რამდენად მნიშვნელოვანია სიყვარულიდან გამომდინარე სიკეთე?

„ადამიანის სწრაფვა მისი სიკეთეა“, — ნათქვამია ბიბლიაში (იგავები 19:22). მართლაც რომ სასურველია სიკეთის გამოვლენა. ამ მუხლში გამოყენებულია ებრაული სიტყვა, რომელსაც „სიკეთედ“, „წყალობად“, „მადლად“, „სიყვარულად“ და „ერთგულებად“ თარგმნიან. ამ სიტყვის მნიშვნელობის უფრო ზუსტად გადმოცემა შესაძლებელია ფრაზით „სიყვარულიდან გამომდინარე სიკეთე“. ის მიუთითებს სიკეთეზე, რომელსაც უკვე არსებული ურთიერთობა უდევს საფუძვლად. მაგალითად, სიკეთე, რომელსაც ერთი პიროვნება მეორის მიმართ, ამ უკანასკნელის მიერ ადრე გამოვლენილი სიკეთის საპასუხოდ, ავლენს. ეს სიტყვა ერთგულებასაც მოიცავს.

სამწუხაროდ, იუდას მეფე იოაშმა არ განავითარა ეს სასურველი თვისება. ის თავისი მამიდისა და ბიძა იეჰოიადაყისგან ძალიან დავალებული იყო. როდესაც იოაში ჯერ კიდევ ერთი წლისაც არ იყო, მისმა ბოროტმა ბებიამ საკუთარი თავი დედოფლად გამოაცხადა და იოაშის ყველა ძმა, სამეფო ტახტის მემკვიდრეები, ამოწყვიტა. მან ვერ შეძლო პატარა იოაშის მოკვლა, რადგან ბიძამ და მამიდამ ის საიმედოდ გადამალეს. ამ სიკეთესთან ერთად მათ იოაშს ღვთის რჯული ასწავლეს. როდესაც იოაში შვიდი წლის გახდა, მისმა ბიძამ ისარგებლა თავისი, როგორც მღვდელმთავრის, მდგომარეობით და სიკვდილით დასაჯა ბოროტი დედოფალი, იოაში კი სამეფო ტახტზე დასვა (2 ნეშტთა 22:10—23:15).

ახალგაზრდა იოაში შესანიშნავი მმართველი იყო, მაგრამ ბიძის სიკვდილის შემდეგ მან კერპთაყვანისმცემლობა დაიწყო. ღმერთმა მასთან იეჰოიადაყის ვაჟი, ზაქარია, გაგზავნა, რათა განდგომილების გამო მეფე გაეფრთხილებინა. იოაშმა ზაქარია ჩააქოლინა. რა შემაძრწუნებელი სახით გამოავლინა მეფემ ორგულობა იმ ოჯახის მიმართ, რომლისგანაც ასე ძალიან იყო დავალებული! (2 ნეშტთა 24:17—21).

ბიბლიაში ნათქვამია: „არ გაიხსენა მეფე იოაშმა მადლი, რაც [ზაქარიას მამამ] . . . უყო მას, და მოკლა მისი ვაჟი“. როცა კვდებოდა, ზაქარიამ თქვა: „იხილოს უფალმა და მოიკითხოს“. მართლაც, მისი სიტყვები შესრულდა — იოაში მძიმედ დასნეულდა და მისმა საკუთარმა მსახურებმა გამოასალმეს სიცოცხლეს (2 ნეშტთა 24:17—25).

მეფე იოაშისგან განსხვავებით, კურთხეული იქნება და შესანიშნავი მომავლით გაიხარებს ყველა, ვინც გაითვალისწინებს ბიბლიურ რჩევას: „წყალობა და ჭეშმარიტება ნუ დაგტოვებს. . . და მოიპოვებ მადლს. . . ღვთისა და ადამიანის თვალში“ (იგავები 3:3, 4).