თქვენ შეგიძლიათ გქონდეთ ბედნიერი მომავალი!

როგორ შეიძლება ნამდვილი ბედნიერების პოვნა? თუ ახლავე დაფიქრდებით, რა შედეგები მოჰყვება თქვენ მიერ მიღებულ გადაწყვეტილებას არაერთი წლის მანძილზე, ამან შესაძლოა გარკვეულწილად განსაზღვროს, რამდენად ბედნიერი მომავალი გექნებათ.

აღსანიშნავია, რომ შეიძლება გაგიჭირდეთ ისეთი გადაწყვეტილების მიღება, რომელიც ნამდვილ ბედნიერებას მოგიტანთ მთელი ცხოვრების მანძილზე. რატომ არის ეს ასე რთული? ბევრს დღესვე სურს ყველაფრის მიღება. მაგალითად, შეიძლება გესმით, რომ თუ ბიბლიურ რჩევებს გაითვალისწინებთ, მტკიცე ოჯახი გექნებათ (ეფესოელები 5:22—6:4). ამას ვერ მიაღწევთ, თუ ყოველთვის სათანადო დროს არ დაუთმობთ ოჯახს და გადაჰყვებით სამუშაოს, გართობასა თუ დასვენებას. როგორც ცხოვრების ბევრ სხვა სფეროში, ამჯერადაც არჩევნის გაკეთება მოგიწევთ წუთიერ სიამოვნებასა და ხანგრძლივ ბედნიერებას შორის. რა დაგეხმარებათ სწორი კურსის არჩევაში? მოდი, დავფიქრდეთ ოთხ მხარეზე.

1. იფიქრეთ მოსალოდნელ შედეგებზე

გადაწყვეტილების მიღებამდე დაფიქრდით მოსალოდნელ შედეგებზე. ბიბლია გვირჩევს: „წინდახედული ხედავს უბედურებას და იმალება“ (იგავები 22:3). თუ თვალს გაუსწორებთ რეალობას და დაფიქრდებით, რა სავალალო შედეგები შეიძლება მოჰყვეს თქვენს გადაწყვეტილებას, დიდი ალბათობაა, რომ არ დაადგებით სახიფათო გზას. მეორე მხრივ, თუ იფიქრებთ კარგ შედეგებზე, რომელსაც გონივრული გადაწყვეტილება მოგიტანთ არაერთი წლის მანძილზე, ეს გიბიძგებთ, განაგრძოთ სწორი კურსით სვლა.

ჰკითხეთ საკუთარ თავს: „რა კვალს დააჩნევს ჩემს ცხოვრებას მიღებული გადაწყვეტილება ერთი წლის ან თუნდაც 10-20 წლის შემდეგ? როგორ იმოქმედებს ეს ჩემს ემოციურ თუ ფიზიკურ ჯანმრთელობაზე? რა გავლენას მოახდენს ჩემ მიერ მიღებული გადაწყვეტილება ჩემი ოჯახის წევრებსა თუ სხვა საყვარელ ადამიანებზე?“ მხედველობიდან არ გამოგრჩეთ, საკუთარ თავს დაუსვათ ყველაზე მნიშვნელოვანი კითხვა: „მოეწონება ჩემ მიერ მიღებული გადაწყვეტილება ღმერთს? უარყოფითად ხომ არ იმოქმედებს ეს მასთან მეგობრობაზე?“ ვინაიდან ბიბლია ღვთისგან არის შთაგონებული, ის დაგეხმარებათ, განსაზღვროთ, რა ესიამოვნება ღმერთს და, ამავე დროს, თავი აარიდოთ მოსალოდნელ საფრთხეს (იგავები 14:12; 2 ტიმოთე 3:16).

2. სწორი კურსით წადით

ბევრი, ნაცვლად იმისა, რომ თავად მიიღოს გადაწყვეტილებები, გარშემომყოფთ ჰბაძავს. მაგრამ ცხოვრების ამა თუ იმ წესის მიყოლა ვერ მოგიტანთ ბედნიერებას მხოლოდ იმიტომ, რომ მას უმრავლესობა ირჩევს. ყველაფერი კარგად აწონ-დაწონეთ. მოვიყვანოთ ნატალის მაგალითი.a ის გვიზიარებს: „მინდოდა, ბედნიერი ოჯახი შემექმნა. მაგრამ ვხვდებოდი, რომ ამისთვის არაფერს ვაკეთებდი, რადგან არასწორი გეზით მივდიოდი. ჩემი მეგობრები, რომლებთანაც ერთად კოლეჯში ვსწავლობდი, საკმაოდ ჭკვიანები და განათლებულები იყვნენ, მაგრამ პირად ცხოვრებაში არაერთ შეცდომას უშვებდნენ. ისინი ცხვირსახოცებივით იცვლიდნენ შეყვარებულებს. მათი არ იყოს, მეც არაერთი მეგობარი ბიჭი გამოვიცვალე, რამაც არაერთხელ მომაყენა ემოციური ტკივილი“.

ნატალიმ იეჰოვას მოწმეებთან დაიწყო ბიბლიის შესწავლა. იგი ამბობს: „მოწმეებს შორის ვნახე ბევრი ბედნიერი ახალგაზრდა თუ წყვილი. მართალია, ადვილი არ იყო, მაგრამ ნელ-ნელა ყველაფერი გადავაფასე და ცხოვრების წესი შევიცვალე“. რა იყო შედეგი? ნატალი განაგრძობს: „ყოველთვის მინდოდა, ცოლად გავყოლოდი ისეთ მამაკაცს, რომლის მიმართაც ღრმა პატივისცემით ვიქნებოდი განმსჭვალული. გარკვეული დროის გასვლის შემდეგ ცოლად გავყევი კაცს, რომელიც ჩემს რწმენას იზიარებდა. ღვთის წყალობით, დღეს ისეთი ოჯახი მყავს, რომელზეც ვერც კი ვიოცნებებდი“.

3. შორს გაიხედეთ

მხოლოდ დღევანდელზე ნუ იფიქრებთ, უფრო შორს გაიხედეთ — ნათლად წარმოისახეთ, რა ბედნიერი მომავალი გელოდებათ და იფიქრეთ იმაზე, თუ რისი გაკეთება გმართებთ, ასეთი მომავალი რომ გქონდეთ (იგავები 21:5). ნუ შემოიფარგლებით მხოლოდ 70-80 წლით, რაც დღეს ადამიანის სიცოცხლის საშუალო ხანგრძლივობაა. ნაცვლად ამისა, წარმოიდგინეთ, როგორ დატკბებით მარადიული ცხოვრებით მომავალში, როგორც ამას ბიბლია გვპირდება.

ბიბლიიდან ვიგებთ, რომ იესო ქრისტეს გამოსასყიდის მეშვეობით ღმერთმა შესაძლებელი გახადა, ადამიანებს მარადიულად ეცხოვრათ (მათე 20:28; რომაელები 6:23). ღმერთი გვპირდება, რომ მალე მისი თავდაპირველი განზრახვა ადამიანებთან და დედამიწასთან მიმართებით შესრულდება. ღვთის მოყვარულთ შეუძლიათ დატკბნენ სამოთხედქცეულ თვალწარმტაც დედამიწაზე მარადიული ცხოვრებით (ფსალმუნი 37:11; გამოცხადება 21:3—5). თუ გადაწყვეტილების მიღების დროს შორს გაიხედავთ, თქვენც გექნებათ ასეთი მომავალი.

4. ძალ-ღონე არ დაიშუროთ მიზნის მისაღწევად

რისი გაკეთება გმართებთ იმისთვის, რომ გქონდეთ ბედნიერი მომავალი, რომელსაც ღმერთი გვპირდება? პირველ რიგში, შეიძინეთ ცოდნა ღვთის შესახებ (იოანე 17:3). ბიბლიის საფუძვლიანი ცოდნა რწმენას განგიმტკიცებთ, რომ ღვთის დაპირებები ერთ დღესაც რეალობად იქცევა. ასეთი რწმენა მოგცემთ იმის ძალას, რომ მოახდინოთ საჭირო ცვლილებები და მოიპოვოთ ღვთის კეთილგანწყობა.

დავფიქრდეთ მაიკლის მაგალითზე. იგი გვიყვება: „ალკოჰოლსა და ნარკოტიკებს 12 წლიდან მივეძალე. მოგვიანებით, ერთ-ერთი ბანდის წევრი გავხდი. მეგონა, რომ 30 წლამდეც ვერ ვიცოცხლებდი. ისეთი გაღიზიანებული და იმედგაცრუებული ვიყავი, რომ არაერთხელ ვცადე თავის მოკვლა. ვფიქრობდი, რომ ცხოვრება უფრო აზრიანი უნდა ყოფილიყო, რომელიც მე ვერ ვიპოვე“. მაიკლი ჯერ კიდევ სკოლაში სწავლობდა, როცა მისი ბანდის ერთ-ერთმა წევრმა იეჰოვას მოწმეებთან ბიბლიის შესწავლა დაიწყო. მას მაიკლიც შეუერთდა.

ბიბლიიდან ნასწავლმა მაიკლს სრულიად შეუცვალა წარმოდგენა საკუთარ მომავალზე. ის გვიზიარებს: „გავიგე, რომ მომავალში დედამიწა კვლავ სამოთხედ გადაიქცეოდა და ხალხი მშვიდად, ყოველგვარი წუხილის გარეშე იცხოვრებდა. იქ ჩემი თავიც წარმოვიდგინე. მიზნად დავისახე, იეჰოვასთან ახლო ურთი ერთობა განმევითარებინა. მაგრამ დროდადრო ჩავარდნებიც მქონდა. ბიბლიის შესწავლის დაწყების შემდეგ რამდენჯერმე დავთვერი და ქალთანაც ვიყავი“.

როგორ შეძლო მაიკლმა მორეოდა საკუთარ თავს და შეეცვალა ცხოვრების წესი? იგი ამბობს: „ჩემი მასწავლებელი ყოველთვის მომიწოდებდა, რომ ყოველდღიურად მეკითხა ბიბლია და მათთან მქონოდა ურთიერთობა, ვისაც ღვთის ნების შესრულება სურდა. ვგრძნობდი, რომ ჩემი ყოფილი ბანდის წევრები კვლავ უარყოფით გავლენას ახდენდნენ ჩემზე. მართალია, უწინ ისინი ჩემთვის ოჯახის წევრებივით იყვნენ, მაგრამ ამჯერად მათთან ყოველგვარი კავშირი გავწყვიტე“.

თავიდან მაიკლმა დაისახა მოკლევადიანი მიზნები, რაც დაეხმარა, მიეღწია ღირებული მიზნისთვის, კერძოდ, ეცხოვრა ღვთის ნორმებით. თქვენც შეგიძლიათ იმავეს მიღწევა. ჩამოწერეთ, რა გრძელვადიანი მიზნების მიღწევა გსურთ და რა ნაბიჯების გადადგმა დაგეხმარებათ მათ მიღწევაში. გაანდეთ თქვენი მიზნები მათ, ვინც მხარში ამოგიდგებათ და სთხოვეთ, თვალი ადევნონ თქვენს სულიერ ზრდას.

ნუ გადადებთ ღვთის შესახებ შემეცნების მიღებას; შეეცადეთ, რაც შეიძლება, მალე მიჰყვეთ მის ხელმძღვანელობას ცხოვრების ნებისმიერ სფეროში. ახლავე გააკეთეთ ყველაფერი იმისათვის, რომ გაიღრმავოთ სიყვარული ღვთისა და მისი სიტყვის მიმართ. მასზე, ვინც ბიბლიური პრინციპებით ცხოვრობს, ღვთის სიტყვაში ნათქვამია: „ყველაფერში, რასაც აკეთებს, ხელი მოემართება“ (ფსალმუნი 1:1—3).

[სქოლიო]