სამეფო დარბაზების მშენებლობა საქართველოში
1 იეჰოვა დიდებული მოძღვარია, ამიტომ სურს, რომ მისმა ხალხმა მიიღოს სულიერი განათლება და სათანადოდ ემსახურონ მას (ეს. 30:20, 21). რამდენადაც იეჰოვას მოწმეები სულიერი განათლების მიღებას ღვთისადმი მსახურების ნაწილად მიიჩნევენ, ისინი მთელი სერიოზულობით ეკიდებიან კრების შეხვედრებს. იქ, სადაც ეს შესაძლებელია ქრისტიანული შეხვედრები ტარდება სამეფო დარბაზებში ანუ ისეთ ადგილებში, რომლებიც ყველაზე შესაფერისია იმისათვის, რომ ღვთის ხალხმა ყოველგვარი ხელის შეშლის გარეშე მიიღოს სულიერი განათლება და ძალები (ებრ. 10:24, 25).
2 ხელმძღვანელმა საბჭომ 1999 შეიმუშავა სამეფო დარბაზების მშენებლობის პროგრამა იმ ქვეყნებისთვის, რომლებსაც შეზღუდული რესურსები აქვთ და სადაც სამეფო დარბაზებზე დიდ მოთხოვნილებაა. მაგალითად, ბელორუსიასა და რუსეთში ამ პროგრამის დახმარებით უკვე 230 სამეფო დარბაზი აშენდა. არც ისე დიდი ხნის წინ, ამ პროგრამის შესაბამისად სამეფო დარბაზების მშენებლობა საქართველოშიც დაიწყეს. საქართველოში დღეისათვის საჭიროა აშენდეს ან შეკეთდეს 72 დარბაზი, თუ არ ჩავთვლით კრებების მომავალი ზრდის შედეგად წარმოქმნილ მოთხოვნილებებს. მიახლოებითი გამოთვლების თანახმად, თუ წელიწადში 10 დარბაზი აშენდება, მაშინ დარბაზებზე დღეს არსებული მოთხოვნილება მხოლოდ 7 წლის შემდეგ იქნება დაკმაყოფილებული.
3 ახალ სამეფო დარბაზებს, ჩვეულებრივ, ტიპობრივი (სტანდარტული) პროექტების მიხედვით აგებენ, რომლებშიც, ადგილობრივი პირობებიდან გამომდინარე, პატარ-პატარა ცვლილებები შეაქვთ. სამეფო დარბაზები სადა და უბრალოა, ამიტომ მათი აშენება, ექსპლუატაცია და მომსახურება ძვირი არ ჯდება. მაგალითად, სავარძლების ნაცვლად დგამენ გადაკრულ გრძელ სკამებს, კონდიციონირების ძვირი სისტემის ნაცვლად კი ამონტაჟებენ უბრალო ვენტილაციას, რომელიც დარბაზს სუფთა ჰაერით უზრუნველყოფს. ძმური სიყვარული გვეხმარება, არ მოველოდეთ მეტისმეტს და გვესმოდეს, რომ კვლავაც დიდი სახსრებია საჭირო იმ კრებებისთვის, რომლებსაც ჯერ არა აქვთ საკუთარი სამეფო დარბაზი (2 კორ. 8:13—15). კრებები, რომლებიც სამეფო დარბაზებს აშენებენ, უნდა მიჰყვნენ ფილიალის მითითებებს. როცა სამეფო დარბაზი მზად არის, ფილიალი აგრეთვე იძლევა მის მომსახურებასთან დაკავშირებულ რეკომენდაციებს, რათა მისი ექსპლუატაციისას ზედმეტი ძალები და სახსრები არ დაიხარჯოს. ამგვარად, ფილიალის ნებართვის გარეშე კრებებმა არანაირი ცვლილება არ უნდა მოახდინონ სამეფო დარბაზში.
4 თუ კრებას სამეფო დარბაზი სჭირდება, ოფისს უნდა გაეგზავნოს მოკლე წერილი ამის შესახებ. ოფისში არსებული სამეფო დარბაზების მშენებლობის განყოფილება ამ კრებაში გაგზავნის თავის წარმომადგენელს, რომელიც კრების უხუცესთა საბჭოს აუხსნის, თუ რა ნაბიჯების გადადგმაა საჭირო დარბაზის ასაშენებლად. ძმები განიხილავენ, თუ რა ზომით შეუძლია კრებას, დაფაროს მიწის ნაკვეთის ყიდვასა და მშენებლობასთან დაკავშირებული ხარჯები. ასევე სამეფო დარბაზების მშენებლობის განყოფილება დაადგენს პრიორიტეტებს და გადაწყვეტს, თუ როდის დაიწყებს სამშენებლო ბრიგადა ამ პროექტზე მუშაობას. ადგილობრივ უხუცესებს სამეფო დარბაზის აშენებაზე ნებართვის მიღების შემდეგ შეუძლიათ ორგანიზება გაუწიონ სამეფო დარბაზისთვის შესაფერისი ადგილის პოვნას. სათანადო მიწის ნაკვეთისა თუ შენობის შერჩევის შემდეგ, დაფინანსების თაობაზე განცხადება იგზავნება ფილიალში. როდესაც დაკმაყოფილდება მოთხოვნა სესხზე და კრება მიიღებს მშენებლობაზე თანხმობას, სამეფო დარბაზების სამშენებლო ბრიგადის რამდენიმე წევრი იგზავნება კრებაში დახმარების აღმოსაჩენად. რა თქმა უნდა, ძირითად სამშენებლო საქმეებს კრება აკეთებს. ბრიგადის წევრები, ძირითადად, ორგანიზებას უწევენ მშენებლობას და ხელმძღვანელობენ მუშაობის მსვლელობას.
5 როგორც კი მშენებლობა წინ წაიწევს, კრების უხუცესები ფილიალიდან დამატებით მითითებებს მიიღებენ წერილობით ან სამეფო დარბაზების მშენებლობის განყოფილების ადგილობრივი წარმომადგენლის მეშვეობით. უხუცესთა საბჭომ და მშენებლობაში მონაწილე სხვა ძმებმა გულმოდგინედ უნდა განიხილონ ასეთი წერილების ყველა პუნქტი და მჭიდროდ ითანამშრომლონ მშენებლობის ზედამხედველთან, მის თანაშემწესა და სამეფო დარბაზების სამშენებლო განყოფილების წარმომდგენელთან.
6 მოხალისეები ადგილობრივი კრებიდან. ადგილობრივი კრების აქტიური დახმარების გარეშე სამეფო დარბაზის მშენებლობა შეიძლება დაგეგმილზე დიდხანს გაგრძელდეს და მეტი დრო და სახსრები დასჭირდეს (იგავ. 13:12). სხვადასხვა ქალაქიდან მიღებული ინფორმაცია ცხადყოფს: როდესაც კრების ყველა წევრი ავლენს მზადყოფნას და მთელი გულით მონაწილეობს მშენებლობაში, სამეფო დარბაზი შეიძლება 2-3 თვეში დასრულდეს (ეს. 6:8). ამის წყალობით ხდება დროისა და სახსრების დაზოგვა. რაც უფრო სწრაფად აშენდება სამეფო დარბაზი, ადგილობრივი კრების მაუწყებლები მით უფრო სწრაფად დაუბრუნდებიან ჩვეულ სულიერ განრიგს (ნეემ. 2:3—5, 17, 18; 6:15).
7 კრების წევრებს არ სჭირდებათ განცხადების შევსება იმისათვის, რომ მონაწილეობა მიიღონ სამეფო დარბაზის მშენებლობაში. ყველას, ვისაც შეუსრულდა 18 წელი და კრებაში კარგი რეპუტაციით სარგებლობს, შეუძლია მონაწილეობა მიიღოს მშენებლობაში. სასურველია, მონაწილეებს ჰქონდეთ მშენებლობაში გამოცდილება, მაგრამ უფრო მნიშვნელოვანია, რომ მოხალისეები მზად იყვნენ, გულმოდგინედ შეასრულონ ნებისმიერი საქმე, რომელსაც დაავალებენ. ერთმანეთის მხარდამხარ მომუშავე და-ძმებს ბევრის გაკეთება შეუძლიათ.
8 ერთ კრებაში უხუცესმა ახალმონათლულ ძმას ჰკითხა, შეეძლო თუ არა მშენებლობაში მონაწილეობა. ძმა სასწრაფოდ დაუკავშირდა თავის უფროსს და შემდეგი დღიდანვე სამკვირიანი შვებულება სთხოვა. თანხმობის შემდეგ მან თავისი შვებულება სიხარულით გაატარა მშენებლობაზე. ერთმა დამ, რომელიც მზარეულად მუშაობს, თავის უფროსს რამდენიმე დღით გაეთავისუფლა, რათა მშენებლებისთვის სადილი მოემზადებინა. შენ რის გაკეთება შეგიძლია, რომ უფრო მეტად მიიღო მონაწილეობა ამ მნიშვნელოვან საქმეში? თუ უშუალოდ მშენებლობაში მონაწილეობის მიღების შესაძლებლობა არა გაქვს, იქნებ სხვა სახით შეძლო დახმარების გაწევა? მაგალითად, შეგიძლია ღამის გასათევი ადგილი შესთავაზო მეზობელი კრებებიდან მოწვეულ და-ძმებს, მოამზადო სადილი, გაიღო შესაწირავი, დაალაგო ან ტანსაცმელი დაურეცხო სამშენებლო ბრიგადის წევრებს. ზოგჯერ, როცა მოხალისეები საკმარისად არ არიან, ფილიალს შეუძლია მეზობელ კრებებს წერილი გაუგზავნოს, რომ დაეხმარონ ამ კრებას მშენებლობაში. რა სასიხარულოა, როცა ეს კრებები მზადყოფნას ავლენენ!
9 სარაიონო ზედამხედველებიც გულმოდგინედ მოუწოდებენ და-ძმებს, რომ მონაწილეობა მიიღონ სამშენებლო პროექტებში როგორც თავიანთ ქალაქებში ისე სხვაგან. მათ კარგად ესმით, რომ კრება დიდ სარგებლობას იღებს, როდესაც შეხვედრებს საკუთარ სამეფო დარბაზებში ატარებს. ამიტომ სარაიონო ზედამხედველები და-ძმებს იმის დანახვაში ეხმარებიან, რომ მშენებლობაში მონაწილეობა იეჰოვასადმი წმინდა მსახურების მნიშვნელოვანი ნაწილია.
10 სამშენებლო ბრიგადის წევრთა საცხოვრებლით უზრუნველყოფა. ბრიგადის წევრებს, რომლებიც კრების დასახმარებლად არის ჩამოსულები, ძირითადად, ადგილობრივი კრება უზრუნველყოფს საცხოვრებლით. ამ ძმებმა, რომლებიც მზადყოფნის სულს ავლენენ, დატოვეს თავიანთი სახლები და უკვე რამდენიმე წელია, რაც ერთი ადგილიდან მეორეზე გადადიან (ლუკ. 9:58). ისინი მშენებლობაში მხოლოდ მოკლე პერიოდით კი არ მონაწილეობენ, არამედ სამეფო დარბაზების მშენებლობა მათთვის სპეციალური სრული დროით მსახურებაა. გასაგებია, რომ ამ მსახურებს, რომლებიც სამეფო საქმისთვის შრომობენ, სჭირდებათ ადგილი პირადი შესწავლისთვის, კარგი დასვენებისა და ძილისთვის. ამიტომ კრების ზოგი წევრი თავის ბინას მათ უთმობს, თვითონ კი მშენებლობის პერიოდში საცხოვრებლად ნათესავებთან ან თანამორწმუნეებთან გადადის. მართლაც რომ შესანიშნავ სულს ავლენენ ისინი! (რომ. 12:13).
11 შეგიძლია მსახურების გაფართოება? თუ დაუქორწინებელმა ძმებმა ან დაქორწინებულმა წყვილებმა შეავსეს განცხადება სამეფო დარბაზის მშენებლობაზე მსახურებისთვის, ფილიალმა შეიძლება მიიწვიოს ისინი, გარკვეული დროით იმსახურონ სამშენებლო ბრიგადასთან ერთად დაშორებულ ტერიტორიაზე. ასეთი მსახურება გრძელდება ორი კვირიდან სამ თვემდე, აუცილებლობის შემთხვევაში კი შეიძლება გაგრძელდეს კიდევ სამი თვით. ზოგიერთ მოხალისეს, რომლებიც სამეფო დარბაზების მშენებლობის პროგრამაში მონაწილეობენ, შეძლება მოგვიანებით შესთავაზონ სპეციალური სრული დროით მსახურება სამეფო დარბაზების მშენებლობაზე. დაუქორწინებელი ძმა ხარ? დაქორწინებულები ხართ? სულიერად მოწიფული ხარ? გაძლევს ჯანმრთელობა იმის საშუალებას, რომ მძიმე ფიზიკური სამუშაო შეასრულო? თუ ასეა, შეგიძლია დაფიქრდე ამ სასიხარულო სპეციალურ სრული დროით მსახურებაზე. კრების უხუცესები სიხარულით მოგცემენ განცხადების ბლანკს.
12 სამეფო დარბაზების მშენებლობაში მონაწილეობს ათასობით მოხალისე, რომლებიც უდიდეს შექებას იმსახურებენ. ასეთი თავგანწირული მსახურებისკენ მათ სიყვარული აღძრავთ, რაშიც იეჰოვას წმინდა სულის გავლენა ჩანს (საქ. 20:35). თუ მდგომარეობა საშუალებას გაძლევს, მოხალისედ იმსახურო, შეუდარებელ სიხარულს მოგანიჭებს იმის დანახვა, თუ რამხელა სიხარულს განიცდიან და-ძმები, რომლებმაც იეჰოვას სადიდებლად ააშენეს სამეფო დარბაზი. ერთმა ძმამ, რომელიც მშენებლობაში მონაწილეობდა, თქვა: „ბრიგადის წევრები სამეფო დარბაზის მშენებლობის დამთავრებისთანავე გადადიან ახალ ადგილზე, რათა სხვა პროექტზე დაიწყონ მუშაობა. მაგრამ ჩვენ იმ და-ძმების სიხარულს ვიზიარებთ, რომელთაც შეუძლიათ ახალ, მყუდრო სამეფო დარბაზში ჩაატარონ შეხვედრები“. ამიტომ, თუ სამეფო დარბაზის მშენებლობაზე მონაწილეობის მიღების საშუალება მოგეცემა, ნუ გაუშვებ ხელიდან ასეთ შესაძლებლობას!
13 სამეფო დარბაზების მშენებლობის პროგრამის წყალობით ხელისუფლების წარმომადგენლები და გარშემო მცხოვრები ხალხი ბევრ რამეში ხედავენ იეჰოვას ხალხის მიერ გამოვლენილ გულითად სიყვარულს. თუ მთელი გულით ვუჭერთ მხარს ამ პროგრამას, იეჰოვას გულს ვუხარებთ. იეჰოვას სიამოვნებს იმის დანახვა, რომ მისი ერთგული მსახურები თავგანწირვით შრომობენ მხარდამხარ, და ის უხვად აკურთხებს მათ. უდავოა, სამეფო დარბაზების მშენებლობის პროგრამა ჩვენს ქვეყანაში არა მხოლოდ სამეფო დარბაზებზე არსებულ მზარდ მოთხოვნას აკმაყოფილებს, არამედ განადიდებს ჩვენს დიდებულ მოძღვარს, იეჰოვა ღმერთს.
[სასწავლო კითხვები]
1. რისთვის არის საჭირო სამეფო დარბაზები?
2. ა) ვინ შეიმუშავა სამეფო დარბაზების მშენებლობის პროგრამა და რა სარგებლობა მოიტანა მან? ბ) რამდენად დიდი მოთხოვნილებაა ჩვენს ქვეყანაში სამეფო დარბაზებზე?
3. ა) რით გამოირჩევა ტიპობრივი პროექტით აშენებული სამეფო დარბაზი? ბ) რით არის უკეთესი სადა სამეფო დარბაზი?
4. ა) რა ნაბიჯების გადადგმაა საჭირო სამეფო დარბაზის მშენებლობის დასაწყებად? ბ) რა მოეთხოვება ადგილობრივ კრებას?
5. როგორ იღებს კრება დამატებით მითითებებს?
6. რატომ არის მნიშვნელოვანი, რომ ადგილობრივი კრების თითოეულმა წევრმა ძალ-ღონე არ დაიშუროს მშენებლობის მხარდასაჭერად?
7. რა მოეთხოვება მათ, ვისაც ადგილობრივი სამეფო დარბაზის მშენებლობაში მონაწილეობა სურს?
8. ა) რის გაკეთება შეგიძლია, რომ მეტი მონაწილეობა მიიღო მშენებლობაში? ბ) კიდევ როგორ შეიძლება მშენებლობისთვის მხარის დაჭერა?
9. როგორ უჭერენ მხარს სარაიონო ზედამხედველები სამშენებლო პროგრამას?
10. რას ვითვალისწინებთ, როცა სამშენებლო ბრიგადის წევრებს საცხოვრებელს ვთავაზობთ?
11. რა მოთხოვნებს უნდა აკმაყოფილებდნენ სამეფო დარბაზების მშენებლობაში მონაწილეობის მსურველები?
12. რა კურთხევებს იმკიან მოხალისეები?
13. რა მიზანს ემსახურება სამეფო დარბაზების მშენებლობის პროგრამა?
[სურათი 2 გვერდზე]
სამეფო დარბაზი თბილისში
[სურათები 5 გვერდზე]
სამეფო დარბაზი თბილისში
[სურათი 6 გვერდზე]
სამეფო დარბაზი თბილისში
[სურათები 8 გვერდზე]
სამეფო დარბაზი თელავში