წიგნი, რომელსაც შეგიძლიათ ენდოთ — ნაწილი 7

ჩვენ ვცხოვრობთ კაცობრიობის ისტორიის განსაკუთრებულ და მნიშვნელოვან მონაკვეთში. ეს არის ის დრო, როცა მსოფლიო არენაზე გამოდის მეშვიდე იმპერია. წინამორბედი ექვსი მსოფლიო იმპერიისგან განსხვავებით, ამ იმპერიის შესახებ მხოლოდ წინასწარმეტყველება არსებობდა. შვიდ მსოფლიო იმპერიაზე, იგივე „მეფეებზე“ ბიბლია წინასწარმეტყველებს: „ხუთი დაეცა, ერთი არის, სხვა ჯერ კიდევ არ მოსულა, მაგრამ როცა მოვა, ცოტა ხანს დარჩება“a (გამოცხადება 17:10).

1 900-ზე მეტი წლის წინათ, როცა ეს სიტყვები დაიწერა, შვიდი მეფიდან ხუთი მეფე ანუ მსოფლიო იმპერიები — ეგვიპტე, ასურეთი, ბაბილონი, მიდია-სპარსეთი და საბერძნეთი — უკვე აღარ არსებობდა. იმ იმპერიაში, რომელზეც წერია, რომ „ერთი არის“, რომი იგულისხმებოდა. მაგრამ რომის იმპერია სამუდამოდ არ იარსებებდა. კიდევ ერთი იმპერია უნდა გამოჩენილიყო, რომლის შესახებაც წინასწარმეტყველება ამბობს: „ჯერ კიდევ არ მოსულა“. ეს ბიბლიური წინასწარმეტყველება მართლაც შესრულდა და მსოფლიო ასპარეზზე მეშვიდე მეფე გამოჩნდა. რომელ იმპერიაზეა საუბარი? უსასრულოდ იბატონებს ის მსოფლიოზე? თუ ეს ასე არ იქნება, როგორ დატოვებს ის მსოფლიო სცენას? საბედნიეროდ, ბიბლია არ გვტოვებს უპასუხოდ.

უტყუარი წინასწარმეტყველება

მეშვიდე იმპერიის ჩამოყალიბება მაშინ დაიწყო, როცა რომის იმპერიის ჩრდილო-დასავლეთით ინგლისი ძალას იკრებდა. XVIII საუკუნის 60-იან წლებში ეს კუნძულოვანი სახელმწიფო ბრიტანეთის ძლევამოსილ იმპერიად გადაიქცა. იგი სიმდიდრესა და ძალაუფლებას იხვეჭდა და უკვე XIX საუკუნეში უმდიდრესი და უძლიერესი ქვეყნის სახელი მოიპოვა. ერთი ნაშრომის თანახმად, „ბრიტანეთის იმპერიაზე დიდი იმპერია მსოფლიოში არ არსებობდა. ეს იმპერია 28 მილიონ კვადრატულ კილომეტრზე იყო გადაჭიმული და მისი მოსახლეობის რიცხვი 372 მილიონს აღწევდა“.

პირველმა მსოფლიო ომმა (1914—1918 წლები) ბიძგი მისცა ბრიტანეთს, მის ყოფილ კოლონიასთან, კერძოდ, შეერთებულ შტატებთან განსაკურთებული კავშირი დაემყარებინა. შედეგად ბრიტანეთის იმპერიამ ასპარეზი დაუთმო ინგლის-ამერიკის მსოფლიო იმპერიას, ანუ ერთ, ინგლისურ ენაზე მოლაპარაკე ორ მოკავშირე ქვეყანას, რომელიც დღემდე არსებობს (იხილეთ ჩარჩო „განსაკუთრებული ალიანსი“).

გამოცხადების 17:10-ში ჩაწერილ წინასწარმეტყველებას მეტ ნათელს ჰფენს წიგნ „დანიელში“ ჩაწერილი წინასწარმეტყველება. დანიელი წერდა „უზარმაზარ ქანდაკებაზე“, რომელიც ღმერთმა ბაბილონის მეფე ნაბუქოდონოსორს ხილვაში ანახა (დანიელი 2:28, 31—43). დანიელმა მეფეს გაუმჟღავნა, რომ ქანდაკების სხეულის ნაწილები განასახიერებდა ერთმანეთის მონაცვლეობით არსებულ იმპერიებს, რომელთა შორის იმ დროისთვის პირველი ბაბილონის იმპერია იყო (ეგვიპტისა და ასურეთის იმპერიები უკვე აღარ არსებობდა). აი, რას ამტკიცებს ისტორია:

ოქროს თავი განასახიერებდა ბაბილონის იმპერიას.

ვერცხლის მკერდითა და მკლავებით წარმოდგენილი იყო მიდია-სპარსეთი.

სპილენძის მუცლითა და ბარძაყებით ძველი საბერძნეთი გვევლინებოდა.

რკინის ფეხები განასახიერებდა რომის იმპერიას.

ნაწილობრივ რკინისა და ნაწილობრივ თიხის ტერფები ასიმბოლოებს დღეს, ინგლის-ამერიკის მსოფლიო იმპერიის დროს არსებულ პოლიტიკურად და სოციალურად დაქსაქსულ მსოფლიოს.

გამოცხადების 17:10-ის თანახმად, მეშვიდე მსოფლიო იმპერია ცოტა ხანს იარსებებს. მაინც რამდენ ხანს? როგორ მოეღება ბოლო მის არსებობას და რა მოხდება ამის შემდეგ? დანიელი ნათელს ჰფენს ამ საკითხებს.

უტყუარი დანაპირები

ზემოხსენებული ქანდაკების აღწერის შემდეგ დანიელმა დაწერა: ‘ქვა ხელის შეუხებლად მოწყდა ადგილიდან, ქანდაკებას დაეცა რკინისა და თიხის ტერფებზე და დაამტვრია’ (დანიელი 2:34). რას მოასწავებდა ეს?

დანიელი განაგრძობს: „იმ [უკანასკნელი] მეფეების დროს ზეციერი ღმერთი დაამყარებს სამეფოს, რომელიც არასოდეს დაიქცევა. ეს სამეფო სხვა ხალხს არ გადაეცემა. ის დააქცევს და ბოლოს მოუღებს ყველა ამ [მიწიერ] სამეფოს, თავად კი მარადიულად იდგება“b (დანიელი 2:44, 45). ყურადღება მიაქციეთ მუხლში აღწერილ მნიშვნელოვან მოვლენებს:

1. გამარჯვებული სამეფო, რომელიც დიდი ქვით არის წარმოდგენილი, ღმერთმა დაამყარა და არა ადამიანმა. ამიტომ, მას ღვთის სამეფო ეწოდება.

2. ღვთის სამეფო დააქცევს ყველა ადამიანთა სამეფოს, მათ შორის მეშვიდე მსოფლიო იმპერიას. ადამიანთა მმართველობები უარყოფენ ღვთის ძალაუფლებას და საბოლოოდ, ღვთის დიდ ომში სიმბოლურ ადგილას, რომელსაც „ჰარ-მაგედონი“, ანუ არმაგედონი ჰქვია, ღვთის წინააღმდეგ გამოვლენ. ბიბლიაში გასაგებად წერია, რომ ამ ომში „მთელი მსოფლიოს მეფეები“ არიან ჩაბმულნი (გამოცხადება 16:13, 14, 16).

3. ადამიანთა წარმავალი მმართველებისგან განსხვავებით, რომელშიც შედის შვიდი მსოფლიო იმპერია, ღვთის სამეფო „არასოდეს დაიქცევა“. ის მთელ დედამიწაზე იმმართველებს (დანიელი 2:35, 44).

დაბადების 3:15-ში მოხსენიებული წინასწარმეტყველება, რომელიც ამ სტატიათა სერიის პირველ ნაწილში ირჩეოდა, დრამატული სახით შესრულდება მაშინ, როცა ღმერთი საბოლოოდ გაანადგურებს ღვთის მოწინააღმდეგეებს. ქალის შთამომავალი, იესო ქრისტე, ბოლოს მოუღებს სიმბოლურ გველს, ანუ სატანას და მის შთამომავლობას (გალატელები 3:16). სატანის შთამომავლობაში შედის ყველა ის ადამიანი, ვინც სატანის ბოროტი გზებით დადის და მხარს უჭერს ადამიანთა მმართველობებს, რომლებიც უარყოფენ ღვთისა და ქრისტეს მმართველობას (ფსალმუნი 2:7—12).

ეს ბადებს მნიშვნელოვან კითხვას: როდის მოხდება საბოლოო განადგურება? როდის დაეცემა „ქვა“, ღვთის სამეფო, მსოფლიოს და როდის წაშლის ადამიანთა მმართველობის ყოველგვარ კვალს? ბიბლია ამ კითხვებს ნათელს ჰფენს ბოლო დღეებისთვის დამახასიათებელი „ნიშნის“ მეშვეობით (მათე 24:3).

„ნიშნის“ ამოცნობა

ბოლო დღეების ნიშანში შედის გლობალური ომები, „დიდი მიწისძვრები“, „ეპიდემიები“, და „საკვების უკმარისობა“ (ლუკა 21:10, 11; მათე 24:7, 8; მარკოზი 13:8). გარდა ამისა, „უკანასკნელი დღეებისთვის“ დამახასიათებელია საზოგადოების სერიოზული მორალური და სულიერი დეგრადაცია (2 ტიმოთე 3:1—5). სრულდება „ეს ყველაფერი“? (მათე 24:8). დიახ, თანაც იმ ზომით, რომ ხალხი მომავალს შიშით უყურებს. გაზეთ „გლოუბ ენდ მეილში“ ეწერა: „პატივდებული საზოგადო მოღვაწეთა უმეტესობა ადამიანთა მოსალოდნელი განადგურების შესახებ შემაშფოთებელ პროგნოზს აკეთებს“.

ეს საზოგადო მოღვაწეები ერთ რამეში ცდებიან — კაცობრიობა არ განადგურდება. ამის გარანტიას თავად ღვთის სამეფო იძლევა, რომელიც ადამიანთა საქმეებში ჩაერევა. როცა იესომ ბოლო დღეებისთვის დამახასიათებელი ნიშანი მოიხსენია, თქვა: „ამ სასიხარულო ცნობას სამეფოს შესახებ იქადაგებენ მთელ მსოფლიოში ყველა ხალხისთვის დასამოწმებლად და მაშინ მოვა აღსასრული“ (მათე 24:14). როგორ სრულდება ეს წინასწარმეტყველება?

230-ზე მეტ ქვეყანაში იეჰოვას მოწმეები ღვთის სამეფოს შესახებ ქადაგებენ. მათი ძირითადი ჟურნალის სახელწოდებაა „საგუშაგო კოშკი იუწყება იეჰოვას სამეფოს შესახებ“. როგორც ცნობილია, იეჰოვა ღვთის პირადი სახელია (ფსალმუნი 83:18). იეჰოვას მოწმეების ბიბლიის საგანმანათლებლო პროგრამა უამრავ ადამიანსა და ოჯახს ეხმარება, შეიცვალონ ცხოვრების წესი და ღვთის ზნეობრივი ნორმების დაცვით მშვიდობისმყოფელი ადამიანები გახდნენ (1 კორინთელები 6:9—11). შედეგად, მილიონობით ადამიანი მთელ მსოფლიოში დარწმუნებულია, რომ ღმერთი დაიცავს მათ, როდესაც კაცობრიობის საქმეებში ჩაერევა.

ისინი საკუთარი თვალით დაინახავენ ქრისტეს ლოცვის შესრულებას, რომელსაც „უფლის ლოცვასაც“ უწოდებენ. ამ ლოცვაში ასეთ სიტყვებს ვკითხულობთ: „მოვიდეს შენი სამეფო და იყოს შენი ნება როგორც ზეცაში, ისე დედამიწაზე“ (მათე 6:10). გიფიქრიათ, როგორი ცხოვრება იქნება დედამიწაზე, როცა ყველას ეყვარება ღმერთი და დაემორჩილება მას? ქვემოთ მოყვანილი ბიბლიური მუხლებიდან გავიგებთ, თუ რატომ არის ეს ცნობა სასიხარულო.

როცა ღვთის ნება შესრულდება დედამიწაზე . . .

• იქნება ნამდვილი მშვიდობა, რაც მხოლოდ ომების შეწყვეტას არ გულისხმობს. „იეჰოვა . . . წყვეტს ომებს დედამიწის კიდეებამდე, მშვილდს ლეწავს და შუბს ამტვრევს, ცეცხლში ბუგავს ეტლებს“ (ფსალმუნი 46:8, 9). „თვინიერნი დაიმკვიდრებენ დედამიწას და გაიხარებენ დიდი მშვიდობით“ (ფსალმუნი 37:11).

• ყველას უხვად ექნება საკვები. „უხვად იქნება მარცვლეული დედამიწაზე, მთის მწვერვალებზეც უხვად იქნება“ (ფსალმუნი 72:16).

• ყველას სრულყოფილი ჯანმრთელობა ექნება. „არც ერთი მცხოვრები არ იტყვის, ავად ვარო“ (ესაია 33:24).

• ყველას მყუდრო საცხოვრებელი ექნება. „ააშენებენ სახლებს და იცხოვრებენ მათში, გააშენებენ ვენახებს და შეჭამენ მათ ნაყოფს. არ ააშენებენ სხვის საცხოვრებლად, არ დარგავენ სხვის შესაჭმელად“ (ესაია 65:21, 22).

• ყველანაირ ტანჯვას ბოლო მოეღება. „ღვთის კარავი ადამიანებთანაა . . . მოსწმენდს მათ ყოველ ცრემლს თვალებიდან და აღარ იქნება სიკვდილი, აღარც გლოვა, გოდება და ტკივილი, რადგან წინანდელი ყველაფერი მოისპო“ (გამოცხადება 21:3, 4).

გხიბლავთ ეს დანაპირები? თუ ასეა, იეჰოვას მოწმეები მოგიწოდებენ, უკეთ გაეცნოთ ბიბლიას. თქვენთვის უფრო მეტად მოეფინება ნათელი იმას, თუ როგორ მოეღება ბოლო კაცის კაცზე ბატონობას. თქვენ აგრეთვე დაინახავთ, რომ ბიბლია ნამდვილად გაამართლებს თქვენს მოლოდინს, რამეთუ ღვთის მიერ არის შთაგონებული (2 ტიმოთე 3:16).c