უსაფრთხოა თქვენი სახლი? — 20 რამ ამის შესამოწმებლად

„როგორც იქნა, სახლში ვარ!“ — ალბათ, შვებით ამოისუნთქავთ ხოლმე, როდესაც დაძაბული სამუშაო დღის შემდეგ ბრუნდებით; გიხარიათ, რომ სახლში საფრთხე არ გემუქრებათ. მაგრამ ნამდვილად ასეა ეს? საკვირველია, მაგრამ ზოგი სახლში უფრო სერიოზულ ხიფათებს აწყდება, რომელთა შესახებაც შეიძლება არც კი იცოდნენ. განსაკუთრებით დიდი სიფრთხილის გამოჩენა ესაჭიროება მათ, ვისაც პატარა ბავშვები ჰყავს, რათა მინიმუმამდე დაიყვანონ სახლში უბედური შემთხვევების რიცხვი. აქ ჩამოთვლილი რჩევების გამოყენებით რატომ არ შეგემოწმებინათ თქვენი სახლი და არ აღგენიშნათ, რა ცვლილებების მოხდენაა საჭირო?

✔ მცენარეები. თუ პატარა ბავშვები გყავთ, არავითარ შემთხვევაში არ იქონიოთ სახლში შხამიანი მცენარეები. გახსოვდეთ, რომ ცნობისმოყვარე პატარები თითქმის ყველაფერს პირში იდებენ.

✔ ფარდები. ბავშვი ვერ უნდა სწვდებოდეს ფარდის ზონრებს. პატარები მათში შეიძლება გაიხლართონ და გაიგუდონ კიდეც.

✔ უჯრები და კარადები. უსაფრთხოებისთვის რამე მოიფიქრეთ მათ დასაკეტად, რომ ბავშვებმა ვეღარ აიღონ მჭრელი ნივთები და სახიფათო სარეცხი საშუალებები.

✔ კიბე. კარგად არის განათებული? უწესრიგოდ ხომ არ არის რამე ზედ მიყრილ-მოყრილი? გაუკეთეთ თუ არა მას მოაჯირი, რომ ბავშვი არ გადმოვარდეს?

✔ ქურა. ქურაზე დადგმული ჭურჭლის სახელურები ქურის შიდა ნაწილისკენ გქონდეთ შეტრიალებული, განსაკუთრებით მაშინ, როცა საჭმელს აკეთებთ.

✔ ჰაერღუმელი. ხშირად გაწმინდეთ ის თუნუქის ფურცლითურთ. ჭარბი ცხიმი შეიძლება სამზარეულოში ხანძრის გაჩენის მიზეზი გახდეს.

✔ ცეცხლსაქრობი. ერთი მაინც გქონდეთ სახლში და დარწმუნდით, რომ ოჯახის ყველა მოზრდილ წევრს შეუძლია მისი გამოყენება.

✔ ბავშვის საწოლი. თამასები ერთმანეთთან ახლოს უნდა იყოს, ლეიბის ირგვლივ ადგილი კი იმხელა არ უნდა იყოს, რომ ბავშვს თავი ჩაუვარდეს.

✔ ფანჯრები. გისოსები ბავშვებს გადავარდნისგან დაიცავს. ხანძრის შემთხვევაში უფროსებს არ უნდა გაუჭირდეთ მისი გაწევა.

✔ ვიტამინები და წამლები. შეინახეთ ისინი დაკეტილ კარადაში ან ისეთ ადგილზე, სადაც ბავშვებს ხელი არ მიუწვდებათ.

✔ აბაზანა. არასდროს დატოვოთ პატარა ბავშვი აბაზანაში მარტო. ბავშვი შეიძლება დაიხრჩოს სულ რაღაც თვალის დახამხამებაში — პატარა წყალშიც კი.

✔ მიკროტალღოვანი ღუმელი. გახსოვდეთ, რომ მიკროტალღოვან ღუმელში საჭმელი მალე ცხელდება. მაგალითად, ბავშვის საჭმელი შეიძლება ძალიან ცხელი იყოს, თუმცა ბოთლი მხოლოდ თბილია ხოლმე.

✔ ღუმელი. დროდადრო შეამოწმეთ, მხუთავი აირი ხომ არ ჟონავს.

✔ მაყალი. ნუ მიუშვებთ ბავშვებს ახლოს ცხელ მაყალთან.

✔ გარაჟის კარი. დაარიგეთ ბავშვები, რომ არასოდეს გაირბინონ გარაჟის კარის ქვეშ, სანამ კარი იღება ან იკეტება, განსაკუთრებით მაშინ, როცა ეს ავტომატურად ხდება.

✔ კვამლის დეტექტორები. ყოველთვის სუფთად გქონდეთ და რეგულარულად შეამოწმეთ ხოლმე. ყოველწლიურად გამოუცვალეთ ელემენტები.

✔ ელექტროზონრები და შტეფსელის როზეტები. გადაყარეთ გახეხილი ელექტროზონრები. შტეფსელის როზეტები, რომლებსაც არ იყენებთ, უმჯობესია რამეთი გქონდეთ დაცული.

✔ ელექტრომოწყობილობები. ნუ გექნებათ ასეთი მოწყობილობები აბაზანასთან ან ნიჟარასთან ახლოს. ჩამიწებასთან დაკავშირებული რაიმე ნაკლის შემთხვევისთვის გათვალისწინებული ამომრთველები დენის დარტყმას თავიდან აგარიდებთ.

✔ სათამაშოების ყუთები. გაუკეთეთ მათ ერთი ან მეტი საჰაერო ნახვრეტი და ისეთი ანჯამები, რომ თავსახური უცბად არ იხურებოდეს.

უთო. ბავშვი ვერ უნდა სწვდებოდეს უთოსა და მის ზონარს.