ჭეშმარიტება ანგელოზების შესახებ
როგორც ვხედავთ, ანგელოზების შესახებ გავრცელებული თვალსაზრისი და ამბები ყოველთვის არ ეთანხმება ბიბლიის სწავლებას. ნამდვილად აქვს რაიმე მნიშვნელობა ასეთი შეუსაბამობის არსებობას? და საზიანოა თუ არა ანგელოზების შესახებ გავრცელებული შეხედულებების მიღება? უეჭველად.
განვიხილოთ, მაგალითად, შეხედულებები, რომლებსაც მხარს უჭერს „ახალი სულიერობა“. ანგელოზების შესახებ დაწერილი ახლანდელი წიგნები აზროვნებისკენ კი არ არის აღმძვრელი, არამედ გულუბრყვილო მორჩილებისკენ უბიძგებს. მკითხველებს იშვიათად მოუწოდებენ თავიანთი პრობლემების გადაჭრისკენ ან ბიბლიაში წვდომისა და ღვთის შემეცნების ძიებისკენ. ეს წიგნები გვარწმუნებენ, რომ ცხოვრებას კეთილ და მოსიყვარულე ანგელოზთან ერთად გავდივართ და რომ არა გვაქვს შიშის მიზეზი, რადგან ვცხოვრობთ ბედნიერ სამყაროში, სადაც ყველაფერი ისეა, როგორც უნდა იყოს. პრობლემების წამოჭრისას მხოლოდ ანგელოზის ჩარევას უნდა დაველოდოთ. მაგრამ თუ ყველაფერი ასეა, რატომღა გვეუბნება ბიბლია, რომ ‘ვიღწვოდეთ რწმენისათვის’? (იუდა 3).
ბევრი წიგნი ანგელოზებზე ადამიანურ სიამაყესა და პატივმოყვარეობას აამებს. მათი ყურადღება „მე“-ზეა გამახვილებული. ამ წყაროების თანახმად, დღევანდელ ანგელოზებს სურთ, რომ ვიცოდეთ, რამდენად ლამაზები და არაჩვეულებრივები ვართ. თუმცა კარგია საკუთარი თავის დადებითად შეფასება, მაგრამ „ახალი სულიერობის“ მთავარ თემას საკუთარი თავისადმი ბრმა სიყვარული წარმოადგენს. ერთ-ერთი ნაშრომის ავტორი ამბობს, რომ პირველი და უდიდესი მცნებაა „გიყვარდეს შენი უფალი საკუთარი თავი“. რამდენად ეწინააღმდეგება ეს იესოს სიტყვებს! მან თქვა: „‘შეიყვარე უფალი ღმერთი შენი ყოვლითა გულითა შენითა და ყოვლითა სულითა შენითა და ყოვლითა გონებითა შენითა.’ ეს არის პირველი და დიდი მცნება“ (მათე 22:36—39). ცხოვრებაში უბედნიერესი ადამიანები ვიქნებით, თუკი ღვთის ინტერესებს საკუთარზე წინ დავაყენებთ.
ანგელოზებისათვის მთავარი ადგილის დათმობა მკვეთრად ეწინააღმდეგება ჭეშმარიტ ქრისტიანობას. პავლე მოციქული განსჯიდა ანგელოზებისადმი თაყვანისცემას (კოლასელთა 2:18). თაყვანისცემა ნიშნავს „ვისიმე ან რისამე პატივისცემას როგორც წმინდა, უზენაესი ძალისა. . . გაღმერთებას“. მაგრამ მრავალი პოპულარული წიგნი მკითხველებს ზუსტად ანგელოზებისადმი პატივის მიგებისა და მოწიწებისაკენ უბიძგებს. გაიხსენეთ, რა უპასუხა იესომ სატანას, როდესაც სატანამ უთხრა, ერთხელ მეციო თაყვანი. იესომ უპასუხა: „უფალს, შენს ღმერთს ეცი თაყვანი და მხოლოდ მას ემსახურე“ (ლუკა 4:8). მოგვიანებით, როდესაც მოციქული იოანე ანგელოზის წინაშე პირქვე დაემხო, ანგელოზმა უთხრა: „ამას ნუ იზამ. შენი და შენი ძმების თანამსახური ვარ, რომელთაც იესოს მოწმობა აქვთ. თაყვანი ეცი ღმერთს“ (გამოცხადება 19:10).
როგორ გვეხმარებიან ანგელოზები
ის, ვისაც ხელმძღვანელობისა და თაყვანისცემისთვის უნდა მივუახლოვდეთ, არის ღმერთი, და არა ანგელოზები. ის მზადყოფნითა და სიხარულით ავლენს სიყვარულს ყველას მიმართ, ვინც მის სამართლიან მოთხოვნებს ასრულებს. მოციქული იოანე სწერდა თანაქრისტიანებს: „აჰა, რა სითამამე გვაქვს მის მიმართ, რომ, როცა რამეს ვთხოვთ მისი ნებისამებრ, იგი გვისმენს. ხოლო როცა ვიცით, რომ იგი გვისმენს, რასაც კი ვთხოვთ, ისიც ვიცით, რომ გვაქვს, რაც მისგან ვითხოვეთ“ (1 იოანე 5:14, 15).
არსებობს მრავალი რამ, რაც არ ვიცით ღვთის ერთგულ ანგელოზებზე. მაგრამ ვიცით, რომ ისინი ემსახურებიან ღმერთს და მისი განზრახვისა და მითითებების თანახმად მოქმედებენ. მათ ღვთის შესახებ ჭეშმარიტების გავრცელების ხელშეწყობა სწადიათ (გამოცხადება 14:6, 7). ანგელოზებს არ სურთ ჩვენგან თაყვანისცემის მიღება. ვინაიდან მათი დანახვა არ შეგვიძლია, არ ვიცით, რამდენად იყენებს მათ ღმერთი ყოველდღიურ ცხოვრებაში თავისი ხალხის დასახმარებლად. მაგრამ ვიცით, რომ იეჰოვა ღმერთი იცავს და ხელმძღვანელობს თავის ხალხს.
რა შესანიშნავ მაგალითს წარმოადგენენ ჩვენთვის ერთგული ანგელოზები! ისინი ადიდებენ და აქებენ ღმერთს (ფსალმუნი 148:2). თუმცა დიდ გონებრივ და სულიერ ძალას ფლობენ, ისინი ღრმა პატივისცემას ავლენენ იეჰოვას უზენაესი ხელისუფლებისადმი (იუდა 9). მათ ძლიერ აინტერესებთ ღვთის მიზნების შესრულება (1 პეტრე 1:11, 12). ამას ღვთის სიტყვიდან, ბიბლიიდან, ვიგებთ. დიახ, ბიბლია არის წიგნი, რომელიც ანგელოზების შესახებ ჭეშმარიტებას გვეუბნება.
[ჩანართი 10 გვერდზე]
ანგელოზებს ღვთის შესახებ ჭეშმარიტების გავრცელების ხელშეწყობა სწადიათ.
[სურათი 8, 9 გვერდებზე]
როდესაც მოციქულ იოანეს თაყვანი უნდა ეცა ანგელოზისათვის, ანგელოზმა უთხრა: „ამას ნუ იზამ!“.