როგორ გამოვიყენოთ დაბეჭდილი შეთავაზებები?
1. როგორი თვალსაზრისი უნდა გვქონდეს დაბეჭდილ შეთავაზებებზე?
1 „ჩვენს სამეფო მსახურებაში“ რეგულარულად იბეჭდება შეთავაზებები ჟურნალებისა თუ სხვა პუბლიკაციების გასავრცელებლად. მსახურებისას აუცილებელი არ არის ამ შეთავაზებების სიტყვასიტყვით გამეორება. ამით უბრალოდ გვთავაზობენ, რა შეიძლება ვთქვათ ამა თუ იმ პუბლიკაციის შეთავაზებისას. შეთავაზება უფრო ეფექტური იქნება, თუ მას ჩვენი სიტყვებით გავაკეთებთ. თუ შეთავაზებას ბუნებრივად ვიტყვით, მობინადრე თავს თავისუფლად იგრძნობს და ჩვენი გულწრფელობა და დამაჯერებლობაც დადებითად იმოქმედებს მასზე (2 კორ. 2:17; 1 თეს. 1:5).
2. რატომ უნდა გავითვალისწინოთ ადგილობრივი ტრადიციები შეთავაზებების მომზადებისას?
2 შეთავაზება მოსაუბრის სიტუაციას მოარგე. სასიხარულო ცნობას უფრო ეფექტურად გადავცემთ, თუ ადგილობრივ ტრადიციებს გავითვალისწინებთ. მიღებულია ჯერ მობინადრეს გაეცნო და შემდეგ გააცნო მისვლის მიზეზი, თუ შენს ტერიტორიაზე უფრო ნორმალურად ითვლება პირდაპირ საქმეზე გადასვლა? ყველა ქვეყანაში განსხვავებული ტრადიციაა, ამასთანავე, ადამიანებიც განსხვავებულები არიან. გამჭრიახობის გამოვლენა შეკითხვების დასმის დროსაც საჭიროა. კითხვებმა, რომლებიც ზოგან სათანადოა, სხვაგან შესაძლოა უხერხულ მდგომარეობაში ჩააგდოს მოსაუბრე. ამიტომ წინდახედულება უნდა გამოვიჩინოთ და შეთავაზება იმის მიხედვით გავაკეთოთ, რაც ადგილობრივი ტრადიციებით მიღებულია.
3. რატომ უნდა მივიღოთ მხედველობაში მათი წარმომავლობა და აზროვნება, ვისაც ვესაუბრებით?
3 გარდა ამისა, როცა მსახურებისთვის ვემზადებით, ჩვენს ტერიტორიაზე მცხოვრებთა წარმომავლობა და აზროვნებაც უნდა მივიღოთ მხედველობაში. მაგალითად მათეს 6:9, 10-ს, ალბათ, სხვადასხვანაირად განიხილავდი გულწრფელ მართლმადიდებელთან და იმ პიროვნებასთან, რომელიც არ არის გაცნობილი „მამაო ჩვენოს“. წინასწარ მოფიქრება დაგვეხმარება, ისე მოვარგოთ ჩვენი შეთავაზებები მობინადრის სიტუაციას, რომ ინტერესი აღვუძრათ (1 კორ. 9:20—23).
4. რატომ არის კარგი მომზადება მნიშვნელოვანი?
4 მაშინაც კი, როდესაც განზრახული გვაქვს დაბეჭდილი შეთავაზება თითქმის იმავე სიტყვებით გადავცეთ, საჭიროა კარგი მომზადება. ყურადღებით უნდა წავიკითხოთ ის სტატია ან თავი, რაზეც საუბარს ვაპირებთ და მოვძებნოთ ინტერესის აღმძვრელი აზრები; შემდეგ ეს აზრები ჩვენს შეთავაზებაში ჩავრთოთ. პუბლიკაციებს მხოლოდ იმ შემთხვევაში შევთავაზებთ ხალისით, თუ კარგად ვიქნებით გაცნობილი მათში მოცემულ სასარგებლო ინფორმაციას.
5. რატომ შეიძლება დაგვჭირდეს სხვა შეთავაზების მომზადება და როგორ შეგვიძლია ამის გაკეთება?
5 სხვა მიდგომები. მხოლოდ დაბეჭდილი შეთავაზებებით უნდა შემოვიფარგლოთ? არა. თუ უფრო ადვილია შენთვის სხვა შეთავაზების ან მუხლის გამოყენება, შეგიძლია გამოიყენო. შეეცადე, არ გამოგრჩეს ჟურნალებში გამოქვეყნებული ის სტატიები, რომლებიც საინტერესო იქნება შენს ტერიტორიაზე მცხოვრებლებისთვის. სამსახურებრივ შეხვედრაზე ინსცენირებების დროს შეგიძლიათ მოამზადოთ ნებისმიერი შეთავაზება, რომელიც თქვენს ტერიტორიას მიესადაგება. ასეთნაირად, ყველას დავეხმარებით სასიხარულო ცნობის ეფექტურად გადაცემაში.