კარდაკარ მსახურებას პირადი სარგებლობა მოაქვს
1 „ჩაიარე ქალაქში, იერუსალიმში, და ნიშანი დაადე შუბლზე იმ ხალხს, რომელიც კვნესის და მოთქვამს იქ ჩადენილ სისაძაგლეთა გამო“ — ასე უნდა შეესრულებინა მწერლის სამელნის მქონე კაცს იეჰოვას დავალება ძველი იერუსალიმის უკანასკნელ დღეებში (ეზეკ. 9:2—11).
2 დღეს იეჰოვას მოწმეები მსგავს საქმეს ასრულებენ მთელ მსოფლიოში იმით, რომ დაუღალავად ქადაგებენ კეთილ ცნობას კარდაკარ და ეძებენ მათ, ვისაც ჭეშმარიტების გაგება სურს, აგრეთვე აფრთხილებენ მათ, ვისაც მოსმენა არ უნდა. ასრულებ ამ სიცოცხლის გადამრჩენ საქმეს? პირადი მდგომარეობისდა მიხედვით სრულად მონაწილეობ მასში?
3 ამ საქმეში მოხმარებული ჩვენი ძალისხმევა ჯილდოვდება, როდესაც გვესმის, რომ ყოველწლიურად ათასობით ადამიანს ეწევა დახმარება ჭეშმარიტების გაგებაში. ამავე დროს, ბევრ პირად სარგებლობასაც ვღებულობთ, როცა რეგულარულად და გულმოდგინედ ვმონაწილეობთ კარდაკარ სამქადაგებლო მსახურებაში. როგორ? განვიხილოთ შემდეგი:
◼ გვეხმარება, უფრო დავაფასოთ ჭეშმარიტება. რაც უფრო მეტად ვმონაწილეობთ კარდაკარ მსახურებაში, მით უფრო მეტად გვესმის ‘კვნესა და მოთქმა სისაძაგლეთა გამო’. დარწმუნებული ვართ, რომ ბიბლიური წინასწარმეტყველება სრულდება, და გვესმის, რომ კაცობრიობის პრობლემებს მხოლოდ იეჰოვას სამეფო გადაწყვეტს იესო ქრისტეს მეშვეობით.
◼ გვეხმარება სულის ნაყოფის განვითარებასა და სრულყოფაში. აშკარაა, კარდაკარ მსახურების დასაწყებად და გასაგრძელებლად სულის ყველა ნაყოფი გვჭირდება — ესენია: სიყვარული, სიხარული, მშვიდობა, სულგრძელობა, სახიერება, სიკეთე, რწმენა (სსგ), სიმშვიდე, თავშეკავება (გალ. 5:22—24).
◼ გვეხმარება ადამიანისადმი შიშის დაძლევაში. გახსოვს, რას გრძნობდი კარდაკარ პირველი მსახურებისას? მიუხედავად ამისა, ნელ-ნელა ვხედავთ, რომ კეთილი ცნობის ქადაგება და ადამიანების გაფრთხილება ყველაზე მნიშვნელოვანია, ამიტომ ხალხის უარი და მათი მხრიდან წინააღმდეგობა შედარებით უმნიშვნელო ხდება. იერემიას მსგავსად, ჩვენც ვრწმუნდებით იეჰოვას მხარდაჭერაში, რაც, თავის მხრივ, რწმენას გვინმტკიცებს (იერ. 1:17—19).
◼ თავმდაბლებს გვხდის. მალე ვგებულობთ, რომ ამ საქმეს საკუთარი ძალებითა თუ უნარით არ ვასრულებთ. პირიქით, თუ თავმდაბლები ვრჩებით და არ ვართ ‘ურჩები’ და ‘უკან მიქცეული’, იეჰოვა ‘სწავლულთა ენას მოგვცემს’ და გვეცოდინება, როგორ ‘გავამხნეოთ’ სხვები (ეს. 50:4—6).
◼ ძალას გვმატებს ჭეშმარიტების დასაცავად. ბასრი ორლესული მახვილი — ღვთის სიტყვა, ბიბლია, — ეფექტურად რომ გამოვიყენოთ, პრაქტიკა გვჭირდება. კარდაკარ მსახურებისას ბიბლიის მუდმივი გამოყენება დაგვანახვებს, რომ ის არის „ცოცხალი, მოქმედი“ (ებრ. 4:12).
◼ გვაძლიერებს სულიერად და ფიზიკურად. კარდაკარ რეგულარულად მსახურება სულიერი სიფხიზლის შენარჩუნებაში გვეხმარება და კეთილ სინდისს გვძენს, რითაც ჩვენს სიხარულს უწყობს ხელს. ბევრს ფიზიკური დატვირთვის შედეგად ჯანმრთელობა უუმჯობესდება.
4 თუ გავითვალისწინებთ იმ მრავალ სარგებლობას, რაც კარდაკარ მსახურებას მოაქვს როგორც მათთვის, ვინც გვისმენს, ისე ჩვენთვის, უდავოდ, საფუძვლიანი მიზეზი გვაქვს, ‘დავრჩეთ ამაში’, ანუ სრული და რეგულარული მონაწილეობა მივიღოთ მასში (1 ტიმ. 4:16, „ახალი აღთქმა და ფსალმუნი“, 1990).