ქრისტიანმა მსახურებმა უნდა ილოცონ
1. რა გვჭირდება მსახურების შესასრულებლად?
1 ჩვენი ძალებით შეუძლებელია ვიქადაგოთ, რადგან მსახურების ძალას იეჰოვა გვაძლევს (ფილ. 4:13). ღმერთი თავისი ანგელოზებით ცხვრისმაგვარი ადამიანების პოვნაში გვეხმარება (გამოცხ. 14:6, 7). ჭეშმარიტების მარცვალს, რომელსაც ჩვენ ვრგავთ და ვრწყავთ, იეჰოვა ზრდის (1 კორ. 3:6, 9). ქრისტიანი მსახურებისთვის ძალიან მნიშვნელოვანია, რომ ლოცვაში ზეციერ მამას მიენდონ.
2. რის შესახებ შეგვიძლია ვილოცოთ?
2 ვილოცოთ საკუთარი თავისთვის: ჩვენ უნდა ვილოცოთ ყოველთვის, როცა ვქადაგებთ (ეფეს. 6:18). რის შესახებ შეგვიძლია ვილოცოთ? უნდა ვილოცოთ, რომ დადებითი განწყობა გვქონდეს და უბნებზე გაბედულად ვიქადაგოთ (საქ. 4:29). შეგვიძლია იეჰოვას ვთხოვოთ, რომ ჭეშმარიტებისადმი სწორად განწყობილი ხალხი გვაპოვნინოს, რომლებთანაც ბიბლიის შესწავლას დავიწყებდით. თუ მობინადრე კითხვას დაგვისვამს, სათანადო პასუხის გასაცემად შეგვიძლია გულში მოკლედ ვილოცოთ და იეჰოვას დახმარება ვთხოვოთ (ნეემ. 2:4). ღმერთს აგრეთვე შეგვიძლია ვთხოვოთ სიბრძნე, რომ მსახურება ჩვენთვის უმთავრესი საქმე იყოს (იაკ. 1:5). გარდა ამისა, იეჰოვას სიამოვნებს, როცა მადლიერებას გამოვხატავთ იმ პატივისთვის, რომ მისი მსახურები ვართ (კოლ. 3:15).
3. როგორ უწყობს ხელს სხვებისთვის ლოცვა სამქადაგებლო საქმიანობის წინსვლას?
3 ვილოცოთ სხვებისთვის: ჩვენ აგრეთვე ერთმანეთისთვის უნდა ვილოცოთ და საჭიროების შემთხვევაში და-ძმები სახელებით მოვიხსენიოთ (იაკ. 5:16; საქ. 12:5). თუ ცუდი ჯანმრთელობის გამო ბევრს ვერ ქადაგებ, კარგი იქნებოდა გელოცა იმ თანაქრისტიანებისთვის, რომლებსაც კარგი ჯანმრთელობა აქვთ, რომ მათ დაუბრკოლებლად იქადაგონ. დარწმუნებული იყავი, რომ და-ძმებისთვის წარმოთქმულ შენს ლოცვებს დიდი ძალა აქვს. აგრეთვე მართებულია ხელისუფლების წარმომადგენლებისთვის ლოცვა, რომ ისინი კარგად იყვნენ განწყობილნი სამქადაგებლო საქმისადმი და ჩვენ „წყნარად და მშვიდად ვიცხოვროთ“ (1 ტიმ. 2:1, 2).
4. რატომ უნდა ვილოცოთ გამუდმებით?
4 მთელ მსოფლიოში სასიხარულო ცნობის ქადაგებას ჩვენი ძალებით ვერ შევძლებთ. თუ „გამუდმებით ვილოცებთ“ ამ საქმეს იეჰოვას დახმარებით შევასრულებთ (რომ. 12:12).