ძალადობას მალე სამარადისოდ მოეღება ბოლო!
„ძალადობა საფრთხეს უქმნის ერს“, — „ნიუ-იორკ ტაიმზი“ (შეერთებული შტატები).
„ძალადობა სახლში“, — „გლობუ“ (ბრაზილია).
„ძალადობა ემუქრება ქალებს მთელ მსოფლიოში“, — „ გლოუბ ენდ მეილი“ (კანადა).
ეს საგაზეთო სათაურები ჩრდილოეთ და სამხრეთ ამერიკაში ნათლად ასახავს შემაძრწუნებელ ტენდენციას. როგორც ამას წინათ მსოფლიო ჯანდაცვის ორგანიზაციამ აღნიშნა: „უკანასკნელ ათწლეულებში ძალადობა, თავისი ყოველი ფორმით, დრამატულად გაიზარდა“.
განვიხილოთ ზოგი დამაფიქრებელი სტატისტიკური მონაცემი:
მკვლელობა. ლათინურ ამერიკაში და კარიბის კუნძულებზე ყოველდღიურად დაახლოებით 1 250 ხდება ძალმომრეობითი სიკვდილის მსხვერპლი. შედეგად, „ამ ქვეყნებიდან ნახევარში, 15—24 წლის ახალგაზრდების სიკვდილიანობის მეორე მიზეზი მკვლელობაა“.
ბავშვებზე ძალადობა. ბავშვებზე ფიზიკური, სექსუალური და ემოციური ძალადობა მთელი მსოფლიოს პრობლემაა. მაგალითად, „რამდენიმე ინდუსტრიულ ქვეყანაში ახალგაზრდების გამოკითხვამ აჩვენა, რომ ბავშვების 10%—15%, რომელთა შორისაც უმეტესობა გოგონები არიან, სექსუალური ძალადობის მსხვერპლნი ხდებიან“.
ძალადობა ქალებზე. 1997 წელს მსოფლიოში ადამიანის უფლებათა დარღვევის შესწავლის შემდეგ, მკვლევარებმა დაასკვნეს, რომ „თითქმის ყველგან ქალების უბედურების მიზეზი ოჯახში გაბატონებული ძალადობაა“ (Human Rights Watch World Report, 1998). ძალადობას ოჯახში, რომელიც მიჩქმალული პრობლემაა, „XX საუკუნის გაუხმაურებელი კრიზისი“ ჰქვია, ნათქვამია გაზეთში „გლოუბ ენდ მეილი“, კანადა.
ასეთივე «უსამართლობით [„ძალადობით“, აქ] იყო აღვსილი» ქვეყანა ნოეს დროს (დაბადება 6:9–12). მაგრამ იეჰოვა ღმერთმა „შეინახა“ ნოე, „სიმართლის მქადაგებელი“, და მისი ოჯახი, „როცა წარღვნა მოუვლინა უღვთოთა წუთისოფელს“. ჩვენს დღეებშიც ასე მოიქცევა ღმერთი. ის დაიცავს „ღვთისმოსავებს“, როცა მოაცილებს მოძალადეებსა და ბოროტებს. დედამიწას კი აღთქმულ ახალ ქვეყნიერებად, სამოთხედ გადააქცევს (2 პეტრე 2:4–9; 3:11–13). ნუთუ სიხარულით არ გევსებათ გული იმის ცოდნით, რომ ძალადობას მალე სამარადისოდ მოეღება ბოლო?