდ გაკეთებულ ხის კვარცხლბეკზე იდგა. მას მარჯვნივ ედგნენ მათითია, შემა, ანაია, ურია, ხილკია და მაასეია, მარცხნივ კი — ფედაია, მიშაელი, მალქია,+ ხაშუმი, ხაშ-ბადანა, ზაქარია და მეშულამი.

5 გაშალა ეზრამ გრაგნილი და მთელმა ხალხმა დაინახა ეს, რადგან ეზრა ყველაზე მაღლა იდგა; ყველა ფეხზე წამოდგა. 6 განადიდა ეზრამ დიდებული ღმერთი იეჰოვა, რაზეც ხალხმა თქვა: „ამინ! ამინ!“+ და ყველამ ხელები ზეცად აღაპყრო. შემდეგ მათ მუხლი მოიყარეს და პირქვე დაემხვნენ იეჰოვას წინაშე. 7 ლევიანები — იეშუა, ბანი, შერებია,+ იამინი, აკუბი, შაბეთაი, ჰოდია, მაასეია, კელიტა, აზარია, იოზაბადი,+ ხანანი და ფელაია — კანონს განუმარტავდნენ ფეხზე მდგომ ხალხს.+ 8 ისინი ხმამაღლა კითხულობდნენ ღვთის კანონს, თან ხსნიდნენ და განმარტავდნენ, რომ ხალხს გაეგო წაკითხული.+

9 მთელი ხალხი ტიროდა, როცა ისმენდნენ კანონში ჩაწერილ სიტყვებს. თირშათა* ნეემიამ, მღვდელმა და გადამწერმა ეზრამ+ და ლევიანებმა, რომლებიც ხალხს ასწავლიდნენ, მიმართეს მათ: „ეს დღე წმინდაა იეჰოვასთვის, თქვენი ღვთისთვის,+ ამიტომ ნუ ტირით და ნუ გლოვობთ!“ 10 ნეემიამ უთხრა მათ: „წადით, ჭამეთ საუკეთესო საჭმელი+ და დალიეთ ტკბილი სასმელი, ნაწილი კი იმათ გაუგზავნეთ, ვისაც არაფერი აქვს, რომ მოამზადოს! წმინდაა ეს დღე ჩვენი უფლისთვის, ნუ დამწუხრდებით, რადგან იეჰოვასგან მომდინარე სიხარული თქვენი ძალაა*!“ 11 ლევიანები აწყნარებდნენ ხალხს და ეუბნებოდნენ: „დამშვიდდით, ნუ ტირით, წმინდაა ეს დღე!“ 12 წავიდა მთელი ხალხი საჭმელ-სასმელად, სხვებისთვის მოსაკითხის გასაგზავნად და სამხიარულოდ,+ რადგან ჩასწვდნენ მათთვის ნათქვამის არსს.+

13 მეორე დღეს საგვარეულოთა თავკაცებმა, მღვდლებმა და ლევიანებმა გადამწერ ეზრასთან მოიყარეს თავი, რათა უკეთ ჩასწვდომოდნენ კანონს. 14 იეჰოვას მიერ მოსეს მეშვეობით მიცემულ კანონში ისრაელებმა აღმოაჩინეს, რომ მე-7 თვის დღესასწაულის დროს მათ კარვებში უნდა ეცხოვრათ+ 15 და გამოეცხადებინათ+ იერუსალიმსა და სხვა ქალაქებში: „წადით მთიან მხარეში და მოიტანეთ ზეთისხილის, ფიჭვის, მირტის, პალმისა და სხვა ხეების ფოთოლხშირი რტოები, რომ დაწერილისამებრ ააგოთ კარვები!“

16 ხალხიც წავიდა და მოიტანა ფოთოლხშირი რტოები, რომ აეგოთ კარვები თავ-თავიანთ ბანებსა და ეზოებში, ღვთის ტაძრის ეზოებში,+ აგრეთვე წყლის კარიბჭისა+ და ეფრემის კარიბჭის მოედნებზე.+ 17 ააგეს ტყვეობიდან დაბრუნებულმა ისრაელებმა კარვები და დაიწყეს კარვებში ცხოვრება. იესო+ ნავეს ძის დროიდან მოყოლებული იმ დრომდე მათ ეს დღესასწაული ასე არ აღუნიშნავთ, რის გამოც დიდად ხარობდა ერი.+ 18 ყოველდღიურად, პირველი დღიდან ბოლო დღემდე, ხმამაღლა იკითხებოდა ღვთის კანონი.+ შვიდი დღე იდღესასწაულა ხალხმა, მერვე დღეს კი, წესისამებრ, საზეიმო შეკრება მოაწყვეს.+

9 შეიკრიბნენ ისრაელები მე-7 თვის 24-ე დღეს და მარხულობდნენ ჯვალოს სამოსით შემოსილნი და თავზე მტვერდაყრილნი.+ 2 გამოეყვნენ ისრაელის შთამომავლები უცხოტომელებს+ და აღიარეს თავიანთი და თავიანთი მამა-პაპის ცოდვები.+ 3 დადგნენ თავ-თავიანთ ადგილებზე და სამი საათის განმავლობაში ხმამაღლა კითხულობდნენ თავიანთი ღვთის, იეჰოვას, კანონის წიგნს,+ შემდეგი სამი საათის განმავლობაში კი ცოდვებს აღიარებდნენ და პირქვე ემხობოდნენ თავიანთი ღვთის, იეჰოვას წინაშე.

4 იეშუა, ბანი, კადმიელი, შებანია, ბუნი, შერებია,+ ბანი და ქენანი დადგნენ ლევიანთა კვარცხლბეკზე+ და შეღაღადეს იეჰოვას, თავიანთ ღმერთს. 5 ლევიანებმა — იეშუამ, კადმიელმა, ბანიმ, ხაშაბნეიამ, შერებიამ, ჰოდიამ, შებანიამ და ფეთახიამ — თქვეს: „ადექით და განადიდეთ თქვენი ღმერთი იეჰოვა ახლაც და მარადიულადაც!+ ღმერთო, განადიდონ მათ შენი დიდებული სახელი, რომლისთვის ხოტბის შესასხმელადაც არ არსებობს ჯეროვანი სიტყვა!

6 ვერავინ შეგედრება, იეჰოვა;+ შენ შექმენი ზეცა, ზეცათა ზეცა და მთელი მათი ლაშქარი, დედამიწა და ყველაფერი, რაც მასზეა, ზღვანი და ყველაფერი, რაც მათშია. შენ ხარ მათი მაცოცხლებელი, პირქვე ემხობა შენ წინაშე ზეციერი ლაშქარი! 7 შენ ხარ იეჰოვა, ჭეშმარიტი ღმერთი, რომელმაც აბრამი ამოირჩიე,+ გამოიყვანე ქალდეველთა ურიდან+ და აბრაამი უწოდე.+ 8 დაინახე მისი ერთგულება+ და შეთანხმება დაუდე, რომ ქანაანელთა, ხეთელთა, ამორეველთა, ფერიზელთა, იებუსელთა და გირგაშელთა მიწას მისცემდი მას და მის შთამომავლობას.+ შენ შეასრულე კიდეც დანაპირები, რადგან სამართლიანი ხარ!

9 შენ იხილე ჩვენი მამა-პაპის გაჭირვება ეგვიპტეში+ და შეისმინე მათი ღაღადი წითელ ზღვასთან. 10 სასწაულები მოახდინე და დასაჯე ფარაონი, მისი მსახურები და მისი ხალხი,+ რადგან იცოდი, რომ კადნიერად+ ექცეოდნენ შენს ხალხს; განადიდე შენი სახელი, და ის დღემდე განდიდებულია.+ 11 ზღვა გააპე მათ თვალწინ და შუა ზღვაში ხმელეთზე გაატარე ისინი,+ მათი მდევარი კი ქვასავით მოისროლე ბობოქარი ზღვის სიღრმეში.+ 12 დღისით ღრუბლის სვეტით მიუძღოდი მათ, ღამით კი ცეცხლის სვეტით უნათებდი გზას.+ 13 სინაის მთაზე ჩამოხვედი+ და ზეციდან ელაპარაკე მათ,+ მიეცი სწორი სამართალი, სანდო კანონები, სასარგებლო წესები და მცნებები.+ 14 წმინდა შაბათის დაცვა ასწავლე მათ;+ მცნებები, წესები და კანონი მიეცი შენი მსახურის, მოსეს ხელით. 15 ზეციდან პურს აძლევდი, როცა შიოდათ+ და კლდიდან წყალს უჩქეფებდი, როცა სწყუროდათ;+ უთხარი, რომ შესულიყვნენ და დაემკვიდრებინათ მიწა, რომლის მიცემაც ფიცით აღუთქვი.

16 მაგრამ ჩვენი მამა-პაპა კადნიერად იქცეოდა,+ ჯიუტობდა+ და არ ისმენდა შენს მცნებებს. 17 არც მოსმენა სურდათ+ და არც მათ თვალწინ შენ მიერ მოხდენილი საოცარი საქმეები ახსოვდათ; გაჯიუტდნენ და წინამძღოლი აირჩიეს ეგვიპტის მონობაში დასაბრუნებლად.+ მაგრამ შენ მიმტევებელი, გულმოწყალე, თანამგრძნობი, სულგრძელი* ღმერთი ხარ და ურყევია შენი სიყვარული*;+ არ მიგიტოვებია ისინი.+ 18 როცა ხბოს ქანდაკება ჩამოისხეს და ამბობდნენ, ეს არის შენი ღმერთი, რომელმაც ეგვიპტის მიწიდან გამოგიყვანაო,+ და დიდად შეურაცხმყოფელ საქმეებს სჩადიოდნენ, 19 მაშინაც კი არ მიგიტოვებია ისინი უდაბნოში, ვინაიდან დიდად მოწყალე ხარ;+ არ მოშორებია მათ დღისით ღრუბლის სვეტი გზის მაჩვენებლად და ღამით — ცეცხლის სვეტი გზის მანათობლად.+ 20 შენი კეთილი სულით აავსე ისინი, რომ გამჭრიახობა ჰქონოდათ.+ მანანა არ დაგიკავებია მათთვის+ და წყალს აძლევდი, როცა სწყუროდათ.+ 21 კვებავდი მათ უდაბნოში 40 წელი+ და არაფერი მოჰკლებიათ, ტანსაცმელი არ გასცვეთიათ+ და ფეხები არ დასივებიათ.

22 მიეცი მათ სამეფოები და დაუმორჩილე ხალხები, გაუნაწილე მათ მიწა;+ დაეპატრონნენ ისინი ხეშბონის+ მეფის, სიხონის,+ მიწას და ბაშანის მეფის, ოგის,+ მიწას. 23 ცის ვარსკვლავებივით გაამრავლე მათი შთამომავლობა.+ დაამკვიდრებინე ის მიწა, რომლის მიცემაც მათ მამა-პაპას აღუთქვი.+ 24 მათაც დაიმკვიდრეს ეს მიწა;+ შენ დაუმორჩილე მათ იმ მიწის მკვიდრი ქანაანელები+ და ხელში ჩაუგდე მათ მათი მეფეებიც და იმ მიწის მკვიდრნიც, რომ თავიანთი სურვილისამებრ მოქცეოდნენ მათ. 25 დაიპყრეს გამაგრებული ქალაქები+ და ნოყიერი მიწები,+ დაეპატრონნენ ყოველგვარი დოვლათით სავსე სახლებს, ჭებს, ვენახებს, ზეთისხილის კორომებსა+ და უამრავ ხეხილს; ჭამდნენ, ძღებოდნენ, სუქდებოდნენ და განცხრომაში იყვნენ შენი უსაზღვრო სიკეთის გამო.

26 ვერ დაინახეს ეს, გეურჩნენ და განგიდგნენ,+ ზურგი აქციეს შენს კანონს. ხოცავდნენ შენს წინასწარმეტყველებს, რომლებიც აფრთხილებდნენ მათ, რათა შენთან დაებრუნებინათ ისინი; დიდად შეურაცხგყოფდნენ თავიანთი საქმეებით.+ 27 ამიტომაც ჩაყარე ისინი მტრების ხელში,+ რომლებიც ავიწროებდნენ მათ.+ მაგრამ, როცა შემოგღაღადებდნენ გასაჭირის დროს, უსმენდი მათ ზეციდან; უგზავნიდი მხსნელებს, მტრების ხელიდან რომ დაგეხსნა ისინი, რადგან დიდად მოწყალე ხარ.+

28 მაგრამ, როგორც კი სულს მოითქვამდნენ, ისევ ბოროტებას სჩადიოდნენ შენ წინაშე+ და შენც მჩაგვრელების, მტრების, ხელში აგდებდი მათ.+ გიბრუნდებოდნენ ისინი და შველას გთხოვდნენ,+ შენც უსმენდი ზეციდან და კვლავაც შველოდი, რადგან დიდად მოწყალე ხარ.+ 29 აფრთხილებდი მათ, რომ დაეცვათ შენი კანონი, ისინი კი კადნიერად იქცეოდნენ და არ ასრულებდნენ შენს მცნებებს;+ სცოდავდნენ, არ იცავდნენ შენს წესებს, კაცს რომ აცოცხლებს.+ ჯიუტობდნენ და ზურგს გაქცევდნენ, ქედს არ იხრიდნენ და ყურს არ გიგდებდნენ. 30 მრავალი წელი უთმენდი მათ+ და აფრთხილებდი შენი წინასწარმეტყველების პირით, რომლებსაც შენი სულით ალაპარაკებდი, მაგრამ ისინი ყურს არ გიგდებდნენ, ბოლოს კი სხვა ხალხებს ჩაუგდე ხელში.+ 31 არ გაგინადგურებია+ და არ მიგიტოვებია ისინი, რადგან დიდად მოწყალე, თანამგრძნობი და გულმოწყალე ღმერთი ხარ.+

32 ახლა კი, ჩვენო ღმერთო, დიდებულო, ძლიერო, შიშის მომგვრელო ღმერთო, შეთანხმების დამცველო და სიკეთის* მქნელო,+ თვალს ნუ დახუჭავ იმ გასაჭირზე, რომელიც გამოვიარეთ ჩვენ, ჩვენმა მეფეებმა, ჩვენმა მთავრებმა,+ ჩვენმა მღვდლებმა,+ ჩვენმა წინასწარმეტყველებმა,+ ჩვენმა მამა-პაპამ და მთელმა შენმა ხალხმა ასურეთის მეფეთა+ დროიდან დღემდე. 33 დავიმსახურეთ ის, რაც თავს დაგვატყდა, რადგან შენ ყოველთვის ერთგული იყავი, ჩვენ კი ბოროტად ვიქცეოდით.+ 34 ჩვენი მეფეები, ჩვენი მთავრები, ჩვენი მღვდლები და ჩვენი მამა-პაპა არ იცავდნენ შენს კანონს, ყურად არ იღებდნენ შენს მცნებებსა და მითითებებს*, რომლითაც შეაგონებდი. 35 მეფეების დროსაც კი, როცა შენ მიერ ბოძებულ ვრცელსა და ნოყიერ მიწაზე ცხოვრობდნენ და ხარობდნენ შენი უხვი სიკეთით, არ გემსახურებოდნენ+ და არ ეშვებოდნენ თავიანთ ცუდ საქმეებს. 36 აი, დღეს ჩვენ მონები ვართ,+ მონები იმ მიწაზე, რომელიც ჩვენს მამა-პაპას მიეცი, რომ ესაზრდოვა მისი დოვლათით. 37 ჩვენი ცოდვების გამო მის უხვ ნაყოფს ჩვენზე გაბატონებული მეფეები ჭამენ.+ როგორც უნდათ, ისე გვეპყრობიან ჩვენც და ჩვენს პირუტყვსაც, და დიდ გასაჭირში ვართ ჩაცვენილნი.

38 ყოველივე ამის გამო წერილობით ვდებთ აღთქმას+ და ვადასტურებთ ჩვენი მთავრების, ლევიანებისა და მღვდლების ბეჭდით!“+

10 აი ისინი, ვინც დაადასტურა ეს ბეჭდის დასმით:+

თირშათა* ნეემია, ხაქალიას ვაჟი,

და ციდკია, 2 სერაია, აზარია, იერემია, 3 ფაშხური, ამარია, მალქია, 4 ხატუში, შებანია, მალუქი, 5 ხარიმი,+ მერემოთი, ობადია, 6 დანიელი,+ გინეთონი, ბარუქი, 7 მეშულამი, აბია, მიამინი, 8 მააცია, ბილგაი და შემაია; ესენი მღვდლები არიან.

9 ლევიანები: აზანიას ვაჟი იეშუა, ბინუი ხენადადის ძეთაგან, კადმიელი,+ 10 და მათი მოძმეები — შებანია, ჰოდია, კელიტა, ფელაია, ხანანი, 11 მიქა, რეხობი, ხაშაბია, 12 ზაქური, შერებია,+ შებანია, 13 ჰოდია, ბანი და ბენინუ.

14 ხალხის თავკაცები: ფაროში, ფახათ-მოაბი,+ ელამი, ზათუ, ბანი, 15 ბუნი, აზგადი, ბებაი, 16 ადონია, ბიგვაი, ადინი, 17 ატერი, ხიზკია, აზური, 18 ჰოდია, ხაშუმი, ბეცაი, 19 ხარიფი, ანათოთი, ნებაი, 20 მაგფიაში, მეშულამი, ხეზირი, 21 მეშეზაბელი, ცადოკი, იადუა, 22 ფელატია, ხანანი, ანაია, 23 ჰოშეა, ხანანია, ხაშუბი, 24 ჰალოხეში, ფილხა, შობეკი, 25 რეხუმი, ხაშაბნა, მაასეია, 26 ახია, ხანანი, ანანი, 27 მალუქი, ხარიმი და ბაანა.

28 დანარჩენები, რომელთაც გაიგეს და ჩასწვდნენ*, რა მოეთხოვებოდათ — მღვდლები, ლევიანები, კარიბჭის მცველები, მგალობლები, ტაძრის მსახურები* და ყველა, ვინც იმ მიწაზე მცხოვრებ ხალხებს გამოეყო ჭეშმარიტი ღვთის კანონის+ დასაცავად, თავიანთ ცოლებთან, ვაჟებთან და ასულებთან ერთად — 29 შეუერთდნენ თავიანთ მოძმეთ, დიდებულებს, და დაიფიცეს, რომ, თუ არ მიჰყვებოდნენ ღვთის კანონს, რომელიც ღვთის მსახურის, მოსეს ხელით გადაეცათ, და არ დაიცავდნენ გულდასმით ჩვენი უფლის, იეჰოვას, მცნებებს, სამართალსა და წესებს, დაწყევლილნი იქნებოდნენ. 30 აღთქმა დადეს, რომ არ მიათხოვებდნენ თავიანთ ასულებს ამ მიწაზე მცხოვრებ ხალხებს და არც მათ ასულებს შერთავდნენ ცოლად თავიანთ ვაჟებს.+

31 თუ ამ მიწაზე მცხოვრები ხალხები შაბათობით გასაყიდად მოიტანდნენ საქონელსა თუ ნებისმიერ მარცვლეულს, არაფერს იყიდდნენ მათგან არც შაბათს+ და არც რომელიმე წმინდა დღეს,+ არ ისარგებლებდნენ მიწით მე-7 წელს+ და ვალებსაც აპატიებდნენ მოვალეებს.+

32 თითოეულმა აგრეთვე წესად ვიქციეთ, რომ ყოველწლიურად შეკელის* მესამედს გავიღებდით ჩვენი ღვთის ტაძარში შესასრულებელი მსახურებისთვის,+ 33 წარსადგენი პურისთვის,+ ყოველდღიური მარცვლეული შესაწირავისთვის,+ შაბათობით+ და ახალმთვარობების დროს+ დასაწვავი მსხვერპლისთვის, აგრეთვე დადგენილი დღესასწაულებისთვის,+ წმინდა ძღვნისთვის, ცოდვის შესაწირავებისთვის+ ისრაელის გამოსასყიდად, და ჩვენი ღვთის ტაძარში შესასრულებელი ყველა სხვა საქმისთვის.

34 წილი ვყარეთ მღვდლებმა, ლევიანებმა და ხალხმა ჩვენ-ჩვენი საგვარეულოების მიხედვით, თუ ვის როდის უნდა მიგვეტანა შეშა წლიდან წლამდე ჩვენი ღვთის ტაძარში, იეჰოვას, ჩვენი ღვთის, სამსხვერპლოზე დასაწვავად, როგორც ამას კანონი მოითხოვდა.+ 35 აღთქმა დავდეთ, რომ წლიდან წლამდე ჩვენი მიწისა და ყველანაირი ხეხილის პირველმოწეულ ნაყოფსაც იეჰოვას ტაძარში მივიტანდით;+ 36 ჩვენი ღვთის ტაძარში მივიყვანდით ჩვენს პირმშოებსა და ჩვენი პირუტყვისა და ცხვარ-ძროხის პირველმოგებულს+ იქ მომსახურე მღვდლებთან,+ როგორც ამას კანონი მოითხოვს. 37 ჩვენი პირველმოწეული მარცვლეულის ღერღილი,+ ჩვენი შესაწირავი, ყოველგვარი ხის ნაყოფი,+ ახალი ღვინო და ზეთი+ უნდა მიგვეტანა მღვდლებისთვის ჩვენი ღვთის ტაძრის საკუჭნაოში*,+ მიწის მეათედი კი ლევიანებისთვის უნდა მიგვეცა,+ რადგან ლევიანები კრებენ მეათედს ჩვენი სამიწათმოქმედო ქალაქებიდან.

38 მღვდელი, აარონის შთამომავალი, ლევიანებთან უნდა იყოს, როცა ისინი მეათედებს შეკრებენ. ამ მეათედის მეათედი ლევიანებმა ჩვენი ღვთის ტაძრის საკუჭნაოსთვის უნდა გაიღონ;+ 39 ისრაელებმა და ლევიანებმა საკუჭნაოში უნდა მიიტანონ მარცვლეულის, ახალი ღვინისა და ზეთის+ შესაწირავი.+ იქ ინახება ტაძრის ნივთები და იქ რჩებიან მღვდლები, კარიბჭის მცველები და მგალობლები. ჩვენ არ უნდა მივატოვოთ ჩვენი ღვთის ტაძარი!+

11 ხალხის მთავრები იერუსალიმში ცხოვრობდნენ,+ ხალხმა კი წილი ყარა,+ რომ ათიდან ერთი იერუსალიმში, წმინდა ქალაქში, დასახლებულიყო; დანარჩენი ცხრა სხვა ქალაქებში დარჩა. 2 ზოგმა ნებაყოფლობით არჩია იერუსალიმში ცხოვრება, და ხალხმაც დალოცა ისინი.

3 აი სამთავროთა მთავრები, რომლებიც იერუსალიმში ცხოვრობდნენ (დანარჩენი ისრაელები, მღვდლები, ლევიანები, ტაძრის მსახურები*+ და სოლომონის მსახურთა შთამომავლები+ იუდას სხვა ქალაქებში ცხოვრობდნენ, თითოეული თავის ქალაქში, თავის სამკვიდროში.+

4 იუდასა და ბენიამინის ტომებიდან ზოგი იერუსალიმში ცხოვრობდა). იუდასტომელთაგან იყვნენ: ფერეცელთა+ შტოდან — ათაია, უზიას ვაჟი, ზაქარიას ვაჟი, ამარიას ვაჟი, შეფატიას ვაჟი, მაჰალალელის ვაჟი; 5 შელაელთა შტოდან — მაასეია, ბარუქის ვაჟი, ქოლხოზეს ვაჟი, ხაზაიას ვაჟი, ადაიას ვაჟი, იოიარიბის ვაჟი, ზაქარიას ვაჟი. 6 ფერეცის შთამომავალთაგან იერუსალიმში 468 მამაცი კაცი ცხოვრობდა.

7 ბენიამინელთაგან იყვნენ: სალუ,+ მეშულამის ვაჟი, იოედის ვაჟი, ფედაიას ვაჟი, კოლაიას ვაჟი, მაასეიას ვაჟი, ითიელის ვაჟი, იეშაიას ვაჟი; 8 აგრეთვე გაბაი და სალაი — სულ 928 კაცი. 9 მათი ზედამხედველი იყო ზიქრის ვაჟი იოელი, ქალაქის მეორე ზედამხედველი იყო ჰასენუას ვაჟი იუდა.

10 მღვდელთაგან იყვნენ: იოიარიბის ვაჟი იედაია, იაქინი,+ 11 სერაია, ხილკიას ვაჟი, მეშულამის ვაჟი, ცადოკის ვაჟი, მერაიოთის ვაჟი, ღვთის ტაძრის წინამძღოლის, ახიტუბის,+ ვაჟი, 12 და მათი მოძმეები, ტაძარში მომსახურენი — სულ 822 კაცი; ადაია, იეროხამის ვაჟი, ფელალიას ვაჟი, ამცის ვაჟი, ზაქარიას ვაჟი, ფაშხურის+ ვაჟი, მალქიას ვაჟი, 13 და მისი მოძმეები, შტოთა თავკაცები — სულ 242 კაცი; ამაშსაი, აზარელის ვაჟი, ახზაის ვაჟი, მეშილემოთის ვაჟი, იმერის ვაჟი, 14 და მათი მოძმეები — 128 მამაცი ვაჟკაცი. მათი ზედამხედველი იყო ზაბდიელი, დიდგვაროვანთა ოჯახიდან.

15 ლევიანთაგან იყვნენ: შემაია,+ ხაშუბის ვაჟი, აზრიკამის ვაჟი, ხაშაბიას ვაჟი, ბუნის ვაჟი, 16 და შაბეთაი+ და იოზაბადი+ ლევიანთა თავკაცებიდან, რომლებიც ზედამხედველობას უწევდნენ ღვთის ტაძრის გარე სამუშაოებს; 17 აგრეთვე მათანია,+ მიქას ვაჟი, ზაბდის ვაჟი, ასაფის ვაჟი,+ მგალობელთა ზედამხედველი, რომელიც ლოცვისას+ გალობას უძღვებოდა, და ბაკბუკია, მისი მოძმე და დამხმარე, და აბდა, შამუას ვაჟი, გალალის ვაჟი, იედუთუნის+ ვაჟი. 18 წმინდა ქალაქში სულ 284 ლევიანი იყო.

19 კარიბჭის მცველები იყვნენ: აკუბი, თალმონი+ და მათი მოძმეები, რომლებიც იცავდნენ კარიბჭეებს — 172 კაცი.

20 დანარჩენი ისრაელები, ლევიანები და მღვდლები იუდას სხვა ქალაქებში, თავ-თავიანთ სამკვიდროებში, ცხოვრობდნენ. 21 ტაძრის მსახურები+ ოფელში+ ცხოვრობდნენ; მათ ციხა და გიშფა ზედამხედველობდნენ.

22 იერუსალიმში ლევიანების ზედამხედველი იყო უზი, ბანის ვაჟი, ხაშაბიას ვაჟი, მათანიას+ ვაჟი, მიქას ვაჟი, ასაფის შთამომავალთაგან, მგალობელთაგან. ის ღვთის ტაძრის სამუშაოებს ზედამხედველობდა. 23 სამეფო ბრძანებულებით+ მგალობლებს ყოველდღიური საჭიროების მიხედვით მუდმივად ეძლეოდათ სარჩო. 24 ფეთახია, მეშეზაბელის ვაჟი, იუდას ვაჟის, ზერახის, შთამომავალთაგან, მეფის მრჩეველი იყო ყველა საერო საქმეში.

25 ზოგი იუდასტომელი ცხოვრობდა დასახლებებში, რომლებსაც გარს მინდვრები ეკრა; ისინი ცხოვრობდნენ კირიათ-არბასა+ და მის მიმდებარე ქალაქებში, დიბონსა და მის მიმდებარე ქალაქებში, იეკაბცეელსა+ და მის დასახლებებში, 26 იეშუაში, მოლადაში,+ ბეთ-ფალეტში,+ 27 ხაცარ-შუალში,+ ბეერ-შებასა და მის მიმდებარე ქალაქებში, 28 ციკლაგში,+ მექონასა და მის მიმდებარე ქალაქებში, 29 ენ-რიმონში,+ ცორაში,+ იარმუთში, 30 ზანოახში,+ ადულამსა და მათ დასახლებებში, ლაქიშსა+ და მის მიდამოებში, აზეკასა+ და მის მიმდებარე ქალაქებში. ისინი ბეერ-შებიდან ჰინომის ველამდე+ დასახლდნენ.

31 ბენიამინელები ცხოვრობდნენ გებაში,+ მიქმაშში, აიაში, ბეთელსა+ და მის მიმდებარე ქალაქებში, 32 ანათოთში,+ ნობში,+ ანანიაში, 33 ხაცორში, რამაში,+ გითაიმში, 34 ხადიდში, ცებოიმში, ნებალატში, 35 ლოდსა და ონოში,+ ხელოსანთა ველზე. 36 იუდაში მცხოვრები ლევიანთა ზოგი ჯგუფი ბენიამინის მიწაზე დასახლდა.

12 აი მღვდლები და ლევიანები, რომლებიც დაბრუნდნენ შეალთიელის+ ვაჟ ზერუბაბელთან+ და იეშუასთან+ ერთად: სერაია, იერემია, ეზრა, 2 ამარია, მალუქი, ხატუში, 3 შექანია, რეხუმი, მერემოთი, 4 იდო, გინეთოი, აბია, 5 მიამინი, მაადია, ბილგა, 6 შემაია, იოიარიბი, იედაია, 7 სალუ, ამოკი, ხილკია და იედაია. ესენი იყვნენ მღვდლებისა და მათი მოძმეების თავკაცები იეშუას დროს.

8 ლევიანთაგან იყვნენ: იეშუა, ბინუი, კადმიელი,+ შერებია, იუდა და მათანია,+ რომლებიც თავიანთ მოძმეებთან ერთად საგალობლების შესრულებას უძღვებოდნენ. 9 მათი მოძმეები, ბაკბუკია და უნი, მათ მოპირდაპირე მხარეს იდგნენ სადარაჯოზე*. 10 იეშუას შეეძინა იოიაკიმი, იოიაკიმს შეეძინა ელიაშიბი,+ ელიაშიბს კი — იოიადა,+ 11 იოიადას შეეძინა იონათანი, იონათანს კი — იადუა.

12 აი მღვდლები, რომლებიც იოიაკიმის დროს საგვარეულოთა თავკაცები იყვნენ: სერაიას+ საგვარეულოდან — მერაია, იერემიას საგვარეულოდან — ხანანია, 13 ეზრას+ საგვარეულოდან — მეშულამი, ამარიას საგვარეულოდან — იეჰოხანანი, 14 მალუქის საგვარეულოდან — იონათანი, შებანიას საგვარეულოდან — იოსები, 15 ხარიმის+ საგვარეულოდან — ადნა, მერაიოთის საგვარეულოდან — ხელკაი, 16 იდოს საგვარეულოდან — ზაქარია, გინეთონის საგვარეულოდან — მეშულამი, 17 აბიას+ საგვარეულოდან — ზიქრი, მინიამინის საგვარეულოდან — ...*, მოადიას საგვარეულოდან — ფილტაი, 18 ბილგას+ საგვარეულოდან — შამუა, შემაიას საგვარეულოდან — იეჰონათანი, 19 იოიარიბის საგვარეულოდან — მათენაი, იედაიას+ საგვარეულოდან — უზი, 20 სალაის საგვარეულოდან — კალაი, ამოკის საგვარეულოდან — ებერი, 21 ხილკიას საგვარეულოდან — ხაშაბია, იედაიას საგვარეულოდან — ნეთანელი.

22 ლევიანებისა და მღვდლების საგვარეულოთა თავკაცები, ელიაშიბის, იოიადას, იოხანანისა და იადუას+ დროს, სპარსელი დარიოსის მეფობამდე, იყვნენ აღნუსხულნი.

23 ლევიანები, რომლებიც საგვარეულოთა თავკაცები იყვნენ, იოხანანის, ელიაშიბის ვაჟის, დრომდე იყვნენ აღნუსხული და მატიანეში შეტანილი. 24 ლევიანთა თავკაცთაგან იყვნენ ხაშაბია, შერებია და კადმიელის+ ვაჟი იეშუა,+ მათი მოძმეები მათ მოპირდაპირე მხარეს იდგნენ და ხოტბას ასხამდნენ და მადლობდნენ ღმერთს, ღვთის კაცის, დავითის, დადგენილი წესისამებრ;+ დარაჯთა ჯგუფები ერთმანეთის პირისპირ იდგნენ. 25 მათანია,+ ბაკბუკია, ობადია, მეშულამი, თალმონი და აკუბი+ კარიბჭის მცველები+ იყვნენ, რომლებიც კარიბჭესთან საწყობებს დარაჯობდნენ. 26 ისინი ცხოვრობდნენ გამგებელ ნეემიას, მღვდელ და გადამწერ ეზრასა+ და იოიაკიმის, იეშუას+ ვაჟის, იოცადაკის, ვაჟის დროს.

27 როცა იერუსალიმის გალავნის აღდგენა უნდა აღენიშნათ, მოძებნეს ლევიანები და თავ-თავიანთი საცხოვრებელი ადგილებიდან იერუსალიმში ჩაიყვანეს, რათა გალავნის აღდგენა საგალობლებისა+ და წინწილების, ქნარებისა თუ სხვა სიმებიანი საკრავების თანხლებით აღენიშნათ გულმხიარულებს. 28 მგალობელთა შთამომავლები შეიკრიბნენ იორდანის მხარიდან, იერუსალიმის მიდამოებიდან და ნეტოფელების+ დასახლებებიდან, 29 ბეთ-გილგალიდან+ და გებისა+ და აზმავეთის+ მიდამოებიდან, რადგან მგალობლებს დასახლებები იერუსალიმის ირგვლივ ჰქონდათ გაშენებული. 30 განიწმინდნენ მღვდლები და ლევიანები და განწმინდეს ხალხი,+ კარიბჭეები+ და გალავანი.+

31 ავიყვანე გალავანზე იუდას მთავრები, აგრეთვე დავნიშნე მგალობელთა ორი დიდი გუნდი და ჯგუფები, რომლებიც მათ გაჰყვებოდნენ. გალავანზე მყოფი ერთი გუნდი მარჯვნივ ნაცრის კარიბჭისკენ გაემართა.+ 32 ჰოშაია და იუდას მთავართა ნახევარი მათ გაჰყვნენ, 33 აგრეთვე აზარია, ეზრა და მეშულამი, 34 იუდა, ბენიამინი, შემაია და იერემია. 35 მღვდელთაგან საყვირებით+ ხელში მიჰყვებოდნენ ზაქარია, იონათანის ვაჟი, შემაიას ვაჟი, მათანიას ვაჟი, მიქაიას ვაჟი, ზაქურის ვაჟი, ასაფის ვაჟი,+ 36 და მისი მოძმეები: შემაია, აზარელი, მილალაი, გილალაი, მააი, ნეთანელი, იუდა და ხანანი; მათ ღვთის კაცის, დავითის, საკრავები მოჰქონდათ.+ მათ წინ გადამწერი ეზრა+ მოუძღოდა. 37 წყაროს კარიბჭიდან+ პირდაპირ ავიდნენ დავითის სასახლის ზემოთ მდებარე გალავნის აღმართით დავითის ქალაქის+ კიბესთან+ და მივიდნენ წყლის კარიბჭესთან,+ აღმოსავლეთით.

38 მგალობელთა მეორე გუნდი საპირისპირო მიმართულებით მიდიოდა, მე და ხალხის ნახევარიც მას მივყვებოდით და მივდიოდით გალავანზე; გავიარეთ ღუმელთა კოშკი,+ ფართო კედელი,+ 39 ეფრემის კარიბჭე,+ ძველი ქალაქის კარიბჭე+ და თევზის კარიბჭე,+ ხანანელის კოშკი,+ მეას კოშკი და ცხვრის კარიბჭე;+ ჩვენ მცველთა კარიბჭესთან გავჩერდით.

40 ბოლოს მგალობელთა ეს ორი გუნდი ღვთის ტაძართან მივიდა; იქ გავჩერდით მე და ჩემთან ერთად მყოფი მმართველთა ნახევარიც, 41 და მღვდლები: ელიაკიმი, მაასეია, მინიამინი, მიქაია, ელიოენაი, ზაქარია და ხანანია საყვირებით ხელში, 42 აგრეთვე მაასეია, შემაია, ელეაზარი, უზი, იეჰოხანანი, მალქია, ელამი და ეცერი. მგალობლები ხმამაღლა მღეროდნენ იზრახიას ხელმძღვანელობით.

43 დიდძალი მსხვერპლი შესწირეს იმ დღეს და გაიხარეს,+ რადგან ღმერთმა დიდად გაახარა ისინი. ხარობდნენ ქალებიცა და ბავშვებიც,+ და შორს ისმოდა იერუსალიმიდან მხიარულების ხმა.+

44 იმ დღეს დანიშნეს კაცები საწყობების+ ზედამხედველებად, რომლებიც შესაწირავების,+ პირველი ნაყოფისა+ და მეათედისთვის+ იყო განკუთვნილი. იქ უნდა შეეგროვებინათ მღვდლებისა და ლევიანებისთვის კანონით დაწესებული წილი,+ ყანებიდან მოტანილი; ხარობდა იუდა, რადგან მსახურობდნენ მღვდლები და ლევიანები.+ 45 ისინი შეუდგნენ ღვთის წინაშე თავიანთი მოვალეობებისა და განწმენდის ვალდებულების შესრულებას; მგალობლებიცა და კარიბჭის მცველებიც ასე მოიქცნენ, დავითისა და მისი ძის, სოლომონის, დადგენილი წესებისამებრ. 46 წინათ, დავითისა და ასაფის დროს, მგალობლებსა და ღვთის საქებარი თუ სამადლობელი სიმღერების შესრულებას ხელმძღვანელები უძღვებოდნენ.+ 47 ზერუბაბელისა+ და ნეემიას დროს მთელი ისრაელი გასცემდა მგალობელთა+ და კარიბჭის მცველთა+ წილს მათი ყოველდღიური საჭიროებისამებრ. ისინი ლევიანებსაც აძლევდნენ წილს,+ ლევიანები კი — აარონის შთამომავლებს.

13 იმ დღეს ხალხის გასაგონად წაიკითხეს მოსეს წიგნი+ და ნახეს, რომ ჭეშმარიტი ღვთის ხალხს შორის ამონელები და მოაბელები+ არასოდეს უნდა ყოფილიყვნენ,+ 2 რადგან არ მიუციათ ისრაელებისთვის საკვები და წყალი, მეტიც, ბალაამი დაიქირავეს მათ დასაწყევლად;+ თუმცა ჩვენმა ღმერთმა წყევლა კურთხევად აქცია.+ 3 როგორც კი ხალხმა ეს კანონი მოისმინა, შეუდგნენ ისრაელებისგან ჭრელი ხალხის გამოცალკევებას.+

4 მღვდელი ელიაშიბი,+ რომელსაც ჩვენი ღვთის ტაძრის საკუჭნაოები*+ ებარა, ტობიას+ ნათესავად ერგებოდა; 5 ელიაშიბს მისთვის ერთ-ერთი დიდი საკუჭნაო ჰქონდა გამოყოფილი, სადაც ადრე მარცვლეულ შესაწირავს, გუნდრუკს და სხვადასხვა ნივთს ინახავდნენ, აგრეთვე ლევიანების,+ მგალობლებისა და კარიბჭის მცველებისთვის განკუთვნილი მარცვლეულის, ახალი ღვინისა და ზეთის+ მეათედის შესანახად იყენებდნენ. იქვე ინახებოდა მღვდლებისთვის განკუთვნილი შესაწირავებიც.+

6 მთელი ის დრო იერუსალიმში არ ვყოფილვარ, რადგან ბაბილონის მეფე არტაქსერქსეს+ მისი მეფობის 32-ე წელს+ ვეახლე და იქ დავრჩი. გავიდა დრო და დავეთხოვე მეფეს. 7 ჩავედი იერუსალიმში და ვნახე, რამხელა ბოროტება ჩაედინა ელიაშიბს,+ ტობიასთვის+ საკუჭნაო რომ დაეთმო ჭეშმარიტი ღვთის ტაძრის ეზოში. 8 ძალიან არ მომეწონა ეს ამბავი, ამიტომ საკუჭნაოდან გარეთ გამოვყარე ტობიას ავეჯი. 9 ვბრძანე და გამოასუფთავეს საკუჭნაო. შემდეგ უკან დავაბრუნე იქ ღვთის ტაძრის ნივთები,+ მარცვლეული შესაწირავი და გუნდრუკი.+

10 გავიგე, რომ ლევიანებს+ არ ეძლეოდათ კუთვნილი წილი+ და ამის გამო იქ მომსახურე ლევიანები და მგალობლები თავ-თავიანთ ყანებში წასულიყვნენ,+ 11 რის გამოც გავკიცხე მმართველები+ და ვკითხე, რატომ არის-მეთქი მიტოვებული ღვთის ტაძარი.+ შემდეგ შევკრიბე ისინი და თავ-თავიანთ ადგილებზე დავაყენე. 12 მთელმა იუდამ მოიტანა მარცვლეულის, ახალი ღვინისა და ზეთის მეათედი+ საკუჭნაოებში.+ 13 საკუჭნაოები მღვდელ შელემიას, გადამწერ ცადოკსა და ლევიან ფედაიას ჩავაბარე და დამხმარედ ხანანი, ზაქურის ვაჟი, მათანიას ვაჟი, დავუნიშნე; ისინი სანდო კაცები იყვნენ. მათ თავიანთი მოძმეებისთვის წილის მიცემა ევალებოდათ.

14 არ დამივიწყო,+ ჩემო ღმერთო, ამის გამო და ნუ დაივიწყებ იმ სიკეთეს*, რაც შენი ტაძრისა და მისი მსახურებისთვის გამიკეთებია.+

15 გავიგე, რომ იუდაში ხალხი შაბათს+ საწნახელში ყურძენს წურავდა, ვირებს მარცვლეულს, ღვინოს, ყურძენს, ლეღვსა და სხვადასხვაგვარ ტვირთს ჰკიდებდა და შაბათ დღეს+ იერუსალიმში მოჰქონდა. გავაფრთხილე ისინი, რომ იმ დღეს არ ევაჭრათ*. 16 ქალაქში მცხოვრებ ტვიროსელებსაც მოჰქონდათ თევზი და სხვადასხვაგვარი საქონელი და შაბათს ყიდდნენ იუდასტომელებზე იერუსალიმში.+ 17 გავკიცხე იუდას დიდებულები და ვუთხარი: „რატომ სჩადიხართ ბოროტებას და რატომ ბღალავთ შაბათს?! 18 თქვენი მამა-პაპაც ხომ ასე იქცეოდა და მათ გამო ჩვენმა ღმერთმა მთელი ეს უბედურება დაგვატეხა როგორც ჩვენ, ისე ამ ქალაქს?! ახლა კიდევ უფრო არისხებთ ღმერთს ისრაელზე, რადგან კვლავაც ბღალავთ შაბათს!“+

19 შაბათის დადგომამდე, როცა იერუსალიმის კარიბჭეებზე ბინდი ჩამოწვა, ვბრძანე, კარები დაეკეტათ და შაბათის დასრულებამდე არ გაეღოთ. კარიბჭეებთან ჩემი მსახურები დავაყენე, რომ არანაირი ტვირთი არ შემოსულიყო შაბათ დღეს. 20 ამის გამო ვაჭრებსა და სხვადასხვა საქონლის გამყიდველებს ერთი-ორჯერ იერუსალიმის გარეთ მოუწიათ ღამის გათევა. 21 გავაფრთხილე ისინი და ვუთხარი: „რატომ ათევთ ღამეს გალავანთან?! თუ კიდევ მოიქცევით ასე, გაგყრით!“ მას შემდეგ ისინი მეტად აღარ მოსულან შაბათს.

22 ვუთხარი ლევიანებს, რომ ყოველთვის უნდა განწმენდილიყვნენ და მოსულიყვნენ კარიბჭეების დასაცავად, რათა არ შებღალულიყო შაბათი დღე.+ ესეც არ დამივიწყო, ჩემო ღმერთო, და შემიბრალე შენი ურყევი სიყვარულის* გამო!+

23 იმ დროს გავიგე, რომ ზოგ იუდეველს ცოლად აშდოდელი,+ ამონელი და მოაბელი+ ქალები ჰყავდა.+ 24 მათი ვაჟების ნახევარი აშდოდურად და უცხოტომელთა სხვა ენებზე ლაპარაკობდა; ვერცერთი ვერ ლაპარაკობდა იუდეველთა ენაზე. 25 გავკიცხე ისინი, დავწყევლე, ზოგიერთს ხელი დავარტყი,+ თმა დავაგლიჯე და ღვთის სახელით დავაფიცე: „არ მიათხოვოთ თქვენი ასულები მათ ვაჟებს და არ მოიყვანოთ მათი ასულები არც თქვენთვის და არც თქვენი ვაჟებისთვის!+ 26 განა ამის გამო არ შესცოდა ისრაელის მეფე სოლომონმა?! მისნაირი მეფე სხვა არცერთ ერს არ ჰყოლია.+ ღმერთს უყვარდა იგი+ და მთელ ისრაელზე გაამეფა, მაგრამ უცხოტომელმა ცოლებმა ისიც გახვიეს ცოდვაში.+ 27 სად გაგონილა ასეთი ბოროტება, ჩვენს ღმერთს რომ ორგულობთ და უცხოტომელებს ირთავთ ცოლებად?!“+

28 მღვდელმთავარ ელიაშიბის+ ვაჟის, იოიადას,+ ერთ-ერთი ვაჟი ხორონელი სანბალატის+ სიძე იყო, ამიტომ გავაძევე.

29 გახსოვდეს, ჩემო ღმერთო, როგორ შებღალეს მათ მღვდლობა და მღვდელთა და ლევიანთა შეთანხმება!+

30 განვწმინდე ისინი უცხოტომელთა ყოველგვარი სიბილწისგან, და მღვდლებსა და ლევიანებს თავ-თავიანთი მოვალეობები დავაკისრე, თითოეულს თავისი საქმე;+ 31 ვიზრუნე იმაზეც, რომ თავის დროზე მოეტანათ შეშა+ და პირველმოწეული ნაყოფი.

არ დამივიწყო, ჩემო ღმერთო და წყალობა მიყავი!+