ᲰᲘᲔᲠᲐᲞᲝᲚᲘᲡᲘ

[წმინდა ქალაქი]

ქალაქი აზიის პროვინციაში. ჰიერაპოლისი მდებარეობდა მცირე აზიაში, ლიკოსის ველის ჩრდილოეთ კიდეზე, ლაოდიკეადან ჩრდ.-ით დაახლოებით 10 კმ-ში. ეს ადგილი შეესაბამება დღევანდელ პამუკალეს (თურქეთი).

როგორც ჩანს, მოციქული პავლე არასოდეს ყოფილა ჰიერაპოლისში, თუმცა ეფესოში მისი ხანგრძლივი ქადაგების შედეგად (ახ. წ. 52/53 წლიდან ახ. წ. 55 წლის ორმოცდამეათე დღის დღესასწაულამდე და მის შემდგომაც [1კრ. 16:8]) „უფლის სიტყვა მთელი აზიის მოსახლეობამ მოისმინა (სქ. 19:1, 10). როგორც ჩანს, ქრისტიანობა ჰიერაპოლისშიც გავრცელდა ეპაფრას თავდაუზოგავი ქადაგების შედეგად (კლ. 4:12, 13).

მართალია, ჰიერაპოლისი პოლიტიკურად მნიშვნელოვან ქალაქს არ წარმოადგენდა, მაგრამ რომის მმართველობის მშვიდობიან პერიოდში მან სახელი გაითქვა, როგორც ნაყოფიერების ფრიგიული ქალღმერთის, კიბელას, თაყვანისმცემლობის ცენტრმა. კიბელას კულტის გავრცელებას ხელი შეუწყო ორმა ბუნებრივმა გარემომ: მინერალური წყლების წყაროებმა და პლუტონიონის, იგივე ქარონიონის სახელით ცნობილმა ღრმა ვიწრო ხეობამ, საიდანაც მომაკვდინებელი აირები გამოიყოფოდა.