მკითხველთა შეკითხვები

რის გაკეთება მართებს ადამიანს, რომელსაც სურს დემონების ზეგავლენისგან გათავისუფლება?

ღვთის სიტყვა ნათელყოფს, რომ დემონების თავდასხმისგან გათავისუფლება შესაძლებელია. ასეთ დროს ლოცვა ასრულებს მნიშვნელოვან როლს (მარკოზი 9:25—29). მაგრამ მათ, რომლებიც დემონების გავლენაში არიან, დამატებითი ზომები უნდა მიიღონ. პირველი საუკუნის ქრისტიანების შემთხვევა დაგვანახვებს, თუ კიდევ რისი გაკეთებაა საჭირო.

სანამ ქრისტეს მიმდევრები გახდებოდნენ, ძველი ეფესოს ზოგი მცხოვრები დემონებით იყო შეპყრობილი. მაგრამ მას შემდეგ, მან, ვინც ღვთის მსახურება გადაწყვიტა და, „ვინც მაგიას მისდევდა, მოიტანა თავისი წიგნები და ყველას წინაშე დაწვა“ (საქმეები 19:19). ამ წიგნების განადგურებით ეფესოში მცხოვრებმა ახალმოქცეულმა ქრისტიანებმა კარგი მაგალითი დაუტოვეს მათ, რომლებსაც დღეს დემონების თავდასხმებისგან გათავისუფლება სურთ. მეტად მნიშვნელოვანია, რომ ამ ადამიანებმა მოიშორონ ყველაფერი ის, რაც სპირიტიზმთან არის დაკავშირებული. ამაში შედის წიგნები, ჟურნალები, ფილმები, ელექტრონული მასალა და მუსიკალური ჩანაწერები, რომლებიც სპირიტიზმის შინაარსს ატარებს; ასევე თილისმები და სხვა საგნები, რომლებსაც ავი სულებისგან დასაცავად იყენებენ (მეორე რჯული 7:25, 26; 1 კორინთელები 10:21).

რამდენიმე წლის შემდეგ, რაც ეფესოელმა ქრისტიანებმა მაგიასთან დაკავშირებული წიგნები დაწვეს, პავლე მოციქულმა დაწერა: ‘ჩვენ ვიბრძვით ბოროტი სულების წინააღმდეგ’ (ეფესოელები 6:12). პავლემ თანაქრისტიანებს მოუწოდა: „შეიმოსეთ ღვთის სრული საჭურვლით, რათა მტკიცედ დაუდგეთ ეშმაკის ხრიკებს“ (ეფესოელები 6:11). ამ რჩევის გათვალისწინება დღესაც სასარგებლოა. ქრისტიანები სულიერად უნდა გაძლიერდნენ, რათა თავი დაიცვან ბოროტი სულებისგან. „უპირველეს ყოვლისა, — ხაზგასმით აღნიშნა პავლე მოციქულმა, — აიღეთ რწმენის დიდი ფარი, რომლითაც შეძლებთ ბოროტის ცეცხლმოკიდებული ისრების ჩაქრობას“ (ეფესოელები 6:16). რწმენის გაძლიერება ბიბლიის შესწავლით არის შესაძლებელი (რომაელები 10:17; კოლოსელები 2:6, 7). აქედან გამომდინარე, ბიბლიის რეგულარული შესწავლა ბოროტი სულების გავლენისგან დაგვიცავს (ფსალმუნები 90:4; 1 იოანე 5:5).

ეფესოელ ქრისტიანებს კიდევ ერთი ნაბიჯის გადადგმა მოეთხოვებოდათ. პავლემ მათ უთხრა: „მუდამ აღავლინეთ ყოველგვარი ლოცვა და ვედრება სულით“ (ეფესოელები 6:18). დიახ, მათ, რომლებსაც სურთ დემონების თავდასხმისგან გათავისუფლება, აუცილებელია, დახმარებისთვის მთელი გულით მიმართონ იეჰოვას (იგავები 18:10; მათე 6:13; 1 იოანე 5:18, 19). ბიბლია მართებულად ამბობს: „ასე რომ, დაემორჩილეთ ღმერთს, წინააღმდეგობა გაუწიეთ ეშმაკს და გაიქცევა თქვენგან“ (იაკობი 4:7).

ქრისტიანებსაც შეუძლიათ ილოცონ მათთვის, რომლებიც დემონების ზეგავლენის ქვეშ არიან, და ყველაფერს აკეთებენ იმისთვის, რომ გათავისუფლდნენ ამ გავლენისგან და იეჰოვას ემსახურონ. ქრისტიანებმა უნდა სთხოვონ ღმერთს, რომ ასეთი ადამიანები სულიერად გააძლიეროს, რათა წინააღმდეგობა გაუწიონ დემონების თავდასხმებს. ღვთის სიტყვაში ნათქვამია, რომ „მართალი კაცის ვედრებას დიდი ძალა აქვს, რადგან სრულდება“. ამიტომ ღვთის მსახურთა ლოცვები, მართლაც, დამხმარეა მათთვის, რომლებიც ყველანაირად ცდილობენ, ‘წინააღმდეგობა გაუწიონ ეშმაკს’ (იაკობი 5:16).

[სურათი 31 გვერდზე]

ეფესოელმა ქრისტიანებმა მაგიასთან დაკავშირებული წიგნები დაწვეს.