როგორ შეიძლება აირიდოთ უსიამოვნებები შვებულების დროს

რაზე ფიქრობთ შვებულების ხსენებისას? ზღვის სანაპიროზე მზისა და მშვენიერი პალმების ჩრდილქვეშ სასიამოვნო მოსვენებაზე? ან იქნებ მთის სუფთა, ცივ ჰაერს არჩევთ?

მაგრამ შეიძლება მოსალოდნელი არასასიამოვნო ამინდის, ფრენის გადადების, ზღვის ავადმყოფობისა და სხვა მრავლის გამო ნერვიულობთ. მიუხედავად ამისა, რა შეგიძლიათ გააკეთოთ, რომ შვებულება რაც შეიძლება სასიამოვნო გახადოთ?

კარგად მოემზადეთ

გონიერი პიროვნებები ყველაფერს წინასწარ გეგმავენ. ისინი ზრუნავენ გამგზავრებამდე მოაწესრიგონ მგზავრობისა და ჯანმრთელობისთვის საჭირო საბუთები. წინასწარ იმის გამოკვლევა, თუ რომელი დაავადების შეხვედრაა შესაძლებელი, ეხმარება მათ განსაზღვრონ, თან რა სახის პროფილაქტიკური საშუალებები წაიღონ.

იმ მხარეში გამგზავრებისას, სადაც მალარია ენდემურია, ბევრი გამგზავრებამდე რამდენიმე დღით ადრე მალარიის საწინააღმდეგო წამლებს იღებს. თუმცა, თავდაცვის მიზნით, ხშირად ურჩევენ, რომ განაგრძონ ასეთი მედიკამენტების მიღება მთელი დასვენების მანძილზე და ერთი თვის შემდეგაც კი. ეს იმიტომ არის საჭირო, რომ მალარიის პარაზიტი დიდი ხნის განმავლობაში განიცდის ორგანიზმში ინკუბაციას. გარდა ამისა, სიფრთხილე სხვა საკითხებთან დაკავშირებითაც მნიშვნელოვანია.

ლონდონის ჰიგიენისა და ტროპიკული მედიცინის ინსტიტუტის დოქტორი პოლ კლარკი გვირჩევს: „ასევე მნიშვნელოვანია რეპელენტით გაჟღენთილი მანჟეტის გადახვევა მაჯებსა და კოჭებზე; კოღოების დამჭერი ბადეებისა და ინსექტიციდების ელექტრო ამაორთქლებლის მეშვეობით მწერების მოსპობა“. ჩვეულებრივ, საუკეთესოა ასეთი აღჭურვილობა დასასვენებლად გამგზავრებამდე შეიძინოთ.

ზღვის ავადმყოფობა ნებისმიერ მოგზაურობას არასასიამოვნოს ხდის. რა იწვევს ამას? ერთი მკვლევარი აცხადებს, რომ უცნობი გარემოდან მომავალი ახალი სიგნალებით ტვინის გადატვირთვის შედეგად, ადამიანს ზღვის ავადმყოფობა ემართება. თუ ამ პრობლემას გემის ცურვის, თვითმფრინავის ვიბრაციის ან საკუთარი ავტომობილის ძრავის ხმა იწვევს, ეცადეთ ყურადღება რაიმე უძრავ საგანზე გადაიტანოთ, შეგიძლიათ ჰორიზონტს ან გზას უყუროთ. კარგი ვენტილაცია საჭირო ჟანგბადით უზრუნველგყოფთ. ზღვის ავადმყოფობის გაძლიერების შემთხვევაში, ანტიჰისტამინურმა პრეპარატებმა შეიძლება მდგომარეობა შეგიმსუბუქოთ. თუმცა ღირს გაფრთხილება იმის შესახებ, რომ ამ წამლებმა შეიძლება გვერდითი მოვლენები გამოიწვიოს, მაგალითად, ჩათვლემა, რადგან ზოგიერთ შემთხვევაში ამან შეიძლება საფრთხეში ჩაგაგდოთ.

თვითმფრინავით ხანგრძლივი მგზავრობაც თავის მხრივ სარისკოა და იწვევს ისეთ დარღვევებს, როგორიცაა გაუწყლოება. ზოგიერთ პიროვნებას უმოძრაოდ და ვიწროდ დიდხანს ჯდომისას შეიძლება ფეხის ტრომბის საფრთხე დაემუქროს. თუ ტრომბი გადაადგილდება და ფილტვამდე ან გულამდე მიაღწევს შედეგი განსაკუთრებით სავალალო იქნება. ამიტომაც ხანგრძლივი ფრენისას, ზოგისთვის შეიძლება საჭირო შეიქმნას გავლა-გამოვლა ან მჯდომარე მდგომარეობაში ფეხის მოხრა და კუნთების ამუშავება. გაუწყლოების შემცირების მიზნით, დიდი რაოდენობით დალიეთ უალკოჰოლო სასმელები.

აძლიერებს ზემოხსენებული ფაქტორები თქვენს შიშს თვითმფრინავით მგზავრობისადმი? თუ ასეა, ალბათ, დაგამშვიდებთ ის ფაქტი, რომ თვითმფრინავით მგზავრობა შედარებით უსაფრთხოა. მონაცემების თანახმად, ის მოტოციკლით 500-ჯერ და ავტომობილით მგზავრობასთან შედარებით 20-ჯერ უსაფრთხოა! თუმცა, ზოგი მოიხსენიებს, რომ ასეთი სტატისტიკური მონაცემები განვლილ მანძილზეა დაფუძნებული და არა შესაბამის დროის პერიოდზე.

სამოგზაუროდ ბავშვების წაყვანას, თან ახლავს განსაკუთრებული სირთულეები. „თქვენი მოგზაურობისთვის მზადება სამხედრო ლაშქრობისთვის საგულდაგულო მზადებას უნდა ჰგავდეს“, — გვირჩევს დიქტორი კეტი არნოლდი. მაშინაც კი, თუ ამას ვერ ახერხებთ, თან წაიღეთ წიგნები, თამაშები ან სხვა ნივთები, ბავშვების ინტერესის გასაღვივებლად. ეს მოგზაურობას მთელი ოჯახისთვის უფრო სასიამოვნოს გახდის.

ჩასვლისას

„სანამ დასვენებისგან სიამოვნებას მივიღებ, ოთხი-ხუთი დღე მჭირდება დაძაბულობის მოსახსნელად“, — ამბობს მრავალი დამსვენებელი. უცხო გარემოს შეჩვევას, უდავოდ, დრო სჭირდება. ამგვარად, გონივრული იქნებოდა ჩასვლისთანავე, პირველ ან მეორე დღესვე არ მოინდომოთ ყველაფრის ნახვა. დაე შეეგუოს თქვენი ორგანიზმი და გონება განსხვავებულ რეჟიმს. წინააღმდეგ შემთხვევაში, მან შეიძლება გამოიწვიოს სტრესი და დასვენება ნაკლებად სასარგებლო გახადოს.

ერთი შეფასების თანახმად, მსოფლიოს მასშტაბით, ასობით მილიონი ადამიანიდან, სულ მცირე ნახევარი, ვინც ყოველწლიურად საზღვარგარეთ ისვენებს, რომელიმე დაავადების ან მიყენებული ტრავმის მსხვერპლი ხდება. ამიტომ, როგორც ერთ-ერთი წიგნის რედაქტორი დოქტორი რიჩარდ დეივუდი განმარტავს „ჯანმრთელობისთვის საუკეთესო ხელშემწყობი საშუალება ზოგიერთ საკითხში თავის შეკავებაა, რაც არც ერთმა მოგზაურმა არ უნდა უგულებელყოს“. რადგან მოგზაურის ორგანიზმი უნდა შეეგუოს ატმოსფეროში არსებულ სხვადასხვა ბაქტერიებს, საკვებსა და წყალს, განსაკუთრებით მნიშვნელოვანია, პირველ დღეებში საჭმლის მიმართ სიფრთხილის გამოჩენა.

„არასოდეს მიიჩნიოთ საკვები უვნებლად თუ არ იცით, რომ ახალია და კარგად მოხარშული (სტერილიზებული), მაგალითად, ხორცი ხარშეთ წითელი ფერის გასვლამდე. მაგრამ, ცხელი საჭმელიც კი შეიძლება საეჭვო იყოს. ამიტომ, „დარწმუნდით, რომ დღევანდელი საუზმე წუხანდელი სადილის მონარჩენი არ არის, ხელახლა გაცხელებული და განახლებული“, — გვაფრთხილებს დოქტორი დეივუდი (Travellers Health).

ამგვარად, თუ თქვენი საცხოვრებლისგან საკმაოდ განსხვავებულ ადგილას ისვენებთ, შესაძლოა ყოველთვის ვერ შეძლოთ ზუსტად იმის ჭამა, რაც გინდათ, როცა გინდათ ან სადაც გინდათ. ეს, რასაკვირველია, ძვირად არ დაგიჯდებათ, სამაგიეროდ ფაღარათს აიცილებთ თავიდან, რაც, მონაცემების თანახმად, ყოველი ხუთი დამსვენებლიდან ორს ემართება.

რაც შეეხება სასმელებს, ბოთლში ჩამოსხმული წყალი ხშირად უფრო უსაფრთხოა, ვიდრე ის, რაც ახლო-მახლოა. პრობლემების თავიდან ასაცილებლად, გონივრულია დალიოთ ბოთლსა და თუნუქის ქილაში ჩამოსხმული სასმელები, რომლებსაც თქვენი თანდასწრებით გახსნიან. ასევე კარგი იქნება, თუ შიგ ყინულის ნატეხებს არ ჩაყრით. ყოველთვის ეჭვის თვალით უყურეთ, სანამ არ დარწმუნდებით, რომ უვნებელია.

სასიამოვნო დასვენებისთვის მნიშვნელოვანი

მკითხველთა გამოკითხვის შემდეგ, მოგზაურობის შესახებ ერთი ჟურნალის რედაქტორმა თქვა: „თუ ამინდი მნიშვნელოვან ფაქტორადაა მიჩნეული დასვენების საინტერესოდ ან უინტერესოდ წარმართვისთვის, მითუმეტეს მნიშვნელოვანია მეგობრები“. სინამდვილეში, „ჯანსაღი საზოგადოება“ სასიამოვნო დასვენებისთვის ხელშემწყობ ფაქტორად „უფრო ხშირად იყო მიჩნეული, ვიდრე კომფორტაბელური სასტუმროები, უსაფრთხო ექსკურსიები, გემრიელი კერძები და დასათვალიერებლად საინტერესო ღირშესანიშნავი ადგილები“.

მაგრამ სად შეიძლება შვებულებისას შეხვდეთ ახალ მეგობრებს, რომლებთანაც ურთიერთობა სასარგებლოა? ერთ-ერთი საშუალებაა წინასწარ მისწეროთ იმ ქვეყნის საზოგადოება „საგუშაგო კოშკის“ ფილიალს, რომელ ქვეყანაშიც გსურთ შვებულების გატარება. ისინი მოგაწვდიან იეჰოვას მოწმეების უახლოესი სამეფო დარბაზის მისამართსა და კრების შეხვედრების დაწყების დროს. რამდენიმე ასეთი მისამართი მოცემულია ამ ჟურნალის მე-5 გვერდზე, უფრო ვრცელ სიას კი ახლახან გამოცემულ „იეჰოვას მოწმეთა წელიწდეულში“ მონახავთ.

იმისთვის, რომ სასიამოვნოდ გაატაროთ შვებულება და ამავე დროს, მოერიდოთ ყოველგვარ უსიამოვნებას, მნიშვნელოვანია ბიბლიის ბრძნული რჩევის გათვალისწინება: „ნუ დაიბნევით: ცუდი საზოგადოებანი ხრწნიან კეთილ ჩვევებს“ (1 კორინთელთა 15:33). როდესაც რომელიმე მივარდნილ ადგილას ისვენებთ და გრძნობთ, რომ არ გსურთ ქრისტიანული პრინციპების თანახმად ცხოვრება გონივრულია აღიაროთ ეს სისუსტე და დახმარებისთვის ღმერთს მიმართოთ, რათა შეეწინააღმდეგოთ ასეთ სურვილს. მშობლებმა შვილების საქმიანობასაც დიდი ყურადღება უნდა მიაქციონ. გახსოვდეთ, რომ ყველგან, სადაც უნდა წახვიდეთ, ‘საზარელი ჟამია’ (2 ტიმოთე 3:1).

როდესაც მთელი ოჯახი ერთად ისვენებთ, ნუ იფიქრებთ, რომ დედა გააკეთებს ყველა საქმეს, რასაც ჩვეულებრივ, სახლში აკეთებს. მზად იყავით, დაეხმაროთ ყოველდღიურ საოჯახო საქმეში. გამოავლინეთ თანამშრომლობის სული. ასეთი განწყობილება დიდად ეხმარება ყველას სასიამოვნოდ გაატაროს შვებულება.

იქნება თქვენი შვებულება სასიამოვნო? რამდენიმე ყურადღებით შერჩეული ფოტოს, ღია ბარათისა და სუვენირის ან თუნდაც რომელიმე ადგილობრივი ხელოვნების ნიმუშის შეძენა, უეჭველად, წარსულის სასიამოვნო მოგონებებს აღგიძრავთ. მაგრამ, ეჭვგარეშეა, რომ განსაკუთრებით დაუვიწყარი ახლად შეძენილი მეგობრები იქნებიან. ნუ გაწყვეტთ მათთან კავშირს. მისწერეთ ერთმანეთს და მოუყევით საინტერესო შემთხვევები. მრავალი საშუალება არსებობს, რომ შვებულება ნამდვილად სასიამოვნო გახადოთ.

[ჩარჩო 17 გვერდზე]

ზოგიერთი შეხსენება შვებულებასთან დაკავშირებით

გამგზავრებამდე

• იქონიეთ ყველა საჭირო მოქმედი საბუთი მოგზაურობასა და ჯანმრთელობასთან დაკავშირებით.

• შეიძინეთ პროფილაქტიკური წამლები.

მგზავრობისას

• დალიეთ დიდი რაოდენობით უალკოჰოლო სასმელები და ხანგრძლივი ფრენისას მსუბუქად ივარჯიშეთ.

• თან წაიღეთ ბავშვებისთვის საინტერესო ნივთები.

ჩასვლისას

• გამოყავით დრო ორგანიზმისა და გონების გარემოსთან შესაგუებლად.

• შემოიფარგლეთ უვნებელი საკვებითა და სასმელით.

• შეინარჩუნეთ ზნეობრივი სიფხიზლე.

• ოჯახის წევრებმა გაინაწილეთ ყოველდღიური საოჯახო საქმე.

[სურათი 16 გვერდზე]

შვებულების დროს ყურადღებით აირჩიეთ მეგობრები.