ᲐᲥᲐᲓᲘ

ნიმროდის მიერ აშენებული ოთხი ქალაქიდან ერთ-ერთი, რომლითაც „ჩაეყარა საფუძველი მის სამეფოს“ (დბ. 10:10). მიჩნეულია, რომ აქადი იგივე ძველი აგადეა. მისი ზუსტი ადგილმდებარეობა უცნობია.

აქადი ეწოდებოდა იმ ტერიტორიის მთელ ჩრდილოეთ მხარესაც, რომელიც მოგვიანებით ბაბილონის სახელით გახდა ცნობილი. როგორც ჩანს, სარგონ I-ის (არა ესაიას 20:1-ში მოხსენიებული სარგონი) მმართველობის დროს აქადი სამეფო ქალაქი გახდა. შუამდინარეთის სამხრეთი მხარე შუმერის სახელით იყო ცნობილი. ბაბილონი ამ ორ ტერიტორიაზე წარმოიქმნა. ბაბილონურ ტექსტებში ძვ. წ. 539 წლამდე — ამ სამეფოს დაცემამდე — ბაბილონის მმართველები კვლავაც აქადის მეფეებად მოიხსენიებოდნენ. კიროსის ცილინდრზე აღნიშნულია, რომ ბაბილონის დამპყრობმა „ბაბილონის მეფის, შუმერისა და აქადის მეფის“ წოდებები მიიღო.

როგორც ცნობილია, აქადური ხელოვნების ნიმუშები — ნატიფი ქანდაკებები და ლამაზად ნაკვეთი საბეჭდავი ბეჭდები — შუმერულზე უფრო დახვეწილია. დღესდღეობით სიტყვა აქადურს ძველ ასურულ და ბაბილონურ ენებთან მიმართებით იყენებენ.