პიონერული მსახურება საშუალებას გვაძლევს, ‘განვიცადოთ და ვნახოთ, რომ კარგია უფალი’
1 „თავად უნდა განიცადო ის დიდი სიხარული, რომელიც პიონერულ მსახურებას მოაქვს, რათა მისი დაფასება შეძლო“. უმეტესობა, ვინც დიდი ხანია, პიონერად მსახურობს, უდავოა, იმავე აზრს გაიზიარებს. რატომ საუბრობენ ეს ერთგული სრული დროით მსახურები ასეთი სითბოთი პიონერული მსახურების შესახებ? მათ ‘გამოსცადეს და ნახეს, რომ კარგია უფალი’ (ფსალმ. 33:9; 1 პეტ. 2:3).
2 ვის შეუძლია პიონერად მსახურება? აუცილებელი არაა, რომ პიონერი განსაკუთრებული პიროვნება იყოს — ჯანმრთელი, ენერგიული, მჭევრმეტყველი, ურთიერთობის მოყვარული, მეგობრული ან ფინანსურად შეძლებული. 1983 წლის ივლისის „ჩვენს სამეფო მსახურებაში“ (ინგლ.) აღნიშნული იყო ყველაზე მთავარი რამ: „საბოლოო ჯამში, პიონერები ხდებიან ისინი, ვისაც ამის სურვილი აქვს“ (მათ. 17:20). ისინი თავიანთი პიონერული სულით გამოირჩევიან.
3 რა არის „პიონერული სული“? ეს არის ქადაგებისა და მოწაფეების მომზადების დავალებისადმი დადებითი დამოკიდებულება. მათ, ვისაც ასეთი სული აქვს, სიყვარული აღძრავს სხვების დასახმარებლად, რითაც ისინი თავგანწირვის სულსაც ავლენენ. იესოს მიბაძვა მათ ნამდვილ სიხარულს ანიჭებს და სულიერი მატერიალურ კეთილდღეობაზე მეტ სიამოვნებას ჰგვრის. ყველა, ვისაც ასეთი სული აქვს, შეძლებისდაგვარად მალე უნდა გახდეს სრული დროით მსახური.
4 ოთხი ნაბიჯი. შეამოწმე შენი შესაძლებლობები. დროდადრო კარგია, თუ პატიოსნად და ლოცვით ავწონ-დავწონით, გვაქვს თუ არა პიონერად მსახურების შესაძლებლობა. თუ იმ დასკვნამდე მიხვალ, რომ ამ მომენტში ეს შეუძლებელია, მაშინ შემდეგი ნაბიჯი გადადგი: გამოათავისუფლე დრო, რაც ცხოვრების გამარტივებას ნიშნავს. კერძოდ, უმნიშვნელო საქმეებისთვის თავის დანებებას, იმ ნივთებისგან გათავისუფლებას, რომლებიც სინამდვილეში არ გჭირდება და რომელთა გამოყენებასა და შენახვას ბევრი დრო მიაქვს (მათ. 19:12, 21, 27, 29; 1998 წლის „ჩვენი სამეფო მსახურების“ დანართი). ხელიდან ნუ გაუშვებ შესაძლებლობას. თუ სინამდვილეში იმ დასკვნამდე მიხვედი, რომ პიონერული მსახურების დასაწყებად სერიოზული არაფერი გიშლის ხელს, ნუღარ დააყოვნებ და საქმეს შეუდექი (საქ. 8:36, 38). თავდაპირველად დამხმარე პიონერად მსახურება მოსინჯე.
5 კურთხევები პიონერულ მსახურებაში ადასტურებს, რომ „კარგია უფალი“. ერთმა ახალგაზრდა დამ ცხრა წელზე მეტი ხნის განმავლობაში პიონერად მსახურების შემდეგ აღნიშნა: „იმდენად უახლოვდები იეჰოვას, რომ თითქოს მას შენთვის ხელი აქვს ჩაჭიდებული . . . განა შეუძლია პიონერული მსახურების გარდა სხვა რამეს ასეთი სიხარულის, სულიერი კმაყოფილებისა და კურთხევების მოტანა?“ (ფსალმ. 72:23). ერთმა წყვილმა კი, რომელიც შვიდ წელზე მეტია, რაც პიონერად მსახურობს, აღნიშნა: „ამაზე უკეთესი რა უნდა გვეკეთებინა ჩვენს ასაკში? ჩვენს უბანზე ხშირად ვხვდებით ხოლმე ჩვენი ასაკის ხალხს. ისინი კომფორტულად არიან მოწყობილი სახლში, წონაში იმატებენ, ბერდებიან და უხეშდებიან. ჩვენ კი მსახურება გონებრივ თუ ფიზიკურ ჯანმრთელობას გვინარჩუნებს. ყოველთვის ერთად ვართ, ბევრს ვიცინით და ცხოვრებით ვხარობთ“. დიახ, პიონერული მსახურება მრავალ კურთხევას აღუთქვამს მათ, ვინც სწორი აღძვრებით მონაწილეობს მასში და სხვების დახმარების სურვილი ამოძრავებს. ამგვარად ისინი თავადაც განიცდიან სულიერ წინსვლას (იგავ. 11:25).