სიცოცხლის ბილიკზე წარმმართველი ლამპარი

„ვიცი, უფალო, რომ ადამიანის ნებაზე არ არის მისი გზა, რომ მიმავალი კაცი ვერ წარმართავს თავის ნაბიჯებს“ (იერემია 10:23). ამ სიტყვებით წინასწარმეტყველმა იერემიამ აჩვენა, რომ ადამიანებს არ შეუძლიათ, დახმარების გარეშე წარმატებით იარონ სიცოცხლის ბილიკზე. სად შეიძლება ასეთი დახმარების პოვნა? ფსალმუნმომღერალი პასუხს იძლევა იეჰოვა ღმერთისადმი ლოცვაში: „ლამპარია ჩემი ფეხისთვის სიტყვა შენი და სინათლე — ჩემი ბილიკისათვის“ (ფსალმუნი 118:105).

ვინც ხელს ჰკიდებს ღვთის სიტყვის, ბიბლიის, შესწავლას და მისი სიტყვების თანახმად იქცევა, ჰგავს ადამიანს, რომელიც დილაადრიანად მიდის სამოგზაუროდ. სიბნელის გამო ჯერ ბევრი რამე არ ჩანს. მაგრამ მზის ამოსვლასთან ერთად ის უფრო და უფრო მეტს ხედავს. საბოლოოდ, მზე მთლიანად ზემოდან დაჰნათის. ის ყველაფერს გარკვევით ხედავს. ეს თვალსაჩინო მაგალითი გვახსენებს ბიბლიურ იგავს: „მართალთა გზა დილის ნათელივითაა: უფროდაუფრო ნათდება დღის დადგომამდე“ (იგავნი 4:18).

რა შეიძლება ითქვას იმათზე, ვინც უარს ამბობენ ღვთის ხელმძღვანელობაზე? ბიბლია ამბობს: „ბოროტეულთა გზა წყვდიადივითაა: არ იციან, სად წაიფორხილებენ“ (იგავნი 4:19). დიახ, ბოროტეულები იმ ადამიანს ჰგვანან, რომელიც გზას ვერ იკვლევს წყვდიადში. როგორი მოჩვენებითი წარმატებებიც კი არ უნდა ჰქონდეთ, ისინი დროებითია, რადგან „არ არსებობს სიბრძნე, არ არსებობს ცოდნა, არ არსებობს რჩევა უფლის პირისპირ“ (იგავნი 21:30).

ამიტომ მისდიე ღვთის სიტყვის, ბიბლიის, ხელმძღვანელობას. ასეთი მოქმედებით დარწმუნდები იგავნის 3:5, 6-ში ჩაწერილი სიტყვების ჭეშმარიტებაში: „ესავდე უფალს მთელი გულით და ნუ დაენდობი საკუთარ ჭკუას. შეეცადე მის შეცნობას ყოველ შენს გზაზე და ის გაგისწორებს სავალს“ (იგავნი 3:5, 6).