ახალგაზრდების შეკითხვები

როგორ გავუმხილო მას ჩემი გრძნობები?

„მაინტერესებს, თუ ქალს მამაკაცი შეუყვარდა, უნდა გაუმხილოს მას თავისი გრძნობები?“ (ლორა)a.

დავუშვათ, მოგწონს ახალგაზრდა, რომელიც ახლახან გაიცანი ან შესაძლოა, დიდი ხანია იცნობ და მასთან რომანტიკული ურთიერთობის განვითარება გინდა. დარწმუნებული ხარ, რომ მასაც იგივე გრძნობები აქვს შენდამი; მაგრამ ძალიან მორიდებულია საიმისოდ, რომ სიყვარულში გამოგიტყდეს. ამიტომ გაინტერესებს, გონივრული იქნება, რომ ინიციატივა გამოიჩინო და სიყვარული აუხსნაb?

მოდი ჯერ ოჯახის წევრებისა და შენ გარშემო მცხოვრებთა გრძნობებზე ვიმსჯელოთ. მაგალითად, ადგილობრივი ტრადიციის თანახმად, მშობლების მოვალეობაში ხომ არ შედის ცხოვრების თანამგზავრის შერჩევა?c მაშინაც კი, თუ ფიქრობ, რომ დაქორწინება და ამ მიზნით ვინმესთან შეხვედრა პირადი გადასაწყვეტია, გახსოვდეს, რომ ქრისტიანები ერიდებიან უადგილოდ ვინმეს განაწყენებას. ისინი ოჯახის წევრებისა და საყვარელი ადამიანების გრძნობებსაც ითვალისწინებენ.

ბევრ ქვეყანაში დღეს სრულიად მისაღებია, ახალგაზრდებმა პირადი არჩევანი გააკეთონ და დაქორწინების მიზნით შეხვდნენ მას, ვინც მოსწონთ. არასწორი იქნება, თუ ქალი საკუთარ თავზე აიღებს ინიციატივას და მამაკაცს სიყვარულში გამოუტყდება? ამ შემთხვევაშიც გასათვალისწინებელია ოჯახის წევრებისა და გარშემო მცხოვრებთა გრძნობები. ხომ არ აღაშფოთებდა ან გაანაწყენებდა ასე მოქცევა მათ?

რას ამბობს ბიბლია — უნდა გამოავლინოს ქალმა ინიციატივა? ბიბლიურ დროში ღვთისმოშიშმა რუთმა ბოაზს დაქორწინება შესთავაზა. იეჰოვა ღმერთმა აკურთხა მისი მცდელობა (რუთი 3:1—13). რასაკვირველია, რუთი მოზარდი არ იყო; ის ქვრივი იყო და ჰქონდა გათხოვებისთვის სათანადო ასაკი. რუთი ბოაზთან საფლირტაოდ ან არასერიოზული განზრახვით არ მისულა. პირიქით, ის ზედმიწევნით მიჰყვებოდა ღვთის კანონს ქორწინებასთან დაკავშირებით (მეორე რჯული 25:5—10).

შეიძლება, შენც მიაღწიე საქორწილო ასაკს და ვიღაც მოგწონს კიდეც. ასეც რომ იყოს, მისთვის გულის გადაშლა, ვისაც, შესაძლოა, შენ მიმართ მსგავსი გრძნობები არა აქვს, დელიკატური და სარისკო საქმეა. ეს იმის მსგავსია, რომ შენი გული სხვას ჩაუდო ხელში. ნაზად მოეპყრობა ის მას თუ ძირს დააგდებს? ბიბლიური პრინციპების მიყოლით ზედმეტ უხერხულობასა და ემოციურ ტკივილს აიცილებ.

გონივრულად იმოქმედე

ოცნებებით გატაცება ძალიან ადვილია. შესაძლოა, შენი ქორწილის დღეც კი წარმოიდგინო და მისი შემდგომი პერიოდიც. მართალია, ასეთ რამეზე ოცნება სიამოვნების მომგვრელია, მაგრამ ეს მხოლოდ ილუზიაა. მან შეიძლება ისეთი ძლიერი სურვილები აღგიძრას, რომლებიც ვერ დაიკმაყოფილო. ბიბლია ამბობს: „ხანგრძლივი მოლოდინი გულს ქანცავს“ (იგავები 13:12). ოცნებებმა შეიძლება განსჯის უნარიც დაგაკარგვინოს. იგავების 14:15 ამბობს: „გონიერი. . .  აკვირდება თავის ნაბიჯებს“. ასეთი ადამიანი პრაქტიკული ჭკუითა და საღად განსჯის უნარით გამოირჩევა. როგორ შეიძლება გონიერების გამოვლენა, როდესაც რომანტიკული გრძნობებით ხარ გატაცებული?

პირველ რიგში, ეცადე, ‘ცოდნით იმოქმედო’ (იგავები 13:16). როგორც ერთი ახალგაზრდა ქალი ამბობს: „სინამდვილეში შეუძლებელია შეგიყვარდეს ადამიანი, რომელსაც არ იცნობ“. სანამ გულს ვინმეს მიუძღვნიდე, ყურადღება მიაქციე მის ქცევებსა და საუბრებს. დააკვირდი, როგორ ეპყრობა ადამიანებს. „ჰკითხე მის მეგობრებსა და უფროსი ასაკის ადამიანებს, რას ფიქრობენ მასზე“, —გვირჩევს ერთი ახალგაზრდა მამაკაცი. „დადებითად ახასიათებენ“ ქრისტიანულ კრებაში? (საქმეები 16:2). ასევე კარგ რჩევას გვთავაზობს ახალგაზრდა ქალი იზაბელი. ის ამბობს: „ჯგუფურად სადმე წასვლა და მისი მშობლების გაცნობა შეიძლება ძალიან დამხმარე აღმოჩნდეს“. სადმე ჯგუფურად წასვლა საშუალებას მოგცემს, ყოველგვარი დაძაბულობის გარეშე დააკვირდე და გაიგო, როგორია ის სინამდვილეში.

ადამიანის ასე გაცნობა დროსა და მოთმინებას მოითხოვს. სამაგიეროდ ეს საშუალებას მოგცემს, დაინახო მისი თვისებები, ხასიათი და შეხედულებები, რაც საბოლოოდ, მის მიმართ გრძნობებს ან უფრო გაგიძლიერებს ან საერთოდ შეგაცვლევინებს გადაწყვეტილებას. იგავების 20:11–ში ნათქვამია: „თვისი საქციელის მიხედვითაც იცნობა ყმაწვილი, თუ სუფთაა ან თუ სამართლიანია მისი საქმე“. დიახ, ადრე თუ გვიან მისი ქცევები დაგანახვებს, როგორი პიროვნებაა ის სინამდვილეში.

აქედან გამომდინარე, გონივრული იქნება, თუ ცდუნებას არ აჰყვები, მოვლენებს წინ არ გაუსწრებ და თავს შეიკავებ შენი გრძნობების დროზე ადრე გამჟღავნებისგან. თუ იჩქარებ და მისგანაც დადებით პასუხს მიიღებ, მოგვიანებით შეიძლება აღმოაჩინო, რომ ის არ არის შენი შესაფერისი მეუღლეd. თუ ჯერ სიყვარულში გამოუტყდები და მერე ეტყვი, რომ აღარ გსურს მასთან ურთიერთობის გაგრძელება, ამან შეიძლება მას ძალიან ატკინოს გული.

შენ რა შთაბეჭდილებას ტოვებ მასზე?

შესაძლოა, ის ახალგაზრდა თავადაც გაკვირდება. ირეკლება შენს ქცევებში ღვთისმოსაწონი თვისებები? „ვხედავ, რომ ბევრი გოგო სათანადოდ არ იცვამს, — ამბობს იზაბელი. თუ გსურთ, სულიერად მოწიფულმა ქრისტიანმა მამაკაცმა მოგაქციოთ ყურადღება, მოკრძალებულად ჩაიცვით“. რაც უნდა შემოგთავაზოთ მოდის სამყარომ, თუ თქვენი მშვე­ნება „მოკრძალებითა და საღი აზროვნებით შერჩეულ მოხდენილ ტანსაცმელში“ იქნება, უფრო მეტად მიიქცევთ იმ ადამიანის ყურადღებას, ვისაც ღვთისთვის მოსაწონი თვისებები აქვს (1 ტიმოთე 2:9).

ბიბლია აგრეთვე მოუწოდებს ახალგაზრდა ქრისტიანებს, ‘მაგალითი იყვნენ ლაპარაკში’ (1 ტიმოთე 4:12). შენი საუბარი ბევრს ამბობს შენზე. როგორ უნდა მოიქცე, თუ ახალგაზრდა მამაკაცთან საუბრის შესაძლებლობა მოგეცემა? თუ ის მორცხვია, შეიძლება თავს უხერხულად გრძნობდეს და ნერვიულობდეს. ერთი გოგო, აბი, ამბობს: „ასეთ დროს შეიძლება შენ მოგიწიოს საუბრის დაწყება, რათა გაიგო, თუ სურს შენთან ურთიერთობა“.

რით უნდა დაიწყო საუბარი? თუ საკუთარ თავზე იმდენს ლაპარაკობ, რომ ვეღარ ჩერდები, მან შეიძლება ეგოისტ და ზერელე პიროვნებად მიგიჩნიოს. ბიბლია გვირჩევს: „მხოლოდ პირად ინტერესებზე კი ნუ იზრუნებთ, არამედ სხვების ინტერესებზეც“ (ფილიპელები 2:4). თუ რამდენიმე კითხვას დაუსვამ თავის თავზე ან თავის მიზნებზე, შეიძლება ცოტათი მაინც გაიხსნას.

სწორი არ იქნება „მზაკვარი ენისა“ და „ცრუ ბაგეების“ გამოყენება (ფსალმუნები 119:2). გონიერი კაცი ასეთ სიტყვებში არაგულწრფელობას შენიშნავს. ამასთანავე, ნუ იტყვი რაღაცას მხოლოდ იმიტომ, რომ ის დააინტერესო, განსაკუთრებით იმ შემთხვევაში, თუ უფრო სერიოზულ თემებს შეეხები და საუბარს პირადი სულიერი მიზნებით დაიწყებ. ყოველთვის იყავი ის, რაც სინამდვილეში ხარ, ­გულწრფელი და პატიოსანი. მხოლოდ ამის შემდეგ დაასკვნი, ერთი გზით მიდის თუ არა თქვენი ცხოვრება.

თუ არ გპასუხობს

როგორ უნდა მოიქცე, თუ ასეთი მოკრძალებული მცდელობის მიუხედავად, ის მაინც არ ავლენს შენდამი რომანტიკულ გრძნობებს? შესაძლოა რამდენიმე კვირა და თვეებიც კი გავიდა, მაგრამ მისი მხრიდან არავითარ ყურადღებას არ გრძნობ. მის სიმორცხვეს უნდა მიაწერო ეს? ჰკითხე საკუთარ თავს: „თუ ასეთი მორცხვია, მზად არის ქორწინებისთვის? თუ დავქორწინდებით, შეძლებს ოჯახური პასუხისმგებლობების საკუთარ თავზე აღებას, თუ ჩემგან მოელის ამის გაკეთებას?“ (1 კორინთელები 11:3). მეორე კითხვა, რაზეც ღირს დაფიქრება, ასეთია: „ნამდვილად მორცხვია, თუ უბრალოდ ჩემით არ არის დაინტერესებული?“ ასეთი დასკვნის გაკეთება გულსატკენია. მაგრამ ამის აღიარება თავიდან აგაცილებს უხერხულ მდგომარეობას, რომელშიც იმ შემთხვევაში აღმოჩნდებოდი, თუ სიყვარულში გამოუტყდებოდი კაცს, რომელსაც შენ მიმართ სერიოზული გრძნობები არა აქვს.

შესაძლოა გაქვს მიზეზი, იფიქრო, რომ შენ მიმართ გულგრილი არ არის. და ფიქრობ, რომ, ბუნებით დინჯია, აჭიანურებს თავისი გრძნობების გამხელას და, თუ ბიძგს მისცემ, აუცილებლად გიპასუხებს. შეიძლება ასეც იყოს, მაგრამ ინიციატივის გამოჩენას თუ აპირებ, უნდა გახსოვდეს, რომ ეს სარისკო საქმეა. კარგად უნდა დაფიქრდე იმაზე, თუ რას ეტყვი და საამისოდ ხელსაყრელი დროც უნდა შეარჩიო.

მაგალითად, შეიძლება არაგონივრულად მიიჩნიო პირდაპირ იმის თქმა, რომ მასზე შეყვარებული ხარ და არჩიო, რაღაცით მიახვედრო, რომ გსიამოვნებს მისი მხრიდან ყურადღების გამოვლენა. სათანადო სიტუაციაში ყოველგვარი დაძაბულობის გარეშე შეგიძლია უთხრა, რომ მისი უკეთ გაცნობა გინდა. არ ინერვიულო, თუ ცოტა ულაზათოდ გამოგივა. ნათქვამს მიღმა დარჩენილ გულწრფელ გრძნობებს უფრო მეტის თქმა შეუძლია, ვიდრე თვითონ სიტყვებს. ისიც გახსოვდეს, ამით დაქორწინებას კი არ სთავაზობ, უბრალოდ, უკეთ გაცნობას. შენი წინადადება შეიძლება მოულოდნელი აღმოჩნდეს მისთვის, ამიტომ ადროვე, კარგად გაანალიზოს შენი ნათქვამი.

თუ კარგად გაიცანი ახალგაზრდა მამაკაცი და დაინახე, რომ კეთილი და ყურადღებიანია, ნუ შეგეშინდება, რომ გრძნობების გამხელისას დაგამცირებს. მაგრამ, როგორ უნდა მოიქცე, თუ თავაზიანად მოპყრობის მიუხედავად მტკიცე უარს გეტყვის. როგორ უნდა მოიქცეს ასეთ სიტუაციაში ახალგაზრდა მამაკაცი? ამ კითხვებს ერთ-ერთ მომდევნო სტატიაში განვიხილავთ.

[სქოლიოები]

[სურათი 22 გვერდზე]

მის ქცევებზე დაკვირვებამ შეიძლება გადაწყვეტილება შეგაცვლევინოს.

[სურათი 22 გვერდზე]

თუ ვიღაც მოგწონს, ესაუბრე უფროსი ასაკის ადამიანებს, რომლებსაც ენდობი და რომლებიც მას კარგად იცნობენ.