ჰქონდა იესოს ბიბლია?

იესოს ბიბლია არ ჰქონია, რადგან იმ დროისათვის სრული ბიბლია არ არსებობდა. თუმცა სინაგოგებში ინახებოდა ის გრაგნილები, რომელთა ტექსტიც მოგვიანებით ბიბლიის ნაწილი გახდა. ერთხელ ნაზარეთის სინაგოგაში იესომ გრაგნილიდან ესაია წინასწარმეტყველის სიტყვები ამოიკითხა (ლუკა 4:16, 17). პისიდიის ანტიოქიაში პავლე მოციქულმა ნახა, რომ ხალხს „კანონისა და წინასწარმეტყველთა წიგნებს“ უკითხავდნენ (საქმეები 13:14, 15). მოწაფე იაკობმა კი აღნიშნა, რომ მოსეს სიტყვებს ‘ხმამაღლა კითხულობდნენ სინაგოგებში ყოველ შაბათს’ (საქმეები 15:21).

ჰქონდათ თუ არა პირველ საუკუნეში წმინდა წერილები? მაგალითად, დედოფალ კანდაკეს სამეფო კარის მსახურს, ეთიოპ საჭურისს ალბათ ჰქონდა, რადგან, თავის ეტლში მჯდომი „ხმამაღლა კითხულობდა ესაია წინასწარმეტყველს“, როდესაც მასთან მოწაფე ფილიპემ მიირბინა (საქმეები 8:26—30). მოციქულმა პავლემ კი ტიმოთეს სთხოვა, ჩაეტანა მისთვის „გრაგნილები, განსაკუთრებით პერგამენტები“ (2 ტიმოთე 4:13). მართალია პავლეს არ დაუკონკრეტებია, თუ რომელი გრაგნილები უნდა წაეღო ტიმოთეს, სავსებით შესაძლებელია, რომ ის გრაგნილები ებრაული წერილების მონაკვეთები ყოფილიყო.

აღმოსავლეთმცოდნის, პროფესორ ალან მილარდის აზრით, ებრაელებს შორის წმინდა წერილების გრაგნილები ძირითადად ჰქონდათ პალესტინის „გავლენიან და განათლებულ ხალხს, ზოგიერთ ფარისეველსა და ნიკოდემოსის მსგავს მოძღვრებს“. ამის მიზეზი ის იყო, რომ გრაგნილები ძვირი ღირდა. ალან მილარდის შეფასებით, „ესაიას წინასწარმეტყველების გრაგნილი 6—10 დინარი ღირდა“, მთელი ებრაული წერილების შესაძენად კი, რომელიც „15—20 გრაგნილისგან შედგებოდა, შეიძელბა ნახევარი წლის გასამრჯელო ყოფილიყო საჭირო“.

ბიბლიაში არ წერია, ჰქონდათ თუ არა იესოსა და მის მოწაფეებს გრაგნილები. თუმცა იესომ საფუძვლიანად იცოდა წმინდა წერილები. შეეძლო ზუსტად მოეყვანა ციტატები ებრაული წერილებიდან და ებრაულ წერილებზე დაფუძნებით ელაპარაკა (მათე 4:4, 7, 10; 19:4, 5). დღეს ბიბლია ადვილად ხელმისაწვდომია და არც ისე ძვირი ღირს, რაც იმის საშუალებას იძლევა, რომ კარგად გავეცნოთ მას.