რა ხდება მსოფლიოში
„ბაბილონის გოდოლი“
როგორც პარიზში გამომავალი გაზეთი (International Herald Tribune) იუწყება, ევროპის კავშირს (ეკ) 11 ოფიციალური ენა აქვს და მოგვიანებით შეიძლება კიდევ 10 დაემატოს. დღესდღეობით ევროპის კომისია, ეკ-ს აღმასრულებელი ორგანო, ოთხზე მეტჯერ მეტ მთარგმნელსა და თარჯიმანს იყენებს, ვიდრე გაეროს მთავარი სამმართველო, რომელსაც მხოლოდ ხუთი ოფიციალური ენა აქვს. მაშინ როცა ძალისხმევა ევროპის გაერთიანებასა და ეკ-ს ოპერაციების გამარტივებას ხმარდება, ენასთან დაკავშირებით საწინააღმდეგო რამ ხდება. თითოეული წევრი-სახელმწიფო საკუთარ ენას უჭერს მხარს. „ეს ბაბილონის გოდოლს ემსგავსება“, — ნათქვამია ზემოხსენებულ გაზეთში. კომისია „ევროენის“ პრობლემასაც აწყდება — ამაში იგულისხმება შიდა ენა, რომელიც სავსეა ჟარგონებითა და ძნელად გასაგები ტერმინებით. როგორც ერთ-ერთი მთარგმნელი აღნიშნავს, ძნელია პოლიტიკოსებს ნათლად გამოათქმევინო აზრი, როცა „ხშირად მათი მიზანი სწორედ ის არის, რომ გაურკვევლად ილაპარაკონ“.
საყვარელი შინაური ცხოველები — როგორ მოქმედებენ თქვენს ჯანმრთელობაზე?
„შინაური ცხოველების სიყვარულმა ადამიანი შეიძლება ექიმის კაბინეტს აარიდოს“, — ნათქვამია „ტორონტო სტარში“. გასული ათწლეულის განმავლობაში ჩატარებულმა სხვადასხვა გამოკვლევამ ნათელყო, რომ, „ვისაც გვერდში ჰყავს საყვარელი ცხოველები, ნაკლებად ექვემდებარებიან სტრესულ მდგომარეობას, ნაკლებად უწევთ ექიმებთან სიარული და, გულის შეტევების შემთხვევაში, უფრო მალეც კი ჯანმრთელდებიან. დამბლადაცემულებს ცხოველი შეიძლება ძალების მოკრებაში დაეხმაროს, ფსიქიკურად დაავადებულებს კი — შიშის დაძლევაში“. პერდიუს ვეტერინარიის უნივერსიტეტის (ინდიანა, აშშ) დოქტორი, ალან ბეკი, თვლის, რომ „ადამიანი მშვიდდება, როცა ყურადღება ცხოველზე გადააქვს და ეფერება“. ცხოველი ადამიანზე მაშინაც კი დადებითად მოქმედებს, როცა პირადად მისი არ არის; ამ მიზეზით შეიქმნა „მკურნალობა ცხოველთა მეშვეობით“. ამიტომ ზოგი ფსიქოთერაპევტი ფსიქიკური მოშლილობის მქონე პაციენტებს ურჩევს, დრო გაატარონ საყვარელ შინაურ ცხოველთან, რაც დადებით შედეგს გამოიღებს.
წყლის რესურსების შემცირება
„ვარგისი წყლის ის რაოდენობა, რომელიც დღეს ერთ მოსახლეზე მოდის, იმის ნახევარიც კი არ არის, რაც 50 წლის წინათ გვქონდა“, — ნათქვამია „იუნესკო კურიერში“ (The UNESCO Courier). მოსალოდნელია, რომ მსოფლიო მარაგის შემცირება გაგრძელდეს. ასეთი მკვეთრი ცვლილება მტკნარ წყალზე არსებული მოთხოვნილების სწრაფ ზრდაზე მეტყველებს, რასაც მოსახლეობის ზრდა, სასოფლო-სამეურნეო საჭიროებები და ინდუსტრიალიზაცია იწვევს. მეცნიერები, რომლებიც დედამიწის რუკას ადგენენ იმ ადგილების გათვალისწინებით, სადაც წყლის უკმარისობაა, ზოგ ადგილს აღნიშნავენ როგორც „კატასტროფულს“. „კურიერის“ თანახმად, ეს იმას ნიშნავს, რომ არსებულმა მარაგმა, „საეჭვოა, გვალვის მსგავსი კრიზისის დროს მოსახლეობის შველა შეძლოს“. ის დასძენს: „სულ რაღაც 50 წლის წინათ მსოფლიოს არც ერთ ქვეყანაში არ ყოფილა წყლის მარაგის კატასტროფულად დაბალი დონე, დღეს კი მოსახლეობის დაახლოებით 35 პროცენტი ასეთ პირობებში ცხოვრობს“.
მათხოვრის როლის შესრულება
თუმცა მრავალ მათხოვარს ნამდვილად უჭირს, ინდოეთში გამომავალი ჟურნალის (The Week) სტატია გვიჩვენებს, რომ ზოგი ხალხს თავს აჩვენებს იმად, რასაც, სინამდვილეში, არ წარმოადგენს. ინდოეთის შტატში, მაჰარაშტრაში, ყავარჯნებზე დაყრდნობილი მათხოვარი შუქნიშანთან შეჩერებულ ავტომობილს მიუახლოვდა. მძღოლმა მას ყურადღება არ მიაქცია და მეგობარ გოგონასთან საუბარი განაგრძო. მათხოვარმა უფრო ხმამაღლა დაუწყო ხვეწნა. მძღოლმა მინა ჩასწია, ჯამში მონეტები ჩაუყარა და ხელი ჰკრა. უეცრად „ხეიბარი“ მათხოვარი კარგად გახდა და ყავარჯნებით ავტომობილის ქარსარიდი მინის მსხვრევა დაიწყო. ზემოხსენებულ ჟურნალში ნათქვამი იყო, რომ «მის დასახმარებლად მოცვივდნენ მისი „უსინათლო“, „კოჭლი“ და „ხეიბარი“ ამხანაგები, რომლებიც სხვა სატრანსპორტო საშუალებებთან მათხოვრობდნენ“, და ქვები, ხელკეტები და ყავარჯნები დაუშინეს ავტომობილს, ბოლოს კი ახალგაზრდა მძღოლი გარეთ გადმოათრიეს. ამ დროს პოლიციის ავტომობილის შემთხვევით გამოვლამ აიძულა მათხოვრები, გაქცეულიყვნენ.
ბავშვებზე ძალადობა მსოფლიოში
ჯანდაცვის მსოფლიო ორგანიზაციის (ჯმო) (ჟენევა, შვეიცარია) შეფასებით, მსოფლიოში 40 მილიონი ბავშვია ძალადობის მსხვერპლი. როგორც „ნიუ-იორკ ტაიმზი“ იტყობინებოდა, 19 ქვეყანაში 14 წლამდე ასაკის ბავშვებს შორის ჩატარებულმა გამოკვლევებმა ცხადყო, რომ ბიჭების 29 პროცენტი და გოგონების 34 პროცენტი სექსუალური ძალადობის მსხვერპლი იყო. ჯმო-ს თანახმად, მარტო შეერთებულ შტატებში ყოველწლიურად დაახლოებით ორი მილიონი ბავშვი ხდება ძალადობის მსხვერპლი.