ვინ მმართველობს?

„ვინ მართავს ქვეყნიერებას?“ შენთვის რომ დაესვათ ეს კითხვა, რას უპასუხებდი? მორწმუნე ადამიანებიდან უმეტესობას შეიძლება ეთქვა „ღმერთი“ ან „იესო“. ბაჰამურ გაზეთში (The Freeport News) მოცემული სტატია იძლეოდა პასუხს, რომელსაც ცოტა ვინმე თუ ელოდა.

«ზღურბლზე ვიპოვე ტრაქტატი, — იწყებს სტატიის ავტორი. — სხვა დროს არაფრად ჩავაგდებდი ასეთ ცნობას, მაგრამ ამჯერად გადავწყვიტე მისი წაკითხვა. სათაურში დასმული იყო კითხვა — „სინამდვილეში ვინ მართავს ქვეყნიერებას?“» ბიბლიაზე დაფუძნებული ტრაქტატის წაკითხვით ამ ქალმა გაიგო, რომ ქვეყნიერების მმართველი არ არის არც ღმერთი, არც იესო, არამედ სატანა ეშმაკი (იოანე 12:31; 14:30; 16:11; 1 იოანე 5:19, აქ).

„გაითვალისწინე შემზარავი სისასტიკის გულცივი უწესობა, — ხსნის ტრაქტატი. — ადამიანებმა გამოიყენეს გაზის კამერები, საკონცენტრაციო ბანაკები, ცეცხლმფრქვევები, ნაპალმის ბომბები და სხვა საშინელი მეთოდები, რათა შეუბრალებლად ეწამებინათ და მასობრივად გაეწყვიტათ ერთმანეთი. . . რა ძალები უბიძგებენ ადამიანებს ჩაიდინონ ასეთი საზიზღარი მოქმედებები ან რა ძალები მანევრირებენ მათზე და აყენებენ ისეთ სიტუაციებში, რომ ისინი იძულებული არიან, ჩაიდინონ ბოროტმოქმედებები? არასდროს დაფიქრებულხარ ამ კითხვაზე: ხომ არ მოქმედებს ადამიანებზე უხილავი ბოროტი ძალა, რომ მათ განახორციელონ ძალადობის მსგავსი აქტები?“ გასაკვირია, რომ ბიბლია სატანას ‘ამ წუთისოფლის ღმერთს’ უწოდებს? (2 კორინთელთა 4:4).

საბედნიეროდ, ახლოა დრო, როცა სატანა და მისი დემონები მეტად აღარ იქნებიან. „გადადის წუთისოფელი და მისი გულისთქმაც, ღვთის ნების აღმსრულებელი კი რჩება უკუნისამდე“ (1 იოანე 2:17). დიახ, ბიბლია გვპირდება, რომ ღვთის ნების შემსრულებლებს სამართლიან ახალ ქვეყნიერებაში მარადიული ცხოვრების იმედი ექნებათ (ფსალმუნი 36:9–11; 2 პეტრე 3:13; გამოცხადება 21:3, 4). როგორ შვებას მოიტანს სატანისა და მისი დემონების ბოროტი ზეგავლენის ჩამოცილება!

ამ პატარა ტრაქტატის შინაარსის შეჯამების შემდეგ გაზეთში (The Freeport News) მოცემული სტატიის ავტორმა დაასრულა: „მე ნამდვილად მოხარული ვარ, რომ წავიკითხე ეს ტრაქტატი. . . ვინაიდან მეც მაწუხებდა ქვეყნიერების მდგომარეობა და ის, თუ ვინ მმართველობს“.