მონაწილეობა მიიღე საქმეში, რომელიც აღარასოდეს გამეორდება
1 კაცობრიობის ისტორიის განმავლობაში ზოგჯერ აუცილებელი იყო, რომ იეჰოვას განაჩენი შეესრულებინა თავის მტრებზე. მაგრამ გულმოწყალების გამო სწორად განწყობილ პიროვნებებს მისცა გადარჩენის შესაძლებლობა (ფსალმ. 102:13). მათ ბედს განსაზღვრავს ის, თუ როგორ გამოეხმაურებიან მის გულმოწყალებას.
2 მაგალითად წარღვნამდე, რომელიც მოხდა ძვ. წ. 2370 წელს, ნოე იყო „სიმართლის მქადაგებელი“. განადგურდნენ ისინი, რომლებიც არ ღებულობდნენ ღვთიურ გაფრთხილებას (2 პეტ. 2:5; ებრ. 11:7). სანამ ახ. წ. 70 წელს იერუსალიმი განადგურდებოდა, იესომ ნათლად მიუთითა, თუ რა უნდა მოემოქმედებინა ნებისმიერს, რათა თავი დაეღწია დაღუპვისგან, რომელიც წილად ხვდებოდა ქალაქს. ყოველი, ვინც უარყო მისი გაფრთხილება, საზარელი შედეგით დაზარალდა (ლუკ. 21:20–24). ასეთი ღვთიური გაფრთხილებები და განაჩენი მრავალჯერ გამეორდა ისტორიის განმავლობაში.
3 თანამედროვე გაფრთხილების საქმე: იეჰოვამ დიდი ხნის წინ განაცხადა, რომ მისი რისხვა მიმართული იქნება დღევანდელი ბოროტი სისტემის წინააღმდეგ და მხოლოდ თვინიერები გადარჩებიან (სოფ. 2:2, 3; 3:8). ამ გაფრთხილების შესახებ ქადაგებისთვის განკუთვნილი დრო სწრაფად გადის! „დიდი გასაჭირი“ ჯერ წინაა და თვინიერები ახლა იკრიბებიან. ნამდვილად, ‘ყანები’ „გადათეთრებულან სამკალად“. ამიტომ ვერც ერთი სხვა საქმე ვერ შეედრება ამის დიდ მნიშვნელობასა და გადაუდებლობას (მათ. 24:14, 21, 22; იოან. 4:35).
4 ჩვენ მონაწილეობა უნდა მივიღოთ თანამედროვე გაფრთხილების ხმამაღლა გაცხადებით, ‘გინდ მოგვისმინონ, გინდ არ მოგვისმინონ’. ეს ღვთისგან მოცემული დავალებაა, რომელიც არავითარ შემთხვევაში არ უნდა უარვყოთ (ეზეკ. 2:4, 5; 3:17, 18). თუ სრულიად მივიღებთ მონაწილეობას ამ საქმეში, სარწმუნოდ გამოვლინდება ჩვენი გულითადი სიყვარული ღვთისადმი, გულწრფელი ზრუნვა მოყვასისადმი და ურყევი რწმენა ჩვენს მხსნელში, იესო ქრისტეში.
5 ახლა არის დრო მოქმედებისთვის: იეჰოვას მიერ წინა განაჩენების შემდეგ ბოროტება ყოველთვის ხელახლა წარმოიშობოდა, რადგან სატანა და მისი დემონები კვლავ მოქმედებენ. მაგრამ, როცა იეჰოვა მომდევნო განაჩენს გამოიტანს, ეს განსხვავებული იქნება. სატანური ზეგავლენა ჩამოშორებული იქნება. გლობალური გაფრთხილება კარს მომდგარი „დიდი გასაჭირის“ შესახებ აღარ იქნება საჭირო (გამოცხ. 7:14; რომ. 16:20). ჩვენ განსაკუთრებული უპირატესობა გვაქვს — ისეთ სამუშაოს ვასრულებთ, რომელიც აღარასოდეს გამეორდება. ახლა დრო გვაქვს, რომ უფრო მეტად მივიღოთ მონაწილეობა.
6 მოციქულმა პავლემ ამ სამქადაგებლო საქმიანობის შესახებ დიდი დარწმუნებით თქვა: „უბრალო ვარ ყველა სისხლისაგან“ (საქ. 20:26). ის ფიქრობდა, რომ არ მოეკითხებოდა სისხლი იმით, რომ ვერ გააცხადა გაფრთხილება. რატომ? იმიტომ რომ, შეეძლო ეთქვა თავის მსახურებასთან დაკავშირებით: „ამისათვის მეც ვშრომობ და ვიღწვი“ (კოლ. 1:29). მოდი, იგივე კმაყოფილება ვიგრძნოთ და შეძლებისდაგვარად სრულიად მივიღოთ მონაწილეობა იმ საქმეში, რომელიც მეორედ აღარასოდეს გამეორდება! (2 ტიმ. 2:15).