სრულყოფილი ჯანმრთელობა მხოლოდ ოცნებაა?

ყოფილხართ როდისმე მძიმედ ავად ან გაგიკეთებიათ სერიოზული ოპერაცია? თუ დიახ, ალბათ, ახლა კიდევ უფრო მეტად აფასებთ სიცოცხლეს. მაგრამ, როგორიც არ უნდა იყოს თქვენი ფიზიკური მდგომარეობა, გჯერათ თუ არა, რომ სრულყოფილი ჯანმრთელობის მიღწევა შესაძლებელია? ეს შეიძლება არარეალური ჩანდეს, თუ მხედველობაში მივიღებთ, რომ გავრცელებულია კიბო და გულის დაავადებები, რომლებიც აუძლურებს ადამიანებს. ფაქტია, რომ დროდადრო ყველა ვავადმყოფობთ. და მაინც, სრულყოფილი ჯანმრთელობა მხოლოდ ოცნება როდია.

ადამიანი იმისთვის შეიქმნა, რომ შესანიშნავი ჯანმრთელობით დამტკბარიყო და არა დაავადებულიყო და მომკვდარიყო. ამიტომაც, ღმერთმა ავადმყოფობისა და სიკვდილისგან ადამიანების გასათავისუფლებლად იესო ქრისტეს გამომსყიდველური მსხვერპლის საფუძველზე მათთვის სრულყოფილი ჯანმრთელობისა და საუკუნო სიცოცხლის მიღწევა გახადა შესაძლებელი. „ისე შეიყვარა ღმერთმა წუთისოფელი, რომ მისცა თავისი მხოლოდშობილი ძე, რათა ყოველი მისი მორწმუნე არ დაიღუპოს, არამედ ჰქონდეს საუკუნო სიცოცხლე“ (იოანე 3:16). ღვთის მიერ აღთქმულ ახალ ქვეყნიერებაში მარადიულად მცხოვრები ადამიანები აღარ დაიტანჯებიან ცუდი ჯანმრთელობითა და სიბერით. რა დაემართება მაშინ ავადმყოფობას?

ავადმყოფობისგან განთავისუფლება

ჩვენთვის ნიმუშია ის, თუ როგორ კურნავდა იესო ქრისტე ავადმყოფებს. ამგვარი განკურნებების შესახებ ნათქვამი იყო: „ბრმები ხედავენ და ხეიბრები დადიან, კეთროვნები იწმიდებიან და ყრუებს ესმით, მკვდრები დგებიან და ღატაკებს ეხარებათ“ (მათე 11:3–5). დიახ, ყველა ავადმყოფი, რომელიც იესოსთან მივიდა, „განიკურნა“ (მათე 14:36). შედეგად, „უკვირდა ხალხს, ხედავდა რა, რომ მუნჯები ალაპარაკდნენ, დასახიჩრებულნი გამოჯანსაღდნენ, კოჭლებმა გაიარეს და ბრმებმა დაინახეს. და ადიდებდნენ ისრაელის ღმერთს“ (მათე 15:31).

მართლაც, თუმცა ადამიანების ამგვარად განკურნების ძალა დღეს არავის შესწევს, შეგვიძლია დარწმუნებული ვიყოთ, რომ ღვთის მმართველობის დროს კაცობრიობა სრულყოფილებას მიაღწევს და ყოველგვარი ფსიქიკური თუ ფიზიკური ავადმყოფობისგან განიკურნება. გამოცხადების 21:3, 4-ში ღვთის დანაპირებს ვკითხულობთ: „აჰა, კარავი ღვთისა კაცთა შორის! და ის დამკვიდრდება მათ შორის, ისინი იქნებიან მისი ერი და თვით ღმერთი იქნება მათთან. მოსწმედს ყველა ცრემლს მათი თვალებიდან და აღარ იქნება სიკვდილი. გლოვა, გოდება და ტკივილიც აღარ იქნება, რადგან წინანდელნი გარდახდნენ“.

წარმოიდგინეთ ქვეყნიერება, სადაც საჭირო აღარ იქნება ფარმაცევტული ინდუსტრია და საავადმყოფოები, ქირურგია და თერაპია! გარდა ამისა, განახლებულ სამოთხეში აღარ იარსებებს დეპრესია და ფსიქიკური დაავადებები. სიცოცხლე მართლაც დიდი სიამოვნებისა და ბედნიერების მომტანი იქნება; ადამიანები მარადიულად ბედნიერები იქნებიან. დიახ, ღვთის უსაზღვრო ძალით ადამიანების სხეულები განახლებას დაიწყებენ და გამოსყიდვის საფუძველზე ჩამოშორებული იქნება ცოდვის გამანადგურებელი შედეგები. „არ იტყვის მცხოვრები: ავად ვარო“ (ესაია 33:24).

რა დიდებული იმედია — სრულყოფილი ფიზიკური და სულიერი ჯანმრთელობა ღვთის სამეფოს ქვეშევრდომობით! თუ ცხოვრების გაწონასწორებული და ჯანსაღი წესი გექნებათ, შეგიძლიათ, ღვთის ახალ ქვეყნიერებაში კურთხევებს მოელოდეთ. დაე იეჰოვამ ‘აავსოს სიკეთით თქვენი გულისთქმა და თქვენი სიჭაბუკე არწივის მსგავსად განაახლოს’ (ფსალმუნი 102:5).