კარგად იცნობთ ზეციერ მამას?

რამდენად კარგად იცნობთ თქვენს მამას? ეს კითხვა შეიძლება ცოტა უცნაურად მოგეჩვენოთ, თუ მოსიყვარულე ოჯახში გაიზარდეთ. „რა თქმა უნდა, კარგად ვიცნობ!“ — ალბათ თქვენი პასუხი ასეთი იქნება. უდავოდ, ადამიანთა უმრავლესობამ კარგად იცის, თუ რა მოსწონს და რა არ მოსწონს მათ მამებს, როგორ რეაგირებენ ისინი ამა თუ იმ სიტუაციაში და როგორ ზრუნავენ თავიანთ ოჯახებზე.

და მაინც, ზოგჯერ, ამა თუ იმ სიტუაციაში მამათქვენი შეიძლება ისე მოიქცეს, რომ ამან თქვენში დიდი გაოცება გამოიწვიოს. მაგალითად, შვილი შეიძლება თავის მამას მშვიდ და რბილი ხასიათის პიროვნებად იცნობს. მაგრამ, როდესაც ოჯახი საფრთხის წინაშე დგება, შვილი ხედავს, რომ მამა სულ სხვა ადამიანად იქცევა — ის გააფთრებით იცავს ოჯახს.

რამდენად კარგად იცნობთ შემოქმედს? მის შესახებ ბიბლიაში ნათქვამია: „მისით ვცოცხლობთ, ვმოძრაობთ და ვარსებობთ“ (საქმეები 17:28). სიცოცხლე ღმერთმა გვიბოძა, ამიტომ ის ყველა ჩვენგანის მამაა (ესაია 64:8). შესაძლოა თქვენც იზიარებთ ამ აზრს და ეს კარგიცაა, რადგან ასეც უნდა ფიქრობდეთ. მაგრამ მხოლოდ ეს არაა საკმარისი. ღმერთის შესახებ გაცილებით მეტი უნდა გავიგოთ. ეს კი ჩვენთვისვე იქნება სასარგებლო.

თუ მამას პატივს სცემთ და კარგი ურთიერთობა გაქვთ მასთან, ეს იმაზე მეტყველებს, რომ კარგად იცნობთ მას. მსგავსადვე, რაც უფრო კარგად გაეცნობით ღმერთს, მით უფრო მეტად განავითარებთ მასთან ახლო ურთიერთობას. თუ კარგად გაიცნობთ ღმერთს და უფრო მეტს გაიგებთ მისი განზრახვების შესახებ, ის დაგეხმარებათ, გაუმკლავდეთ ცხოვრებისეულ სირთულეებს.

რა თვისებები აქვს ღმერთს? როგორ უნდა იმოქმედოს ღვთის თვისებების შესახებ მეტის გაგებამ მასთან თქვენს ურთიერთობაზე? გაკისრებთ რაიმე პასუხისმგებლობას ღვთის გაცნობა? ამ კითხვებზე პასუხი მომდევნო სტატიაში იქნება განხილული.

[ჩანართი 3 გვერდზე]

სხვებთან თქვენი ურთიერთობა დამოკიდებულია იმაზე, თუ რამდენად კარგად იცნობთ მათ