შეგიძლიათ მარადიულად ცხოვრების იმედი გქონდეთ?

„ადამიანის ორგანიზმში ხდება რაღაც, რაც სიცოცხლის მაქსიმალური ხანგრძლივობის 115—120 წლით შემოფარგვლას განაპირობებს“, — აღნიშნავს დ-რ ჯეიმს რ. სმიტი, უჯრედული ბიოლოგიის მეცნიერებათა პროფესორი. — ეს ზღვარი არსებობს, მაგრამ არავინ იცის, მისი არსებობის მიზეზი“. ბიოლოგ დ-რ როჯერ გოსდენის სიტყვების თანახმად, გასაკვირი არ არის, რომ „მეცნიერებს ჯერ კიდევ მოუწევთ სიცოცხლის გასახანგრძლივებელი გზების ძიება, მაგრამ თითქმის არც ერთი მათგანი ფიქრობს ამაზე“. მოხდება რაიმე ცვლილება?

„მართლაც მნიშვნელოვანი კითხვის“ პირისპირ

მიუხედავად იმისა, რომ სიბერის არიდებასთან დაკავშირებით მრავალი თეორია არსებობს, მკვლევართა უმეტესობა ეთანხმება ამერიკის გერონტოლოგთა საზოგადოების პრეზიდენტის დ-რ ჯინ დ. კოჰენის აზრს, რომ «ყველა ეს „ჯადოსნური ვაზნები“ [თეორიები] ფუჭი აღმოჩნდა». რატომ? მეცნიერი ნანსი შუტი „იუნაიტიდ სტეიტს ნიუზ ენდ უორლდ რიპორტში“ აღნიშნავს: „ჯერ კიდევ არავინ იცის, რა იწვევს სიბერეს და მის გარდაუვალ შედეგს, სიკვდილს. ისეთი დაავადების მკურნალობა კი, რომლის გამომწვევი მიზეზი უცნობია, შემთხვევითობაზეა დამოკიდებული“. დ-რ გოსდენიც იმ აზრის არის, რომ სიბერე კაცობრიობისთვის კვლავ გამოცანად რჩება: „ის [სიბერე] უცხო არ არის არც ერთი ჩვენგანისთვის, მაგრამ მისი ბუნება კვლავაც იდუმალებით არის მოცული“. გოსდენი აღნიშნავს, რომ „მართლაც მნიშვნელოვანი კითხვა, რატომ ვბერდებით,“ თითქმის ყურადღების გარეშე რჩებაa.

ცხადია, რომ, ადამიანის შესაძლებლობები შეზღუდულია როგორც სირბილში, სიმაღლეზე ხტომასა და წყალში ყვინთვაში, ისე აზროვნებისა და მსჯელობის მასშტაბებში. „მართლაც მნიშვნელოვან კითხვაზე — რატომ “? — პასუხის გაცემა, როგორც ჩანს ადამიანის შესაძლებლობების ფარგლებს სცილდება. ამიტომ პასუხის საპოვნელად ერთადერთი საშუალებაა, მივმართოთ პიროვნებას, რომელიც ადამიანის მწირ ცოდნაზე აღმატებულ ცოდნას ფლობს. სწორედ ამის გაკეთებას გვირჩევს სიბრძნის უძველესი წიგნი, ბიბლია. ის ლაპარაკობს ‘სიცოცხლის წყაროზე’ და გვარწმუნებს, რომ ‘თუ ძებნას დავუწყებთ, ვიპოვით’ (ფსალმუნი 35:10; მეორე ნეშტთა 15:2). მაშ, რას გვიჩვენებს ღვთის სიტყვის, ბიბლიის კვლევა, რატომ კვდება ადამიანი?

სიკვდილის ძირითადი მიზეზი

ბიბლია გვამცნობს, რომ პირველი ადამიანების შექმნისას ღმერთმა „მარადიულობა ჩადო მათ გულებში“ (ეკლესიასტე 3:11; უილიამ ბეკის თარგმანი). მაგრამ შემოქმედმა მარადიულად ცხოვრების მხოლოდ სურვილი კი არ მისცა პირველ ადამიანებს, არამედ შესაძლებლობაც. თავიდან მათი სხეული და გონება სრულყოფილი იყო და ირგვლივ სასიამოვნო ატმოსფერო და სიმშვიდე სუფევდა. შემოქმედის განზრახვის თანახმად, მათ მარადიულად უნდა ეცხოვრათ და დროთა განმავლობაში დედამიწა სრულყოფილი შთამომავლებით გაევსოთ (დაბადება 1:28; 2:15).

მაგრამ უსასრულოდ ცხოვრება პირობითი იყო. ის ღვთისადმი მორჩილებაზე იყო დამოკიდებული. ღვთის ნების შეუსრულებლობის შემთხვევაში, ადამი ‘მოკვდებოდა’ (დაბადება 2:16, 17). სამწუხაროდ, პირველმა წყვილმა ურჩობა გამოავლინა (დაბადება 3:1–6). რადგან ‘ცოდვა ურჯულოებაა’, ურჩობის გამო ისინი ცოდვილები გახდნენ (1 იოანე 3:4). შედეგად, მათ მარადიულად ცხოვრების პერსპექტივა დაკარგეს, ვინაიდან „ცოდვის საზღაური სიკვდილია“ (რომაელთა 6:23). ამიტომ პირველი ადამიანებისთვის გამოტანილ განაჩენში ღმერთმა თქვა: „მტვერი ხარ და მტვრადვე მიიქცევი“ (დაბადება 3:19).

ამგვარად, ადამისა და ევას შეცოდების შემდეგ, ცოდვის შედეგი, რომელიც ნაწინასწარმეტყველები იყო, მათ გენებში აისახა და მათი სიცოცხლის ხანგრძლივობას ზღვარი დაედო; ამას კი სიბერე და სიკვდილი მოჰყვა. გარდა ამისა, ედემის ბაღიდან — სამოთხიდან — გაძევების შემდეგ პირველ ადამიანებს კიდევ ერთ ფაქტორთან მოუწიათ გამკლავება; ეს იყო ედემის გარეთ არსებული პირობების მიერ შექმნილი თარჯი (დაბადება 3:16-19, 23, 24). ნაკლოვანი გენეტიკური კოდისა და მკაცრი გარემო პირობების შერწყმამ კი გავლენა იქონია პირველ ადამიანებსა და მათ შთამომავლობაზე.

განაჩენი და აღთქმა

პირველი წყვილის ცხოვრებაში ეს საზიანო ცვლილებები მანამ მოხდა, სანამ შვილები გაუჩნდებოდათ; ამიტომ მათ მხოლოდ თავიანთი მსგავსი შთამომავლების წარმოშობა შეეძლოთ უკვე — არასრულყოფილების, ცოდვილებისა და ისეთების, რომლებიც დროთა განმავლობაში დაბერდებოდნენ. „სიკვდილი გადავიდა ყველა ადამიანში, რადგან ყველამ შესცოდა“ — ამბობს ბიბლია (რომაელთა 5:12; შეადარეთ ფსალმუნი 50:7). „ჩვენი უჯრედების სტრუქტურაში ჩვენივე სიკვდილის გარანტიაა ჩაწერილი“, — აღნიშნავს ერთ-ერთი სამედიცინო წიგნი (The Body Machine—Your Health in Perspective).

მაგრამ ეს არ ნიშნავს, რომ უსასრულო, — სიბერისა და სიკვდილისგან თავისუფალი, — ცხოვრების იმედისთვის საფუძველი არ არსებობს. ჯერ ერთი, გონივრულია, გვწამდეს, რომ ადამიანებისა და სხვა საოცრად მრავალგვარი ცოცხალი არსებების ყოვლად ბრძენ შემოქმედს შეუძლია წესრიგში მოიყვანოს ნებისმიერი გენეტიკური დარღვევა და ადამიანს მარადიულად ცხოვრებისთვის საჭირო ენერგია მისცეს. მეორეც, ღმერთმა სწორედ ამის გაკეთება აღგვითქვა. მას შემდეგ, რაც იეჰოვამ პირველ ადამიანებს სასიკვდილო განაჩენი გამოუტანა, რამდენჯერმე ცხადყო, რომ თავისი განზრახვა დედამიწაზე ადამიანების მარადიულად ცხოვრების შესახებ არ შეცვლილა. მაგალითად, ის გვარწმუნებს: „მართალნი დაიმკვიდრებენ ქვეყანას და იარსებებენ მასზე უკუნისამდე“ (ფსალმუნი 36:29). რა უნდა გააკეთოთ პირადად თქვენ, რომ ეს დანაპირები თქვენზეც შესრულდეს?

როგორ შეიძლება თქვენი სიცოცხლე გახანგრძლივდეს და გახდეს მარადიული?

საინტერესოა მეცნიერ რონალდ კოტულაკის განაცხადი, რომელიც მედიცინის დარგში 300-ზე მეტი მკვლევარისგან ინტერვიუს აღების შემდეგ გააკეთა: „მეცნიერებმა დიდი ხანია იციან, რომ შემოსავალი, საქმიანობა და განათლება მნიშვნელოვნად განაპირობებს ადამიანის ჯანმრთელობასა და სიცოცხლის ხანგრძლივობას. . . მაგრამ სიცოცხლის ხანგრძლივობისთვის უდიდესი მნიშვნელობა მაინც განათლებას ენიჭება“. შემდეგ კი განმარტავს, რატომ: „როგორც საკვები განამტკიცებს ჩვენს იმუნურ სისტემას დაავადების გამომწვევი მიკრობების წინააღმდეგ ბრძოლაში, ისე განათლება გვიცავს ჩვენთვის საზიანო არჩევანის გაკეთებისგან“. ერთმა მკვლევარმა თქვა: „განათლება გასწავლით, როგორ გაუმკლავდეთ წუთისოფელს“ და როგორ „გადალახოთ მოსალოდნელი დაბრკოლებები“. ამიტომ კოტულაკის სიტყვების თანახმად, განათლება არის „ჯანსაღი და ხანგრძლივი ცხოვრების საიდუმლოს გასაღები“.

მარადიული ცხოვრების მიღებისკენ გადადგმული პირველი ნაბიჯიც განათლებაა — ბიბლიური განათლება. იესომ თქვა: „ესაა საუკუნო სიცოცხლე, რომ გიცნობდნენ შენ, ერთადერთ ჭეშმარიტ ღმერთს, და მას ვინც მოავლინე — იესო ქრისტეს“ (იოანე 17:3). იეჰოვა ღმერთზე ანუ შემოქმედზე, იესო ქრისტეზე და ღვთის მიერ გატარებულ გამოსყიდვის ღონისძიებაზე შემეცნების მიღება არის განათლების ერთადერთი სახე, რომელიც ადამიანს მარადიული ცხოვრების გზაზე დასადგომად პირველი ნაბიჯის გადადგმაში დაეხმარება (მათე 20:28; იოანე 3:16).

იეჰოვას მოწმეები ეწევიან საგანმანათლებლო საქმიანობას, რომელიც სიცოცხლის მომცემი ბიბლიური შემეცნების მიღებაში დაგეხმარებათ. ისინი ამას უსასყიდლოდ აკეთებენ. ეწვიეთ მათ ერთ-ერთ სამეფო დარბაზს, რათა უფრო მეტი ინფორმაცია მიიღოთ ამ საგანმანათლებლო პროგრამის შესახებ ან სთხოვეთ იეჰოვას მოწმეებს, თქვენთვის მოსახერხებელ დროს სახლში გეწვიონ. ნახავთ, რომ ბიბლია შეიცავს საფუძვლიან მტკიცებას იმასთან დაკავშირებით, რომ ახლოს არის დრო, როდესაც სიცოცხლეს აღარ შეამოკლებს თარჯები და აღარ განსაზღვრავს ფინიშის ხაზი. მართალია, სიკვდილი ათასწლეულების მანძილზე ბატონობს, მაგრამ მალე სამუდამოდ მოისპობა. ეს მართლაც აღმაფრთოვანებელი პერსპექტივაა, როგორც ხანდაზმულებისთვის, ისე ახალგაზრდებისთვის!

[სქოლიო]