განივითარე სხვებთან მსჯელობის უნარი
1 საქმეების 13:14—41-ის თანახმად, მოციქული პავლე პისიდიის ანტიოქიაში სინაგოგაში შევიდა და ესაუბრებოდა იქ მყოფებს, რითაც იმის შესანიშნავი მაგალითი დაგვიტოვა, თუ როგორ ვიმსჯელოთ სხვებთან. პავლე ითვალისწინებდა მსმენელების წარმოშობას და შეხედულებებს და სასიხარულო ცნობას შესაბამისად გადასცემდა. მისი მაგალითის განხილვისას მოდი დავფიქრდეთ, ჩვენ როგორ შეგვიძლია მსგავსად მოქმედება მსახურების დროს.
2 გამონახე საერთო ენა: პავლე ძირითადად ქადაგებდა იმის შესახებ, რომ ღვთის განზრახვის განხორციელებაში იესოს მთავარი როლი ეკავა. მიუხედავად ამისა, მას მსჯელობა ამ საკითხით არ დაუწყია. პავლე თავიდან შეეხო იუდეველების ისტორიას — საკითხს, რომელშიც საერთო აზრი ჰქონდათ მას და მის მსმენელებს, რომელთა შორისაც უმთავრესად ებრაელები იყვნენ (საქმეები 13:16—22). მსგავსად, ჩვენც უფრო ეფექტურად გამოგვივა ადამიანთა გულამდე მიღწევა, თუ ვეცდებით მათთან საერთო ენის გამონახვას. ამისთვის შესაძლოა საჭირო იყოს, ტაქტიანი შეკითხვებით მათ საკუთარი შეხედულებების გამოთქმის საშუალება მივცეთ და ყურადღებით მოვუსმინოთ, რათა დავინახოთ, რა არის მათთვის ნამდვილად მნიშვნელოვანი.
3 იუდეველთა ისტორიაზე საუბრისას პავლემ მსმენელებს შეახსენა, რომ, ღვთის დაპირების თანახმად, დავითის შთამომავლობაში მხსნელი უნდა მოსულიყო. მაგრამ მრავალი იუდეველი ელოდა სამხედრო გმირს, რომელიც მათ რომაელთა ბატონობისგან გაათავისუფლებდა და იუდეველ ერს ყველა ერზე მაღალ მდგომარეობამდე მიიყვანდა. უეჭველია, მათ იცოდნენ, რომ იუდეველმა რელიგიურმა წინამძღოლებმა იესო უარყვეს, რომაელებს გადასცეს და იერუსალიმში მოკლეს. როგორ უნდა დაერწმუნებინა პავლეს ისინი, რომ სწორედ იესო იყო აღთქმული მესია?
4 იმსჯელე მსმენელის გათვალისწინებით: პავლე ითვალისწინებდა მსმენელთა შეხედულებებს და წმინდა წერილების მეშვეობით მსჯელობისას იმას ეყრდნობოდა, რასაც ისინი უკვე აღიარებდნენ. მაგალითად, პავლემ აღნიშნა, რომ იესო დავითის შთამომავალი იყო და მასზე ქადაგებდა იოანე ნათლისმცემელი, რომელსაც ღვთის წინასწარმეტყველად თვლიდნენ (საქმეები 13:23—25). მან ყურადღება გაამახვილა იმაზე, რომ იესოს უარყოფით და მოკვლით რელიგიურმა წინამძღოლებმა „შეასრულეს წინასწარმეტყველთა წიგნებში ჩაწერილი სიტყვები“ (საქმეები 13:26—28). შემდეგ მან აღნიშნა, რომ არსებობდნენ იესოს აღდგენის თვითმხილველები, და წმინდა წერილებიდან მოიყვანა ცნობილი ადგილები, რომლებიც იესოს მკვდრეთით აღდგენით შესრულდა (საქმეები 13:29—37).
5 მეორე მხრივ, პავლემ სხვა მეთოდი გამოიყენა, როდესაც ათენში, არეოპაგში, ბერძენ მსმენელებს მიმართავდა (საქმეები 17:22—31). მაგრამ ის იმავე ძირითად ცნობას გადასცემდა და ორივე შემთხვევაში მისმა ძალისხმევამ კარგი შედეგები გამოიღო (საქმეები 13:42, 43; 17:34). დღესაც, ჩვენ უფრო ეფექტურები ვიქნებით მსახურებაში, თუ ვეცდებით მსმენელებთან საერთო ენის გამონახვას და მსჯელობის დროს გავითვალისწინებთ მათ ვინაობას და შეხედულებებს.
[სასწავლო კითხვები]
1. რომელ ბიბლიურ მონაკვეთს განვიხილავთ და რატომ?
2. რას ვსწავლობთ იქიდან, თუ როგორ დაიწყო პავლემ მსჯელობა?
3. რატომ უჭირდათ პავლეს მსმენელებს იმ აზრის გაზიარება, რომ იესო იყო აღთქმული მესია?
4. როგორ მსჯელობდა პავლე ეფექტურად იუდეველ მსმენელებთან?
5. ა) როგორ მიიღო მხედველობაში პავლემ მსმენელები, როდესაც ბერძნებთან ქადაგებდა? ბ) როგორ შეგვიძლია მივბაძოთ პავლეს ადგილობრივ ტერიტორიაზე ქადაგებისას?