ქაცვი მრავალმხრივ სასარგებლო მცენარე

◼ ადრეულ შემოდგომაზე თუ რუსეთს ეწვევით და ქალაქგარეთ გაისეირნებთ, თქვენს თვალს არ გამოეპარება ნარინჯისფერი წვრილი ნაყოფით დახუნძლული ქაცვის პატარა ხეები. ნაცვლად იმისა, რომ ნაყოფი მტევნად გამოიღოს, კენკრა მთლიან ტოტზე ასხია და მას მიმზიდველ ფერს აძლევს.

ქაცვი ეკლიანი მცენარეა, ამიტომ ნაყოფის შეგროვებისას ფრთხილად უნდა იყოთ. ისინი სათითაოდ უნდა მოკრიფოთ და შეეცადოთ, არ დაგეჭყლიტოთ. მას ცივი კლიმატი უყვარს, ამიტომ კარგად ხარობს ევროპის ჩრდილო-დასავლეთ მთიანეთსა და ალტაის მთებში (ცენტრალური აზია), ასევე დასავლეთ და ჩრდილოეთ ჩინეთსა და ჰიმალაის ჩრდილოეთ ნაწილში. საუკუნეების მანძილზე ქაცვი ძალიან ფასობდა ჩინეთში, რუსეთსა და ტიბეტში.

ქაცვი მოხსენიებულია ძველი ტიბეტური მედიცინის ჩანაწერებსა და ძველ ბერძნულ ტექსტებში. მისი ბერძნული სახელწოდება „ჰიპოფაე“ ნიშნავს „მბზინავ ცხენს“. ძველი ბერძნები ცხენებს ქაცვის ნაყოფს ან ფოთლებს უსვამდნენ, რომ დოღის დროს მათ ბეწვს ებზინა.

მეოცე საუკუნის დასაწყისში რუსმა იმიგრანტებმა ქაცვი ციმბირიდან შეიტანეს ჩრდილოეთ ამერიკაში, რათა ის კომერციული მიზნით მოეშენებინათ კანადასა და შეერთებულ შტატებში. დღეს ბევრ ქვეყანაში მოჰყავთ ქაცვი საკვები პროდუქტებისა და სამედიცინო საშუალებებისთვის.

სხვა სასარგებლო ნივთიერებებთან ერთად ქაცვი შეიცავს C და E ვიტამინებს, ფოლიუმმჟავას, კაროტინოიდებს, ცხიმოვან მჟავებსა და ფლავონოიდებს. ახლახანს ჩატარებული სამედიცინო კვლევების საფუძველზე მედიკოსები აცხადებენ, რომ ქაცვი სასარგებლოა კიბოს, გულ-სისხლძარღვთა დაავადების, კანის სხივური დაზიანების, ღვიძლისა და კუჭის წყლულოვანი დაავადებების სამკურნალოდ. ქაცვისგან აგრეთვე ამზადებენ მჟავე, არომატულ სასმელებს.

ქაცვის შავი, პატარა თესლი განსაკუთრებული თვისებებით გამოირჩევა. ქაცვის თესლში უფრო მეტი მასაზრდოებელი ნივთიერებაა, ვიდრე თავად ნაყოფში. გამოკვლევებმა ცხადყო, რომ ქაცვის ზეთი აძლიერებს იმუნურ სისტემას. გარდა ამისა, ქაცვის ზეთს იყენებენ კოსმეტიკაში, რადგან ზეთში შემავალი ნივთიერებები კანს ახალგაზრდულ იერს უნარჩუნებს.

თუ ოდესმე ეწვევით რუსეთს, თქვენს ყურადღებას ალბათ მიიპყრობს ქაცვის ნარინჯისფერი ნაყოფი. როგორც უკვე აღვნიშნეთ, ქაცვი არა მხოლოდ მიმზიდველი მცენარეა, არამედ მრავალი სასარგებლო თვისებით გამოირჩევა. ეს მცენარე ერთ-ერთია იეჰოვას იმ მრავალი ქმნილებიდან, რომელიც მის სიბრძნესა და სიკეთეზე მეტყველებს!