ღვთის სახელი შუა საუკუნეების ციხესიმაგრეში

„გამოიღვიძეთ!“-ისთვის სლოვაკეთიდან

ევროპის შუაგულში მდებარე სლოვაკეთი პატარა, მაგრამ მრავალფეროვანი ქვეყანაა. მის თვალწარმტაც პერიფერიებში მიმობნეული ციხე-კოშკები ამ ადგილების ხანგრძლივი და მდიდარი ისტორიის მოწმენი არიან. მათ შორის ყველაზე ღირსშესანიშნავია ორავას ციხესიმაგრე, რომელიც 112 მეტრზე აღმართული ციცაბო კლდიდან გადმოჰყურებს სოფელს.

ისტორიულ წყაროებში პირველ წერილობით ცნობებს ორავას ციხესიმაგრის შესახებ 1267 წლიდან ვხვდებით. მას შემდეგ მან მრავალი მეპატრონე გამოიცვალა. 1556 წლიდან ის მდიდარი ოჯახის — ტურზოების — მფლობელობაში გადავიდა. ტურზოებმა ციხესიმაგრის ტერიტორიაზე სხვა შენობებთან ერთად სამლოცველოც ააგეს.

ყოველ წელს ორავას ციხესიმაგრე და მასში გამოფენილი ექსპონატები ათიათასობით მნახველს იზიდავს მრავალი ქვეყნიდან. შიდა ეზოში დამთვალიერებლებს შეუძლიათ ნახონ ქვიშაქვის რელიეფზე შემონახული განსაკუთრებით საინტერესო რამ — ტურზოების ოჯახის საგვარეულო გერბი, რომელზეც ლათინური ასოებით ამოკვეთილია ღვთის ბიბლიური სახელი — იეჰოვა.